「奶茶王」夏雨出名老馬有火（佢後生嗰陣仲火，有名叫「青筋現」），74歲高齡，開戲拍劇做製作仍然精力旺盛，頭腦清晰，敢愛敢恨。十年前舊事，夏雨一樣記得。
點會唔記得呢？當年《溏心風暴》爆出，鮑鮑（定大鮑？）夏雨奪視帝呼聲高唱入雲，但最後個獎去咗無綫親生仔陳豪手上。影大合照嗰陣，鮑鮑已經面黑黑，事後謂：「我唔明白評選規則，都預計係冇獎攞，不過都冇所謂，唔會影響我生活！你估世界末日咩！唔使戥我唔抵，向前望囉！」頒獎禮後，《溏心》舉行慶功宴，夏雨亦有出席。陳豪當時特地走到佢身邊敬酒，搭晒膊頭有講有笑。
不過夏雨終究意難平，曾稱：「呢個係無綫set定嘅遊戲，當然有佢嘅規則，我自己覺得好唔抵啫，或者其他人眼中陳豪值得拎兩個獎呢？」贈多句：「所以冇話公唔公平，遵守遊戲規則啦！你問我有冇唔開心，我當然有。」再於另一訪問稱：「無綫唔尊重我，係政策問題。佢哋捧嘅目標係後生仔，簽經理人約嘅，係因為能夠幫公司搵錢。但我簽嘅約都係TVB嘅，只不過因為抽唔佣，就將我放喺一個好冷嘅位置。」
夏雨從來不會假惺惺話你知佢公平競爭滿意賽果之類廢話，一講起「當年陳豪拎咗視帝」呢單嘢，今時今日夏雨上《1圈圈》受訪時仍然青筋現：「其實第一年（爭視帝），喺網上就好似爆炸一樣，好多人都話係黑幕。其實有好多因素嘅。」夏雨開始慢慢數喇：「首先，陳豪係所謂親生仔，另外，當時我係啱啱約滿冇續約，換咗我係無綫統帥，我都唔會頒俾你啦。其實仲有好多原因嘅。」只說了「首先」已沒有「然後」。
第二年獲獎，條氣會否順番啲呢？夏雨話：「第二年贏咗，並唔係純粹因為你演得好，亦有很多因素。呢個係累積分嚟嘅，因為上一年網民為我抱不平，我諗如果再唔頒俾我，觀眾會將你個台都拆埋！」有獎冇獎，同樣都係好多因素嘅。但問題係，既然佢都明白「親生仔有獎」呢個玩法，咁夏雨點解仲咁嬲？
節目中，夏雨爆料謂，失獎之後，佢係嬲到直接搵《溏心》監製劉家豪講：「我唔撈喇！」拒絕再演《溏心》續集。原來係因為…當年夏雨拍首輯《溏心》，花咗好多努力，先至咁有戲劇效果，就連陳豪嘅喜劇表現，都係夏雨傳授。夏雨說：「或者咁又係『唔化』嘅一種表現。第一輯大部份笑位，都係嚟自我嘅設計！最後成套劇全組人都囊括所有獎項，惟獨我『斯人獨憔悴』。」
夏雨唔係講笑，嗰年《溏心》拎咗6個大獎，包括：
最佳劇集：《溏心風暴》
最佳男主角：陳豪
最佳女主角：李司棋
我最喜愛的電視男角色：陳豪
我最喜愛的電視女角色：關菊英
最佳男配角：阮兆祥
一講起，夏雨又著咗：「陳豪本身唔係做喜劇嘅人，大部份都係我教佢點做嘅，最後佢拎咗『最受歡迎角色』又拎埋視帝，係咪需要咁呢？」
(蘋果日報)
From:微博/三個院子
From:微博/林更新
From:微博/三個院子
From:微博/陳小春
From:微博/三個院子
