【好有大將之風】仔仔IG表演魔術　連鄭秀文都畀Like！(有片睇)

2018-03-12

張繼聰係童星出身，自細就渾身表演慾，佢同謝安琪嘅大仔張瞻（James）都遺傳咗佢嘅演藝細胞，James今年雖然只係10歲，但同老竇一樣，自細就好有表演慾。James除咗於去年開咗個YouTube channel，拍片做YouTubber，上月中仲開埋個IG account，不時拍片直播同大家互動，阿爸阿媽都即刻follow佢，仲喺自己IG幫個仔宣傳添。

張瞻年紀細細，已經好有表演慾。(IG圖片)

娛樂

張繼聰仔仔張瞻IG表演魔術　表現淡定連鄭秀文都畀Like

撰文：冼燕珊

發佈日期：2018-03-12 07:00

最後更新日期：2018-03-12 12:59

張繼聰係童星出身，自細就渾身表演慾，佢同謝安琪嘅大仔張瞻（James）都遺傳咗佢嘅演藝細胞，James今年雖然只係10歲，但同老竇一樣，自細就好有表演慾。James除咗於去年開咗個YouTube channel，拍片做YouTubber，上月中仲開埋個IG account，不時拍片直播同大家互動，阿爸阿媽都即刻follow佢，仲喺自己IG幫個仔宣傳添。

張瞻年紀細細，已經好有表演慾。(IG圖片)

James日前於IG上載一條片，佢手持一條鞋帶同鐵圈表演魔術，將個鐵圈隔空套落條鞋帶度，再拎返出嚟，仲要係用全英文表演。雖然呢個係一個好Common嘅魔術表演，但見James非常淡定，成個表演Flow亦好流暢，臨尾仲有一句：「Magic!」，有晒台型。就算開頭有個小小失誤，跌咗個鐵圈，都無影響到佢，若無其事繼續表演，對於十歲人仔嚟講，呢個表現真係好專業。老竇張繼聰好捧場咁留言大讚：「Amazing!」，仲有天后鄭秀文都有畀Like。

(HK01)

【首度回應】姚子羚：絕對冇咁嘅事！

2018-03-12

無綫藝員藝姚子羚與圈外男友鄭子邦拍拖三年以來一直愛得甜蜜，屢傳婚訊，沒料三年情近日突然爆出畫上句號。

姚子羚首度公開露面回應，她心情看來不俗，似乎未有受情變影響。講到心情如何，她說：「都OK嘅，因為要講嘅都已經講咗。（鬆一口氣？）都會嘅，同埋都係我哋兩個人嘅決定，我哋關係依然好好。（三年情告終可唔可惜？）有聚有散，世界係圓嘅，永遠唔知將來會點，總之依家呢一刻，我哋覺得呢個相處方式係最舒服。（分咗手幾耐？）詳細唔講，或者可以講係用另一個方式去相處。」

分手唔關姊妹事

姚子羚與鄭子邦分手，有指是因她及其好姊妹逼婚，令關係由「婚」變「分」。問到姚子羚是否在結婚問題上與鄭子邦出現分岐？她說：「絕對唔係，呢樣嘢真係好想去澄清，唔係外間所講嘅結婚問題、逼婚問題，都要幫我身邊嘅好姊妹澄清，絕對唔係因為逼婚、結婚問題。感情係兩個人嘅事，我亦都相信我哋一路係朝住呢個目標去進發，但係可能過程裏面出現咗一啲相處上面嘅嘢，但係唔需要用唔好嘅心態去面對呢件事，我哋只係換咗第二個相處嘅方式，大家又舒服咗，將來嘅嘢亦冇人知。」

姚子羚（後排左）澄清分手一事唔關好姊妹事。（資料圖片）

前男友咁啱出走學佛

問到分開一段時間可有復合轉機？她說：「冇諗喇，專心拍嘢，仲諗咁多咩？我都係嗰句，我哋嘅關係依然係好好，依然會聯絡，好開心一對情侶去到最尾唔需要鬧交唔開心收場，依家呢個關係目前係最好嘅。（阿邦傷心去咗尼泊爾修行？）唔係，佢係佛教徒，呢個旅程計劃咗好耐，佢平時都去唔同地方學佛，對佢嚟講係最開心，只係咁啱得咁橋。（去拍嘢兩個月分散咗分手心情？）都係嘅，不過就算係香港都OK，大家關係良好，所以唔會有大影響，不過當然離開咗就可以專心做嘢。」

撐前男友好好

姚子羚除感謝一班好姊妹支持，還感謝粉絲及不認識的朋友留言打氣，她說：「希望大家畀多啲空間我哋，同埋阿邦真係好好嘅，希望大家唔好以為我逼婚不遂，佢又對我唔好，係絕對冇咁嘅事，我哋嘅關係好好，佢對我好好。」姚子羚也強調今次分手與第三者無關。問到可接受新戀情？她說：「暫時未，哈哈，冇諗，緣分交畀個天，要嚟嘅始終會嚟，未到最後永遠都唔知道，情侶、結婚都有可能分開，隨緣啦。」

（on.cc）

【預產期約5月】熊黛林興奮拍大肚相

2018-03-12

熊黛林(Lynn)前年嫁俾家族坐擁百億資產嘅富二代郭可頌，去年宣佈懷孕，預產期約5月，距離生B嘅日子越嚟越近，日前Lynn同老公郭可頌影咗一輯大肚相，佢哋影呢輯相係希望第時BB提起，佢哋可以拎出呢啲張，話俾小朋友知爸爸同媽咪係好期待BB出世。

準媽咪Lynn手腳仍然纖瘦

Lynn笑得好燦爛，雖然肚凸凸，不過手腳仍然纖瘦，果然係model底子，Lynn身穿吊帶裙時，明顯上圍升級唔少，至於爸爸郭可頌就大晒肌肉，遲啲真係單手抱B冇難度，Lynn笑言：「一直老公都好照顧我，有咗BB後老公更事事以我為先，我覺得好開心，睇得出自己真係冇嫁錯人。」

Lynn笑言懷孕期間，老公一直細心照顧佢。

作為準媽咪，Lynn現時未覺得緊張，反而好期待BB出世，同時又有啲唔捨得同BB身心相連嘅親密關係，佢解釋：「每次BB喺我肚入面郁，我都好興奮。」問到Lynn有冇睇書學習湊B同教小朋友嘅技巧，Lynn表示只係睇過少量關於育兒書籍，平日都係多向一啲有湊B經驗嘅朋友請教：「我哋都想順其自然，第時再一步步學習，我唔想俾太大壓力家人及BB。」

(Apple Daily)

【相隔23年】食咗防腐劑？李若彤重現小龍女仙氣Look！

2018-03-12

「情若真，不必相見恨晚……」一睇句歌詞，唔駛講都知係張德蘭為劇集《》唱嘅主題曲，要講《神鵰》，唔通真係講隻鵰咩，梗係講不食人間煙火、仙氣度爆燈嘅「姑姑」小龍女！陳玉蓮、李若彤、劉亦菲先後都扮演過，就連台灣女星陳妍希都有份，仲被譽為「高脂版小龍女」！要配得起小龍女最強仙氣最勁氣質，唔係陳玉蓮，就一定係李若彤！但係今round，叮！李若彤，贏呀！

1995年同古天樂合演《神鵰》嘅李若彤，事隔23年又再度「小龍女」上身，今日內地網站瘋傳一批李若彤為拍廣告扮「小龍女」嘅相，相中一身白色古裝上陣嘅佢擺出唔同甫士，最攞命係依然同當年一樣，嗰陣「小龍女」除，即係不食人間煙火嘅氣質，一滴都冇少過！大批網民狂loop，話李若彤超過廿年後再扮「小龍女」，竟然完全冇走樣，保養得宜，又話比較廿幾年前個「小龍女」look，完全傻傻分不清咁話！仲話劉亦菲同陳玉蓮同陳妍希全部可以企埋一邊，網民話：「留住了歲月，驚艷了時光，姑姑你太美了！」、「點解冇老過？」、「氣場好勁，溫柔霸氣！」

網民猛話李若彤駐顏有術冇跌Watt，覺得好神奇兼猛問咩秘方，不過都唔夠佢嘅歲數神秘，真係歲數神算都搞唔掂呀！曾經佢報稱係1973年出生，但畀人話係報細咗六年，2014年佢拍劇時被人問到歲數之謎，當時佢話一定唔止39歲，但幾多就一定唔會講喎！

布景都好認真呀！

有Feel！

曠古爍今！

搵人話畀我知佢同23年前有咩分別？

隔住個Mon都Feel到陣仙氣！

靚到癲呀！

風華絕代！

同以前有咩分別？

仙氣外洩！

食咗防腐劑？

(東方日報)

【廿四孝男友】感情升溫！帶單文柔睇戲任影唔嬲！

2018-03-12

藝人陳展鵬、單文柔（Phoebe）已是公開的一對，展鵬更經常帶同Phoebe出席好友聚會，大家都對她印象相當不俗，讚她又乖又有禮貌！日前，展鵬出席活動時，被問到女友Phoebe是否已融入家中時，展鵬即風趣謂：「佢又唔係菲傭！點會融入家中，總之大家相處舒服！」

無錯！相信佢哋真係相處得唔錯，剛剛於新加坡出席無綫「big big channel」活動的展鵬，一返港就即陪女友，男女拍拖不外乎食飯同睇戲，今晚展鵬與Phoebe去餐廳撐枱腳，之後仲去咗戲院睇戲，仲畀東網讀者影到添，佢哋仲好大方唔介意任影唔嬲！讀者都大讚佢哋nice爆！展鵬休息咗半年，好快就要開劇嘞！有時間真係要多啲陪女友同家人先得嘞！

一返香港就陪女友睇戲！

展鵬廿四孝男友呀！

(東方日報)

【有前輩成功咗】吳日言用偏方造人！？

2018-03-12

吳日言（Yan）出席寵物店開幕活動。

提到Yan造人大計，佢話：「小朋友係上天安排，隨緣啦，寵物就可以自己決定，亦可同BB共存，不過十劃未有一撇，我都希望有消息。」係咪唔夠勤力？Yan話：「都有啲眼紅身邊朋友，明明放棄咗又突然有咗。」Yan透露有睇中醫，又聽過啲偏方：「坊間太多奇怪偏方，好三級唔方便喺度講，又玩倒轉又盛，都唔知得唔得。」Grace竟然話：「我有聽過一位前輩講，一定要倒轉，佢個仔仲好靚仔，不過我唔講係邊個。」Yan笑話：「咁可能為咗生個靚仔返去都要倒轉一下，第日大家見到我個仔靚仔就知我有冇倒轉。」

（Apple Daily / singtao）

【與前妻復合？】洪朝豐：個天「噗」一聲全部攞走晒

2018-03-12

洪朝豐20年來飽受抑鬱狂躁症纏擾，要終生服藥，豈料去年先後確診舌癌和淋巴癌，將他的人生推落谷底。經切脷手術及電療後，洪朝豐總算撐過來重新振作。他日前首度開腔分享抗癌經歷，感激前妻葉桂好悉心照顧，並笑言不再為外貌有變感自卑：「你覺得我條頸好核突，唔係我問題，係你問題。」

曾是香港當紅DJ的洪朝豐，去年10月確診舌癌，兩個月後切脷保命，竟再發現患上淋巴癌，幸經多個月治療後，總算撐過來。洪朝豐在本月5日進行完最後一次電療後，重新振作的他，重過新生。

洪朝豐說：「今次落難，得到好多人幫助支持同鼓勵，包括朋友同學生，如果唔係佢哋，我冇咁容易企番起身，我希望將呢種功德透過我訪問擴散開去，令到多啲人受到幫助。」

（圖片來源：蘋果日報）

切去半條脷後，洪朝豐表示進食和講說話也得小心翼翼：「我呢邊（左）牙床都出咗事，係癌前病變，醫生要削我牙床骨，下面有幾隻牙都攞走咗。將新造嘅脷蓋住呢邊（左邊）牙床骨，蓋住之後新造嘅脷要靠我原本條脷嘅帶動先郁到，所以我講嘢發音上有兩個音發得好辛苦，包括K音同埋個G音。當我講嘢同食嘢時，啲牙會親條脷，要就住。」

（互聯網圖片）

被連串病魔打擊，可覺上天不公？洪朝豐苦笑說：「原本我社會聲譽好好，賺好多錢，但抑鬱狂躁症令到我一無所有，神憎鬼厭，我經過好長時間努力，自力更生，然後企番起身教人打坐、唱歌，但個天『噗』一聲，全部攞走晒。我而家冇咗聲我點搵食？個天究竟想點？」

不但受樣貌、謀生能力及進食問題困擾，洪朝豐表示睡覺時不停流口水令他輾轉難眠，碰上電療期間連續幾日落雨天灰灰，令他心情更灰，因而萌起跳樓輕生念頭，他說：「但回心一諗，跳樓死咗就一了百了，但唔死咁點算？累人累物係咪先？」有日，他的打坐學生到家中探訪，送上一本手抄經書，教他嘗試將美好感覺貢給佛陀，洪朝豐一試，晚上竟睡得甜，令他有所頓悟：「突然睇到我存在價值，我同自己講，電療完之後要開始番正常人生活，將美好嘅嘢貢畀人。」

洪朝豐感激一班打坐學生對他精神上和經濟上的支持。互聯網圖片

能夠重新振作，洪朝豐要特別多謝他的前妻葉桂好在飲食方面悉心照顧，讓他專心治病。洪朝豐說：「而家同前妻一齊住，真係好微妙，我同佢分開咗30年，但佢願意喺我落難時照顧我。」可有機會復合？洪朝豐笑說：「唔會，佢唔愛我，我都唔愛佢，我哋好似家人咁，咁多人對我好，令到我喺呢方面可以鬆咗一啖氣，我先至能夠有一個轉化。」

前妻葉桂好（互聯網圖片）

（Apple Daily）

【爭住集郵】靚靚同智霖同型爆甫士影相：不嬲都恨生女！

2018-03-12

藝人袁詠儀（靚靚）與老公張智霖（Chilam）日前拍拖到紅館撐王祖藍、阮兆祥及李思捷的演唱會。二人趁機與一眾好友於後台聚舊之餘，一向想生女的靚靚被「表演嘉賓」羅敏莊囡囡陳禛的魅力所吸引，拉着老公與陳禛合照留念。而陳禛面對影后級的靚靚及男神級Chilam毫不怯場，全程表現淡定，她又與一眾「靚姐姐」包括佘詩曼等鍾麗淇等大擺型爆甫士影相，氹得眾人開心不已，這位「明日之星」絕不客忽視！陳禛媽媽羅敏莊除相關照片上載到社交網站並留言﹕「一定要幫陳禛集郵！」

張智霖同袁詠儀就去咗睇「福祿壽」演唱會。

幾咁受歡迎。

陳禛擺晒Pose咁～

又淡定又可愛！

(東方日報)

【手機殼出賣咗】林峯新歡起底長腿千語着同款外套遊勻港島！

2018-03-12

現年38歲嘅林峯同24歲嘅吳千語，由傳婚訊好事近變成傳分手，有傳千語戀上前政協施子清長孫施伯雄，空穴來風之際，日前林峯父母出動，要囝囝陪去海洋公園，同行仲有一名青春少艾、貌似千語嘅長腿美女。

現年38歲嘅林峯同24歲嘅吳千語，由傳婚訊好事近變成傳分手。（資料圖片）

日前林峯父母出動，要囝囝陪去海洋公園。（資料圖片）

同行仲有一名青春少艾嘅長腿美女（資料圖片）

噚日就有讀者向《蘋果》報料，指呢位「長腿千語」正名叫張馨月。（微博圖片）

林峯雙親顯然醉翁之意，目的似乎係想搞相睇，加上父母中途離開，俾晒空間林峯上馬，林峯亦做足本份，對個位「長腿千語」照顧有加，仲幫佢一擊即中掟咗隻PeppaPig，搞到新歡不知幾開心，攞住隻公仔嘟嘴自拍。

張馨月有幾張手機自拍，同「長腿千語」日前打電話時用嘅機款、手機殼一模一樣。（合成圖片）

噚日就有讀者向《蘋果》報料，指呢位「長腿千語」正名叫張馨月，英文名Carina，喺佢自我簡介上寫住係「平面、T台、影視廣告」模特兒，佢亦參加過2010全國時尚內衣模特大賽，喺比賽中得到亞軍。張馨月去年11月又以模特兒身份出席過廣州車展，作為大陸佳麗，之前讀者任小姐話喺海洋公園聽到佢用普通話交談其實都好合理。對比番張馨月微博同ig相，除咗身材、五官同「長腿千語」有九成相似之外，喺張馨月嘅相庫中有幾張手機自拍，同「長腿千語」日前喺海洋公園打電話時用嘅機款、手機殼一模一樣。仲有一點，上個月張馨月喺赤柱，所穿嘅墨綠色外套、黑色短靴非常非常之相似。

上個月張馨月喺赤柱，所穿嘅墨綠色外套、黑色短靴非常非常之相似。（合成圖片）張馨月微博自我簡介上寫住係「平面、T台、影視廣告」模特兒。（微博圖片）

法官大人！綜合環境證供，有理由相信林峯新歡「長腿千語」都好大機會係呢位張小姐。張馨月喺ig用「愛生活，愛陽光」嚟形容自己，由今年1月起時不時喺香港出現，除咗去過赤柱，亦有到過銅鑼灣，上月底仲同港女一樣，食串炸豬大腸都要影相留言話係「HK街邊小吃」，而張馨月佢亦都有follow林峯嘅ig同微博，唔知今次行「老爺奶奶政策」嘅張馨月又會唔會成功變成林太呢？

佢亦參加過2010全國時尚內衣模特大賽，喺比賽中得到亞軍。（微博圖片）

(蘋果日報)

【楊怡投訴】羅仲謙：你唔好後悔！

2018-03-12

藝人羅仲謙到尖沙咀出席慈善活動。

羅仲謙明顯操得一身爆肌身形，西裝明顯被撐到脹卜卜，健碩身材無所遁形，他說：「我同張繼聰係同們師兄弟，大家同一個教練，依家一齊操fit，睇吓有冇機會去拍一個健身嘅旅遊特輯。（旅遊特輯係咪冇衫着？）唔會，最多特寫吓啲肌肉，希望可以同其他地方嘅藝人交流吓，唔係一定要比賽。（要操幾耐？）今次唔係要操大隻，係要操極致嘅線條，要操到好巔峰，依家完成咗一半。（同張繼聰邊個fit啲？）磅數比我強，我哋互相鼓勵，依家幾乎日日見，同見老婆一樣咁密。（戒口？）暫時唔使，仲要增磅。」