陳茵媺（Aimee）同老公陳豪2016年4月追女成功後，一直專心照顧3個小朋友。
不過Aimee戲癮難忍，最近已經復出拍戲，仲夫妻檔出席活動搵奶粉錢！
今日一朝早，Aimee就喺Instagram上載Set頭相，而亮點就落喺做「監工」嘅Camilla身上噃！
相中嘅Aimee背脊對住鏡頭，見到有兩位專人為佢整頭同化妝，十足女王咁！
1歲半嘅紮咗噴泉頭嘅Camilla就坐喺媽咪大髀上，一面好奇又疑惑咁𥄫實媽咪化妝，仲望到皺晒眉咁，非常可愛又搞笑！
原來Camilla朝早5點已經「當值」，Aimee留言：「朝早5點化妝整頭，我嘅小天使陪住我！」
網民都大讚好Cute，仲笑言叫Aimee小心囡囡整花個妝，因為佢哋好奇又貪玩呀！
（on.cc 東網）
曾經出過性感寫真集嘅「宅男女神」孫慧雪（雪雪）今年七月誕下B仔。
估唔到佢咁快就已經收身成功！
呢日雪雪仲自拍幾張靚相，之後喺社交網同大家Happy share。
見到雪雪啲相影到好似寫真咁靚，原來佢話換咗新電話，所以鏡頭好似有專業相機嘅感覺，搞到佢忍唔住影相影唔停：「用iphone X亂影！好有大機效果～應該返唔到轉頭！」
唔少網友都話孫慧雪好有少女味，好似未生過咁，仲大讚佢索到爆！
（on.cc 東網）
鄭希怡（Yumiko）、周汶錡同Cara G.等，今日喺尖沙嘴出席「SHARE THE JOY OF GIVING」慈善親子時裝騷，Cara G.、曾昭亮同黃心妙都帶埋仔女一齊行騷，不過Yumiko反而冇帶阿囡梁浸浸，反而拖住陸永兩個囡囡行。
陸永嘅太太Rainah喺現場為兩個女打點，但係就唔多願意上鏡，問Yumiko點解唔帶梁浸浸出嚟行騷？Yumiko話：「唔敢呀，佢呢個年紀（兩歲）係會亂咁走嘅階段，未係可以做到指令，行騷暫時唔得。」
提到帶陸永兩個囡囡Hannah同Simsim行騷，Yumiko大讚佢哋好乖好靚，仲有follow佢哋嘅相。行騷嗰陣，Hannah顧住影相唔願行，Yumiko就笑話好得意：「陸永噚日都有打畀我，已經同兩個女講，到時會同個好高嘅姐姐行騷。我就同返佢講，因為冇農夫演唱會飛，我要報仇。」
Yumiko就話梁浸浸o依家好多問題發問，又話唔想佢咁快大，好珍惜呢個時刻，佢話：「佢依家每次出街都自己襯鞋，我都有keep住佢一對鞋，佢每樣嘢都希望可以留低一啲做記念，我嫲嫲喺我細個就用文字同相片，記錄咗我嘅成長過程，有6本日記，好珍貴。所以我由懷孕開始，都記錄低等佢大個時睇返，當係我畀佢嘅一份禮物。」
另外，周汶錡話兩歲多嘅大仔Jacques鍾意跑嚟跑去難以控制，所以冇帶佢到場行騷，至於會唔會拍吓廣告？Kathy話：「要問老公，賺錢嘅都唔想。一家四口更加冇可能，為慈善都有機會嘅，但暫時都唔會住。」
陳浚霆今日喺筲箕灣出席Toyzone開幕禮，佢透露最鍾意玩具車，爸爸同哥哥就鍾意限量版figure，玩具多到連屋企都擺唔晒，要放喺個倉。
陳浚霆表示今日同劉丹慶祝生日，點知就擺咗烏龍：「今日齊人喺九龍灣一間車行拍外景，阿蟹（呂慧儀）之前打晒俾所有人，叫大家同丹爺慶祝，雖然我已經離開劇組，但都有叫埋我去，我負責買蛋糕，不過我印象中丹爺係1月生日。」噚晚唔問丹爺？佢笑住話：「好（火羅）架嘛，不過唔緊要啦，心意啫！後來阿蟹同阿滕（滕麗名）都有問丹爺，先知丹爺真係1月，原來佢嘅身份證係報錯咗11月，所以TVB年年叫丹爺去11月星辰，佢都冇去過。」
陳浚霆話明年1月會再同丹爺慶祝，仲有佢同阿滕都係1月壽星，問佢有咩生日願望？佢話：「希望喺大陸發展順利，明年年初已經有兩部網劇落實，好興奮！」
(蘋果日報)
名模熊黛林（Lynn）早前宣布造人成功，消息一出後，唔少網友都祝賀佢。雖然Lynn懷有身孕，不過仍不時同網友分享生活點滴。
今日，佢就喺社交網同大家分享去咗哈爾濱嘅相，仲留言表示：「從20幾度的香港來到了零下十幾度的哈爾濱，好想在結了冰的松花江邊拍，可是真的太冷了！ 」
相中見到Lynn由頭包到落腳，就知道天氣有幾凍，其中一張相仲見到着住毛毛大褸兼戴上墨鏡嘅Lynn嘟嘴賣萌，似乎心情非常靚，唔少網友都留言叮囑Lynn要小心身體，以免着涼。
另外，仲有網友大讚Lynn即使懷孕，塊面依然面尖尖，果然得天獨厚呀！
(on.cc東網)
早前產下二胎不久，昆凌就剪去長髮，及肩短髮仍然顯得少女感十足。
早前就更為拍新片將頭髮剪得更短，變成型格短髮。
最近更換上金色的短髮，她在個人社交網站上分享染髮時的照片。
見她頭髮沾滿泡沫又往後梳，突顯立體五官，似足外國的帥哥，Man爆造型令粉絲改稱她做「昆哥」!
（on.cc 東網）
日前「宇宙最強」甄子丹就同太太汪詩詩出席慈善晚宴活動，子丹就透露13歲女甄濟如（Jasmine）會為慈善獻聲，而昨日詩詩就喺Instagram上載阿女喺台上高歌嘅片段，網民都一致留言大讚「Amazing」（出色）、冇得輸呀！
Jasmine揀選咗已故國際天后雲妮侯斯頓（Whitney Houston）嘅經典歌曲《Greatest Love Of All》嚟唱，雖然詩詩就話阿女好少有機會表演，但係片中嘅Jasmine非常有台型，完全冇怯場，簡直係「高音準、中音甜、低音勁」，甚有巨星風範。
啲留言全部都係好評，讚Jasmine又靚又叻，話佢係「Super star」，而詩詩就留言話為阿女感到驕傲，子丹都話：「I’m a proud dad!」果然基因強大呀！
(on.cc東網)
陳小春因為同囝囝Jasper參加大陸真人騷《爸爸去哪兒5》之後，Jasper即刻成為咗小暖男，融化咗好多觀眾嘅心，連帶對陳小春嘅印象都大為改觀！
查實小春一直都係得個樣，尤其喺老婆應采兒面前，更加係只得一個笑樣！
話晒o依家個節目又差唔多到尾聲，「愛妻號」嘅小春，梗係要陪老婆出去玩吓喇！
今日應采兒喺微博貼咗啲火辣辣嘅泳衣相，張張都晒長腿，有啲仲係同小春玩騎膊馬添！
不過應采兒似乎都冇忘記個仔，搞笑留言話：「Jasper心想：爸爸媽媽去哪兒了？」
唔知佢哋又會唔會趁住呢個機會，努力造人，生個囡囡湊做一個好字呢？
(蘋果日報)
廚餘和剩食等問題近年愈來愈多港人關注，上任特首梁振英的夫人唐青儀，也曾創辦過相關慈善組織。
有內地傳媒報道，山東省的章丘市餐廚垃圾處理中心，每天約會將全市收集到的14、5噸各式回收到的剩菜剩飯，送入一個「飼養車間」，內裏「飼養」着美洲蟑螂，牠們每天可以吃掉比自己體重還多5%的廚餘剩食。整個飼養車間，最多可容納3億隻美洲蟑螂。
更重要的是，據中心展示的農業部檢測中心報告，這些負責吃廚餘剩食的美洲蟑螂，未檢驗出有沙門氏菌及大腸桿菌等有害物質，卻有高達71.2%的粗蛋白質，蛋白質含量比外國進口的秘魯魚粉等還高。故此，當這些美洲蟑螂死了之後，就都被磨成飼料來養雞。
（明報）
美國一名餵哺母乳的媽媽某天發現自己的母乳出現異常，顏色由平常的白色轉為黃色，詢問兒科醫生後，才發現原來當時正值其7個月大的寶寶發燒，因此媽媽體內自動在母乳內添加脂肪及抗體，幫助寶寶抗病。
媽媽蔡斯（Ashlee Chase）其後於Facebook上表示，平日有不少身邊的人指她的嬰兒已有7個月大，質疑她繼續餵母乳的必要性，但是次事件終證明背後好處。有網民指：「媽媽的身體為嬰兒作出的改變往往令人嘆為觀止。」
亦有媽媽向蔡斯表示支持：「你是母親，自然會知道甚麼是對你的嬰兒最好的。」有專家指，蔡斯的母乳變黃，可能含是富含免疫球蛋白的初乳。獲認可的哺乳顧問奧康納（Leigh Anne O’Connor）受訪時解釋：「人類目前對母乳複雜的元素僅有初步認識，這肯定是（寶寶）最好的藥。」
(Apple Daily)
