纖維肌痛症女患者腹部、腰部都有壓痛點，可以計劃生育嗎？懷孕和分娩過程會否受痛症影響？麻醉科專科醫生李而安表示，此症不會影響女性懷孕，只要及早與醫生商量分娩方法，可如常生兒育女，毋須過分擔心。
李而安說，若計劃懷孕，患者首要與醫生商量應否繼續服藥。曾有三十歲女患者懷首胎，因應她的病情受控，選擇懷孕期間不服藥物控制痛症。女患者寧願辭工，持續做運動，安心養胎。結果懷孕期間並無因痛症求醫，最終自然分娩誕下健康寶寶。另有女患者選擇無痛分娩，同樣成功誕B。
不過，李認為，纖維肌痛症患者有機會懷孕期間較健康正常的準媽媽辛苦，因為隨時要面對痛症發作，但整體而言，此症對生育影響不大。
(東方日報)
吳鎮宇出席活動，他表示近期多了時間留港拍港產片，又透露年底聖誕期間都要開工，未知有否時間陪兒子Feynman（費曼），但他相信兒子曾作幕前演出會所以體諒他。
「我喺屋企嘅時候會陪佢，咁佢功課都忙，佢跟我去過片場，佢明白我嘅，知道我喺片場個樣唔同晒，好嚴肅好大壓力。」
問到想唔想仔仔再拍嘢，吳鎮宇：「係冇人搵佢呀！都要放假先得，唔係過我嗰關，係我老婆嗰關。」
問鎮宇會否叫兒子幫他按摩，鎮宇即搞笑大爆跟兒子相處的趣事，他說：「佢專蝦我㗎！知道一撒嬌我就心軟，食晒我啲嘢！朋友送盒嘢嚟，佢食淨一粒畀我！」
講到仔仔發育時期，吳鎮宇：「食咁多，夠兩個佢發育，我話佢就嚟冇頸，可以做英雄片嗰個雪人，佢又成日坐喺度縮埋一舊，冇咗條頸，要搵骨醫掹番佢條頸出嚟！但佢又話自己識養生，咳嘅時候唔係唔飲汽水，係唔飲凍嘅汽水。」
(on.cc 東網)
女星黃依汶（Emme）出席其品牌專櫃開幕，好友何嘉莉（Lilian）特意到場支持。9月尾才誕下囡囡的Lilian坐月後出山，身形fit爆，她表示：「為Emme而出山，諗住收工（封肚），仲補緊身，冇餵人奶，未回復最好，有雙下巴。」Emme笑言：「就係話畀人知你生完一個月都咁瘦，請你做兩次瘦面啦。」二人更互笠高帽，Emme大讚Lilian有一女一仔最幸福。Lilian則讚Emme家庭事業兩得意。
問到Lilian現在是否最幸福的時候？她表示：「係呀，辛苦嘅開始，做媽媽唔易，照顧大小，都幾難。」她稱五歲兒子沒有呷醋，每朝都要攬妹妹，想抱她。Lilian和Emme也認同兩個夠晒數。問到Emme是否會追女？她表示：「老公（陳國坤）努力中，我冇努力，陳真仲細，等佢返學先，我要做嘢，生咗佢會好慘，冇時間理佢，佢依家1歲8個月，啲人成日問佢有冇3歲，佢生得牛精同成熟。」問到二人會否對親家？二人互讚自己小朋友，Emme讚陳真好靚仔，Lilian就話囡囡肥肥哋，好生養，Emme笑言可以對住親家先。
另外，Emme表示今次品牌開專櫃感到很開心，希望可以去到更遠地方再開。她透露剛與家人去完旅行又要工作，要平衡工作及家庭，又覺得有些經歷相似的朋友很開心。問到Emme為何改名，她說風水師話溫柔啲，平衡家庭及事業。
(東方日報)
吳若希（Jinny）上月中與何兆鴻（Alex）終於簽字結婚，正式成為何太﹗
雖然2人未打算舉行盛大婚宴，但婚紗相又豈能不影。
Jinny與Alex原來飛了去法國巴黎影結婚相。
Jinny日前在社交平台擺放了一張她背向鏡頭，望住Alex在巴黎鐵塔下擺住Chok甫士的照片。
Jinny留言︰「我這個背影，完全表達到我當時想說的話～」
有粉絲嘗試猜想Jinny想說的話，留言︰「Jinny︰做咩啫你？」Jinny就表示佢估中啦，回應︰「Yes!!!! U got me!!!」
(明報即時娛樂)
於六、七十年代經極一時的大導演楚原今日84歲生日，曾執導逾百部電影的電影一代宗師，賣座電影包括《七十二家房客》和《玉女添丁》，於九十年代演出無綫處境劇《卡拉屋企》飾演「白頭佬」一角，角色深入民心。
楚原叔如往年一樣假尖沙咀王晶有份投資的食店設火鍋壽宴，筵開六席，元華、文雪兒、黎海珊和錢小豪等到場祝賀，84歲高齡的楚原叔鬚鬢皆白，但精神非常之好，穿上灰色上衣，跟朋友談天說地時聲如洪鐘，非常健談，而太太南紅則在旁默默陪伴，一如往常小鳥依人，夫妻甚有默契，晚宴大概十時左右結束，方便楚原早一點回家休息。
(83歲生日)
(82歲生日)
(東方日報)
鍾麗淇離開無綫轉戰瑜伽界，至今已執教長達12年！當初獲伯樂黃佩霞游說接觸高溫瑜伽，由一張白紙蛻變成專業導師，不諳廣東話的她鬧過不少笑話，本想要求學生「唔好頂住個肺」，卻說成「頂……個肺」。她表示無悔轉行，因瑜伽已融入生活，即使獲邀幕前演出也會Say no！
初學面色發紫
鍾麗淇（Margaret）於無綫默默耕耘9年，演出過17部作品，2005年卻毅然抽身轉投瑜伽界！一切只因機緣巧合，她說：「2002年去澳洲拍旅遊特輯，認識咗呢間瑜伽創辦人之一嘅黃佩霞，當時佢開始做高溫瑜伽，叫我試堂玩吓，第一堂好辛苦，90分鐘喺班房熱到塊面變紫色，要衝出房！」及後黃佩霞鼓勵她堅持，由起初給予折頭，到後來索性贊助她。
Margaret初學時筋骨未夠柔軟，很多動作也未能完成，為免被同學們望到，她每次也選擇最後排位置，過了一段時間才接受自己的不完美，她說：「倒不如努力啲，後來我跟咗其中一位老師，每日四點上堂，嗰時去非洲拍劇會拎DVD嚟睇住做，對瑜伽好有熱情。」
教到失控爆喊
Margaret成為正式導師前，接受了連串訓練，於外地完成五星期課程返港後，卻向黃佩霞推卻執教：「課程中教好多瑜伽歷史同道理，我先發現原來乜都唔識，所以唔想教，但佢對我有信心，叫我做住助教先，點知冇耐就掟我出海做導師，記得教第一堂時，入班房唔知點開聲講嘢，好緊張，到落堂先鬆一口氣。」如是者展開一星期教18堂瑜伽生涯，但教了兩個月後，有一日Margaret於導師房失控爆喊，全因課堂中的一個動作，大部分學生未能擺出正確姿勢，她將責任怪在自己身上，認為教得不好所致，在旁的導師聞言即大呼做得好：「佢話有時一堂成90個學生，冇可能每個都滿足到，只要佢哋安全就得，唔好對自己要求太高。」
從藝員轉變為瑜伽導師，Margaret直言感覺得意，但試過有學生問她參演的劇集，令她有點不開心：「惟有當係轉捩點，唔理得咁多，總之對自己有信心，打好個底就唔怕。但都有爆笑位，成日講錯廣東話，將膨脹個肋骨，講做排骨；想叫學生唔好頂住個肺，但講咗頂……個肺。」
變心惟有二揀一
談到當初為何捨得放棄水銀燈下生活，Margaret自嘆技不如人，未能一心二用，倒不如集中做好一件事，於二選一情況下，原來心中早已有答案：「個心變咗，好似拍劇收工就拎住瑜伽嘅碟去睇，咁既然有機會轉行點解唔試吓，嗰段時間可以負擔到，所以呢步唔難踏出去，因為冇嘢放唔低，係心態問題，已忘記自己係藝人。」放下了演員身份，令Margaret感到前所未有的舒服，加上瑜伽學校大多數導師是外國人，不知她曾當演員，連學校的外籍老闆由黃佩霞口中獲悉她曾於無綫工作，也誤會她是新聞主播，Margaret對此高興不已：「100%做自己，唔驚講錯嘢，又可以講英文交流瑜伽！」
一教便是12年，現時瑜伽對Margaret而言是生活的一部分，在家也會教兩個女兒做瑜伽，她表示已不再留戀娛樂圈：「好過我嘅人大有人在，接咗劇要專心，我寧願選擇唔接，除非有意義啦！我覺得冇揀錯瑜伽呢條路。」
鍾麗淇 Profile
英文名：Margaret
出生日期：1976年11月3日
入行經過：1995年參加多倫多華裔小姐可惜落選，及後報讀無綫藝員訓練班，畢業後加入無綫大家庭，演出過的劇集作品包括《刑事偵緝檔案III》、《衝上雲霄》、《鑑證實錄I、II》及《天涯俠醫》，最後一套作品為《心慌．心郁．逐個捉》。她由2005年起擔任瑜伽導師，至今已教了12年。
(東方日報)
吳尊帶着一對兒女參加內地節目《爸爸去哪兒5》好爸爸形象大受觀眾歡迎。
最新一集節目中極少在鏡頭前露面的吳尊老婆林麗瑩也在節目中再次現身。
雖然吳尊老婆全程戴上口罩，但在節目中大展廚藝，一家四口相當溫馨。
不少網民也大讚吳尊老婆溫柔是位好媽媽，亦尊重她身為圈外人不太希望上鏡的意願。
網民認為她肯為一家上節目已經是非常偉大。
(on.cc 東網)
被冠以「世紀賤男」嘅崔建邦，近年不斷洗底，原來除咗係事業上不斷向上爬，感情上佢亦都有所改變。今日就有報道話佢有意同林珊珊嘅細女李怡(野人)結婚。
Amigo去年初同野人撻着後，好快佢哋已經喺飛鵝山同居，今年7月，又被周刊爆料，話見到佢哋兩個喺將軍澳廣場嘅吉野家買飯，男嘅排隊俾錢，之後再到隔鄰嘅吉之島買日用品同零食。佢哋只係喺吉野家買咗一盒飯兩份食，真係好sweet，但Amigo回覆傳媒時就咁話：「唉吔！咁我窮冇錢嘛，第二時有錢咪買多啲囉！」
雖然Amigo口中話自己窮，但今日就有報道話原來佢哋已經有結婚計劃喇，真係恭喜晒！
報道入面，講到野人身邊好友透露，於單親家庭長大嘅野人，並未因為咁而害怕婚姻，相反佢仲一直好想有自己嘅家庭，好想結婚生仔，而Amigo就捉到女方呢個心態，追野人時已經表明自己已經玩夠，好快野人仲應承同Amigo同居試婚。
野人身邊好友仲話，Amigo同佢哋講今次係認真嘅，因為野人俾到佢前所未有嘅感覺，認定野人就係佢嘅唯一，所以想喺野人30歲前就同佢結婚。咦！野人今年已經28歲，咁幾係仲有年多時間俾佢哋籌備，珊珊好快就做人外母喇！
報道就話呢位「外母」明顯唔係好鍾意呢位未來女婿，就算拍拖年多，野人都唔會帶Amigo出席家庭聚會，相反家姐李澄(西瓜)就不時帶同DJ男友出席家庭聚會。
珊珊當初見女大女世界，阻止唔到野人同Amigo拍拖，只希望時間可令阿女清楚了解Amigo，但佢想唔到阿女會同Amigo會有結婚打算，精明嘅珊珊o依家唯有向佢身邊朋友下苦功，勸下野人唔好一時衝動做錯決定。
(蘋果日報)
李佳芯（Ali）出席台慶劇《誇世代》大派對，日前剛接受完手術的她精神甚佳，但為免影響傷口而顯得步步為營。
講到剛封視后便接受手術，Ali笑說：「唔關事嘅，之前已經Check到卵巢附近有個囊腫，因為工作未有空檔做手術，但係新加坡返嚟就痛，立即入院Check同做手術切除。」
「因為囊腫都有10cm大，會Check番係咩事，九成係良性。」
問到要幾耐康復，Ali表示：「兩到三星期，都OK嘅，係易攰啲，做完手術冇咗就安樂，之後都要覆診，傷口會痛，肚嗰度唔用到力，所以都去唔到馬來西亞。」
問到男友有何表示，Ali笑言：「佢都忙，自己要開劇，佢都做柴可夫載我出入。（有冇加深感情？）做柴可夫都加深？我覺得自己都幾自閉，估唔到收到好多朋友祝福，主動話煲湯我飲。」
Ali又表示12月才開劇，現時可以專心休息。
(on.cc 東網)
藝人陳豪與太太陳茵媺（Aimee）於環球貿易廣場出席智能手機發布會，Aimee身穿黑色低胸吊帶連身裙，非常搶眼。二人接受訪問時，被問到是否有很多夫婦檔活動，陳豪笑說：「係呀！愈嚟愈多！（有幾多個？）都仲傾緊，都幾多嘅，多啲嚟密啲手，辛苦啲都冇所謂。（會唔會兩公婆一齊拍廣告？）都有人問，睇吓有冇機會啦！乜嘢產品都有可能。」
小朋友難搞
至於會否一家五口一齊出鏡，陳豪說：「嘩！依家小朋友未係時侯，就算叫佢哋影相都有問題，一個望嘅時候第二個去咗玩，我都要花15至30分鐘，先成功影到一張全家一齊望鏡頭嘅相，所以廣告要遲啲，等佢哋大個啲。」
囡囡勁嬌嗲
Aimee又謂喜歡幫子女打扮，萬聖節亦有去玩。問到是否細女現時比較乖，他們說：「個個都乖，不過男仔比較好動啲，因為我哋兩個都好活躍，小朋友都唔弱。」陳豪指細女Camilla較嬌嗲，兩個仔則較活躍：「細女攬到我好實，好有愛嘅感覺，講唔到出嚟。」而Aimee指大仔都嗲，陳豪即說：「似足媽咪。」
問到是否不再介意性感出席活動，Aimee：「都唔係好性感，係健康嘅性感。好開心可以出嚟着靚衫。」陳豪得戚笑說：「回復狀態係要騷吓。（管佢衣着？）靚行先，唔好特別賣弄性感。」
(蘋果日報 / 東方日報)
