馬來西亞女星廖子妤（Fish）來港發展及居住滿了六年，日內就返家鄉與家人過年，她說：「馬來西亞同香港差唔多，去食團年飯、同親友拜年，馬來西亞有一味叫撈生，即係香港人叫嘅『撈起』，撈起時大家要講好多吉利說話，今年想要達到咩目標或願望，撈完咪風生水起，我都好想返去撈過起。」
Fish坦言去年事業最勁，一口氣連接了五部戲，她說：「兩部係主演，三部係客串，好多工作同拍戲機會，多啲人識我，今年好想乘住上年嘅好運，事業再好啲。」隨着工作增多，她的收入也有進帳，她笑說：「今日想食壽司就食，聽日想食燒肉就食。」回想起初來香港時候，因為無錢連發高燒都不敢睇醫生，她說：「公司都有叫我睇醫生嘅，但我真係驚貴，冇乜錢，嗰時我有帶成藥嚟香港，諗住自己都冇工作，瞓覺多啲休息應該會好嘅，（唔辛苦咩？）都幾辛苦，嗰時自己走落街買咗好多支水、乾糧，係咁飲水，食完就食藥瞓覺，因為人體係有自愈能力，因為發緊燒，好似好番啲，落街買嘢食又燒番，唔單只全身燒，又會骨痛，但我都要食飯，惟有自己再爬落去，我真係唔想欠人哋嘢，所以有咩問題自己解決，嗰段時間比較難捱啲。」
Fish (最左)上年憑《骨妹》入圍金像獎最佳女配角提名名單，吐氣揚眉~
除了不敢睇醫生，Fish坦言之前每一餐都要計住，她說：「想買嘅嘢都要諗過度過，食一餐飯都要計住，因為驚會使大咗，冇咗生活費，（最窮困係點？）因為我每個星期只可以攞一次advance(預支）400蚊，係經理人公司畀我，合約寫明嘅，有一次去到星期五先發現我得番20蚊，但星期六、日公司又冇開，呢20蚊要用三日。」
廖子妤當時嘅預算係400蚊使足一個星期。
「（點捱？）捱到呀，唔出街囉，總之會有辦法，嗰時冇工開嘅日子我瞓得好晏，趕喺快餐店嘅下午茶六點鐘，我五點九就去買個下午茶餐，跟住將個餐分兩次食，晚飯食一半，沖多啲水變成粥，第二朝加啲麵豉再食，其他日子就食即食麵，我仲有買一包米，如果食辛辣麵，再煲飯，將即食麵撈落去一齊食，就有即食麵飯，（咁慘？）其實唔慘㗎，我自己都唔想用咁多錢，因為未賺錢。頭兩年都係咁過，係艱難啲，因為拍完第一部戲後，差唔多成兩三年都冇拍過戲，不過我ok嘅，有呢啲日子我先更加珍惜依家，我覺得幾開心。」
樂天知命嘅Fish
難捱嘅日子已經過去喇！加油呀～
（ON.CC）
陳詩欣（中）和家姐（左）感情非常好。
