曾幾何時，因為有個老婆叫謝安琪嘅關係，於是乎事業冇乜起色嘅張繼聰，喺呢段「女尊男卑」嘅關係，搞到好多網民故意將張繼聰叫成「謝繼聰」，又封佢為「廢柴老公」，直到12年佢幫大台拍劇集《老表，你好嘢！》而大受歡迎，密密接拍電視同電影，之後佢喺專訪曾經講過，當年為咗呢啲mean爆嘅抨擊，曾經諗過了結生命，好彩最後臨崖立馬。

喺今時今日，唔單止冇人再張繼聰佢做「謝繼聰」，反而叫謝安琪做「張繼聰老婆」，佢嘅努力已經得到認同！正所謂經歷係會令人成長，o依家嘅張繼聰已經支撐成頭家，老婆可以專心喺屋企相夫教子，張繼聰仲為網民對老婆嘅惡意批評，喺ig撰文還擊。

今日凌晨，張繼聰又喺網上撰文訴心聲，言談間又講當日嘅負評。事緣係張繼聰無意間到喺2010年叱吒樂壇頒獎禮嘅片段，當時嘅謝安琪走勢好凌厲，自嘲自己花朵好猛嘅張繼聰就喺台下做嘉賓：「當時我嘅抑鬱病非常嚴重，非常想又非常怕去呢個Party 。想去，係因為太太當時成績非常出色，我一定要喺現場支持佢同見證佢努力嘅成果，怕去，係因為我當時嘅成績非常冇乜成績…..」

張繼聰續話：「片中所見嘅我，其實當時食行藥，所以好口乾，好頭暈，好攰，個cam又起勢隊住隊住，同時又好感動，好替太太開心，好想抱住佢，再同時好驚好怕，好擔心食白果嘅我唔知又會俾人點嘲笑，總之九萬幾個層次又li又lu …..同時台上嘅太太，成晚雖然得到好多個獎，其實當時嘅佢抑鬱病都好猛烈，承受好大嘅壓力，佢都係考緊宇宙俾佢嘅試….」

「你話世界係幾奧妙？快唔快樂，原來同得到幾多無關。快樂，其實係因，唔係果，如果你咁得閒睇到嚟呢到，朋友，我想講嘅係，每一個經歷其實冇乜意義，意義係由自己去界定，但係一定比你想像中美好同重要，就算當時係幾惡啃都好，好好行自己嘅路就掂，就好似我家吓睇番段片，發現原來嗰日唔係路障，而係加油站，令我選擇之後嘅路，決心尋找快樂同自在，亦係嗰日，令我更有勇氣去更多嘅頒獎禮，食更多嘅白果，所以你話，人生幾美好，根本就冇衰嘢！」

留言一出，喺fb即刻俾人洗版，一夜晚有過萬過讚好，有啲係圈中人，亦有啲係網民，正如張繼聰咁講：「人生幾美好，根本就冇衰嘢！」

(蘋果日報)