日前出活動時歌手陳柏宇就話自己因為打打噴嚏而扯傷背脊，不過佢都冇休息密密現身。今日（27日）係符曉薇（Leanne）嘅32歲生日，陳柏宇當然唔會錯過同老婆結婚後嘅第一個生日喇！陳柏宇相當識做咁喺凌晨12點時於社交網上傳二人齊齊慶祝嘅相，相中二人面貼面相當sweet呀！
陳柏宇仲以女神稱呼Leanne，留言中又提大家唔好問Leanne幾多歲，說：「我女神生日啦！（大家記住千其唔好問佢幾多歲呀）」認真細心。
而一班網友都好識做咁祝Leanne年年「18歲」生日快樂，唔知陳柏宇又會帶Leanne去邊度慶祝呢？！
(on.cc東網)
無綫劇集「老表」系列去到第三輯《老表，畢業喇！》，男主角郭晉安繼頭兩輯扮導遊及議員後，今次飾演熱血校長，還與舊拍檔蔡少芬相隔17年後再拍劇。郭晉安直言劇集的搞笑班底默契十足，相信會令觀眾會心微笑。不過，三奪「視帝」的他就打定輸數，唔寄望憑此劇攞獎：「如果有獎攞係額外嘢，祖藍話《老表》唔係攞獎劇，拍《老表》唔會有獎攞，喜劇始終係群體戲，要突出係好難。」
穩陣派唔敢自駕遊
郭晉安拍了三輯《老表》，建議祖藍若有意再開拍，可以試創作一套較嚴肅的劇，由原有班底演出。問到可有興趣參與幕後工作？他笑說：「唔會，咁辛苦，做得創作就冇得休息，返到屋企個腦都唔停，祖藍個頭大，創作細胞夠多就話啫。」
對於與蔡少芬再合作，他笑言兩人話題已變成湊仔經：「我哋嘅小朋友差唔多年紀，大家湊小朋友方法都唔同，我就係穩陣派，佢就鍾意冒險，好似去旅行佢會自駕遊，我就唔敢，情願坐公共交通工具，佢都鼓勵我可以試吓。」
送仔女讀國際學校
至於教導小朋友，郭晉安自言冇壓力，因與老婆歐倩怡由計劃生B起已決定不做「怪獸家長」催谷仔女讀書，寧願送他們到國際學校，在相對輕鬆的環境下學習，他笑說：「希望佢哋讀書最緊要開心，佢哋諗到做咩都會鼓勵，好彩依家冇乜功課壓力，通常喺學校已經做晒。」郭晉安自言是開通爸爸：「自己教小朋友好自由民主，大家有商有量，溝通得好好。」
圈中成日爆出「撞樣潮」，咁人有相似並唔出奇，好似2013年9月發生「杜生好寸」事件，當時許志安去踢波，有人要求合照，點知係咁叫安仔做「杜生」，安仔當然冇理，之不過最終都有同呢個人影合照，最終成為網上熱話。
咁「杜生」事件發生四周年，許太Sammi之前已經「自抽」咗老公一次，同杜德偉拍廣告扮認錯人，叫杜德偉做「許生」，
而許太Sammi亦有撞樣對象，就係趙頌茹，趙頌茹被指五官激似Sammi，甚至有人話幾可亂真！
之但係Sammi覺得似樣嘅係另有其人，今日凌晨喺Instagram貼出一張合照，個組合都幾新鮮……Sammi、周家怡、江美儀同林保怡，Sammi覺得自己同江美儀好似樣，打hashtag「我同我家姐江美儀很似樣」，原來佢哋約埋一齊食飯，講吓藝人拍戲嘅辛酸，周家怡就話好多藝人埋位都覺得自己係得，衝落去就出事。
此外，江美儀亦帶咗兩隻愛犬到場，Sammi都有撩佢哋玩。睇番江美儀同Sammi合作，好似係拍電影版《衝上雲霄》先認識，未知佢哋係之前識，定係拍攝嗰陣先識。其實喺圈中「人有相似」，耐唔耐都有好似出爐港姐雷莊𠒇如同哨牙「癲姐」蔡思貝生到餅印咁；蔡一智同黃心穎被人話似「兄妹」；薛世恒同袁偉豪就似「孖兄弟」；
巴斯光年同鄧梓峰拍埋一齊都真係好難分；仲有出道以嚟，一直有人覺得梁詠琪（GiGi）同陳曉東好似樣……
有啲搞笑到連自己個女都認錯……鄭希怡（Yumiko）於2013年喺微博貼咗阿爸張相，「老爸回到家，很高興地和我說：『剛才我在街上看到你，等沒甚麼人時，還和你拍了一張合照呢！』爸，你連女兒也認錯嗎？」原來Yumiko爸爸係同徐子珊影相…
（蘋果日報）
敢言的杜汶澤自從14年雨傘運動後就被標籤是「黃絲」，遭內地封殺、圈中人冷待，事業亦大受影響，可是未有打沉阿澤意志，繼續追電影夢。近日他四出宣傳下月2日上映、自導自演的電影《空手道》，日前接受商台監製梁泰來（Terry）主持的《1圈圈》訪問，遭對方冷嘲熱諷，阿澤積壓3年冤屈氣大爆發，甚至公開鬧爆梁泰來是「契弟」。
杜汶澤近日忙於宣傳自導自演的電影《空手道》，他日前接受商台錄音訪問，過程中發生了不愉快事件，阿澤前日先在facebook爆seed，昨日更開名鬧爆商台監製梁泰來，阿澤同時大吐過去3年心中谷住的一股冤屈氣。
阿澤於14年撐雨傘運動後被內地封殺，他默默耕耘做好本份，及至為《空手道》接受商台節目《1圈圈》訪問，卻燃點阿澤的爆點。前日他在fb貼文：「其實你又點會估到，到今時今日，仲會有電台主持人問你，究竟你同劉德華吳君如唔啱，係咪真㗎？我真係睬你都生臭狐啦！你估我杜汶澤今日有戲要上，就乜嘢都要答你喇咩？O依家乜嘢年代呀？莫講話你個台家陣少人聽，多人聽我都未驚你呢！商業電台！」
阿澤更hash tag「錄咗唔播正契弟」、「雖然你本身都係」，當時阿澤還未開主持人的名字，網友要自己「猜燈謎」。昨日阿澤再貼文狙擊，文尾終於有重點：「正如噚日商台個監製Terry，一開始個錄音訪問嘅時候成條太監咁陰陰嘴笑住咁話『等咗呢個訪問你嘅機會好耐，你知你幾少戲拍㗎啦！』你條契弟講得啱！既然我咁難得有戲上，希望大家多多支持！」
被阿澤點名鬧爆的梁泰來昨午2時許準備離開商台外出工作，問到被阿澤「開咪」一事，梁泰來淡然回答：「冇任何回應。」至於阿澤的訪問將於後天播出。過去3年，阿澤經歷過好友疏遠、敵人嘲笑，還有工作受影響等連番打擊，他說：「原本一年拍8部戲閒閒地搵千零二千萬，搞到一年搞一部，再唔係就漂洋過海，又或者喺電視台教人焗雞，遲下連KOL都做埋。」
阿澤甚至被屈靠老婆田蕊妮撐起頭家：「層樓我買嘅、食我嘅、着我嘅，連佢揸緊架Benz都係我送嘅，我點樣食軟飯呀X街？」受盡人情冷暖的阿澤說：「嗰啲藍屍unfriend你，好奇咩？黃屍又好好多？嗰啲黃屍同你去玩，都叫你唔好post相！驚影響佢內地啲生意。」
阿澤表示封殺前做男主角的電影試過票房收3,000萬，他說：「睇唔起我嗰啲同行，咁嘅成績你哋試過未？如果因為我嘅立場而輸，咁我唔覺得羞恥囉。所以我出親街，都岳到個頭好高。」阿澤自爆這幾年憤怒轉放到道場，結果取得空手道黑帶：「我，係唔會認輸嘅！」
(蘋果日報)
淡出再回巢。。。
近年大台唔少藝員都傾向北上搵食，人材流失呢個問題，除咗力捧新人之外，唔少得搵啲淡出咗嘅朋友「回家」啦！
袁詠儀
90年港姐冠軍入行嘅「靚靚」袁詠儀，入行冇耐已經喺大台做女主角，之後仲進軍大銀幕，佢入行嘅電視作品唔多。01年同Chilam張智霖拉埋天窗，06年生咗囝囝「魔童」，而喺阿仔出世之後靚靚仲短暫回巢大台，同三哥苗僑偉合作拍過《疑情別戀》同埋同三嫂戚美珍合作拍重頭劇《富貴門》，而佢仲係做第一女主角。
戚美珍
一樣都「回巢」過大台嘅就有三嫂戚美珍，藝訓班出身嘅三嫂90年嫁咗畀三哥之後淡出娛圈，而佢喺08年被力邀復出拍重頭劇《富貴門》，之後再客串過《老公萬歲》就再未有喺大台演出，o依家只係間唔中客串電影。
關詠荷
關詠荷喺03年同張家輝結婚，仲誕下囡囡Brittany，而佢喺2000年同大台約滿離巢，主力返大陸發展，而喺07年重返拍處境劇《同事三分親》、分別再喺10年同13年拍《五味人生》及《情逆三世緣》，而近年關詠荷淡出娛圈。
毛舜筠
81年加入大台嘅毛舜筠91年打轉攻電影圈，喺08年大台力邀拍長篇處境劇《畢打自己人》之後接連再拍《天天天晴》，而去年再拍《愛·回家》系列第三輯《愛·回家之八時入席》。
可嵐今日喺鰂魚涌出席電影短片活動，佢之前以導演身份參加呢個活動，今年用2012年創作，但未公開過嘅歌曲《愛了算了》兼擔當演員。呢首歌提及同前夫分開時心情：「首歌係正面講放下，曾經愛過嘅就算分開我都會愛，將愛變成祝福。」
現時為贍養費同前夫對簿公堂，可嵐今早上庭時，前夫願意支付佢要求嘅一蚊贍養費：「之前佢唔肯俾，到今日終於肯。而阿仔既贍養費我想佢每月俾一萬，希望個仔有穩定生活，其他費用我會努力搵錢。」
同場參加活動嘅Kellyjackie仍然係單身，佢指有認識新朋友，正在了解中，佢笑指好友吳若希都有落力介紹。
(蘋果日報)
胡定欣、袁偉豪（Ben）、薛世恒到圓方出席Michael Kors旗艦店開，兩男撞樣似足孖生兄弟，今日中午兩人先喺旺角一齊出席活動，俾黃翠如摸手仔認人，夜晚兩男又一齊出現，當胡定欣同呢兩人企埋一齊影合照時，鬼馬嘅胡定欣仲玩佢哋，望住薛世恒抵死打招呼：「Hello，Ben.」令全場大笑。
日前新加坡舉行「星和無綫電視大獎2017」李佳芯爆冷奪視后，有指輸咗嘅胡定欣藐爆對方，定欣否認：「吓，冇呢件事，自己對佳芯都好有信心，其實獎項對每個人都係鼓勵，自己都係過來人，最緊要公司需要多啲演員，佳芯係好努力演員，大家應該正面啲去睇。」
問到明年1月舉行嘅大台頒獎禮，會唔會睇好對方攞獎呢？定欣就避答，反而力撐鮑起靜攞獎：「每一年去頒獎禮都覺得好似去party，今年好開心，同鮑姐同劇，希望可以一齊出席頒獎禮，好想佢得到獎，反而自己就好輕鬆，希望《同盟》可以攞獎，因為大家打得好辛苦。」
(蘋果日報)
藝人趙頌茹（阿Yu）到金鐘出席活動，分享如何跟下一代講解環保。她慨嘆與兩名女兒講環保並不容易：「同佢哋講一張紙要用幾多棵樹，佢哋完全唔明，繼續剪紙剪到成地紙碎，我覺得呢條係好漫長嘅路。」她認為當女兒慢慢長大就會明白，現在學校亦有教沖涼只沖5分鐘：「平時沖好耐，玩水嘛，依家就知道節約用水，又會帶購物袋，但要再做多啲。」
提到就讀小學二年級的大女仍然未慣上學，阿Yu表示很擔心：「每一日都唔記得功課，究竟係太多嘢搞定係點呢？希望佢會愈大愈好。」她自言每日都花很多時間照顧女兒，要好好控制自己的情緒，笑言要「哦」到女兒明白為止，所以變得很長氣。
對於早前拍攝的劇集已經完成，她希望快點可以收看，之後就要拍林雅詩的電影：「開咗鏡，但未到我拍，我個角色係做佢朋友，但未收到劇本，希望佢快啲啦。」另外，她計劃聖誕節獨自帶女兒去旅行和模擬返工，試試自己能否應付到。問到可會想接拍親子真人騷？她直言唔好，雖然自己照顧女兒沒有壓力，女兒亦不怕鏡頭，但不想被看到最真實的一面：「唔想個女出鏡。（如果酬勞好吸引？）都係唔好，唔想個女做完話唔讀書去做幕前，唔想影響佢讀書。」
（on.cc東網）
今年9月升呢做咗老竇嘅郭富城，尋日（26號）就係佢嘅52歲生日，雖然明知城城同太太方媛一定會一齊慶祝，不過佢哋好似好神秘咁，點都唔肯一齊見人，方媛都係喺社交網甫咗張單人晒腿加個蛋糕相吊吓大家癮，不過，終於都搵到佢哋一齊慶生嘅相，方媛仲翹實城城，場面冧到爆！
尋晚一大班朋友齊齊幫城城慶生，作為「壽星仔」嘅城城着上鮮紅色Tee非常搶眼又Sharp醒，佢前面就放住方媛擺咗上網嘅蛋糕，而方媛無視現場咁多人嘅存在，全程翹實城城之餘，仲將個頭挨晒落城城個膊頭上面，方媛露出一臉幸福相，真係齋睇相都Feel到佢哋有幾幸福，而城城豎起手指公，唔知佢係讚緊太太方媛正呀！
定係想話個生日會玩得好開心呢？不過搵勻成張相，都唔見佢哋嘅愛情結晶品囡囡Chant嘅蹤影，睇嚟都應該係因為年紀太細唔方便帶佢出嚟一齊慶祝。
(on.cc東網)
鄭秀文（Sammi）聲沙沙現身圓方出席活動，佢話：「因為轉天氣就鼻敏感，加上自己鍾意攬住隻貓，將啲貓毛吸晒入去。」問點解唔攬老公許志安，Sammi笑：「攬貓好啲。」
講到張智霖豪擲近億買入大寶閣，同Sammi嘅父母做鄰居，Sammi表示：「好開心喎，同Chilam做鄰居，以前一齊合作拍電影《衝上雲霄》，感覺好得意。」
問到佢咁鍾意下廚，會唔會煮兩味請Chilam一家食飯？Sammi話：「哎呀，我唔敢呀，佢哋平時食慣好嘢。」咁當年買落嘅大寶閣，O依家樓價係咪升咗好多？Sammi話：「都有升嘅，記得好多年前喺TVB做音樂節目小主持，鄺美雲都有同我傾偈，佢話如果有錢，最好買樓同買股票，自己人生第一次聽到呢啲投資心得，但嗰時邊有錢呀，O依家擁有物業嘅幕後功臣歸細佬，尤其大寶閣呢啲有升值潛力嘅樓，都係細佬話買嘅，自己都有少少sense。」問到老公呢？佢笑話：「咁就弱啲。」老公最有眼光係咪揀中你？Sammi大叫：「嘩！我唔敢亂講喎，佢人生裏面最冇眼光係揀到我。」講完忍唔住大笑：「做人謙虛啲好，都係唔好寫啦，好似好肉酸。」Sammi仲話爸爸諗住搬屋，換一間細啲嘅單位：「因為佢o依家年紀大，去厠所都要行得比較遠，而且爹哋中過風，行動冇咁方便，所以有朝一日將父母換去細啲單位，大家千祈唔好寫我虐待老人家。」
(蘋果日報)
