無綫藝員張嘉兒、陳煒、蔣家旻、謝雪心和鄧佩儀等在將軍澳出席十一月星辰活動。
張嘉兒將於18日生日，她透露老公Nathan不在港，會與快將14個月大嘅女兒慶生：「依家有女萬事足，好享受做媽咪嘅樂趣，目標係追多兩個，老公都鍾意小朋友，下年開始試，希望35歲前生多一個先，唔係冇氣冇力湊，因為一個都要花好多心機、精神，依傢仲餵緊人奶，都好忙。」
談及女兒，張嘉兒指她在十月裏病足成個月，搞到自己睡眠不足，幸好現在囡囡已經康復。張嘉兒雖然現在少拍劇，但多了嬰兒產品邀請她在網上宣傳，笑言自己像KOL（網紅）一樣，不過這種工作好適合她在家中湊女，又能夠增加收入。
(on.cc東網)
古天樂同宣萱曾一齊拍《刑事偵緝檔案》、《尋秦記》、《寵物情緣》演情侶，唔少fans都希望佢哋現實中會有發展，不過二人多年只係老友。
古仔、宣萱、徐子淇、黎姿、梁詠琪及徐濠縈等，今日出席活動，宣萱同古仔老友鬼鬼，影相時，古仔笑宣萱擺pose好似條腰有事咁，宣萱笑言：「人哋話S型條腰靚啲，所以先擺pose。」古仔之前拍《真．三國無雙》嗰陣，被啲真兵器插損咗隻眼，古仔話目前康復都理由，不過要過多幾日先拆線，o依家隻眼唔係太舒服，問到拆線緊唔緊張?古仔解釋：「之前醫生幫佢睇過，本來聯咗8針，但係唔知點解有一針唔見咗，隻眼有啲哽哽哋。」
問擔唔擔心古仔，宣萱望咗古仔一眼：「OK喇!最緊要冇死到，聯咗8針，我都冇諗過眼球原來聯到針。頭先都有睇睇古仔個傷口，有啲嘢凸咗出嚟，針原來係透明。」古仔話o依家視力冇問題，仲可以繼續拍戲，之但係拍完就要用CG執走，執靚啲眼白，身邊嘅宣萱笑住話：「睇嘢朦朦哋就好，睇我可以靚啲。」
古仔今次受傷都有還神，意外嘅嘢大家都唔想：「唔會因為咁唔拍動作戲，亦冇理由自己搵嘢插自己隻眼。」咁有冇機會再合作，宣萱話等古仔好番先，古仔都期待，大家都好耐冇合作都叫有新鮮感。
(蘋果日報)
歌手蘇永康到黃竹坑擔任慈善晚宴表演嘉賓，他笑言經常飾演律師和醫生等角色，怕現場的嘉賓對他應該不太了解，要自我介紹後才可唱歌。提到晚上重播有份演出的劇集《壹號皇庭IV》，他自爆首播時沒看過：「因為1995年我去咗發展台灣市場，我淨係打番嚟問陶大宇同歐陽震華套劇得唔得，佢哋話得，冇事。」
感謝鄧特希提攜
蘇永康好感謝監製鄧特希，當時對方要求歌曲《假使有日能忘記》要有個3分鐘內的版本，他一直不明白，現在看到重播才明白對方的要求，在劇中會經常播放這首歌：「啱啱嗰集仲用咗首歌做MV，我依家明點解首歌嗰時Hit得咁犀利。」
重播令無綫賺錢
蘇永康笑言自己在劇中只是「溝女」，第四輯的戲較少，第五輯較多，因為沒有撞錄音期。問可想再拍？他直言難以再找同樣的班底，而鄧特希亦沒興趣重複同類型的劇本：「呢個Casting點同你計呢？內地價定香港價？不如大家睇重播，聞說收視唔錯，每晚嘅廣告我數過有14個，都係大品牌。對TVB係好事，因為佢基本上零成本，每晚起碼賺20萬。」
金牌班底難再聚
說到近日到歐洲、美加、雲頂及澳門等地開騷，蘇永康笑言聽得最多的說話就是為何以前的劇集比現在好看這麼多：「我要幫TVB辯護，當時拍《皇庭》嘅所有都係精英，啲導演依家一係喺內地撈得好掂、一係已經做咗電影導演，編劇就係金牌編劇鄧特希同已故嘅司徒錦源，後來司徒錦源就幫杜琪峯寫劇本。」蘇永康笑言可有機會再合作要看緣分，希望可以透過無綫重組這個強勁班底。
(東方日報)
呢兩日有關崔建邦嘅新聞，真係轉得好快，早前先有報道話佢做番有腳雀仔，願意停低落嚟娶林珊珊細女李怡（野人），今午崔建邦出席活動，就話自己係單身，轉個頭，兩人分別喺ig宣佈，原來手已分。
喺宣佈分手嘅同時，崔建邦前度唐詩詠今日喺圓方出席《空手道》放映會，唐詩詠被問到知唔知崔建邦喺中午露口風，話自己係單身，詩詠聞言，反應頗大：「吓，喔，OK，你哋講我先知。」詩詠再補充道：「晏晝先有人問我有關佢哋結婚傳聞，其實我都唔清楚發生咩事。」詩詠又話平時冇乜同崔建邦聯絡：「呢啲都係佢自己事，冇乜點傾，亦都唔會八卦。」咁會唔會關心崔建邦？詩詠話：「唔使喇，咁大個人，識得處理。」
(蘋果日報)
太陽娛樂老闆周焯華（洗米華）同Mandy嘅第三胎，日前有報道指已經喺9月出咗世，再添一女，甚至有指洗米華安排Mandy同仔女返澳門住，不過無論係洗米華定洗米嫂（陳慧玲 Heidi），都將家庭放喺第一位。
事有湊巧，今年被捲入呢段複雜關係入面嘅松岡李那，今日喺中環蘭桂坊出席稍後舉行嘅《蘭桂坊日本嘉年華》記者會，記者提到Mandy Lieu再為洗米華誕下女兒，問到松岡有冇留意新聞？松岡明顯聽呢單新聞感到驚奇，先係睩大對眼，然後不停「WoW」表達心情，再用英文反問：「Oh really? WoW I don’t know.」
咁佢會唔會恭喜吓周生？松岡話：「Not sure，我唔知。」同周生仲有無聯絡？佢話：「Not really.」然後再情不自禁對洗米華再度做爸爸表示驚奇：「Three child？WoW easy to pregnant.」咁松岡希唔希望有自己嘅小朋友？佢話：「hope in the future, I never get baby, is god give them.」松岡又喺訪問時表示自己對蘭桂坊一啲都唔陌生，因為七年前嚟香港發展第一份工作就係喺蘭桂坊度舉行。
講到飲酒，佢話自己都鍾意但唔會飲好多，隔星期先至會同朋友見面飲吓嘢，最喜歡紅酒同日本清酒。日前萬聖節，松岡喺個人Instagram上分享自己化身貓女郎嘅相，佢話當時自己喺日本東京，仲透露呢段時間一路都喺東京，因為要宣傳剛喺日本發行嘅個人新歌《The Earth》，松岡表示係一首EDM跳舞歌，會有性感造型，希望遲啲有機會嚟香港同馬來西亞宣傳。另外，早前有份演出嘅一套中日合作電影，亦會喺月底上映。
(蘋果日報)
農夫成員陸永與老婆Reina喺2011年奉子成婚，幾個月前Reina發聲明同親父劃清界線，陸永爆岳父欠落周身債，連累老婆被收數佬長期滋擾，目前主力照顧囡囡陸一穎(Hannah)同陸一心(Simsim)，不時都有貼下囡囡嘅生活照上網，點知噚日出咗一個post講Simsim對人用「靚」同「得意」嘅反應，就惹嚟網民批評，認為Simsim係「玻璃心」。
「陸永嫂」Reina今日喺Ig貼出文，留言話點解一個四歲小朋友接受唔到人哋話佢得意，係咪一定要讚佢靚，佢先叫叻，Reina今日問Simsim，點解唔鐘意媽咪用「得意」嚟讚佢，Simsim嘅答案係「因為『得意』係細個，『靚』係大個，佢想做大人」。
Reina認為一個四歲小朋友思想唔會好似部分網民咁，諗嘢咁複雜，唔會覺得人哋讚佢得意等於唔靚，「而我讚自己個女得意，因為我真係覺得佢好得意，我口中嘅『得意』並冇包含『唔靚』在內，我都唔覺得一個唔靚嘅人，係一定會得意囉」。
佢又指有網民成日話「陸永嫂」Reina讚女Hannah靚，Simsim唔靚，又話Simsim會唔開心云云，咁Reina都有將自己Ig啲所有post重新睇一次，自問從來好少將兩姊妹拎嚟比較，只係喺幾個post中，有講過兩個女，兩款性格，兩個都係獨一無二。只係有啲人留言問Hannah靚啲定Simsim靚啲。
Reina打個譬如喺Hannah眼中，爸爸係最靚仔，反而阿妹Simsim真心覺得爸爸唔靚仔，Hannah以前試過為咗呢件事喊住鬧Simsim，當時Reina都即刻同佢哋兩姊妹講，「個個人睇嘅嘢都唔一樣，個個人用自己對眼睛去睇嘢，企嘅位置唔一樣，睇嘅嘢唔一樣，覺得『靚』同『唔靚』都冇分『啱』或者『唔啱』」，Reina就話「你哋兩個都係我個女，我都覺得你兩個係最靚女嘅，但總會有人覺得你哋唔靚，如果第時有人話你哋唔靚，你哋都唔使唔開心，因為『靚』唔係最重要」。
「陸永嫂」Reina今日都有再問Simsim，如果媽咪o依家話「你唔靚你會唔會唔開心」，Simsim就答「唔會！咁我要乖啲我就會靚啲囉⋯我都係唔使咁靚啦」。唔少媽咪級嘅網民都覺得「陸永嫂」Reina講得冇錯，每個小朋友都係獨一無二，另有網民笑言Simsim話乖啲就靚啲，咁佢話唔使咁靚，係咪即係佢唔想乖。話晒童言無忌，估計Simsim都係想將自己感受講出嚟。
(蘋果日報)
前名黎姿嘅馬黎珈而，今晚以一身全白套裝到灣仔會展出席「EllE Style Awards 2017」頒獎禮。久未受訪，黎姿亦樂於大談近況。問佢既又要兼顧工作又要照顧家人係咪好辛苦？佢話：「要照顧三個小朋友，而且佢哋仲細，依家成日都要扭抱，雖然已經幾歲，但都會扭抱。」
難怪黎姿依家仲咁瘦，佢都話：「大家成日話我瘦，因為我成日要抱佢哋出街，唔捨得唔抱佢哋，好想成日都攬住佢哋。」黎姿成日俾人讚佢凍齡，佢話；「最緊要係心態。我成日都陪佢哋去playgroup、親子班，令我感覺好多活力，感覺自己都後生咗，因為感覺開心嘛，加上醫學美容，所以啲人咪覺得我凍齡囉，但其實心態係最緊要嘅。」
黎姿又笑言自己係公司嘅白老鼠，乜嘢療程都會試，「除咗整容之外。會試下啲機器，緊緻地會嘅。」仲話如果試到啱用就會介紹俾客人聽：「係一個安全保證。」嚟緊聖誕會否同家人出埠？黎姿表示：「一定會，啲大節日，學校有假期，就想同佢哋輕鬆一下，因為學校啲功課好辛苦，佢哋又咁大壓力，又要考試，希望可以帶佢哋出去玩下，又可以當親子活動。」
學生壓力係真係好大！
(蘋果日報)
林珊珊幼女野人（李怡）與崔建邦噚日先至俾周刊話佢哋計劃結婚，點知今日突然嚟兩個戲劇性轉變，首先係男方今午出席活動時，一口否認話：「相信好多人關心我嘅感情生活，呢個報道唔係真嘅。」又否認同野人拍拖，他稱依家自己係單身：「大家係好朋友，各自為工作努力。我銀行戶口個數目好細，要努力加油先。」但就承認見過林珊珊一、兩次面，但避談見家長詳情。
至今晚近8時，野人突然在IG出Post，宣佈同崔建邦和平分手！唔通因為唔認佢係女友……吖？
野人表示，佢同崔建邦係和平分手，呢個決定係有共識，而分手原因不包括有第三者、或其他外在因素。野人又稱，係雙方經過商量協議之下，先至決定分開，停止這個關係。野人又力撐崔建邦是一個「忠誠及充滿愛的人」，表示對他絕對信任，亦不相信對方會「偷食」。
分手後，野人謂兩人會繼續互相支持。至於分手宣言的附圖應是她與崔建邦相攬的影子。崔建邦於約20分鐘後，即近晚上8時半，也於IG出Post，承認分手。附圖是黃昏景色，他寫道：「這兩天看到很多關於我感情事的報道，很多謝大家對我們的關心，兩個人能夠走在一起，是緣份，就算結束了，感情仍在。
很感恩能跟Tj一起走過這段路，她是一個心地很好，對生命有一股熱誠的快樂女孩，很感恩我們之間有過一段這麼快樂的回憶。有現在這個決定，其實大家心裏很難過。希望大家尊重我們的決定，不用胡亂猜測。很開心我們曾經擁有這一片天空。」傳媒致電崔建邦及林珊珊，但一直未有接聽電話。睇番野人IG，雖然佢未有透露何時協議分手，但一星期前就出ig post寫道：「A person who loves me back is on his way to me.
The right person for me will know who I am.I don’t have to convince anyone to love me. The right person will love me.」還在尋找她的Mr Right。
(蘋果日報)
袁偉豪日前就喺Instagram上載咗扮五星戰隊（Power Rangers）嘅相。
相中有6個人，叫大家估吓係邊個！到咗凌晨，謎底終於解開喇！
原來就係佢、女友張寶兒、胡定欣、楊潮凱、黃長興同埋一個朋友，見佢哋着晒制服非常認真，而啲衫係袁偉豪負責提供！
佢哋當晚喺中環周圍整蠱人又同人影相，娛人娛己，又唔使怕畀人認出又可以玩，連「黃戰士」定欣都話：「真係玩得好開心，又要整古人，又要忍笑！」真係青春返晒嚟！
佢哋又去到大會堂演奏廳外取景，擺晒甫士加埋啲燈光效果，真係勁似影緊電影海報！
而當中嘅亮點，就係黃長興喇，佢連褲着喺套貼身制服入面，部電話又凸晒出嚟，楊潮凱笑言：「ET部手機真係好新潮係植入體內式！」
網民都讚佢哋造型好靚、好型、好正，唔知邊個咁好彩當晚同到佢哋影相呢？
(on.cc 東網)
香港考試及評核局向教育局提交2017年全港性系統評估報告，其中小三推行基本能力評估研究計劃(BCA)。小三BCA報告揭示，學生在中文科寫作範疇中，大致能正確書寫常用字詞，惟偶有錯別字，如將「經過」誤寫成「徑過」，又或將「籃球」誤寫成「藍球」。標點符號方面，偶爾出現誤用，如開關引號方向顛倒，又在標示對話時，用了開引號，卻欠關引號，個別學生未能適當斷句。
寫作範疇的實用文部分，要求學生撰寫賀卡，惟個別學生寫賀卡時，欠缺恭賀信息或恭賀信息不明確，如學生只替對方獲獎感到高興，但忘記恭賀對方得獎。
而在短文部分，報告指大部分學生能審閱題目，「離題」或「內容貧乏」的文章比以往減少，惟「不切題」或「內容空泛」的文章偶爾出現。學生常犯的錯別字包括，將「不知不覺」誤寫成「不自不覺」：將「繼續」誤寫成「斷續」；將「值得」誤寫成「直得」等。個別學生更誤用省略號，如在「等」後加省略號，另有個別學生未能適當斷句，又或濫用逗號，有學生甚至「一逗到底」。
小三BCA英文科方面，在寫作範疇上，不少學生運用的字詞非常有限，時態運用錯誤、錯誤表達等，亦十分常見；部分學生串錯字。在說話評估方面，部分學生讀音出錯，如將「fit(適合)」錯讀成「fat(肥胖)」；又將「new(新)」錯讀成「now(現在)」。
至於小三BCA數學科方面，報告則指出，部分學生在解答應用題時混淆了乘法和除法，亦有部分學生列寫算式時，混淆了「被減數」和「減數」。此外，部分學生未能掌握貨幣的找換，個別學生更混淆了「7角」和「7元」。而在量度物件重量時，少數學生混淆和誤用各度量單位，如錯誤指出一個蘋果重約200kg(公斤)、一袋米的量約是2克等。
(東方日報)
