文詠珊（Janice Man/JM）今日凌晨喺微博貼文寫，「昨天從芬蘭轉機到聖彼得堡，我的五件行李全給芬蘭航空Finnair弄丟了。所有的禦寒衣物和生活用品都在行李中，未來的兩星期在北歐都不知道怎麼過渡，而芬蘭航空只回覆一句「不清楚」。 這是一個合理的回覆嗎？ 」
同金融才俊男友吳啟楠（Carl）趁聖誕外遊嘅JM，今日回復記者，身在聖彼得堡嘅佢話：「係全部行李冇晒，一件都冇，我係準備去睇北極光，由芬蘭轉機去俄羅斯，五件行李冇晒，一件都冇，芬蘭航空一句回覆都冇。」JM又話，除咗佢哋，同行至少有6、7人都冇咗行李，「噚晚咁啱撞番同機3個美國人，佢哋都話未搵得番，但航空公司只係話No Information，又唔聽電話。」JM嬲爆話：「真係太過份，太誇張，我都好少會咁寫出嚟，但真係覺得好匪夷所思，追佢哋（航空公司）就表現好唔耐煩，一係就電話打唔通。」聖誕去旅行本來開開心心，但因為唔見行李搞到唔開心，JM話：「如果去日本都唔驚，但今次我準備去睇北極光嘅Full Gear冇晒，連啲糧食都冇晒，暖包都冇，呢度又買唔到，所以我已經凍到病咗，噚日先買番個喼，依家準備上機喇！」
佢喺微博公開事件，網民都覺得佢好慘。(微博圖片)
其實唔止JM唔見行李，同行至少有6、7人都冇咗行李，真陰公。(ig截圖)
向芬蘭航空Finnair投訴，但得到嘅答案係「唔清楚」。(微博圖片)
未知唔見行李時，JM心情依然靚爆，不停購物。(ig截圖)
(Apple Daily)
