藝人張建聲近期憑熱爆網劇《反黑》招積一角，令不少觀眾喪like，廿八歲才入行的他，可謂有心唔怕遲，當年入行後，找到了人生目標，愛上了演戲，由第一部電影開始，便認定自己要走演員的路，他謂：「我覺得一個人無嘢好得過可以有Second Life，呢樣嘢演戲可以畀到我，我可以走入別人嘅人生，同埋我好喜歡留意身邊人，然後再去諗，若果演佢哋，我會點樣做，當我演到同我想像嘅係一樣嘅話，係好有滿足感，我唔係學院派出身，但我對演戲真係好有興趣，呢家我能夠做到自己喜歡嘅工作，又可以叫做養到家，真係可以話夢想成真！將來我都好希望可以去讀演戲，因為我覺得依家出嘅係盲力，想收番細緻啲。」
入行六年，張建聲絕不是一帆風順，張建聲曾經試過足足一年無工開，那段時間，可說是他的「黑暗年」，他謂：「嗰陣冇工開，要賒借度日，再加上爸爸患癌，又要擔心媽媽，個世界真係好灰。（點捱去過？）堅持信念，唔好放棄，盡力去做好自己。（最高峰欠債幾多？）都有幾十萬，醫藥費加生活，公司同朋友都好好，都有係我艱難嘅時候幫過我，將來我有能力，一定會幫番人。（嗰段日子係咪要好慳？）一定，一日用廿蚊，餐餐公仔麵，咁啱嗰陣要增肥拍劇，公司都有資助我增肥，所以都唔會餓親。」
山窮水盡的日子不易捱，還要面對至親離別，令EQ再高的張建聲都曾經一度崩潰，他謂：「記得有一日，知道爸爸已經無任何方法可以醫好個病，我真係接受唔到，曾經一腳踢落醫院張櫈度，覺得無能力去救自己親人，非常無助，之後爸爸凌晨時份走咗，我同媽媽去認屍，我都唔敢叫媽咪入去，我拉開個簾，見到爸爸變咗一個無靈魂嘅身體，嗰一刻好難受，但要忍住自己嘅情緒，先照顧好媽咪，之後一個去搞爸爸嘅身後事，當我做晒所有嘢，返屋企坐低，情緒就即刻爆晒出嚟，激動到打爆咗屋企塊鏡，好崩潰。」
日子再難過，為了家人，為了自己，也要盡力挺過去，張建聲如今總算捱過來，他直言非常感恩，因他的身邊一直有一班好朋友以及好老闆支持他：「老闆蕭定一對我一直都好好，仲有黃柏高，都畀咗好多意見我，當然仲有同我合作過嘅導演，同埋《反黑》台前幕後嘅一班團隊，佢哋個個都好錫我，好感恩。」
（on.cc東網）
曾經歷四段婚姻的著名時裝設計師、芭蕾舞蹈家張天愛，對愛情仍充滿期盼，揚言藝術家愛情觀特別豐富，但明言不會再婚，她說：「我自私，唔想畀婚姻綑綁自由嘅生活！」
內地開舞蹈學校
