現年26歲嘅曾淑雅（Jumbo）樣靚身材索，11年獲「中國小姐」三料冠軍，入行1年已有富二代揸百萬靚車獻慇懃，前年Jumbo出席活動呻dry咗3年冇拍拖，不過原來Jumbo已經名花有主，日前陪矇豬眼男蜜遊台灣，被讀者黃先生透過「爆相爆片」分享。

讀者黃先生喺電話表示：「嗰日傍晚6點幾，我喺台北101見到佢同一個男人睇街頭表演，Jumbo全程蹺實男人隻手，兩個人黐得好埋，仲聽到佢哋用國語交談，睇咗一陣就拖手走。」從讀者提供「爆相爆片」所見，Jumbo嘅男友人年約30多歲，着黑色大褸外表成熟穩重，比身高174cm嘅Jumbo仲高半個頭。

《蘋果》致電問Jumbo係咪拍拖？最初佢反應愕然，但其後都大方認愛：「拍咗差唔多一年，我哋行山識，因為一大班朋友行山，大家有共同興趣，嘗試發展。」問到男友背景？Jumbo表示：「佢姓黃，做投資，唔係老闆。」知唔知男友以前有冇同圈中人拍拖？Jumbo口快快爆男友秘密：「應該冇，我知佢好耐冇拍拖，差唔多十年…好似唔好講太多佢嘅嘢，保持神秘好啲。」

問到點令男友打破10年齋鉢？Jumbo甜笑：「因為大家性格同興趣都夾。」係咪一見鍾情？佢再笑：「哈哈哈，可以咁講嘅。」讀者指聽到兩人講國語，問男友係咪台灣人？Jumbo表示：「香港人，因為有好多台灣朋友一齊，讀者咁近呀？我諗住收得埋㖭，佢唔係呢行，驚佢唔習慣，不過大家有共識，如果被人影咗，都唔介意公開，開心事嚟。」

有冇計劃結婚？佢冧笑：「冇咁快，了解中。好難得遇到一個好認真好專一嘅男仔，雖然佢好多女仔朋友，但會知道佢同呢啲真係朋友，佢會尊重你，大家有個信任，溝通得好好。」

(蘋果日報)

曾經應承註冊結婚，不過簽字當日。。。

67歲嘅徐少強喺70年代演過唔少大俠角色，當年「大俠」型象深入民心，佢仲由電影圈打入電視，代表作仲有《三少爺的劍》、《天蠶變》等等，其中《天蠶變》入面雲飛揚一角尤其著名。

而徐少強嘅感情生活亦相當精采，徐少強喺早年曾經有第一任妻子，二人育有一子徐亦東，而佢亦係創作人，活躍於廣告及電影業。

不過講到徐少強較廣為人知嘅一段情，相信就係佢同米雪妹妹雪梨嘅一段「婚姻」，徐少強同雪梨喺82年拍《養鬼》時認識，而喺翌年雪梨仲為徐少強誕下大仔徐偉棟，87年再誕下次女徐頴堃，不過唔夠1年二人喺88年分手。

大部分人以為雪梨當年同徐少強離婚，但其實佢哋根本冇結過婚，雪梨喺2015年曾經接受訪問透露，當年生完仔後，徐少強曾經應承註冊結婚，不過簽字當日，徐少強「忘記」帶同前妻之離婚證明書，最後不了了之。

而喺九十年代晚期，徐少強返大陸發展，而佢亦喺十幾年前再娶一名細自己30年嘅嫩妻，仲生咗一仔一女。

(蘋果日報)