韓國男團EXO的27歲前中國成員鹿晗，今日忽然在微博公開認戀同劇《甜蜜暴擊》的20歲大陸女星關曉彤。
消息傳出後，震驚全城。由於鹿晗在大陸人氣極高，更擁有大批粉絲，有不少粉絲得知消息後大感晴天霹靂。而鹿晗公開有女朋友之後，疑有粉絲不堪「失戀」之痛做儍事，在微博有網民指鹿晗公開戀情後，已先後有三名粉絲跳樓及一名粉絲割脈，有人更上載跳樓片段上網，不過有女網民指該名跳樓粉絲本身有抑鬱症，自殺與鹿晗公開戀情冇關。
不過暫時粉絲自殺事件只在微博瘋傳，未知是否屬實。
(蘋果日報)
【小海綿入鏡】黃曉明Angelababy慶祝結婚兩周年
黃曉明與Angelababy（楊穎）兩年前今日（10月8日），在上海舉行童話式世紀婚禮，一度成為全城熱話，婚後至今年1月，更在港誕下囝囝小海綿，一家三口相當幸福，而Angelababy亦已收身成功並復出。
黃曉明對Angelababy甚為浪漫，婚前曾為Angelababy大搞神秘生日派對，送上過百萬元跑車。
昨日是兩人的結婚周年紀念日，黃曉明於微博上載蛋糕照片，蛋糕上見他寫有：「Dear Baby,Happy 2nd Anniversary!Love,Xiao Ming」，而其中亮點是兩串串燒代表兩年外，更見到小海綿露出肥手仔抓蛋糕，相當搞笑﹗
由於鹿晗當天公開與關曉彤的戀情時極其簡單地寫道：「給大家介紹一下，這是我女朋友。」黃曉明也搞笑模仿這一認愛金句：「給大家介紹下，這是我們兩周年！」
網友紛紛圍觀並送上祝福：「兩周年快樂啊，要好好的幸福！」看見「小海綿」的小手出鏡， 很多粉絲興奮地表示：「小手肥嘟嘟，一定很可愛！」「小海綿見證了兩周年！」
（明報即時娛樂/大紀元）
【12分鐘的自白】 成龍：做錯咗一件全世界好多男人都會做錯嘅事
17歲嘅吳卓林，日前一句「I’m gay」，公開認戀年約30歲嘅加拿大網紅Andi，身為母親嘅吳綺莉都接受愛女嘅性向，喺微博留言：「No matter how，love you always. Bless 」以示支持卓林。
卓林係吳綺莉為成龍所生嘅私生女，早於99年2月，成龍同吳綺莉傳出緋聞，兩人均矢口否認，又話關係只如兄妹。當時有周刊拍得成龍送吳綺莉返回舊山頂道的寓所；事後問兩人是否拍拖？成龍謂：「o依家啲報館嘅採訪手法似乎有啲問題，成日搵狗仔隊跟明星，其實外國都有好多狗仔隊，但唔同香港嗰啲，人哋外國狗仔隊會證實咗先寫，但香港就係『屈字堆』。我哋香港嘅電影界同報界應該要團結，惡性競爭先會令到生靈塗炭。」
同年10月，驚爆吳綺莉懷孕四個月，當時成龍笑笑口謂：「做乜問我啫！」記者再問：「有消息話吳綺莉大肚，傳嗰位武打明星係你喎？」成龍謂：「係咩？我都唔知點解。佢（指吳綺莉）都冇話係我。唉，係咩？是但啦，你鍾意點寫就點寫啦。嘿！好吖，我終於可以打低鄭伊健，成為頭條啦！」
成龍講完呢番話不足一星期，腹大便便的吳綺莉接受鄭裕玲主持的《全線大搜查》獨家訪問，問及成龍是否BB經手人，吳點點頭，單方面承認腹中塊肉是成龍的骨肉，而向來經歷慣風浪的成龍大哥，當時身在日本，對傳媒左閃右避，手足無措。
11月10日，成龍喺機場富豪酒店舉行記者會，笑容滿面高舉招牌「V」字勝利手勢，走勻全場，俾傳媒拍照5分鐘，態度合作，然後開始其為時約12分鐘的自白。成龍於訪問時，承認自己做錯咗一件全世界好多男人都會做錯嘅事，並聲稱自己係一時貪玩，更揚言如果BB係佢，佢一定會負責。
(東方日報)
【睇嘢唔好睇表面】阿嬌甜笑護男友：對我超好
Twins昨晚約九點半由長沙返抵香港，蜜運中的鍾欣潼（阿嬌）笑容滿面，面對記者連聲恭喜，她即報以甜笑，聽到記者喚她男友做「王陽明」，她即大發嬌嗔說：「哎吔，唔係王陽明！」
阿Sa在旁說：「唔好咁八卦！」阿嬌續說：「多謝大家關心，開心嘅，佢係一個體貼嘅男仔，（拍咗3個月拖？）冇，識咗3個月啫，（幾時正式開始？)我同佢都好忙，我日日拍戲拍到癲。」
對粉絲指她男友太靚仔，所以阿嬌擔心冇安全感，阿嬌說：「唔驚。」對自己還是對男友有信心？阿Sa又幫口說：「哎吔，睇嘢唔好睇表面！」阿嬌即和應：「係呀！（男友對你好唔好？）超好！」但有咩實際行動呢，佢冇解釋，但就耷低頭甜笑咗一陣。
問男友如何奪得她芳心？阿嬌想了一會說：「唔講咁多，希望大家畀多啲空間我哋，因為我好少公開戀情，亦唔識點樣公開戀情，唔識得點樣騷恩愛，所以依家好尷尬，（大家戥你哋開心？）我知，多謝，畀多啲時間、空間我哋。」
Twins跟麥玲玲同一班機返港，有傳阿嬌將自己跟男友的八字給麥玲玲算命，阿嬌即說：「吓！講咩呀，我哋同一班機啫。」她有否畀麥玲玲算計吓兩人八字？阿sa再幫口說：「我哋啱啱喺飛機度見到，邊有咁快呀！」阿嬌說：「係囉，尋日先啱啱出新聞，即刻傳成咁啦。」阿嬌並澄清她昨日在機場沒有黑面。
(on.cc東網/蘋果日報)
【模範夫妻結婚16年】張智霖：遵守承諾最浪漫
近年不少明星帶同子女一同拍攝真人騷，問到Chilam又可會考慮，「其實都有邀請過，但始終係時間問題，佢係學生要返學好難就時間。」但要出鏡又可會接受得到?「我諗佢自己都未必接受到，哈哈哈…佢好怕羞。」魔童偶然會出現在Chilam的自拍影片，都是表現得活潑好動，但原來面對外人卻是怕羞仔一名，「喺屋企係一個安全環境嘛，自己喺到玩就ok，但如果要面對咁多人我覺得佢未必可以好似其他小朋友咁自在，佢都係怕羞。」
近年不少星二代都加入娛樂圈，魔童年紀輕輕已經遺傳爸爸媽媽的優良DNA，連老婆靚靚都曾大讚囝囝靚仔，問到若果魔童將來想入行，Chilam又有何看法，「其實做藝人都係其中一行，但聽講呢個世界仲有72行，每一個小朋友都有好多可能性，所以我唔會成日著眼於佢究竟會唔會入行，呢個行業好細，世界好大。」
Chilam與老婆靚靚是圈中的模範夫妻，結婚16年依然恩愛，更不時於網上放閃 ，不過Chilam就強烈否認自己是浪漫的人，「我真係唔係，有時都會被投訴話唔夠浪漫。」不過聽到他說出對浪漫的定義，其實就已經足以冧爆，「浪漫並唔係在於品質，時常要送嚟送去，送嚟送去但係你成日都出去沾花惹草都係冇意思，反而我覺得係一個遵守，或者叫做keep住一個promise係最浪漫嘅一件事 。」靚靚有要求你做什麼浪漫的事嗎?，Chilam笑說「咁就實在太膚淺喇！」
Chilam早前過了46歲生日，身為美魔男的他無論皮膚外貌身形，依然保持得非常好，這次受訪時因為拍戲而留鬚，更多了幾分男人味，對於衣著打扮，Chilam表示私下愛輕鬆，「喺工作上我都有要求，每次出嚟希望都符合到要去嘅場合，但私底下就盡量輕鬆，平時已經好dress up，私底下就盡量casual平衡番自己生活，平時又咁行，做嘢又咁行，我唔係想要咁嘅生活。」
(蘋果日報)
【sweet過關心妍夫婦】陸漢洋搭住苟姑娘香肩慶生：沿途有妳，感謝
處女黨僅餘成員苟芸慧同男友陸漢洋近日愛得高調，喺公眾場合都開放講感情事，早前更有傳陸漢洋已送咗陸媽媽留俾佢嘅家傳鑽石鑲製而成嘅訂情戒指；另有周刊報道陸漢洋帶埋苟姑娘去半山睇豪宅，又一齊出發去意大利，被問到係咪向苟姑娘求婚，陸漢洋故作神秘話「返嚟就知」，苟姑娘一方則話「講得多冇驚喜」，搞到外界心癢癢。
日前係44歲陸漢洋生日，佢喺自己個Instagram度貼咗張相，苟姑娘當然係一份子啦，仲有關心妍同老公楊長智，陸漢洋喺留言中提到自己又大一歲，佢話：「沿途有你，妳，您…感謝…一步一生。又老一歲了。」
之後又點兄弟楊長智個名話「28 years and still keep going stronger and tighter！」咁苟姑娘呢？可能一切在心中啦，睇陸漢洋喺相中個樣，唔知係咪飲咗啲酒，面紅紅咁，影相時又同苟姑娘頭貼頭，佢隻手仲搭住喺苟姑娘香肩，個樣sweet過關心妍夫婦，一睇就知分別。
到底幾時公佈好消息啫？順帶一提，當晚呢個double couple嘅慶生飯，係喺中環一間法國菜私房菜食嘅，睇番網上食評，人均消費700蚊，評分以5星為滿分的話，平均都有3星以上，好經濟實惠吓。
(蘋果日報)
【求婚成功﹗】10‧10做老襯﹗
無綫綠葉王、曾在兒童節目中做「認字特警」的藝人李天翔，今日成功向拍拖六年的圈外女友BoBo求婚，他表示已排期準備於10號在律師樓簽字結婚，他透過電話訪問表示：「最近忙緊拍劇集《果欄中的江湖大嫂》，呢幾日忙到都係瞓得十五個鐘，終於都抽到時間去完成求婚，我唔想簽左字先去補做呢樣嘢呀!」他表示求婚過程中，女友有感動到眼濕濕，不過二人未有打算大搞婚禮，只會做簽字儀式。另外，藝人鄭世豪、陳少邦及黃嘉樂亦有出席求婚現場，祝福一對準新人。
(東方日報)
【搵應采兒訴苦】Yumiko傾電話傾到眼濕濕
大陸親子真人騷《爸爸去哪兒5》、《不可思議的媽媽》陸續登場，而小春父子、Yumiko同囡囡梁浸浸分別出演。
小春曾經講過囝囝Jasper從未同自己單獨相處過，而Yumiko亦係首次單獨帶囡囡出國。
兩個新手父母都不約而同話，希望藉着喺今次嘅節目，可以爭取多啲親子時光。
之前喺真人騷，小春同Yumiko對住仔女亦試過挫敗同氣餒過。
前者俾人話躁狂EQ低，後者就俾人話唔識湊女兼疑似爆粗。
而《不可思議的媽媽》今晚就會播出第三集，喺預告中，Yumiko就搵咗老死應采兒（即陳小春老婆）訴苦，同尋求安慰。
對住電話入面嘅老友，Yumiko仲忍唔住講到眼濕濕。
之後，Yumiko喺呢段片中留言：「低谷之後，最需要這種暖心的安慰了⋯！」
(Apple Daily)
【污垢可能會致細菌感染】產後護理小貼士
寶寶順利出世後，媽媽們未能鬆懈，產後護理是另一門挑戰。令一眾新手媽咪最難受莫過於「坐月」期間不得沖涼洗頭，究竟這些習俗是否仍適用？產後「惡露」何時完？產後多久可以恢復性行為？衞生署家庭健康服務醫生逐一解答常見疑問。
仍有媽媽堅守坐月一個月不沐浴的傳統習俗，衞生署家庭健康服務高級醫生朱敏儀表示，前人「坐月」戒沐浴是當時只有井水及河水，怕產婦受感染。今非昔比，產婦只要可以下床走動，就可開始每日洗澡，否則身體及頭髮上污垢有機會令寶寶受細菌感染。洗澡水溫要維持約攝氏三十七度，連同洗頭最好十分鐘內完成，避免着涼。
要每日勤加清潔身體的另一原因，是產婦分娩後兩至六周陰道流出經期般的血，但流量較經期多，稱為「惡露」，是子宮排出的新陳代謝物。朱醫生建議產婦每日勤換衞生巾或護墊，每次大小便後最好用花灑由前向後沖洗陰道，防止會陰傷口受感染。另外，母乳餵哺可刺激賀爾蒙分泌，有助子宮收縮，可加快排清惡露。
不少婦女關心產後多久可回復性生活，朱表示，子宮及會陰傷口一般產後兩周大致復原，惡露漸排清，只要產婦身心感到舒適，就可與丈夫行房。但朱醫生提醒，不少婦女以為月經未恢復就毋須避孕，這是謬誤。卵巢在產後約四周開始排卵，只要恢復性行為就要避孕，否則夫妻「造人」過急，家庭計劃大失預算。
少部分產婦分娩後咳嗽、打噴嚏或跳動時有尿滲情況，朱建議做盆骨底肌肉運動，有助強化肌肉控制大小便，改善因肌肉鬆弛令膀胱或子宮下垂，更可令陰道更緊緻。做法簡單，動作像忍尿般，忍耐三秒，然後放鬆，感覺陰道附近肌肉有向內及向上收緊感覺。無論躺臥、站立或坐着都可「暗暗練功」，每回做五至十次，每日三回，持續半年可見效。
產後進補養身，朱建議最好諮詢註冊中醫師意見，勿自行胡亂進補，因補品有機會引致產後出血或血壓高，某些中藥成分可經母乳傳給寶寶，初生嬰肝臟功能未成熟，或影響健康。
(on.cc東網)
【因拍劇撻着】鹿晗認戀20歲女星 導致微博癱瘓
27歲內地小鮮肉鹿晗曾為韓國男子組合EXO及中國分隊EXO-M成員，隊內擔任主唱、領舞及門面擔當。2015年加盟綜藝節目《奔跑吧兄弟》，成為跑男團的一份子。
鹿晗在今日中午12時正突然發出一條微博，稱「大家好，給大家介紹一下，這是我女朋友關曉彤」，正式公開與大陸女星關曉彤拍拖，但網友都不敢相信，以為是惡作劇或劇集宣傳。
隨後女方關曉彤回應男友，然後雙方工作室轉發祝福，連好友陳赫也留言祝福，網友才開始相信兩人戀情。
曾演出多套因為鹿晗這則微博，猶如突如其來的炸彈，有網民稱微博因此癱瘓了一段短時間不能更新最新資訊，而兩人的名字也瞬即成為微博熱搜榜的第一位。
兩人就因為合拍新劇《甜蜜暴擊》而撻着，於殺青時合照更並排一起，合照期間鹿晗舉起了3隻手指，平時的他在《跑男》只會舉起v字手勢，所以粉絲議論他這個舉動究竟代表了甚麼，而當時兩人還沒有公開戀情。
早前兩人亦被網友偷拍到約會的蜜照，看來拍拖拍了一段時間。
(on.cc 東網)