胡杏兒將於本月尾就榮升做媽媽，懷孕初期，對於腹中塊肉嘅性別，一直都保持神秘感，杏兒就話每次照超聲波，BB都摺埋重要部位，又話有長輩未返香港，要等埋先公佈。
直至上月底，杏兒同老公李乘德(Philip)就開咗一個小型派對，公佈BB嘅性別，登登登…「It’s a boy.」，係慈姑椗嚟㗎！
啲人話女人最靚嘅時刻，除咗係結婚嘅時候，就係懷孕喇，所以好多準媽媽都會喺分娩前，影番輯靚相留念，杏兒都唔例外，佢今日就同老公分別喺ig貼咗啲Baby bump shoot。
李氏夫婦就好有默契咁，黑白配咁喺ig貼圖，李太負責黑色系列，李生就貼出白色系列，真係隔住個mon都感受到佢哋啲幸福！
(蘋果日報)
莊思明(Lisa)今日喺ig貼咗啲手瘀腳瘀嘅相，原來佢日前發生交通意外，好彩人冇事，但佢就留言話：「架車撞到total loss，但我除咗撞瘀手腳之外，竟然一啲事都無！俗語有話『大難不死必有後福』，希望我嘅後福唔會太後先降臨，以後真係要小心揸車啦，因爲唔係每次意外都咁好彩！」之後佢仲寫咗一大堆Hashtag：「#o依家有d唔捨得我架gucci車仔 #以後要加倍小心 #大難不死必有後福 #drivesafe #Fiat原來好硬淨！」
Lisa今日接受傳媒訪問，佢話：「嗰日喺金鐘花園道落斜，行到轉彎，可能因為之前落完雨，冇為意地下好跣，我又揸得快咗少少，結果唔小心撞咗，我人冇事，自己可以行落車，真係好好彩，但係車房話整番都麻煩，因為啲機件好傷，叫我不如total(劏)咗佢！」Lisa仲話雖然架車揸咗5、6年，而且佢都打算換車，但係冇諗過喺呢個情況吓唔要架車：「我冇諗過佢離棄我會快過我離棄佢，其實真係好唔捨得，佢都真係好堅硬，之前Mona(莊思華)揸呢架車俾人撞過都冇事！」
Lisa亦都話楊明事後有話咗幾句，佢叫我下次小心啲，唔知喺呢段冇車揸嘅情況下，男友又會唔會做柴可夫呢？佢就話：「佢都唔得閒，我咪自己搭車囉，或者坐人哋啲車，呢個時候係一個好好嘅考驗，測驗一下邊個係我嘅好朋友，明知我撞完車，佢都肯借車俾我，呢個真係好朋友！」至於男友會唔會打算送番架車？Lisa哈哈大笑話：「唔會喇，你當佢係首富咩，我可能過幾日還神兼睇車，我心目中唔會買7人車，太大喇，怕自己控制唔到，多數會買番啲細車！」
(蘋果日報)
噚晚謝安琪(Kay)就同老公張繼聰同大仔張瞻(James)一齊去夜跑。
三口子跑之前當然要影張相打吓咭啦。
張繼聰就將相貼分別貼咗喺fb、ig同大家分享，張繼聰仲好風騷咁留言：「夜跑，非常快樂，見人少少，着番見姣豬豬背心先」
而人妻Kay都係fb轉貼老公嘅相，佢就留言話：「我叫咗佢咪鬼咁着……」呢啲隔空打情罵肖，真係好閃～
Kay就當然要操刀幫兩仔爺影張合照啦，張繼聰就姣豬豬咁着桃紅色背色，想成為焦點，但都唔及阿仔醒目，James一招騷肌，晒出一排齊齊整整嘅排骨，真係非常吸睛。
好多網民都留言大讚James：「嘩，阿仔都6嚿腹肌……犀利……搶晒阿爸鏡」
(Apple Daily)
徐榮囡囡徐心怡（包包）憑着可愛嘅外表，成功俘虜唔少網民嘅心，不過包包唔經唔覺就已經兩歲喇。
呢日徐太就喺社交網上傳咗幾張同包包開生日會嘅相，相中除咗有個兩層高嘅卡通蛋糕之外，仲有一大班同包包同年同月同日生嘅小朋友一齊慶祝。
徐太仲代包包留言多謝大家嘅生日祝福：「多謝各位uncle auntie哥哥姐姐的祝福 可以同好多朋友仔同埋幾十個同年同月同日出世的壽星仔壽星女一齊慶祝生日 包包好開心呀」
有網友仲留言話佢哋一家四口好似樣添呀！
(on.cc 東網)
藝人胡諾言（胡仔）及胡蓓蔚（豹嫂）出席起步禮活動，為一眾跑手打氣，二人都經常有跑步，更是Crazy Runners成員，不過豹嫂笑言沒有胡仔那麼經驗豐富。
談及最近有否跑步訓練，豹嫂表示這陣子較忙，上一次跑已是與姚子羚在澳洲拍攝胡說八道特輯時，坦言十分享受街道無人自由跑步的時光。
講到好姊妹胡杏兒正待產，豹嫂表示昨天才跟杏兒拍照，是她生B前最後一個工作日，因為預產期是一星期後，拍攝期間大家都十分擔心，胡定欣更笑說若真的突然臨盤會幫忙接生。
而胡仔指自己都想身體力行，但昨晚忙於拍攝劇集《特技人》，凌晨4時才收工，怕體力不支。胡仔亦指跑步真的會上癮。問到會否跟女兒一起鍛煉，他笑言女兒不足8歲，未有需要鍛煉，但正在學砌機械人及劍擊，課外活動也多姿多彩。
(on.cc東網)
現年43歲嘅藝人李漫芬（Fanny）早前宣布懷孕，雖然大住肚但佢嘅工作未有減少，密密搵奶粉錢！
不過今日佢就喺微博透露呢兩日患上感冒，但大住肚唔敢亂咁食藥：「發冷發熱，好辛苦好無助…」今朝佢仲要空肚去做嘅糖水測試，相信就係令大肚婆聞風喪膽嘅妊娠糖尿測試，令佢大呻做媽媽好唔容易呀！
佢上載咗一張醫院相，留言：「今早要做糖水測試，空肚到現在，剛第一次抽血完，等待兩小時後的第二次，我從小就怕打針，但心跟自己說之前捐血都不怕今次都不用怕。」
第一次做媽媽嘅佢對懷孕非常陌生，坦言依家先係個開始，不過好彩有老公談成坤（Alvin）陪伴，仲有好多朋友為佢解難，所以佢都話：「人生就不是每天學習嗎？！我要努力！」
網民都留言叫佢好好休息，注重身體呀！
(on.cc東網)
陳建州（黑人）同太太范瑋琪（范范）於2011年拉埋天窗後，就喺2015年生咗一對孖仔「飛飛」同「翔翔」，不時在社交網站上分享生活點滴。
眾所周知黑人十分鍾意搞怪，今次佢又有新搞作喇！
黑人今次就喺社交網上傳咁兩段佢同一對孖仔玩「遙控曱甴」嘅片。
片中飛飛、翔翔對奔跑嘅曱甴又驚又喜。
飛飛仲將放大版嘅曱甴捉起想同媽咪開心share，嚇得范范崩潰逃跑，仲係咁同飛飛講：「NO!」想嗌飛飛唔好行埋去佢度。
而喺一邊嘅黑人也笑得勁開心！難怪唔少網友都忍唔住戥范范辛苦。
(on.cc 東網)
江華日前與太太麥潔文（Kitman）現身九龍區的商場拍拖二人世界，夫婦途經護膚品專門店時，Kitman獨自入內選購，而戴Cap帽及黑超的江華則「望妻石」上身，站在門外耐心等候。
之後Kitman手持戰利品步出，見記者在場亦友善打招呼，兩公婆又大方企定定合照後才繼續往掃貨。
(on.cc東網)
陳貝兒早前承認離婚，但離婚後首個中秋節就唔寂寞，因為曾接受貝兒訪問嘅德國人妻同泰國人妻齊齊帶埋老公嚟香港過中秋，順道探望貝兒，貝兒當然要一盡地主之誼，喺中追月夜帶咗佢哋去打邊爐，一齊Re-U追月啦！
早前陳貝兒隨攝製隊出埠拍攝節目《嫁到這世界邊端》，走訪唔同地方，訪問多名異鄉人妻，大講到愛情家庭觀，失婚嘅貝兒仲多次淚灑幕前。不過呢次外景，佢都重新認識自己，決定重新出發尋找幸福。
期間，貝兒到訪過德國同泰國訪問異鄉人妻，見證了兩段sweet爆異地緣，估唔到德國人妻卡菲同泰國人妻Judy趁中秋節返咗香港呢個娘家，佢哋仲帶埋老公同行，貝兒噚晚就同佢哋打邊爐，大搞追月宴Re-U一吓，鏡頭前後都嘈到爆。
德國人妻卡菲同泰國人妻Judy雖然從不認識，但首次見面都一見如故，兩對夫妻有講唔完話題，至於見到人哋雙雙對對嘅貝兒都唔會羡慕，貝兒今日接受傳媒訪問時話：「我享受happy single，我可以有自己更多空間同時間，不過今年中秋有佢哋飛返嚟同我一齊過，真係好驚喜。」
(蘋果日報)
陳慧琳（Kelly）出席關注乳癌活動，表示自己每年都會做身體檢查。
「我係比較敏感，有少少唔妥就會Feel到，就會問朋友有冇呢個情況出現，如果持續落去就會睇醫生。」
被問到有冇試過係虛驚一場自己嚇自己，Kelly：「有試過呀！」Kelly又謂試過在奇怪位置生瘡：「唔係喺塊面，總之喺啲怪位生瘡。」
她亦表示較注重面部：「因為要上鏡，但裏面都重要，入面都反映到面部，五臟六腑都緊要。」
問到平時有否補身，她說：「飲啲湯水，生完係咁補番，依家間唔中飲吓，但唔敢飲太補，會生瘡。」
問到老公可都注重身體健康？Kelly謂：「佢絕對唔注重，我都逼唔嚟，只要佢身邊朋友有咩發生佢就會驚，所以我講冇用。（佢會定期檢查？）冇呀，佢唔妥先會檢查。」
Kelly就話擔心老公會傳染畀兩個仔：「不過佢都真係好勁，我哋全家病晒佢都冇病，係幾壯，所以我唔擔心佢，通常個仔有病，第一個就會係我病。」
(on.cc 東網)
