台灣藝人庾澄慶（哈林）去年與台灣新聞主播張嘉欣結婚後，不久就宣布造人成功，今年6月更喺社交網宣布BB出世，再次升呢做爸爸！
而剛剛榮升為人母嘅張嘉欣，產後一直未有露面，亦甚少同哈林齊齊合體，而呢日就罕有地出現喺台灣女星徐若瑄社交網度，相當難得！
徐若瑄喺社交網上載咗一張同哈林夫婦及友人吃聚嘅照片，並留言：「在這𥚃（裏）吃到用珍珠奶茶做成餅乾的小甜點！覺得很特別！謝謝哥和嫂啊！有人請客必需吃光光😎這天是不會減肥的！#快樂也很重要 這麼多都進肚子了會跑2小時 #運動是為了可以吃更多美食 很喜翻我的 #可愛復古懷舊小綠包」。
相中見到哈林企喺老婆身後，兩公婆都笑得好燦爛，精神甚佳，不過就未見BB仔嘅蹤影，唔知BB似爸爸定媽媽呢？
(on.cc東網／蘋果日報)
鍾欣潼（阿嬌）終於認戀「醫界王陽明」賴弘國！
然而賴弘國雖然被爆離過婚，阿嬌依然話想同對方開花結果。
賴弘國高大靚仔，仲要係醫生，自然討女生喜歡，有一名身材Fit爆的女生Wendy，於9月8日在fb甫與賴弘國合照，並且留言：「半年見一次老公，畢竟他事業做太大。」
有指Wendy都係讀醫科。不過Wendy之後fb在澄清同賴弘國只係學長學妹關係。
「認識我的就知道我一天24小時都在開玩笑」她更強調跟男友感情好好，幫番賴弘國洗白。而賴弘國透過任職的診所表示Wendy只是學妹，全冇感情瓜葛。
(on.cc 東網)
人夫王浩信（Vincent）早前傳出拍攝無綫劇集《踩過界》期間，曾單獨與劇中演員蔡思貝打邊爐，及後更指浩信與太太陳自瑤婚姻亮紅燈，結果要浩信澄清。
而昨晚一對緋聞男女浩信及思貝齊齊現身無綫台慶亮燈活動，起初二人拍照時有輕攬兼有講有笑，未有半點尷尬，及後更雙雙受訪，浩信對於被指揸車到思貝家樓下，他表示當日只是在該屋苑附近泊車開工，寄望外界不要再有報道傷害同事，更揚言欣賞思貝，他謂：「佢好用心，所以唔好因為拍劇傾得多而有所誤會。（太太陳自瑤誤會？）梗係唔會，過兩日我哋有活動先講。」
而思貝則澄清自己並非該屋苑住戶，當日亦只是於該處泊車，浩信聞言即謂：「你早講嘛！」思貝就坦言為此感無奈。
問到與浩信再見面會否感尷尬？她謂：「唔會，拍劇咁耐係好拍檔。（同陳自瑤熟唔熟？）拍過一套劇。（你好惹是非？）拍一套劇就會有，之前拍《踩》劇都有同張振朗傳過。（覺得好無辜？）我學習緊點同同事相處愉快之餘，而又冇緋聞。」
至於浩信被問到會否因緋聞影響自己與太太的心情？他謂：「唔會，太太知我哋係朋友，第一日拍都一齊研究劇本，話唔係Friend都冇人信。（會唔會因為呢件事避嫌？）唔需要，套套劇都要避點會拍得好。」
王浩信與陳自瑤周一（9日）下午到天水圍一商場出席活動，亦是二人自婚變的消息傳出後首度「合體」於公開活動現身。據知，二人席間會大玩遊戲，兩公婆拍住上齊齊搵真銀，相信會成為傳媒焦點。而陳敏之與囝囝雷子樂亦會出席同一活動。
(on.cc東網)
王力宏最近推出新碟《A.I.愛》後引起不少樂迷及網民正反兩極批評。
有台灣消息指有網民聲稱在相關社交網站留下負評後即遭刪文甚至被舉報，更無端端把王力宏太太李靚蕾扯落水，有部分網民更成立「鐵血蕾後刀下冤魂」網上聯盟以「呻冤」！
王力宏工作室在微博發聲明為李靚蕾護航，先指如有「涉及人身攻擊、不雅用詞、或激烈的負面言論，本公司會視情況刪除、限制留言。」並指對於有部分媒體對李靚蕾的不實報道會保留法律追訴權利。
聲明指：「靚蕾很愛護粉絲，平時會花時間私自用心整理收集粉絲的禮物、卡片、留言跟力宏與團體分享，報道所稱之『親上火線對槓粉絲』是絕無可能的不實報道。」
(on.cc 東網)
胡杏兒將於本月尾就榮升做媽媽，懷孕初期，對於腹中塊肉嘅性別，一直都保持神秘感，杏兒就話每次照超聲波，BB都摺埋重要部位，又話有長輩未返香港，要等埋先公佈。
直至上月底，杏兒同老公李乘德(Philip)就開咗一個小型派對，公佈BB嘅性別，登登登…「It’s a boy.」，係慈姑椗嚟㗎！
啲人話女人最靚嘅時刻，除咗係結婚嘅時候，就係懷孕喇，所以好多準媽媽都會喺分娩前，影番輯靚相留念，杏兒都唔例外，佢今日就同老公分別喺ig貼咗啲Baby bump shoot。
李氏夫婦就好有默契咁，黑白配咁喺ig貼圖，李太負責黑色系列，李生就貼出白色系列，真係隔住個mon都感受到佢哋啲幸福！
(蘋果日報)
莊思明(Lisa)今日喺ig貼咗啲手瘀腳瘀嘅相，原來佢日前發生交通意外，好彩人冇事，但佢就留言話：「架車撞到total loss，但我除咗撞瘀手腳之外，竟然一啲事都無！俗語有話『大難不死必有後福』，希望我嘅後福唔會太後先降臨，以後真係要小心揸車啦，因爲唔係每次意外都咁好彩！」之後佢仲寫咗一大堆Hashtag：「#o依家有d唔捨得我架gucci車仔 #以後要加倍小心 #大難不死必有後福 #drivesafe #Fiat原來好硬淨！」
Lisa今日接受傳媒訪問，佢話：「嗰日喺金鐘花園道落斜，行到轉彎，可能因為之前落完雨，冇為意地下好跣，我又揸得快咗少少，結果唔小心撞咗，我人冇事，自己可以行落車，真係好好彩，但係車房話整番都麻煩，因為啲機件好傷，叫我不如total(劏)咗佢！」Lisa仲話雖然架車揸咗5、6年，而且佢都打算換車，但係冇諗過喺呢個情況吓唔要架車：「我冇諗過佢離棄我會快過我離棄佢，其實真係好唔捨得，佢都真係好堅硬，之前Mona(莊思華)揸呢架車俾人撞過都冇事！」
Lisa亦都話楊明事後有話咗幾句，佢叫我下次小心啲，唔知喺呢段冇車揸嘅情況下，男友又會唔會做柴可夫呢？佢就話：「佢都唔得閒，我咪自己搭車囉，或者坐人哋啲車，呢個時候係一個好好嘅考驗，測驗一下邊個係我嘅好朋友，明知我撞完車，佢都肯借車俾我，呢個真係好朋友！」至於男友會唔會打算送番架車？Lisa哈哈大笑話：「唔會喇，你當佢係首富咩，我可能過幾日還神兼睇車，我心目中唔會買7人車，太大喇，怕自己控制唔到，多數會買番啲細車！」
(蘋果日報)
噚晚謝安琪(Kay)就同老公張繼聰同大仔張瞻(James)一齊去夜跑。
三口子跑之前當然要影張相打吓咭啦。
張繼聰就將相貼分別貼咗喺fb、ig同大家分享，張繼聰仲好風騷咁留言：「夜跑，非常快樂，見人少少，着番見姣豬豬背心先」
而人妻Kay都係fb轉貼老公嘅相，佢就留言話：「我叫咗佢咪鬼咁着……」呢啲隔空打情罵肖，真係好閃～
Kay就當然要操刀幫兩仔爺影張合照啦，張繼聰就姣豬豬咁着桃紅色背色，想成為焦點，但都唔及阿仔醒目，James一招騷肌，晒出一排齊齊整整嘅排骨，真係非常吸睛。
好多網民都留言大讚James：「嘩，阿仔都6嚿腹肌……犀利……搶晒阿爸鏡」
(Apple Daily)
徐榮囡囡徐心怡（包包）憑着可愛嘅外表，成功俘虜唔少網民嘅心，不過包包唔經唔覺就已經兩歲喇。
呢日徐太就喺社交網上傳咗幾張同包包開生日會嘅相，相中除咗有個兩層高嘅卡通蛋糕之外，仲有一大班同包包同年同月同日生嘅小朋友一齊慶祝。
徐太仲代包包留言多謝大家嘅生日祝福：「多謝各位uncle auntie哥哥姐姐的祝福 可以同好多朋友仔同埋幾十個同年同月同日出世的壽星仔壽星女一齊慶祝生日 包包好開心呀」
有網友仲留言話佢哋一家四口好似樣添呀！
(on.cc 東網)
藝人胡諾言（胡仔）及胡蓓蔚（豹嫂）出席起步禮活動，為一眾跑手打氣，二人都經常有跑步，更是Crazy Runners成員，不過豹嫂笑言沒有胡仔那麼經驗豐富。
談及最近有否跑步訓練，豹嫂表示這陣子較忙，上一次跑已是與姚子羚在澳洲拍攝胡說八道特輯時，坦言十分享受街道無人自由跑步的時光。
講到好姊妹胡杏兒正待產，豹嫂表示昨天才跟杏兒拍照，是她生B前最後一個工作日，因為預產期是一星期後，拍攝期間大家都十分擔心，胡定欣更笑說若真的突然臨盤會幫忙接生。
而胡仔指自己都想身體力行，但昨晚忙於拍攝劇集《特技人》，凌晨4時才收工，怕體力不支。胡仔亦指跑步真的會上癮。問到會否跟女兒一起鍛煉，他笑言女兒不足8歲，未有需要鍛煉，但正在學砌機械人及劍擊，課外活動也多姿多彩。
(on.cc東網)
現年43歲嘅藝人李漫芬（Fanny）早前宣布懷孕，雖然大住肚但佢嘅工作未有減少，密密搵奶粉錢！
不過今日佢就喺微博透露呢兩日患上感冒，但大住肚唔敢亂咁食藥：「發冷發熱，好辛苦好無助…」今朝佢仲要空肚去做嘅糖水測試，相信就係令大肚婆聞風喪膽嘅妊娠糖尿測試，令佢大呻做媽媽好唔容易呀！
佢上載咗一張醫院相，留言：「今早要做糖水測試，空肚到現在，剛第一次抽血完，等待兩小時後的第二次，我從小就怕打針，但心跟自己說之前捐血都不怕今次都不用怕。」
第一次做媽媽嘅佢對懷孕非常陌生，坦言依家先係個開始，不過好彩有老公談成坤（Alvin）陪伴，仲有好多朋友為佢解難，所以佢都話：「人生就不是每天學習嗎？！我要努力！」
網民都留言叫佢好好休息，注重身體呀！
(on.cc東網)
