中秋節，唔少傳統嘅中式餅店一早就磨拳擦掌，搶佔市場，而霆鋒嘅鋒味曲奇，近年亦加入戰團，喺中秋搶佔一席。
又係老闆又拍劇仲要做大陸騷，不過中秋節，就算再忙，霆鋒都會抽時間，陪吓屋企人團團圓。噚晚霆鋒就貼咗佢同老竇謝賢、媽咪狄波拉嘅合照。佢哋仲即席示範咩叫「舉頭望明月，低頭吃蘋果」嘅表情。
簡簡單單兩張相，就睇到謝氏一家嘅表情，有着微妙嘅變化。而網民都笑佢哋果然係出自演藝世家，做個表情都到位過人。
(蘋果日報)
【我叫…】鍾麗緹細女考拉改名、跟張倫碩姓
鍾麗緹歲幼女考拉（Cayla）接拍電影《精靈﹒格格》。
考拉在戲中飾演小格格，電影將於2019年新年上映。
鍾麗緹表示今次是考拉第一次拍古裝戲，所以感到新奇及開心。
同時，考拉已經跟後父張倫碩姓張！
原名「嚴稚棱」的考拉，最近改名為「張凱琳」。
(on.cc 東網)
【21年後一樣咁靚】高海寧晒婆孫照超溫馨
高海寧（高Ling）雖然工作忙碌，但佢嘅婆婆專程由南京嚟香港，所以呢個乖孫就當然要抽時間陪吓對方，尋晚梗要一家人做節食飯過中秋啦！
佢喺Instagram上載咗同婆婆一齊嘅對比照，留言：「一轉眼，21年了！我最心愛的外婆，您一定要健健康康，繼續陪著（着）我、一直陪伴著（着）我…#婆孫情#彼此的一生中最愛#你陪我長大我陪你到老！」
當年大概9歲嘅佢挨實婆婆，雙手捉實婆婆膊頭笑得勁開心！而今年嘅佢「複製」當年合照，同婆婆做番一樣嘅表情動作！網民都激讚高Ling冇變過，細細個已經係美人胚子又下巴尖尖，唔同嘅只係戴咗副眼鏡，又話婆婆都係咁靚，叫佢要身體健康咁話，真係隔住咗個Mon都覺得佢哋好溫馨呀！
不過有搞笑嘅網民就留意到另一樣嘢，覺得當年高Ling隻手個感覺有啲怪怪咁話「右邊隻手好恐怖」，相信都係角度問題啫？？！！
(on.cc東網)
【一齊慶祝11周年】蔡一智夫婦促成楊生楊太好姻緣！
關心妍同老公楊長智相愛十一周年，佢哋兩公婆約咗蔡一智同太太周雪芳出嚟慶祝。
因為咁啱今年係蔡一智同周雪芳結婚十一周年，兩位人妻都收到老公送嘅鮮花，認真幸福！
關心妍喺社交網發文話：「雖然每年都講，雖然講了十一年，但還是要感謝你們倆（蔡一智和周雪芳），將這幸福Yangjonas介紹給我！Happy 11th Anniversary！拍拖十一周年快樂 ，結婚十一周年快樂。」
其實十一年前係蔡一智夫婦介紹楊長智畀關心妍認識，促成咗呢一段咁幸福美滿嘅姻緣！
楊長智亦有發文表示要多謝蔡一智和周雪芳：「祝你們結婚十一周年快樂，多謝關心妍。拍拖十一周年快樂， Alllove。」
(on.cc東網)
【洗米華陪完Mandy】洗米仔晒中秋節全家福撐Heidi：The Chau family
43歲澳門賭業猛人周焯華（洗米華），同正印陳慧玲（Heidi）及情人Mandy Lieu三角關係，喺洗米華極力挽救下，成功冧掂老婆Heidi撤銷離婚申請，又用銀彈政策o氹掂Mandy Lieu留英國。
洗米華上月被影到喺倫敦Harrods陪Mandy行街，搭電梯去睇童裝嗰陣，不過洗米華喺嗰兩程電梯好熱情，主動擰轉後面錫咗Mandy四、五次，之不過8月嗰陣，洗米華都有陪家人歐遊，兼準備大女周梓潼（Virginia）喺英國開學嘅嘢。
噚日係中秋節正日，當然要陪住家人食飯做節，咁洗米華都有返去「交人」，洗米華大仔周柏豪就喺社交網貼咗家庭相，相中見周太Heidi、細妹周羨潼、爸爸洗米華同爺爺，留言：「Happy MoonCakeDay from the Chau family!」
兩父子仲一齊飲酒，兼帶住戴有燈嘅眼鏡鬥chok。
(蘋果日報)
【KellyBB扮兔兔】Jacques Avner 玩燈籠過中秋
鍾嘉欣早兩日同囡囡Kelly、仲有怕醜脊醫老公Jeremy，一家三口喺加拿大返港過節。
錫女錫到燶嘅嘉欣BB，趁住中秋節正日，幫囡囡着咗件粉紅兔仔衫。o依家14個月大嘅Kelly，眼仔碌碌越大越靚女可愛，仲越嚟越似媽咪o忝。
至於同樣得意嘅，仲有周汶錡(Kathy)兩個囝囝Jacques同Avner。啱啱Kathy就貼咗兩兄弟拎住燈籠過中秋嘅相。兩歲大嘅Jacques，依舊cute到震，呃like絕對冇難度。
至於越大越似哥哥嘅Avner，亦都搶咗唔少鏡。
對住呢幾個得意星二代，唔使食湯圓，都甜到漏！
(蘋果日報)
【想囡囡做和平公主】鄺文珣：冇特別去擇日生
現年42歲的鄺文珣（May）於上月25日剖腹誕下6.36 磅B女 Chesney。
日前她在社交平台分享喜悅，晒Chesney靚腿。
鄺文珣回應傳媒：「我哋冇特別去擇日生，只係揀25號生。」
「而Chesney個名其中一個意思係peace同peaceful，我都好想佢好似主耶穌基督咁係一個prince of peace ，咁佢就係一個princess of peace 。」
而B女亦遺傳了媽媽眼睛碌碌，十分可愛。
(on.cc 東網)
【做慈善都咁Sweet】靚靚Chilam似時光倒流互餵食雪糕
繼之前Ice Bucket Challenge（冰桶挑戰）之後，最近又掀起另一股熱潮，就係Ice-cream Challenge（雪糕挑戰），玩法係兩名參加者必須矇住雙眼，用一隻手喺一分鐘之內互相餵對方食完一支甜筒。而最近藝人袁詠儀（靚靚）被tag中接受挑戰，佢就揀咗老公張智霖（Chilam）做Partner，做善事之餘，仲大晒恩愛，隔住個Mon感受到甜蜜滿瀉！
靚靚喺社交網分享短片，片中靚靚化身主持訪問Chilam，Chilam表示今年拍咗個訓練導盲犬嘅節目，體驗到視障人仕「人狗合一」嘅重要性：「導盲犬同對眼一樣咁重要，帶領去唔同地方。動物幫到人類，人類亦幫到動物，今日最重要帶出互助呢個訊息。」
喺挑戰嘅一分鐘裏面，靚靚同Chilam好落力餵對方，同時「摩打口」食雪糕，不過靚靚似乎就唔準Chilam個口，不斷隊到佢塊面同下巴，搞到Chilam忍唔住話：「喂！下巴嚟㗎！高啲得唔得？」
跟住又到靚靚出聲：「喂！轉吓啦喂！」二人好似時光倒流咁返回青春年代，互餵Sweet到爆！
唔少網民留言大讚「Wonderful couple」，仲話做慈善都要咁Sweet，唔戴太陽眼鏡真係唔掂呀！
(on.cc東網)
【為囡囡推Job失七位數】謝安琪：咁樣係聰明㗎
樂壇天后謝安琪自今年三月誕下女兒張靖（Karina）後一直深居簡出，專心照顧一對子女，搵奶粉錢重任全交由丈夫張繼聰。
前晚即迎月夜，老公不在身邊的謝安琪在社交網分享帶同一對仔女參加所住的屋苑舉行的中秋派對照片，焦點所在當然是小女主Karina，不過首次去「中秋P」的Karina出巡只有十分鐘，要急急回宮！
昨日張繼聰由佛山趕返香港，就是和太太及子女共度中秋節，認真廿四孝！由於這是Karina首個中秋節，張繼聰在家中來個全家福，相中更見他們家中貼滿不少子女的照片。
謝安琪接受電話訪問時，笑言不想難為女兒，所以見她喊即離開派對，更說怕醜等於聰明！她說：「鄰居見到佢都哄埋去話：『喂！你成個張繼聰咁嘅？』佢係怕醜，因為佢開始認人，其實啲人話咁樣係聰明㗎！因為佢開始諗嘢識得認人。」
向來愛吃月餅的謝安琪，直言因要減肥而盡量忍口，她說：「當係喺日本超市試食咁用牙籤拮住、食一個手指尾咁細。因為坐月時補得太勁，搞到自己係肥寶寶，依家同標準體重爭十幾磅，唔算遠！我肥極都面尖尖，影上半身呃到人！但個肚皮仔要加油，朝朝跑步！（要收身因復工？）生完想重整吓，嚟個乾坤大挪移，借呢個機會認真做運動，人生fit一次！以前我跑兩步都腳軟，好渣！」
雖然謝安琪未收身成功，但原來由產前到產後，一直都有不少商演及廣告商以甘詞厚幣力邀，為湊女至今已推掉至少7位數字的收入，認真肉痛，更言最快要兩個月後才正式復工！她說：「日日都有好多（邀請），唔係講笑！佢哋透過Facebook、email等等渠道，無孔不入send message搵我。價錢比我生B前仲高，可能大家少見咗我，願意付出好多，有時諗起都肉赤，因為我係咁推。有啲我推咗三四次，佢哋好好，係咁keep住問我幾時可以。之前有人搵我影嘢，但唔啱時候，因為餵緊人奶、補身補到脹卜卜，佢哋好體諒。（推咗七位數？）嘩！真係有！拍廣告嘅話，最快都要一兩個月之後。（價高者得？）睇誠意同質素多啲。」
於昨日凌晨五時許趕返香港張繼聰，他接受東網電話訪問時，對於Karina只現身「中秋P」十分鐘，他說：「一定會有生保嘅過程，我覺得ok，女仔有啲矝持係好，唔好邊個埋嚟都無任歡迎，男仔可以開朗啲。下次唔使驚，爸爸保護佢！囡囡好黐我，我好冧，終於明白前世情人呢句說話，中秋除咗同老婆浪漫食飯，都要同囡囡慶祝中秋，我都好掛住佢，因為嚟緊呢兩個月，都係兩部電影叠住，中港兩地走，雖然辛苦啲，但都想有抽多啲時間盡量見佢。」
(on.cc東網)
【逆齡係遺傳？】張彥博撞跌嫲嫲致斷骨超內疚
今天（5日）踏入37歲的張彥博最近雖然忙於拍攝無綫新劇《跳躍生命線》，但向來重視家人及節日的他，為了趁中秋佳節向各界送上祝福，早前特意抽空拍攝歌曲《圓缺》MV，更請來已達93歲高齡的嫲嫲客串演出，令整個MV更加充滿愛。
現場所見，嫲嫲完全不像已經年過90歲，氣色極好的她，不但行動自如，更能精靈地回應博博及導演的要求，又不時與現場工作人員閒聊，既可愛又活潑，看來「逆齡」這個特質絕對有遺傳。
雖然嫲嫲咁精叻，但博博還是大為緊張，除了趁不用埋位時與嫲嫲聊天外，每當轉場時，他都必定拖實嫲嫲一齊行，場面溫馨。
談到MV推出未夠一日，即獲不少粉絲大讚感動，博博笑言自己拍攝時亦不無感動：「我拖住嫲嫲一齊行嗰幕，睇番Playback，見到嫲嫲嘅背影，我都好感動。因為我細個係爺爺嫲嫲同姨婆湊大嘅，所以同佢哋Close。好記得大概六歲嗰陣，有次做完節返屋企時，我撲上嫲嫲嘅背脊度想佢孭我，不過因為我太肉緊，竟然撞跌咗嫲嫲同搞到佢斷骨，但嫲嫲從來冇怪過我，而我後尾知道好大件事，所以內疚咗好耐。自此，我就更加珍惜嫲嫲，因為我知道佢係最錫我嘅人之一。」
博博又笑言嫲嫲後生時十分靚女，是男生們典型愛追求的窈窕淑女。而嫲嫲接受訪問時，亦大讚阿博重親情兼孝順：「我哋都知佢好忙，成日冇覺瞓，但只要佢得閒，佢一定會返嚟同我哋食飯，就算幾咁趕都好。」
(on.cc東網)