準新娘被野生捕獲。。。
韓國神劇《太陽的後裔》兩位主角宋仲基同宋慧喬今年7月忽然認戀兼宣佈下月31號結婚，兩人早前飛到美國影婚紗照，近日更飛到去法國巴黎預支蜜月。
連日來，雙宋喺巴黎都被捕獲，當中有網民就喺法國Le Bon Marche商場撞到喬妹蹺實宋仲基行街，噚日又有粉絲公開兩人喺街頭嘅相片，而喬妹亦有公開其正面相，由於腹部微隆，即時惹來大肚疑雲。
噚日深夜有網民公開咗雙宋嘅合照，雙宋仲要好大方，唔避忌與同鄉影合照，企定定任影。照片中，喬妹素顏上陣，穿上長褸，手挽Hermès手袋影靚相，雖然喬妹冇化妝，但依然好省鏡，而佢外套下，穿上白色衫，其中一張相，明顯見佢腹部微隆，令人覺得佢懷孕之說，更加似層層。
另外，有網民就指收到喬妹經理人方面嘅短訊，要求佢哋刪除喬妹合照，唔知係唔係怕被人指懷孕？
(蘋果日報)
好多人尋尋覓覓，經歷過好多次情傷先搵到真愛，張達倫上年同青梅竹馬兼同學Kimmy結婚，仲造人成功，好快有仔抱。
要講到識得最耐最耐嘅，一定係DJ少爺占（甄子康），佢同太太Tina係幼稚園同學，兩人喺中學時重遇，拍咗17年拖，秘密喺06年情人節結婚，呢件事低調到原來商台同朋友都唔知，兩人愛情結晶品喺14年出世，之後一家三口時不時出街都俾人見到，幾溫馨㗎。
吳尊同樣都選擇咗秘婚，喺09年同高中同學林麗瑩結婚，11年被踢爆唔認數，直到13年先承認老婆身份，o依家育有一子一女。最近吳尊仲帶埋阿仔Max同阿女Neinei拍大陸節目《爸爸去哪兒5》。
吳雨霏15年宣佈同初戀男友洪立熙喺美國註冊婚婚，兩人識於微時，曾經三離三合，最後都可以拉埋天窗。今年初結婚2周年，Kary發表愛的宣言，讚老公係「最善良最有愛心最man的男人」。
早前朱千雪被發現同圈外醫生男友拍拖，佢喺活動上話同男友識咗29年，但最近先有感情發展，兩家人仲熟絡到一齊去旅行。至於係咪封盤喇？佢雖然話唔識答，不過睇個笑容，相信都近喇。
(蘋果日報)
袁詠儀（靚靚）到老人院出席慈善活動，期間與老人家玩遊戲。
講到好友郭富城終於大方講囡囡，問到探了BB未？靚靚表示：「未有機會，其實佢生咗有通知我哋，但我生過都知，唔想咁快去騷擾一個新手媽咪，大家講一句會令佢哋亂，所以過多一頭半個月等佢哋熟手先探，點知到之前想上去探時，但城城又唔喺度，冇理由自己踩上去。」
她亦謂未睇過BB的相，但講到城城謂BB似迷你版的自己。
靚靚就謂：「女仔似好唔好呢？不過東莞妹一定靚！」一次過讚埋同是東莞人的城城及自己。
靚靚又踢爆城城近來唔見人：「之前我哋話生完，啲人陪老婆坐月，佢就話使乜陪，點知到佢就真係唔見咗人，但佢真係好爹哋。（連電話都冇覆？）有覆，但冇出嚟，都明佢想陪老婆。」
問到會送咩禮物畀BB，靚靚就話：「本身想送BB嘢，但佢都大把，可能到時同沈嘉偉一齊打個金牌。」
問到可會與BB上契，她笑言：「依家唔興啦，不過我個仔係沈嘉偉嘅契仔。（契咗佢當你個女？）我又唔拘，如果城城肯我就肯，我得閒可以幫佢湊B。」
（on.cc 東網）
連串美容事故未有嚇怕一眾愛美女士，有美容師為免上身，在網上直接出售透明質酸針劑，更以郵寄方式，把身份保密。
有賣家隱身於商業大廈、旺區商場小店內出售。
皮膚科專科醫生警告，透明質酸針劑必須存放在醫療雪櫃內，若注射透明質酸針劑失敗，導入血管內會令血管栓塞及皮膚壞死，甚至填充物料會導致失明及中風。
網上交友平台不難發現不少自稱美容中心的帳號，明目張膽貼出各式各樣的透明質酸（又稱玻尿酸）針劑，售價由800至2000港元不等，甚至有客人注射透明質酸的前後對比圖片。不少賣家未有列出售賣地點，亦沒有相關美容中心資料。
含有透明質酸作為有效成分而供注射入人體的藥劑製品屬第1部毒藥及醫生處方藥物，必須由醫生或按醫生指示使用，亦須在註冊藥房由註冊藥劑師或在其監督按醫生處方才可售賣。任何人非法售賣或管有，一經定罪，每項控罪最高可處罰款10萬港元及監禁兩年。
網上亦有多名賣家表示只會以郵寄方式出售，不會進行面對面的交易，有賣家表明以往曾為女士注射透明質酸針劑，但因近月多宗美容事故發生，令她「怕怕」，擔心會被「累死」，故現時只作郵寄出售。
立法會議員郭家麒批評，透明質酸針劑已納入第一部毒藥及醫生處方藥物，但衞生署多年來仍疏於執法，擔心美容事故持續發生，會將有關議題再次在立法會討論，促請衞生署執法。
衞生署發言人指，由2015年至今年7月，該署處理共131宗因銷售或管有未經註冊藥劑製品而被定罪的個案。另外，根據《進出口條例》規定，從香港境外進口藥劑製品的人士，必須事先向該署申領進口許可證，違例者一經定罪可被罰款50萬港元及監禁兩年。
（on.cc 東網）
對付腰酸背痛或運動肌肉拉傷，不少人選擇貼一塊冰感清涼的止痛貼。麻醉科專科醫生提醒，市面上不少止痛貼含甲基水楊酸等消炎藥物成分，部分長期病患者、對藥物敏感、十二歲以下兒童、孕婦等不應胡亂使用。此外，止痛貼種類繁多，有溫涼之分，選購前宜了解產品配方。
麻醉科專科醫生李而安表示，市面上可自行購買的止痛貼不少含甲基水楊酸，雖然屬於非類固醇消炎藥物，但結構與阿士匹靈相似，對相關藥物敏感和胃出血人士忌用。曾有文獻指出，十二歲以下兒童使用阿士匹靈類藥物，長遠可增患雷氏綜合症風險，導致脂肪肝和肝衰竭。她說：「用一塊半塊，影響看似不大，但不少人慣性每日使用。」
此外，部分標榜「效力較強」的止痛貼，常見成分更包括雙氯芬酸鈉和酮洛芬等須醫生處方的消炎藥物，多用於較嚴重的退化性關節炎和明顯創傷。這些藥物成分有機會引致胃炎、胃潰瘍等副作用，長遠可影響心、肝、肺、腎等器官功能。患心臟病、腎病和哮喘人士應小心使用。孕婦應避免接觸這些消炎類藥物，以免經皮下吸收影響胎兒健康。
止痛貼滲透皮膚後可產生局部刺激性效果，原來有溫感和涼感之分。含薄荷醇的涼感止痛貼對運動後的急性肌肉關節紅腫和酸痛，有冰敷冷卻功效；含辣椒素的溫感止痛貼則適用於慢性炎症和肌肉勞損。她提醒，皮膚容易敏感人士，宜選用辣椒素含量不高於百分之一的產品，以防出現痕癢、發炎甚至灼傷。大部分藥膏狀的止痛產品，藥物劑量和刺激度比止痛貼低，適合容易過敏人士使用。
她提醒，使用止痛貼時應避免額外進行熱敷，以免因體溫上升而吸收過多藥物。若使用止痛貼後皮膚出現敏感徵狀，應即時停用並以清水沖洗。止痛貼只能發揮短暫紓緩效果，若持續痛症應及早求醫，對症下藥。
止痛貼常見功效及成分：
功效 / 成份 / 注意事項
~消炎止痛 / 甲基水楊酸(Methyl Salicylate)、雙氯芬酸鈉*(Diclofenac Sodium)、酮洛芬*(Ketoprofen) / 對阿士匹靈敏感、胃病、心臟病、腎病、哮喘、十二歲以下兒童、孕婦等人士忌用
~產生冰涼感覺 / 薄荷醇(Menthol) / 適用於運動肌肉酸痛
~產生溫熱感覺 / 辣椒素(Capsaicin) / 適用於慢性炎症和肌肉勞損，皮膚敏感者應小心使用
*須由醫生處方
(資料來源：麻醉科專科醫生李而安)
(東方日報)
王祖藍同李亞男喺2014年高調在台慶直播中求婚，15年完婚，到依家都係過住二人世界。唔少人會催佢哋生小朋友，但祖藍就話一定要完成手頭所有工作，明年先開始努力造人。
記者好奇一問：「又唔係你陀BB，點解要停晒所有工作？」祖藍突然收起笑臉，好認真咁話：「我驚佢抑鬱呀！佢會㗎，一定要我陪住㗎。」原來兩人婚很不久，王祖藍就接拍大陸劇集《哪吒與楊戩》，上咗橫店3個月，當時亞男試過入院，但身邊冇人陪住，祖藍一直好內疚。
「跟住佢真係抑鬱呀，試過自己無啦啦喺屋企喊，爸爸媽媽唔喺身邊，嫁咗個老公又唔喺身邊，咁點呀？嗰件事之後，我就冇再接電視劇同電影喇…佢剩係要我，我唔喺度，佢就空虛，咩人喺度佢都空虛㗎啦。」
祖藍同亞男喺06年相識，第一次見面，祖藍已經對呢個女仔有深刻印象，佢話﹕「見佢拎住個名牌袋，入面有本聖經，而最有趣嘅係咩呀，佢個手袋原來係A貨嚟嘅，哈哈，哎呀對唔住。」祖藍話當時兩人已互生情愫，但自己仲做緊兒童節目，收入唔多，而亞男係華姐冠軍，要拍拖真係困難重重。
佢話﹕「祈過禱覺得唔平安呀…..真係唔係竹門對竹門，嚇死佢屋企人呀！佢屋企人嗰時約咗我出嚟傾吓偈，佢屋企係上海好有教育嘅家庭，父母喺藝術大學畢業，諗住生個亞男咁嘅女，第日都可以嫁名門望族，啲闊太見佢都會話『呢個係我新抱就好喇』，佢真係乖到飛起。但一下子見到我，唔係剩係矮呀，仲有咩咩咩慳啲啦Baby呀，咩嚟㗎，我個女點解會同個唔男唔女嘅人一齊呀？畀我都驚啦，所以好明嘅。」
結果佢哋拖拖拉拉，到咗09年先開始拍拖。祖藍笑謂：「其實亞男都唔鍾意我扮女人，佢見到我扮梁朝偉會話『哎呀好靚仔』，我都唔知點解？作為一個基督徒，我覺得自己應該係落咗佢降頭0架。佢為咗我決定唔返加拿大喎……佢真係可以嫁好啲，你唔好計依家嘅我吖，佢同我一齊嘅時候我都未……咁富有。」
(蘋果日報)
田蕊妮今日40歲生日，相識滿天下的她昨晚獲一班好友包括唐詩詠、鄭嘉穎、薛凱琪及阮兆祥等，聯同丈夫杜汶澤大搞生日派對。
身為愛妻號的阿澤向來創意無限，為老婆大人特意訂造一個Super Woman造型的蛋糕，寓意阿田為女強人！
阿澤在社交網上載甜蜜合照時留言：「佢十八歲生日嗰一年，響 karaoke 搞，我響度，我真係響度！今日佢四十大壽，我又點會錯過呢？」
阿田則冧爆回應：「我18歲生日嗰年，你係我個friend，今日我40歲你係我老公！緣分嘅嘢！老公，多謝你」。
另外，踏入四十歲展開人生新階段的阿田，有感而發的回顧過去，並為寫了一封《給自己的信》，不少網民看後都說非常感動，更鼓勵她繼續加油！
《給自己的信》：
「二十多歲，總想快點長大！世界只有男朋友跟朋友，常常裝作很成熟喜歡交一些比自己年長的朋友，以為已經歷夠多跟他們說覺得自己很老，幸好他都大方沒有找人打我。
到了三十多歲，進入矛盾一生的過程，想事業好，想婚姻好，想家人好，以為悟到些少人生道理，幫自己定下一個完美的藍圖，對於好與壞有一個個人的標準。直至媽媽讓我深切地經歷了老，病，死。徹底改變了我。
如今踏入四十，我只祈求自己能有一顆慈悲的心，一對智慧的眼，重新出發去面對一切幻象。放輕鬆，帶多點歡樂與關懷給認識與不認識的朋友。未知十年後的當年今日再看到這封信又會是如何呢？」
(on.cc 東網)
唔單只媽媽靚，混血囡囡都好靚啊。。。
38歲嘅「嚴謹」張達倫(Max)，去年同青梅竹馬嘅舊同學陳鳳玲(Kimmy)結婚，今年4月宣布造人成功，仲拍片放上網報喜，心情超級興奮。預產期喺下個月嘅Kimmy，日前仲喺朋友圈，分享咗幾張同老公張達倫影嘅靚靚孕照。
就生得嘅Kimmy個肚好似籮咁大，佢揀咗一套黑色同一套白色嘅性感紗裙影相，相反Max就無趁機會騷肌，只係着咗白恤衫同西褲，而其中一張仲有Kimmy同前夫所生混血女兒，事關張達倫同Kimmy囡囡關係一向好好，而且就嚟多個細佬，囡囡都好開心。
除咗美孕照，Kimmy仲分享咗一張囝囝嘅4D相，之前講笑話老友黎諾懿囝囝叫「小春雞」，佢囝囝秋天出世叫「大秋雞」嘅張達倫，接受傳媒訪問就話：「係呀！老婆預產期喺下個月，未改名呀，已經請咗家傭姐姐，但冇請陪月，因為老婆話自己搞得掂，同埋想自己照顧番，家傭姐姐就幫手做下家務。」問張達倫有冇攞定侍產假陪老婆？佢就開心咁話：「有假放呀！本來有個劇要返大陸，咁啱成個刻推遲咗到明年初先開工，咁一定可以留喺香港陪老婆生喇，因為老婆想順產，所以都緊張架，隨時要攞走佬袋入醫院架嘛！」
(蘋果日報)
陳豪近日到商台宣傳，講到近期圈中不少型男都操肌變大隻佬，佢就自己只係初級，要操到中級先至會收手，希望再大隻啲，練多啲肌肉，仲會親子做運動。
陳豪話：「阿仔會叫我騷肌肉佢睇，我就指住話係老鼠仔，第日會去咗你度，跟住阿仔仲扮老鼠仔。」
「平時會同小朋友做運動，踢波、游水都玩吓，大仔就比較文靜，鍾意睇書，三個小朋友性格各有不同，二仔最似我 ，大仔似足媽咪，連胎印都同媽咪右腳同一位置，囡囡就好獨立，集合我同太太，好彩三個小朋友個樣都似媽咪，似Daddy就好大鑊喇。」
提到佢有份主演嘅《使徒行者2》， 陳豪話自己返到屋企好繁忙，要照顧小朋友，等佢哋瞓晒覺先可以食飯，唔得閒追劇。
問佢同老婆係咪少咗二人世界，陳豪話：「我好尊重夫妻關係，我哋會抽時間做呢樣嘢，計劃每年一次二人世界旅行，另一個係family一家人旅行，不過暫時要籌備二仔入學，未得閒計畫二人世界旅行。」
（on.cc 東網）
藝人伍詠薇與老公練海棠結婚18年，一直表現恩愛，去年老公被爆密會大胸女，搞到要老婆出來執手尾，向傳媒鞠躬道歉，最終伍姑娘亦原諒老公，事件總算雨過天青。
日前下午5時，戴帽及太陽眼鏡的伍姑娘，穿上黑色背心連身裙現身中環，身形甚fit的她打扮如少女，之後步往附近一間裁縫店會合老公，約半小時後，見伍姑娘與老公前後腳離開，練海棠邊行邊戴回黑超，當見到記者拍照，伍姑娘即笑笑口向鏡頭揮手打招呼，而練海棠亦急急搭住老婆膊頭交戲，全程任影唔嬲。
另一晚，伍姑娘與老公就相約張智霖、袁詠儀及蔡一智夫婦等前往大坑搵食，沿途見Chilam不時手指指兼「頭岳岳」搵路，未幾練海棠發現有記者，又即刻十指緊扣拖住伍姑娘行，大晒恩愛！其後一行人齊齊進入了附近一幢大廈開餐。
(東方日報)
