(DO姐)鄭裕玲今日(12/12/2017)到邵氏影城，出席方逸華追思會。
她接受傳媒訪問時提到方逸華的難忘事：「最難忘是邵逸夫獎啦，由2003年六叔創辦的第一屆邵逸夫獎，已經搵咗我做司儀，(六叔六嬸)非常緊張呢個獎項啦。
由03年至今都做司儀，每年方小姐都會好用心，每樣擺設都會關注，做咗十幾年都係咁樣，同埋每年方小姐都會book一次 1廠去run一次，最感動係方小姐每年都會去後台，親身多謝我同另一位司儀，但其實喺我心目中，你係一位老闆，都唔需要咁樣做，仲會帶埋禮物嚟多謝我哋。
今年見到方小姐冇出現，但都聽到周邊人話佢有嚟過，當時我就無為意啦，直至佢過身嘅消息知道咗後，就覺得好突然囉！」
DO姐坦言，方小姐是一位好傳奇的女性，由歌手變成顯赫的人，她很努力，亦很有生意頭腦，於十多年來，與她的接觸，覺得她是一位很謙虛的人，對所有人都好關懷，毫無架子。
問到六叔、六嬸相繼離開，可覺得邵逸夫獎的義意已改變？
她說：DO姐話「咁又唔會，因為已經Run咗十幾年，都好順暢，相信明年都會繼續，一路繼續，一路咁Run落去。」
(蘋果日報)
蔡卓妍(Sa)自從被爆同「麻雀大王」後人兼百億闊少石恆聰(Anthony)拍拖之後，阿Sa雖然喺公開場合好少講戀情，一得閒佢都做跟得女友，今年7月先同男友同遊日本，日前二人仲一齊去咗印度，阿Sa有喺Ig貼相，之但係佢貼嘅都係單人相，行吓景點咁。
今日有周刊指，此次印度之行，似乎石家出席友人婚宴，阿Sa同男友家人一齊過去，男友胞妹石佩藍都有貼出同阿Sa嘅合照，早前又貼咗一條佢哋喺印度飯聚嘅片，片中阿Sa更扮印度西施跳舞，一早已融入石家。
據報道指，二人拍拖一年，感情好穩定，不過阿Sa同Anthony工作都忙，因為好珍惜相處嘅時間，之前阿Sa接受訪問時都講過出道以嚟一直都忙喺工作上，目前會抽多啲時間享受生活，多啲私人時間。
早前阿Sa被影到同男友去中環行街，阿Sa喺名店睇中個手袋，Anthony即畀錢，加上男友為人細心同孝順，知阿Sa唔太鍾意去人多嘅地方，又遷就到阿Sa嘅生活習慣，難怪阿Sa拍拖以嚟，keep住春風滿面，睇嚟好快好事近。
(蘋果日報)
下年情人節係吳岱融(鷲哥)同鍾淑慧結婚22周年紀念，吳岱融為o氹老婆開心，專登唱咗首國語歌《回去愛你十億秒》送畀太太，兩人鮮有以夫妻檔合體
日前喺葵涌拍攝MV，展現唔少親䁥鏡頭，吳岱融同太太深情又攬又錫，好鬼sweet。
吳岱融做番老本行唱歌，而鍾淑慧就做MV女主角。
吳岱融話首歌內容講男人為事業忙，忽略太太，想鼓勵人珍惜husband and wife，大約都係十億秒。歌詞中都有自己心聲，類似係講男人唔應該要女人流淚咁。鍾淑慧聽到好冧豬，佢話：「第一次版Demo雖然唔係老公唱，但都幾打動女人心，好有吸引力，我都俾啲姊妹聽，大家好有同感，老公平時只會唱人哋啲歌。」
首歌叫人珍惜夫妻關係，鍾淑慧冧晒。
吳岱融廿幾年前曾經做過一段時間歌星，至近年先再開金口，首歌預計喺下年情人節，即結婚周年紀念日先放上網推出，不過唔使問，楔係已經送咗俾太太先，兩人仲話有啱嘅工作唔抗拒夫妻檔上陣。
鍾淑慧幫老公影相
鍾淑慧嚟唔切收身，吳岱融讚老婆其實keep得幾好。
年輕時兩人的婚照
今次mv 20歲既仔仔都有參與幕後剪接
(蘋果日報)
藝人陳國峰（Penny）去年同太太黃思雅結婚後，喺今年9月喜添囝囝梓燐（峰之子）。
時間過得好快，眨眼間「峰之子」已經3個幾月大，呢日陳國峰就幫佢搞咗個簡單百日宴，之後仲喺社交網分享靚相謂：「梓燐百日宴，有個咁靚咁特別嘅蛋糕，真係特別高興 #峰之子 Day100」
相中見陳國峰一家三口齊齊現身，雖然佢哋冇着上親子裝，但「峰之子」一身白色斯文Look就非常Sharp醒，真係夠晒搶鏡。
而講到最特別嘅，當然唔少得好友送上嘅百日宴蛋糕，呢個蛋糕造型精緻，蛋糕上仲企有一個長大後嘅「峰之子」公仔，個公仔嘅打扮仲要同「峰之子」嘅百日宴Look係一樣添！
唔少網友見到後都大讚個蛋糕好有心思，仲話肥嘟嘟嘅「峰之子」愈大愈靚仔，祝佢健康快樂成長添！
(on.cc東網)
近年多咗好多高齡產婦，就連高齡Daddy亦越來越多。繼年過半百嘅杜德偉同蘇永康一索得男後，55歲嘅錢國偉（Wilson）亦將於明年初榮升做老豆，早前已透露今胎生女，話晒係前世情人，心情當然好興奮啦。
上月尾，錢國偉就陪懷孕7個多月嘅太太陳宛蔚(Calinda)去九龍城一間藥行睇中醫，當日下午四時許，見陳宛蔚腹大便便，着住貼身衫、牛仔褲及波鞋，身形明顯比以前豐滿咗好多
陳宛蔚懷孕7個多月，據知今胎生女。
佢哋大約等咗15分鐘，Calinda全程戴住口罩，直到見中醫時先除低，幫佢睇面色同把脈，見Calinda不停問中醫師問題，畀完錢冇攞藥就離開。
陳宛蔚一向好鍾意小朋友，但之前身體弱，所以一直有睇中醫調理身體。
錢國偉一改花弗形象，突然變咗顧家暖男，幫老婆開門之餘，上落一級樓梯都扶到實，非常體貼，之後兩人就好恩愛咁手拖手行去攞車。
上落都好小心，陳宛蔚撓實老公。
據聞Calinda今次睇嘅中醫師姓方，李克勤太太盧淑儀、關心妍等都曾經求診，而且收貴頗貴，每次診金連藥都要逾千元。而Calinda未懷孕前體重唔夠一百磅，為咗生BB，足足睇中醫調理身體一年先成功懷孕。
可見陳宛蔚腹大便便
Wilson接受《蘋果》電話訪問時話﹕「佢(Calinda)一向鍾意小朋友，咁中醫真係幫到，所以keep住睇。(據聞收費好貴？)朋友價啦。」佢透露太太預產期喺明年2月中，問心情係咪好緊張？Wilson話﹕「我要盡做多啲嘢，令自己唔好咁緊張，遲啲都會停工陪太太。(已預備BB用品？)老婆精過我啦。(對小朋友有乜期望？)最重要健康開心就得。(係咪已報學校？)都係老婆緊張過我，但真係搵緊。」
手拖手行去攞車。
(蘋果日報)
藝人陳豪到銅鑼灣出席活動，宣傳其個人咖啡品牌的Pop-up Store，並即場調製特色咖啡，陳豪表示向來演藝事業及做咖啡都較低調，但現在人愈大開始改變想法，覺得要更出力宣傳自己，最近兩星期亦開始落力玩社交平台：「今次呢個Pop-up Store我都親力親為，五日都喺度，唔係只係掛名，我親自入豆、烘焙、設計，所以事都自己做。」
陳豪又指其咖啡工場開了九個月，一直協助別人搞咖啡生意，現在希望自己開實體店，亦已開始搵舖位：「都好幸運有人支持，又有唔同商舖搵好多，但未決定邊區，仲搵緊，有個地方都七七八八嘅，呢樣事成再講。」
問有否考慮推出適合小朋友的咖啡？他表示有想過，但始終有咖啡因，所以都只是給兒子飲朱古力：「遲啲先，囝囝成日都話想飲，又玩啲咖啡豆，都想訓練囝囝了解多啲咖啡。（開定三間咖啡店畀三個仔女？）三間太少喇啩？哈哈！不過夢想係大，實幹係慢，到時再睇情況啦！」
講到他近期開始玩社交平台，盡量日日Update近況，希望與Fans拉近距離：「藝人當中我都算慢喇！我依家開始識呃Like。（同網友互動？）互動唔敢講，實在好忙，要拍戲、湊仔、搞咖啡，但會盡量甫多啲嘢。（被太太陳茵媺感染？）唔係嘅，我係時候要醒，收埋自己收埋太耐，應該多啲同人分享。」
提到近日被影到帶二仔到幼稚園面試，陳豪承認近期相當忙碌：「面試咗好多間，有排未完，仲未揀好。（想兩兄弟同一間學校？）就我方便當然好，但每個小朋友唔同性格，要搵適合佢哋更加緊要。（你作為藝人帶小朋友面試有冇着數或者尷尬事？）又冇喎！我覺得人人平等，父母咩人都應該規矩一樣，我都教仔咩都要排隊。」
(on.cc東網)
藝人胡諾言（胡仔）、陳婉衡、林師傑及林泳淘日前到馬來西亞拍攝競技節目
左起：胡諾言、陳婉衡、林師傑及林泳淘
以特別嘉賓身份亮相的胡仔透露難忘上機前一晚，細女腳趾扭傷經歷，他謂:「佢依家冇乜事，不過我發覺每次出埠做嘢，細女都會受傷，好在佢照咗X光冇咩大礙。」
而向來有跑步習慣的他，出埠時也會邊跑邊拍照留念
但此舉卻被朋友勸告，他謂:「原來馬來西亞嘅馬路，有時會有人坐住電單車嚟偷嘢，話我算好幸運冇事發生，不過當然下次我唔敢，會謹慎啲啦！」
拍攝花絮 可見大家為咗拍攝競技節目都出盡全力。
(東方日報)
藝人劉玉翠及張崇德到奧運出席微電影首映，並宣布作品在外地微電影節得到不少獎項，包括最佳導演及劉玉翠獲得最佳女主角獎。
玉翠好友劉雅麗及關寶慧趁今日是玉翠生日送上蛋糕及遞上女主角獎座，令玉翠驚喜得眼濕濕。
玉翠表示戲中她要照顧病母，感覺抑壓，到最後對方離世時情緒大崩潰，她表示今次電影沉重講死亡，希望大眾認識臨終預設治療，究竟在家人病危時，仍應否勉強急救令對方繼續受苦：
「我想大家認識多啲，到有需要時可做最好嘅處理畀屋企人，我覺得部電影好有意義，其實冇乜人工，呢方面我命苦啲，不過有意義好滿足！（仲有獎品有女主角獎！）好開心得到鼓勵！仲有兩個獎，演員路好困難，但畀到我滿足感，會繼續拍！」
至於張崇德則演醫生，他覺得相當難演繹，明知病人不能夠活，但亦希望可以令他們不會太辛苦：「當年我個仔都急救過無數次，所以更加有感受，希望套戲畀大家知道應該點樣處理病危病人，之前喺講座睇過套戲一次，全場人都喊到飛起。」
(on.cc東網)
藝人張繼聰（阿聰）向來是圈中的「愛妻號」和模範爸爸，空餘都會陪伴家人，享受親子樂。東網發現阿聰與太太謝安琪（Kay）和仔仔張瞻於晚上約八時許現身於九龍區商場的餐廳開餐。明顯修身成功的Kay與仔仔張瞻先到餐廳，Kay就細心地點餐，張瞻則表現活潑郁來郁去，隨後一身牛仔裝束的張繼聰出現，一家三口言談甚歡。
張繼聰向來重視家庭，肩負教仔女責任。
張瞻細心聆聽爸爸嘅教導。向來工作忙碌的阿聰，非常珍惜與仔仔相處的時光，更爭取與仔仔傾談心底話。期間，阿聰與張瞻傾談人生道理，當中以天使和魔鬼來作比喻談論人生，他說：「每個人心中都有天使同魔鬼，會影響你對每件事嘅決定。」教他怎樣面對是非黑白。
一家好和諧
隨後，阿聰更以自身經歷來教育仔仔，他表示曾遭欺凌：「我廿八歲時都被人bully（欺凌）到三十幾歲，你媽咪都試過！」Kay全程默默地聆聽，低頭吃東西，安心將教仔的重任給予阿聰。面對阿聰的教導，張瞻全程安靜聆聽，更不時點頭回應，兩父子亦有說有笑，感情相當不俗！
(東方日報)
藝人馬浚偉於電台節目中，一連四日訪問了一位他的圈中契妹－楊怡。入行18年的楊怡，被馬浚偉問到最不愉快的經歷時，原來是拍攝劇集《流金歲月》。
她說：「嗰時拍完《婚前昏後》，評價幾好，大家話我好似張可頤，加上個人開始心雄，覺得自己：『嗯，我得㗎喇！做戲ok啦！有人留意我喇！』到拍《流金歲月》嘅時候，我覺得自己喺揣摩角色方面都可以，但當時有個導演拍完場戲之後同我講：『喂，你啲戲好誇呀！頭先埋嚟睇你啲戲，唔得呀，全部都唔得呀！』嗰一剎那，我有種從高處『嘭』一聲跌落谷底嘅感覺，好唔開心，到依家都記得嗰種感覺。」
談到二人的兄妹情，楊怡形容跟馬浚偉工作，不只是開心，還有窩心。楊怡謂：「嗰時同你拍《滙通天下》，爸爸入咗醫院，但我緊接就要返內地拍劇，直至我收到一個電話話要我返香港。嗰日我即刻同材叔（監製梁材遠）講，一定要畀我返港，我唔想令自己後悔。我記得我返去處理好家事、安頓好自己之後返去（酒店），一開房門就見到你封信。入面係一張卡，裏面有段文字，我打開睇，嘩…嗰一剎那……」
楊怡哽咽起來，淌着淚，形容這段無聲的安慰、鼓勵，更勝千言萬語。她又說：「要喺工作時間內處理好家事，同恢復好情緒去繼續工作，要唔影響劇中嘅人，嗰段日子對我嚟講，係一個好大嘅考驗。」
她認為高興的是，在這個很親的人面前不需要掩飾，而心中一直都很感激馬浚偉。
(on.cc東網)
