藝人李家鼎到尖沙咀出席活動，即場示範以苦瓜製作名為「苦盡甘來」的涼拌菜，又透露將到郵輪上開Talk Show。

提到早前李家鼎三代同堂食飯影合照，他笑言孫仔即是苦盡甘來的「甜」，雖然他口中抱怨孫仔百厭，但仍遮不住喜悅：「佢幾咁百厭呀！（怕唔怕爺爺？）又唔係驚我，係知道我唔蝦得囉！佢依家13個月大，學緊行，佢阿媽就心痛佢跌，我就覺得由佢跌囉，唔跌點學行呀？」

問到中秋會否與孫仔過？李家鼎大呻好忙，講到郵輪之旅或可帶孫仔同行？他說：「都想帶埋佢去，但佢太細喇，咩都唔識！（帶女友去？）女咩友呀？師奶就有！」

李家鼎首次上郵輪開騷，問到會分享哪些話題？他謂：「睇吓到時咩環境囉！（沖繩係港人結婚勝地？）我又唔係日本人，佢哋傻啫。（海外結婚浪漫啲！）落雨拍拖仲浪漫呀！以前一個包一杯水一齊食，捱到咁就浪漫喇！我哋上咗年紀嘅唔講呢啲，大家係睇真性情，係Love Story，邊似你班後生仔呀！」

(on.cc東網)

歌手吳若希（Jinny）同男友Alex9月8日入紙申請結婚，出年仲會喺外地擺酒添，以為成件事開開心心，點知啱啱有啲激心事搞到心情好差呀！

佢喺ig留言：「你想出名唔通唔幫你咩？～ 叻～ 一而再再而三挑引（挑釁）我，做乜姐（啫）你？講左（咗）幾次，唔好攞我個女嚟玩！你係咪有病姐（啫）！鬧你咪鬧你囉使俾（畀）面你？」

原來又係囡囡畀人攻擊，身為人母嘅Jinny梗係要挺身而出保護囡囡啦！

嬲到震嘅Jinny，一連開咗幾個post，仲晒埋嗰位網友嘅相出嚟，之後Jinny留言：「無啦啦被人追擊係咪好好玩？！」、「做乜private姐（啫）～ 做乜delete留言姐（啫）～～～」、「純粹問一句，我也是人，你有沒想過如果這種欺凌是發生在你自己身上，你是什（甚）麼想法？！」

真係怒不可遏！網友見到Jinny咁嬲，都留言力撐佢呀！之後，Jinny好似下咁啲火，佢留言：「好啦～ 我玩完啦！你既（嘅）世界真係好唔公平，所以你要將唔公平發洩係（喺）人地（哋）身上～ 我都好多謝你～等我發現呢個世界原來對我好公平～因為雖然有你呢d（啲）人，但我身邊都有好多對我好好既（嘅）人」

最後，Jinny刪晒頭先貼嘅post，話唔想再爭吵，只係想得到公平對待，又指刪post唔係退讓，仲希望大家識得尊重大家。

(on.cc東網)