藝人麥雅緻、朱凱婷和張美妮在將軍澳出席無綫節目《嫁到這世界邊端》記者會。
麥雅緻挺着七個月巨肚到場，非常搶眼！為了貪靚，她仍穿着高跟鞋赴會，並笑謂：「我嚟到先換！」
問腹中胎兒性別？她大賣關子，指自己會效法楊洛婷：「諗住開個Party先宣布。」
預產期在十月底的她打算剖腹生產。問老公張頴康會否陪足全程？她表示就算老公要拍劇都會抽時間到醫院陪產：「想加床陪足我咁多日。（陪入埋產房？）佢會入去剪臍帶，但我哋唔會做Live！」
更爆老公怕血，當年為大女剪臍帶就象徵性剪一下便將個波交畀醫生。她又笑指囡囡知道有弟妹時有少許呷醋，但現在已經接受：「出街啲人叫佢妹妹，佢會話佢唔係，佢係姐姐。」
劉家聰早前趁暑假即將完結，專誠安排假期，帶女兒劉紅昕到泰國旅行度假，好讓女兒充電後迎接新學期。
廿四孝父親家聰表示：「今次同阿囡特別趁暑期尾聲去咗曼谷玩，除咗學整泰國菜，阿囡仲去咗玩高卡車，嗰個車場係東南亞數一數二嘅大場，啲車都有番咁上下速度。」
「雖然阿囡對高卡車幾有天分，對入彎角度亦有認識，入彎又快又準，直頭可以話全無難度，但我做阿爸嘅睇起上嚟，始終放心唔落，喺場外邊睇住，就喺心入面嗌『阿囡，你小心呀！唔使開咁快㗎，注意安全呀！』好彩最終都冇驚冇險，順利過終點，做阿爸嘅放心晒！」
家聰又分享父女檔學整泰國菜的經過，他說：「我哋為咗學整泰國菜，專誠一早起身去當地街市買餸，好有誠意㗎！」
「個街市係本地人嘅街市，一般遊客好少會識『貢』到嚟呢度，但呢度啲蔬菜幾新鮮，啲蝦又生猛，價錢仲出奇地平添！講真，今次泰國之旅整泰菜同行街市呢part，又可以親子，又可以學啲泰式新『煮』意，真係個非常唔錯嘅體驗！」
(on.cc 東網)
林心如去年7月閃嫁霍建華，今年1月剖腹生下女兒「小天使」，日前赴北京出席代言活動，她身穿平口洋裝，露出性感香肩及修長美腿，看到現場來了3名活潑小孩，立刻跪地擁抱及互動，臉上散發出母愛光輝。
林心如產後2個月便復出工作，近期在台趕拍偶像劇，被問到事業、家庭兩頭燒，是否覺得辛苦？她說：「不覺得辛苦，我現在是邊玩邊學，會研究孩子到什麼階段、適合玩什麼樣的玩具，或什麼時候可以訓練身體哪部分的肌肉。」
至於當媽8個月的育兒心得，林心如表示要懂得寶寶的天賦，並發現和開啟天賦，是父母最重要的使命，「應該讓寶寶們要多玩，在玩中發現自己的天賦和潛能。」
(自由時報)
車保羅拍過唔少戲同劇，角色形象好多係古古怪怪、神神化化。
因為佢外型都幾獨特，高得嚟又非常瘦，啱晒拍鬼片。
呢位綠葉都有過失意時候，最慘係同無綫約滿，只獲二千蚊底薪合約，車保羅唔肯，外闖嘗試其他職業，但又因為明星身份，嚇走咗好多工作機會，結果拎咗幾個月綜援。
人在低處，車保羅有朋友伸援手，介紹佢做保安、地盤散工；亦試過問相識嘅副導借錢救急，結果一個月都冇回覆。
車保羅話拍戲會上癮，終於俾佢等到止癮毒，啱啱就為ViuTV拍咗《詭探》，又係演一位識啲啲法術，又會製造啲奇怪靈異裝置，貫徹以往戲路。
(Apple Daily)
34歲嘅William Hung（孔慶翔），喺04年參加美國綜藝節目《American Idol》，因為五音不全兼騎呢嘅表演而走紅，佢嘅參賽歌曲《She Bangs》仲成為佢嘅首本名曲！
William今日喺洛杉磯時間晚上7點30分左右，喺當地一個小公園接受美國《蘋果》FB直播訪問，網民除咗關心佢嘅工作，亦都好關心佢嘅感情生活。14年有英美娛樂網站外電報道，話William同任職護士、同齡嘅Jian Teng喺加州結婚，嗰陣佢哋完成註冊儀式後嘅合照曝光，「Hung嫂」臉圓圓、豬膽鼻及身形頗豐滿，外形合襯，同William有夫妻相。
訪問入面，講到感情生活嘅時候，佢話：「唔係咁理想，上年啱啱離咗婚，大家都有愛過對方，維持咗2年半，我哋喺自願下分手，俾大家去搵適合嘅人，我唔介意，o依家去搵第3個更好，應該最掂！」跟住有人問佢擇偶條件，佢話：「我自己冇規定，不過似乎亞洲人適合我多啲，o依家有幾個諗緊，睇中咗，未知得唔得？」William仲話：「我第一段婚姻只係維持了10個月，再婚都只係維持咗2年半就完結，可能我哋識咗6個月就結婚，大家都冇了解清楚，經過今次之後，我明白要付出所有嘢，時時為着對方、遷就對方，以後我都會花多啲時間了解。」
(蘋果日報)
歌手周啟生對姪仔周永恒與朋友被傳抵達澳洲時，在航機上被警察帶走問話，表現決絕堅拒跟姪兒扯上任何關係。
周啟生接受訪問時，被問到是否跟十五年前跟親姪薪酬上出現拗撬有關，他表示：「你問佢（周永恒）Daddy同佢自己啦！」
其實兩叔姪曾關係密切，當年周永恒是由周啟生帶入行，更擔任其經理人，可是周永恒推出唱片後，兩叔姪傳出因薪酬問題而反目。
當年周啟生公開數臭周永恒說：「從今日開始再唔係佢經理人。」
不過，周永恒三年前發生家暴及婚外情風波時，周啟生只是避談，不似如今態度如此強硬，擺明要「割席」。
周永恒接受訪問時暗示，成了自己父親跟阿叔之間的磨心：「如果我同我細佬有意見不合，我都唔會有興趣知佢細路仔嘅事，近十年連拜年嘅時候都少見到，一家人冇話憎唔憎，啲老人家見到會唔開心，和和氣氣就好。」
問他可會嬲過阿叔，他說：「我淨係可以講我好欣賞我阿叔嘅音樂，好想同佢有機會合作，但係我嘅音樂水平永遠都唔會有佢咁高啦，冇佢咁勤力。」又指周啟生是其偶像，很想叔姪有合作機會。
（on.cc 東網）
曾演真人版電影《20世紀少年》及驚慄片《呪怨》的32歲日本女星平愛梨，今年1月跟拍拖三年的30歲日本國腳長友佑都拉埋天窗，並在今年6月補擺喜酒，廣獲球壇和藝能界人士到賀。昨晚兩夫婦再度傳來喜訊，平愛梨證實懷孕，將榮升首任媽咪！
長友佑都昨晚在Instagram宣布消息，並公開一張與愛妻着住情侶T-Shirt的合照，當中可見長友摸着平愛梨的肚子，並且深情對望，洋溢着幸福之情！長友表示自己會努力支持愛妻，希望愛情結晶品順利出世，並希望各界今後繼續關照長友一家，不過未有公開BB預產期。
而平愛梨大前日聯同演員妹妹平祐奈和諧星好友入球場，為爭奪世界盃決賽周出戰資格的日本隊打氣，期間可見她做足保暖措施，穿長袖衫兼帶備口罩，以防凍親。
(on.cc東網)
51歲郭富城今年4月同7月30歲生日嘅大陸模特兒方媛（Moka），喺半島酒店擺酒兼簽字香港秘密入紙，當時已傳城城雙喜臨門。但城城婚後一直忙拍戲，親人都在上海嘅Moka就中港兩邊走。有指城城為咗方便照顧大肚Moka安胎，將會申請Moka來港定居，有傳已plan好喺香港生B。
上月中，陀住八個幾月肚嘅Moka，似乎好怕悶，去完上海返港後又被拍得去柴灣工業城影studio寫真。
至於胎兒性別，之前有傳係一索得男，但今日忽然有消息稱Moka昨日已於養和誕下千金！恭喜恭喜！消息來自商台節目《1圈圈》嘅，而事有湊巧，Moka噚日下晝曾經貼圖上ig，但係一開佢個ig已經「唔見咗」。
與此同時，噚晚收到消息稱，城城揸住幽靈之子戰車，喺跑馬地同養和附近不停兜圈，不但黑麻麻戴住黑超，仲特登打開咗車窗，似乎有意吸引大家視線，唔知係咪因爲跑馬地多記者辣更，城城刻意用自己用魚餌，引開記者好讓老婆秘密入院；及後本報到場了解，於今早凌晨一時半，只見一架銀色的七人車，駛離養和醫院時，直返城城的寓所。
城城經理人小美稱：「我未收到消息。但是一如以往所説：其私人事不回應，是一份尊重。」問到城城放幾耐假陪老婆生B？小美回覆：「沒有刻意放假，一直在開工，為新電影定妝。」記者仲問過城城，但到現在都未有回覆。
(蘋果日報)
前港姐冠軍張名雅與圈外老公蔡錦豪婚後一直恩愛如昔。
今年3月更誕下囝囝Mario，一家三口幸福滿瀉。
近日佢哋仲去咗英國旅遊，相當開心。
名雅老公喺社交網上載出發嘅照片，仲話：「Our first flight with Mario. Such a challenge.（今次係Mario第一次搭飛機，絕對係一個挑戰。）」
相中就見到佢兩公婆有得出外都不知幾開心，不過Mario就似乎有啲驚，喊晒咁呀！
原來名雅此行仲有個目的，就係慶祝老公嘅生日，佢仲偷偷哋帶咗個蛋糕上機添！
太太咁有心思，相信老公都覺得Sweet爆，有蛋糕都唔止，仲有香檳。相信呢個Trip對佢兩公婆嚟講都好難忘呀！
(on.cc 東網)
鍾嘉欣（Linda）與圈外老公Jeremy Leung一直非常恩愛，婚後更誕下囡囡Kelly，一家三口幸福美滿。
而成為人母嘅Linda暫時都喺加拿大居住，照顧囡囡為先。
不過間中都會回港出席活動，等一班粉絲可以見吓佢。
今日Linda仲喺社交網發文話好掛住大家兼上載多張嘅照片，就話：「大家好嗎？想念你們。我現在很好。我想問，你們想再看我演戲嗎？我已經好久沒有拍戲啦！」
其中一張相就見到Linda抱住囡囡，Linda仲指住個蔚藍嘅天空，雖然只係得個背面，不過都覺得畫面好有愛！
另外一張相就見到Linda一身運動look上陣，仲曬得一身健康膚色。
大批網友都大讚Linda嘅身材弗到爆，仲有網民留言問Linda幾時拍番戲呀，大家都好期待佢幾時有劇集出街，一定會支持呀！
（on.cc 東網）
