早排拍完大台劇《跨世代》嘅張繼聰，終於可以正式接手做湊女公。由於阿女張靖(Karina) 精力充沛，即使唔使拍劇，阿聰晚晚都要陪阿女睇埋深宵劇場先有得瞓。之前佢就話：「每當佢瞓着諗住放佢落床時，佢就醒嚟望住你笑，於是又再抱佢，好彩我拍慣通宵戲，所以每晚都抱着囡囡睇《天地豪情》，我同張家輝講，我個女第一套戲就係睇佢演出。」
廿四孝老竇仲打算遲啲會將囡囡張靖（Karina）個名紋喺身上，佢話：「近排拍緊戲，要連戲唔紋住，同埋等我過咗紋身嘅痛苦先，上次痛到爭啲休克。」
啱啱張繼聰又抱住囡囡玩自拍，仲玩埋變妝App，點知望住鏡頭嘅Karina，忽然送咗啖「豆腐花」俾爸爸，有網民就話阿女識搶fo。
做咗人媽咪嘅千嬅都留咗兩次言，讚Karina好cute，仲話自己好懷念嘔奶日子o忝！
唔知千嬅會唔會再追多個呢！？
（蘋果日報）
42歲荷里活一姐安祖蓮娜祖莉日前在洛杉磯受訪宣傳執導作《First They Killed My Father》。
安祖蓮娜祖莉再談同畢彼特離婚一事，眼濕濕咁話：「我唔享受單身，唔係我想咁（離婚）。」
安祖蓮娜日前喺比華利山酒店受訪，好耐冇坐定定接受記者訪問谷新片嘅佢坦言：「今次係我相隔好耐第一次再咁做（受訪），實在唔容易。今次我有啲怕醜，因為我內心唔似以前咁堅強。」
再談同畢佬離婚一事，安祖蓮娜忍唔住眼濕濕：「一直都好困難，（離婚）完全冇好處，只有困難。」
至於仔女近況如何，安祖蓮娜就話：「佢哋好好，一直互相支持，某程度上是我前所未見過的。看到佢哋如何彼此幫助，大哥哥照顧小朋友，一齊幫咗我好多。今次真係令佢哋找到自我，找到屬於自己嘅聲
音。」
被問到點睇未來的自己時，安祖蓮娜就話：「10年前嘅我唔會想到自己的家庭生活、婚姻及事業會是今天的情況，現在於這個年齡，我只想身體健康。」
(on.cc 東網)
去年結婚的「巨聲幫」隊長陳國峰（Penny）今日喺社交網宣布添丁，太太黃思雅為佢誕下囝囝，母子平安：「同大家報個平安，感謝大家嘅祝福同關心，托賴母子平安。感謝醫生與各位醫護人員 #我係陳國峰 #我係陳國峰個仔」
Penny上載咗囝囝啱啱出世嘅相，瞇實眼嘅囝囝面珠紅卜卜，雖然仲未睇得出到底係似爸爸定媽咪，不過Penny自己都擺張自拍做對比，唔知係咪佢全程陪住太太生產太頻撲，成面鬚根出晒嚟，似乎佢都要好好休息，準備照顧阿仔喇！
Penny就兒子出世報喜：「今日係擇日開刀嘅，過程順利，但係我嘅心情就好似坐過山車咁，好刺激！好似以前參加歌唱比賽時等出場咁，心跳加速，手心出汗，太太都好緊張，我有入產房剪臍帶，依家仲未同囝囝改名，不過有個花名叫『峰之子』！好感恩！原定9月6日出世，但係上星期醫生建議早啲出世會好啲，因為媽媽胎水唔夠，咁啱！今日朝早出血，係生得嘅先兆。」感覺好似夾咗今日生咁！
留言一出，Penny嘅一眾圈中好友如朱智賢、周志文、吳業坤、楊潮凱等都紛紛留言祝賀新手爸爸。
(on.cc東網)
藝人麥雅緻、朱凱婷和張美妮在將軍澳出席無綫節目《嫁到這世界邊端》記者會。
麥雅緻挺着七個月巨肚到場，非常搶眼！為了貪靚，她仍穿着高跟鞋赴會，並笑謂：「我嚟到先換！」
問腹中胎兒性別？她大賣關子，指自己會效法楊洛婷：「諗住開個Party先宣布。」
預產期在十月底的她打算剖腹生產。問老公張頴康會否陪足全程？她表示就算老公要拍劇都會抽時間到醫院陪產：「想加床陪足我咁多日。（陪入埋產房？）佢會入去剪臍帶，但我哋唔會做Live！」
更爆老公怕血，當年為大女剪臍帶就象徵性剪一下便將個波交畀醫生。她又笑指囡囡知道有弟妹時有少許呷醋，但現在已經接受：「出街啲人叫佢妹妹，佢會話佢唔係，佢係姐姐。」
劉家聰早前趁暑假即將完結，專誠安排假期，帶女兒劉紅昕到泰國旅行度假，好讓女兒充電後迎接新學期。
廿四孝父親家聰表示：「今次同阿囡特別趁暑期尾聲去咗曼谷玩，除咗學整泰國菜，阿囡仲去咗玩高卡車，嗰個車場係東南亞數一數二嘅大場，啲車都有番咁上下速度。」
「雖然阿囡對高卡車幾有天分，對入彎角度亦有認識，入彎又快又準，直頭可以話全無難度，但我做阿爸嘅睇起上嚟，始終放心唔落，喺場外邊睇住，就喺心入面嗌『阿囡，你小心呀！唔使開咁快㗎，注意安全呀！』好彩最終都冇驚冇險，順利過終點，做阿爸嘅放心晒！」
家聰又分享父女檔學整泰國菜的經過，他說：「我哋為咗學整泰國菜，專誠一早起身去當地街市買餸，好有誠意㗎！」
「個街市係本地人嘅街市，一般遊客好少會識『貢』到嚟呢度，但呢度啲蔬菜幾新鮮，啲蝦又生猛，價錢仲出奇地平添！講真，今次泰國之旅整泰菜同行街市呢part，又可以親子，又可以學啲泰式新『煮』意，真係個非常唔錯嘅體驗！」
(on.cc 東網)
林心如去年7月閃嫁霍建華，今年1月剖腹生下女兒「小天使」，日前赴北京出席代言活動，她身穿平口洋裝，露出性感香肩及修長美腿，看到現場來了3名活潑小孩，立刻跪地擁抱及互動，臉上散發出母愛光輝。
林心如產後2個月便復出工作，近期在台趕拍偶像劇，被問到事業、家庭兩頭燒，是否覺得辛苦？她說：「不覺得辛苦，我現在是邊玩邊學，會研究孩子到什麼階段、適合玩什麼樣的玩具，或什麼時候可以訓練身體哪部分的肌肉。」
至於當媽8個月的育兒心得，林心如表示要懂得寶寶的天賦，並發現和開啟天賦，是父母最重要的使命，「應該讓寶寶們要多玩，在玩中發現自己的天賦和潛能。」
(自由時報)
車保羅拍過唔少戲同劇，角色形象好多係古古怪怪、神神化化。
因為佢外型都幾獨特，高得嚟又非常瘦，啱晒拍鬼片。
呢位綠葉都有過失意時候，最慘係同無綫約滿，只獲二千蚊底薪合約，車保羅唔肯，外闖嘗試其他職業，但又因為明星身份，嚇走咗好多工作機會，結果拎咗幾個月綜援。
人在低處，車保羅有朋友伸援手，介紹佢做保安、地盤散工；亦試過問相識嘅副導借錢救急，結果一個月都冇回覆。
車保羅話拍戲會上癮，終於俾佢等到止癮毒，啱啱就為ViuTV拍咗《詭探》，又係演一位識啲啲法術，又會製造啲奇怪靈異裝置，貫徹以往戲路。
(Apple Daily)
34歲嘅William Hung（孔慶翔），喺04年參加美國綜藝節目《American Idol》，因為五音不全兼騎呢嘅表演而走紅，佢嘅參賽歌曲《She Bangs》仲成為佢嘅首本名曲！
William今日喺洛杉磯時間晚上7點30分左右，喺當地一個小公園接受美國《蘋果》FB直播訪問，網民除咗關心佢嘅工作，亦都好關心佢嘅感情生活。14年有英美娛樂網站外電報道，話William同任職護士、同齡嘅Jian Teng喺加州結婚，嗰陣佢哋完成註冊儀式後嘅合照曝光，「Hung嫂」臉圓圓、豬膽鼻及身形頗豐滿，外形合襯，同William有夫妻相。
訪問入面，講到感情生活嘅時候，佢話：「唔係咁理想，上年啱啱離咗婚，大家都有愛過對方，維持咗2年半，我哋喺自願下分手，俾大家去搵適合嘅人，我唔介意，o依家去搵第3個更好，應該最掂！」跟住有人問佢擇偶條件，佢話：「我自己冇規定，不過似乎亞洲人適合我多啲，o依家有幾個諗緊，睇中咗，未知得唔得？」William仲話：「我第一段婚姻只係維持了10個月，再婚都只係維持咗2年半就完結，可能我哋識咗6個月就結婚，大家都冇了解清楚，經過今次之後，我明白要付出所有嘢，時時為着對方、遷就對方，以後我都會花多啲時間了解。」
(蘋果日報)
歌手周啟生對姪仔周永恒與朋友被傳抵達澳洲時，在航機上被警察帶走問話，表現決絕堅拒跟姪兒扯上任何關係。
周啟生接受訪問時，被問到是否跟十五年前跟親姪薪酬上出現拗撬有關，他表示：「你問佢（周永恒）Daddy同佢自己啦！」
其實兩叔姪曾關係密切，當年周永恒是由周啟生帶入行，更擔任其經理人，可是周永恒推出唱片後，兩叔姪傳出因薪酬問題而反目。
當年周啟生公開數臭周永恒說：「從今日開始再唔係佢經理人。」
不過，周永恒三年前發生家暴及婚外情風波時，周啟生只是避談，不似如今態度如此強硬，擺明要「割席」。
周永恒接受訪問時暗示，成了自己父親跟阿叔之間的磨心：「如果我同我細佬有意見不合，我都唔會有興趣知佢細路仔嘅事，近十年連拜年嘅時候都少見到，一家人冇話憎唔憎，啲老人家見到會唔開心，和和氣氣就好。」
問他可會嬲過阿叔，他說：「我淨係可以講我好欣賞我阿叔嘅音樂，好想同佢有機會合作，但係我嘅音樂水平永遠都唔會有佢咁高啦，冇佢咁勤力。」又指周啟生是其偶像，很想叔姪有合作機會。
（on.cc 東網）
曾演真人版電影《20世紀少年》及驚慄片《呪怨》的32歲日本女星平愛梨，今年1月跟拍拖三年的30歲日本國腳長友佑都拉埋天窗，並在今年6月補擺喜酒，廣獲球壇和藝能界人士到賀。昨晚兩夫婦再度傳來喜訊，平愛梨證實懷孕，將榮升首任媽咪！
長友佑都昨晚在Instagram宣布消息，並公開一張與愛妻着住情侶T-Shirt的合照，當中可見長友摸着平愛梨的肚子，並且深情對望，洋溢着幸福之情！長友表示自己會努力支持愛妻，希望愛情結晶品順利出世，並希望各界今後繼續關照長友一家，不過未有公開BB預產期。
而平愛梨大前日聯同演員妹妹平祐奈和諧星好友入球場，為爭奪世界盃決賽周出戰資格的日本隊打氣，期間可見她做足保暖措施，穿長袖衫兼帶備口罩，以防凍親。
(on.cc東網)
