現年37歲嘅日本女星吉川日奈曾經係90年代人氣偶像，佢自從移居夏威夷生活後已甚少公開現身，今日佢於Instagram公佈喜訊，自爆目前為丈夫懷有第二胎。
吉川日奈喺當紅時跟視覺系樂隊SHAZNA嘅變裝主音IZAM閃婚後7個月離婚，吉川日奈喺2011年宣佈大肚及改嫁圈外人，翌年誕下囡囡後，一家三口移居夏威夷生活。
吉川日奈不時喺Instagram上載同囡囡嘅生活照，今日佢貼出同乖女於當地沙灘嘅溫馨母女照，見囡囡依偎媽咪腹部，吉川日奈表示一家人正期待小生命來臨，直至出世前都會以三人家族咁開心度過。
(蘋果日報)
前港姐陳潔玲早前接受電台訪問，期間談到在圈中遇過賤男的經歷。
陳潔玲指有位男仔經常表示自己成日受情傷，又話自己其實純如白兔，對愛情專一，又會用自己嘅童年經歷和家事去博不同女藝人的同情。
陳潔玲更指自己亦受過對方追求過。
由於陳潔玲未有開名誰是賤男，結果搞出大頭佛令不少網民估賤男係歌手吳業坤。
結果，陳潔玲要喺社交網公開向吳業坤Say sorry，其中一個寫住:「無啦啦搞着你，明明你賣的從來是實力不是靚仔。咁多位，如果你鬧吳業坤或者鬧我你哋會開心啲，咁繼續鬧啦，close file 。不回應了。祝大家生活愉快。」
(on.cc 東網)
現年23歲嘅日本青春女星武井咲目前趕拍主演新劇《黑色皮革手冊》，當地雜誌《週刊女性》今日卻驚爆武井咲已未婚懷孕，更決定同拍拖多時嘅男子組合EXILE主音TAKAHIRO奉子成婚。
消息指，武井咲同TAKAHIRO於今日低調註冊，懷有骨肉嘅女方預產期係明年春天。黃昏時份，TAKAHIRO同武井咲聯名發聲明公佈婚訊，武井咲現時懷孕三個月，佢仍會繼續為10月開播新劇進行拍攝，一對新人冇打算開記者會交代婚事，婚禮方面暫時亦未有計劃。
早在2015年，TAKAHIRO飛甩AKB48舊將板野友美後，火速換畫戀上合演警匪劇《戰力外搜查官》嘅拍檔武井咲，當時TAKAHIRO被發現戴上口罩夜訪武井咲香閨，令戀情得以曝光。不過當時雙方事務所否認二人拍拖，武井咲發言人仲指兩人唔會再私下見面。
(蘋果日報)
冼國林執導新片《我們的6E班》舉行慈善首映禮，主演的藝人孫耀威、葉芷如、陳欣妍、方力申、洪天明及麥長青等紛紛現身，場面相當熱鬧。
孫耀威太太陳美詩未有現身支持丈夫，孫耀威表示：「佢幫我睇住舖頭嘛，不過有諗過遲啲包場同粉絲一齊睇戲。」
他又坦言兩人婚後，太太才被自己粉絲接受。
「以前有粉絲鬧佢死女人、睇你幾時死，甚至會爆粗、說話要幾難聽都有，仲有粉絲着三點式，甫相話自己身材比佢（陳美詩）好！」
孫耀威坦言曾因留言而封鎖某些粉絲。
「當時睇到我好心痛，兩邊都係愛我嘅人嘛，但可能依家已成定局，大家開始理智嘞。」
(on.cc 東網)
歌手關心妍（Jade）出席歌唱比賽活動，問到愛女楊榮心（心心）是否已上學？Jade說：「未，只係返Playgroup。」隨即自封是「懵盛盛」家長，Jade說：「朋友話我知心心今年9月要報學前班，我真係唔知，所以唔會係怪獸家長。（讀名校？）唔使，近屋企就得喇，最好可以行返學。」Jade否認住半山，被問到是否搬到山頂？她說：「香港區啦，附近有女校同埋有一條龍升學嘅學校，自己唔太擔心，等上帝安排。」
Jade表示沒有逼女兒睇圖書及背數字，她說：「反而日日帶佢去玩，教佢禮貌同叫人，品德緊要，依家佢識Thank You，數字1至10佢遲早會識。」由於心心是Jade的心肝寶貝，身為人母的她自爆日夜抱女搞到整傷手，Jade說：「成日抱搞到扭親兩邊手，去睇醫生按到隻手瘀晒。」隨即打爛醋埕表示愛女只懂叫爸爸，Jade說：「對住我叫爸爸，我教佢叫媽媽，佢都係叫爸爸，冇辦法，仲未識叫。」
加盟Neway不久即大肚的Jade坦言與公司合約一而再、再而三延期，她說：「仲有兩年幾，其實同Neway嘅關係一直都好好，已經唔係合唔合約。」另外，同場的葉家寶講解是次唱歌比賽詳情，透露18個參賽者有12位唱英文歌，奪冠者將代表香港出席10月於緬甸舉行的世界賽。
(on.cc東網)
張繼聰（阿聰）出席「帝舵錶Born to Dare新錶鑑賞會」，育有一子一女的阿聰指十歲大的囝囝早已開學，但見處處有塞車，可感受到開學的「威力」，囝囝現讀六年班，明年將升讀中一，又可以送囝囝返學，笑言過多兩年，囝囝不想再被送返學校，所以現時要好好享受接送放學後，和囝囝買零食的美好時光，他又說：「同老婆仲好記得當年送囝囝返學，記錯返學時間。」
談到阿聰之前紋了囝囝名字在身上，問到可有計劃紋埋囡囡個名？他笑言：「留咗位㗎喇，可能紋中文名，應該下半年啦。（會留位生下個再紋？）咁我個身都有好多位，要生多廿幾三十個喇！」
不過他表示要等他過了紋身的痛苦先才再紋，因為上次他痛到差些休克。
(on.cc東網)
「性感靚媽」林雅詩（Grace）在東網節目中跟主持人Kiwi分享瘦身心得及擇偶條件。
已為一子之母的Grace身材keep得非常好。
主持人更即場摸Grace的蛇腰，證明Grace腹部結實冇肥腩。
同時，Grace突然自爆在兒子心目中是一個「雙面人」。
原來是仔仔批評媽媽化妝前後兩個樣，皮膚完全不同。
(on.cc 東網)
藝人洪天明與太太周家蔚拍拖出席新片《我們的6E班》首映，但見家蔚瘦了一圈，天明說：「掛住我？」家蔚笑答：「佢去咗內地做嘢，我唔係好敢出去食嘢，驚唔知食咗啲乜落肚。佢返嚟我即刻交兩個仔畀佢湊，我唔得嘞！」
天明則十分享受湊仔，當問到會否再生，天明謂：「有壓力㗎，爸爸（洪金寶）想抱女孫，如果係會係呢兩年內嘅事。會去外國睇醫生，肯定係生女先得，我依家都傾緊去美國拍嘢，係就順便搞埋，一舉兩得。」
家蔚則笑說：「一係留畀（洪）天祥幫手啦。」她又自爆早前以為自己有身孕，天明謂：「佢叫我買驗孕棒，我即刻諗幾時嘅事，最後發現原來搞錯咗。」
天明又謂將返內地公幹，此行或會逗留兩、三個月，兩夫婦又要唱「分飛燕」。
(on.cc東網)
趙薇與富商老公黃有龍的7歲女兒「小四月」就讀香港的國際學校。
日前，小四月跟其他同學於就讀的學校正門步出，小四月眼大大似足媽咪，長髮及腰紮起長辮，外形標致。
雖然趙薇投資有道被喻為「娛圈女股神」，持有影視、酒業及不動產多項業務，身家逾60億港元，但她照顧女兒的方法絕不炫富，並沒有大排場，只派保母湊放學。
現場其他家長都安排名車接小朋友，但趙薇相當低調，只安排一輛七人保母車接載。
因學校門口不能泊車，小四月與保母行到對面街候車時，沿途彈彈跳，並拎住卡通傘盡顯童真。
期間她以流利英語及普通話跟保母傾偈，關係相當要好，當七人車駛至，活潑的小四月即彈住上車。
(on.cc 東網)
「潮媽」 鄭希怡 （Yumiko）首次夥拍愛女梁子柔（梁浸浸）齊齊擔任代言人為營養補充品拍攝廣告，廣告片中梁浸浸身穿恐龍裝上陣造型可愛，加上眼仔碌碌及一頭天生鬈髮，真係「萌」到暈。
Yumiko表示初為人母時，對於照顧愛女的確有點手忙腳亂，但她勝在好學，不斷在上網找資料之餘，亦採納鄭媽媽的傳統湊小孩智慧。
經過2年多的時間，現在Yumiko對BB的飲食、生病時的照顧、皮膚護理等等育兒知識都有一套自家心得，已能夠將梁浸浸照顧得頭頭是道。
Yumiko的愛女梁浸浸因生得趣致，出世不久就成網紅人物。
（on.cc東網）
