藝人馬浚偉於電台節目中，一連四日訪問了一位他的圈中契妹－楊怡。入行18年的楊怡，被馬浚偉問到最不愉快的經歷時，原來是拍攝劇集《流金歲月》。

她說：「嗰時拍完《婚前昏後》，評價幾好，大家話我好似張可頤，加上個人開始心雄，覺得自己：『嗯，我得㗎喇！做戲ok啦！有人留意我喇！』到拍《流金歲月》嘅時候，我覺得自己喺揣摩角色方面都可以，但當時有個導演拍完場戲之後同我講：『喂，你啲戲好誇呀！頭先埋嚟睇你啲戲，唔得呀，全部都唔得呀！』嗰一剎那，我有種從高處『嘭』一聲跌落谷底嘅感覺，好唔開心，到依家都記得嗰種感覺。」

談到二人的兄妹情，楊怡形容跟馬浚偉工作，不只是開心，還有窩心。楊怡謂：「嗰時同你拍《滙通天下》，爸爸入咗醫院，但我緊接就要返內地拍劇，直至我收到一個電話話要我返香港。嗰日我即刻同材叔（監製梁材遠）講，一定要畀我返港，我唔想令自己後悔。我記得我返去處理好家事、安頓好自己之後返去（酒店），一開房門就見到你封信。入面係一張卡，裏面有段文字，我打開睇，嘩…嗰一剎那……」

楊怡哽咽起來，淌着淚，形容這段無聲的安慰、鼓勵，更勝千言萬語。她又說：「要喺工作時間內處理好家事，同恢復好情緒去繼續工作，要唔影響劇中嘅人，嗰段日子對我嚟講，係一個好大嘅考驗。」

她認為高興的是，在這個很親的人面前不需要掩飾，而心中一直都很感激馬浚偉。

(on.cc東網)

近期喺《開心速遞》飾演「欣欣」，乖乖女加傻大姐形象開始入屋嘅邵佩詩即將離開《開心速遞》，日前喺ig已經話：「做好每一場戲的準備，不能讓自己有遺憾＃進入最後倒數＃可是我病了＃欣欣的日子＃開心速遞。」

邵珮詩接受傳媒訪問時，承認將會離開劇組，拍到231到232集，即係出年二月左右，就會播出佢最後兩集：「呢兩年都係喺11廠拍《愛.回家》，真係好唔捨得，但我要出去闖下架喇，傻大姐唔可以做成世！」

另外，飾演《天與地》「家明」嘅張景淳，岩岩拎完十年金牌，但有傳佢即將離開大台，佢接受訪問時話係誤會，嚟緊仲會加入《開心速遞》：「有呢啲傳聞都幾好，証明有人留意自己，無傷大雅都幾好呀。」

(Sina)