藝人王君馨接受節目訪問，她表示自當選港姐亞軍後，被安排參加內地節目《舞動奇跡2》，她在比賽中順利贏得冠軍在香港及內地一炮而紅，本以為事業從此會一帆風順，可是因主持《日日有食神》表現差，被網民狠狠抨擊令事業急跌谷，面對一連串的狠批，令情緒好抑鬱和壓力失控導致患上暴食症：「自己開始變得好假，冇辦法，因為人哋抨擊你嘅時候，你仲要笑住講：『我以後會做得好啲。』但其實內心係好唔舒服，好唔開心。我唔夠膽喺餐廳食飯，惟有返到屋企不停食。整個焦慮同暴食嘅情緒維持咗九個月至一年，最肥嘅時候曾有127磅，雖然對我嘅身高嚟講唔算係肥，但對一個香港藝人嚟講已經很肥！」
幸好王君馨找到改變她一生的宗教信仰：「多得趙希洛、周家蔚帶我去教會。」
王君馨與老公Daniel異地相戀12年，聞說二人曾經分過手，君馨指：「因為佢好妒忌。我要嚟香港做交流生，我唔希望認識每個新朋友，每次Post一張相，佢都要問好多問題。如果連呢啲信任都冇，咁我點可以同你結婚呢？長痛不如短痛，所以我們分咗手。」後來又是信仰的關係，兩人建立了穩定的信任。
(on.cc東網)
據地產消息透露，姚子羚今日以933萬港幣，購入將軍澳全新豪宅「晉海」，一個三房、面積達623呎單位。
該單位原價為1,130萬，經折扣後減了200萬，名副其實筍盤！
適逢近期不時傳出子羚與男友鄭子邦婚期將至，如此敏感時期置業，未知是否為婚後添置新居所！
有傳媒向子羚求證，子羚承認首次榮升業主。
「價錢合理啦！都係同屋企人夾份，會一齊住，想佢哋住得舒服啲！」子羚又指因為要供樓，所以希望之後有更多工作。
(on.cc 東網)
藝人鍾嘉欣近日於溫哥華返到香港，回來兩天便接受好友馬浚偉主持的電台訪問。
嘉欣是馬浚偉於圈中廣為人知的契妹，二人於訪問中滔滔不絕，更大談嘉欣19歲選美時個性羞澀，因陳慧琳提攜才成為大熱，她說：「我第一次開音樂會邀請到陳慧琳（Kelly）做嘉賓，我真係好開心，開心到喊。因為佢當時係我選美嘅評判，係佢畀我信心，因為我當時係唔被睇好，冇人話我會贏，因為我靜到不得了，見到記者我會走，唔想影到我。到見評判嗰日，即係比賽嘅前一日，陳慧琳對記者話：『我鍾意12號鍾嘉欣，嚟自溫哥華，因為佢笑容甜美。』由嗰一刻、一日內，我由乜新聞都冇，突然變成大熱，就係因為陳慧琳嘅睇好。」
陳慧琳成為鍾嘉欣演藝生涯中的伯樂，影響力絕對不少。被馬浚偉問到她有沒有在音樂會中重提此事，嘉欣謂竟然是陳慧琳先提起：「佢對我講：『你睇唔到啫，我哋個個都睇到你係掂㗎！』之後我真係超開心：『吓，真喺㗎？多謝！』因為我真係好欣賞佢，覺得佢真係個好人！」
雖然很喜歡陳慧琳，但嘉欣重申女兒命名Kelly卻與陳慧琳無關。
她說：「當時我喺懷孕時，同老公瞓覺時喺度諗改咩名，突然間就諗到『Kelly』，因為classic（經典）。依家好多父母會改好特別嘅名，有三、四個音節。所以我就想女兒有個classic啲嘅名，仲有我想佢唔好太女仔嘅感覺，而『Kelly』嘅感覺正正比較爽朗、硬淨，但又不失女性感覺。」
(on.cc東網)
日前就係賈靜雯嘅43歲生日，作為愛妻號嘅修杰楷當然唔會忘記呢一個大日子啦！
賈靜雯就喺社交網站上載同老公嘅合照並發表長文多謝老公畀咗個驚喜佢，仲話覺得自己好幸福添！
相中就見到一個用蠟燭拼湊成嘅心心，中間仲擺咗一個寫有「Happy Birthday」蛋糕，除咗蛋糕之外，修杰楷仲送咗紮花畀太太，睇見都覺得好Sweet呀！
修杰楷亦都喺社交網站上載同太太慶祝生日嘅相，修杰楷仲留言：「親愛的老婆，我和小寶貝們都會永遠在你身邊讓你每天都能笑的這麼開心，生日快樂，永遠愛你。」
(on.cc 東網)
台灣藝人庾澄慶（哈林）去年與台灣新聞主播張嘉欣結婚後，不久就宣布造人成功，今年6月更喺社交網宣布BB出世，再次升呢做爸爸！
而剛剛榮升為人母嘅張嘉欣，產後一直未有露面，亦甚少同哈林齊齊合體，而呢日就罕有地出現喺台灣女星徐若瑄社交網度，相當難得！
徐若瑄喺社交網上載咗一張同哈林夫婦及友人吃聚嘅照片，並留言：「在這𥚃（裏）吃到用珍珠奶茶做成餅乾的小甜點！覺得很特別！謝謝哥和嫂啊！有人請客必需吃光光😎這天是不會減肥的！#快樂也很重要 這麼多都進肚子了會跑2小時 #運動是為了可以吃更多美食 很喜翻我的 #可愛復古懷舊小綠包」。
相中見到哈林企喺老婆身後，兩公婆都笑得好燦爛，精神甚佳，不過就未見BB仔嘅蹤影，唔知BB似爸爸定媽媽呢？
(on.cc東網／蘋果日報)
鍾欣潼（阿嬌）終於認戀「醫界王陽明」賴弘國！
然而賴弘國雖然被爆離過婚，阿嬌依然話想同對方開花結果。
賴弘國高大靚仔，仲要係醫生，自然討女生喜歡，有一名身材Fit爆的女生Wendy，於9月8日在fb甫與賴弘國合照，並且留言：「半年見一次老公，畢竟他事業做太大。」
有指Wendy都係讀醫科。不過Wendy之後fb在澄清同賴弘國只係學長學妹關係。
「認識我的就知道我一天24小時都在開玩笑」她更強調跟男友感情好好，幫番賴弘國洗白。而賴弘國透過任職的診所表示Wendy只是學妹，全冇感情瓜葛。
(on.cc 東網)
人夫王浩信（Vincent）早前傳出拍攝無綫劇集《踩過界》期間，曾單獨與劇中演員蔡思貝打邊爐，及後更指浩信與太太陳自瑤婚姻亮紅燈，結果要浩信澄清。
而昨晚一對緋聞男女浩信及思貝齊齊現身無綫台慶亮燈活動，起初二人拍照時有輕攬兼有講有笑，未有半點尷尬，及後更雙雙受訪，浩信對於被指揸車到思貝家樓下，他表示當日只是在該屋苑附近泊車開工，寄望外界不要再有報道傷害同事，更揚言欣賞思貝，他謂：「佢好用心，所以唔好因為拍劇傾得多而有所誤會。（太太陳自瑤誤會？）梗係唔會，過兩日我哋有活動先講。」
而思貝則澄清自己並非該屋苑住戶，當日亦只是於該處泊車，浩信聞言即謂：「你早講嘛！」思貝就坦言為此感無奈。
問到與浩信再見面會否感尷尬？她謂：「唔會，拍劇咁耐係好拍檔。（同陳自瑤熟唔熟？）拍過一套劇。（你好惹是非？）拍一套劇就會有，之前拍《踩》劇都有同張振朗傳過。（覺得好無辜？）我學習緊點同同事相處愉快之餘，而又冇緋聞。」
至於浩信被問到會否因緋聞影響自己與太太的心情？他謂：「唔會，太太知我哋係朋友，第一日拍都一齊研究劇本，話唔係Friend都冇人信。（會唔會因為呢件事避嫌？）唔需要，套套劇都要避點會拍得好。」
王浩信與陳自瑤周一（9日）下午到天水圍一商場出席活動，亦是二人自婚變的消息傳出後首度「合體」於公開活動現身。據知，二人席間會大玩遊戲，兩公婆拍住上齊齊搵真銀，相信會成為傳媒焦點。而陳敏之與囝囝雷子樂亦會出席同一活動。
(on.cc東網)
王力宏最近推出新碟《A.I.愛》後引起不少樂迷及網民正反兩極批評。
有台灣消息指有網民聲稱在相關社交網站留下負評後即遭刪文甚至被舉報，更無端端把王力宏太太李靚蕾扯落水，有部分網民更成立「鐵血蕾後刀下冤魂」網上聯盟以「呻冤」！
王力宏工作室在微博發聲明為李靚蕾護航，先指如有「涉及人身攻擊、不雅用詞、或激烈的負面言論，本公司會視情況刪除、限制留言。」並指對於有部分媒體對李靚蕾的不實報道會保留法律追訴權利。
聲明指：「靚蕾很愛護粉絲，平時會花時間私自用心整理收集粉絲的禮物、卡片、留言跟力宏與團體分享，報道所稱之『親上火線對槓粉絲』是絕無可能的不實報道。」
(on.cc 東網)
胡杏兒將於本月尾就榮升做媽媽，懷孕初期，對於腹中塊肉嘅性別，一直都保持神秘感，杏兒就話每次照超聲波，BB都摺埋重要部位，又話有長輩未返香港，要等埋先公佈。
直至上月底，杏兒同老公李乘德(Philip)就開咗一個小型派對，公佈BB嘅性別，登登登…「It’s a boy.」，係慈姑椗嚟㗎！
啲人話女人最靚嘅時刻，除咗係結婚嘅時候，就係懷孕喇，所以好多準媽媽都會喺分娩前，影番輯靚相留念，杏兒都唔例外，佢今日就同老公分別喺ig貼咗啲Baby bump shoot。
李氏夫婦就好有默契咁，黑白配咁喺ig貼圖，李太負責黑色系列，李生就貼出白色系列，真係隔住個mon都感受到佢哋啲幸福！
(蘋果日報)
莊思明(Lisa)今日喺ig貼咗啲手瘀腳瘀嘅相，原來佢日前發生交通意外，好彩人冇事，但佢就留言話：「架車撞到total loss，但我除咗撞瘀手腳之外，竟然一啲事都無！俗語有話『大難不死必有後福』，希望我嘅後福唔會太後先降臨，以後真係要小心揸車啦，因爲唔係每次意外都咁好彩！」之後佢仲寫咗一大堆Hashtag：「#o依家有d唔捨得我架gucci車仔 #以後要加倍小心 #大難不死必有後福 #drivesafe #Fiat原來好硬淨！」
Lisa今日接受傳媒訪問，佢話：「嗰日喺金鐘花園道落斜，行到轉彎，可能因為之前落完雨，冇為意地下好跣，我又揸得快咗少少，結果唔小心撞咗，我人冇事，自己可以行落車，真係好好彩，但係車房話整番都麻煩，因為啲機件好傷，叫我不如total(劏)咗佢！」Lisa仲話雖然架車揸咗5、6年，而且佢都打算換車，但係冇諗過喺呢個情況吓唔要架車：「我冇諗過佢離棄我會快過我離棄佢，其實真係好唔捨得，佢都真係好堅硬，之前Mona(莊思華)揸呢架車俾人撞過都冇事！」
Lisa亦都話楊明事後有話咗幾句，佢叫我下次小心啲，唔知喺呢段冇車揸嘅情況下，男友又會唔會做柴可夫呢？佢就話：「佢都唔得閒，我咪自己搭車囉，或者坐人哋啲車，呢個時候係一個好好嘅考驗，測驗一下邊個係我嘅好朋友，明知我撞完車，佢都肯借車俾我，呢個真係好朋友！」至於男友會唔會打算送番架車？Lisa哈哈大笑話：「唔會喇，你當佢係首富咩，我可能過幾日還神兼睇車，我心目中唔會買7人車，太大喇，怕自己控制唔到，多數會買番啲細車！」
(蘋果日報)
