藝人李佳芯（Ali）及蔡思貝到深水埗宣傳無綫劇集《踩過界》，Ali回應有指她與ViuTV主持陳炳銓，因為公司壓力，要將戀情低調。
她表示：「公司冇壓力，我本身都低調。（係咪拍拖？）正常交往，我本身都想喺事業上面衝，所以呢方面一向低調，我諗我依家如果冇一個正常嘅交往，我自己都驚。（男方有壓力？）唔知佢有冇壓力，我哋冇傾呢啲嘢，但有都會係好事，可以係一種動力。（話你哋女尊男卑、美女與野獸？）係咩？我幾鍾意睇《美女與野獸》，幾浪漫！其實佢都做男主角喎，喺我角度我唔覺得係女尊男卑，同埋做朋友，舒服、開心就得！」
(on.cc東網)
現年40歲、95年亞姐亞軍黎淑賢(Bonnie)係出名嘅索媽，與前夫盧惠光生咗兩個仔。後來嫁俾現任丈夫、美容醫生許智政再生兩個仔，但身材依然fit到漏，一啲都冇走樣。
不過，黎淑賢最近嘅嘅樣就被指好膠，五官越來越精緻，有整容之嫌。
日前Bonnie接受訪問時，誓神劈願否認整容，佢話：「對我嚟講，要開刀嘅先係整容，我冇開過刀，我只係打咗針！」Bonnie老公係美容醫生，Bonnie打美容針當然由老公負責。
問佢係咪女為悅己者容，同時又要取悅老公？Bonnie一口否認話：「點解我要取悅別人？至緊要係自己覺得好睇，唔需要為別人而生活！」
盧惠光係黎淑賢嘅前夫，被問到佢上一段婚姻對現在有冇影響，佢話﹕「每一段婚姻都唔同嘅，對象唔同吖嘛！不過人係會長大，以前我10幾歲就結婚，當然唔夠成熟，o依家我有4個仔，從佢地身上，我都可以學到好多嘢！」
Bonnie隨後笑住更正：「應該係5個仔先啱」因為第5個仔就係老公！
「我真係精神分裂！對住個大嘅就要講大人嘢，對住細嘅，又要扮cute。我成日叫錯佢哋嘅名，有時要叫４次先叫得啱，連工人姐姐都笑埋一份！」
(on.cc 東網)
現年50歲嘅前港姐陳法蓉近年注重作息，已減少幕前嘅產量以享受生活。呢日佢突然喺微博晒出2001年嘅古裝劇《小寶與康熙》舊照，並留言：「舊日的足迹。」
照片中，當年嘅演員張衞健、朱茵、陳法蓉、吳辰君、張茜等齊齊入鏡，大家樣貌青澀，面上仲帶有幾分稚氣，簡直係男嘅型，女嘅索！
呢幾張相一曝光，即引來網友無限回憶。
唔少人都話好羨慕張衞健可以畀一班靚靚「老婆」圍，佢哋紛紛留言：「好喜歡這部劇」、「真的好喜歡這部電視啊，好喜歡你扮演的龍兒」、「怎麼沒有林心如和舒淇呢」。
仲有網友唸出「小寶」張衞健嘅名詩：「涼風有信，秋月無邊，虧我思嬌嘅情緒好比度日如年，雖則我唔係玉樹臨風、瀟灑倜儻，但我有廣闊嘅胸襟加強勁嘅臂彎！」真係見字有聲呀！
(on.cc東網)
歌手鄭欣宜與導演彭秀慧出席電影《29+1》DVD簽名會。
欣宜表示一開始接這電影時很驚自己做得不好，因為演戲經驗不多，但幸好導演跟她慢慢傾，亦為她與拍檔蔡瀚億提供練習，讓他們多些了解對方。
今次回響幾好，為日後拍戲打了少少強心針。她笑言：「其實之前都講過，我想做啲八婆、bitch嘅角色，因為可以好不負責任，好好玩。」
另外，談到她獲蕭定一投資千萬開新唱片公司Label，讓她自立門戶做揸弗人。
對此欣宜未有否認：「我九月會出新歌，到時會同大家分享我喺唱片方面嘅動向。」
問到係咪大個女嘅決定：「都大個女，係時候要繼續學多啲嘢，等宣布。」
講到自己喺音樂方面想多啲話事：「其實蕭定一好錫我，一路都畀好多話事權我，有時我係唔識，叫番佢哋揀，但都係好事，可以逼自己成長，逼自己去學做音樂，總之係開心嘢，到時大家等聽好消息。」
（on.cc 東網）
【講得出做得到】張栢芝直播開心宣佈大日子！
張栢芝自從開咗社交網站之後，不時更新同網友玩直播，同大家更新吓近況。
之前栢芝喺直播期間宣布重返樂壇，呢個喜訊真係令到班粉絲大感興奮。
栢芝真係講得出，做得到。
佢仲喺社交網站上載歌詞同大家分享，睇嚟佢真係好重視錄音呢個大日子！
喺錄音期間，栢芝趁住空檔同大家玩直播，話因為依家錄音錄到好肚餓，所以要食番兩啖炒飯先有力再錄。
「壓力好大，我一入錄音室就覺得好大壓力，又唔夠瞓，我唔想靠電腦執音，想一take過！好多話我唱KTV同台上唱現場好唔同，因為KTV冇靠電腦係會好啲。」
及後栢芝話因為要養聲，所以同網友玩多陣直播就講拜拜啦！
(on.cc 東網)
曾演出日劇《交響情人夢》嘅女星紗榮子同購物網站ZOZOTOWN社長前澤友作，前年秋天撻着，佢哋一度傳出好事近，點知日前就爆分訊，紗榮子無望嫁入豪門。
據日本傳媒報道，紗榮子為兩個囝囝到英國升學﹐秋天開始搬到當地居住，不過前澤友作為生意龐大，根本唔可能離開日本，兩人尊重對方意願，已於兩個月前和平分手，但紗榮子日後仍會往返日本工作。對於分手傳聞，紗榮子事務所承認兩人已經分手，話私人事交番佢本人處理。
30歲嘅紗榮子入行多年演藝事業唔夠佢私生活精采，被指拜金嘅佢，另一半都家底十足。紗榮子於2007年同著名棒球手達比修有奉子成婚，並育有兩名兒子，兩人喺2012年離婚收場，紗榮子獲得可觀贍養費。至於前澤友作係購物網站ZOZOTOWN社長，身家更達235億港元，令紗榮子成為圈中富婆，不時於社交網站公開富貴生活。
(蘋果日報)
【認好錫栢芝】謝賢回應「不喜歡王菲」：多餘嘅
謝賢接受電視節目訪問時，談及兒子謝霆鋒的前妻張栢芝及現任女友王菲。
謝賢坦言好錫栢芝：「我成日同人講我好錫呢個新抱，因為佢幫我生咗兩個孫，有咩好得過畀兩個孫我呀？」
問到同霆鋒現任女友王菲有冇見面：「呢樣唔理啦！霆鋒從來唔會問我識咩女仔，我哋屋企唔興問呢啲嘢！」
但近日有指謝賢只喜歡栢芝，而不喜歡王菲，令謝賢大感委屈。
謝賢接受訪問時澄清：「完全係斷章取義，都多餘嘅。」
「我個仔（霆鋒）依家咁開心，性格又開朗，一定有原因嘅。」
之後謝賢仲話：「我梗係好鍾意王菲。」
(on.cc 東網)
陳美齡嘅61年人生，有上有落，刺激如坐過山車。
初生時一度被重男輕女嫲嫲嫌棄，童年一次意外跌入水缸差點喪命，幸好獲嫲嫲救活過來，嫲孫關係逆轉。陳美齡機緣巧合入行，歌唱事業如日方中卻宣佈退出，重投校園，專心向學卻接獲爸爸病逝打擊。當陳美齡遇上心儀日籍丈夫金子力，決定中日婚姻，卻承受歷史枷鎖壓力。「我覺得人生係唔會預想得到，即使有計劃都未必咁順利，o依家幾好，但又突然會病，明明好好時，又會面對爸爸過世。」
好事壞事突如其來，陳美齡都坦然面對，佢日前喺中環寓所接受專訪時平常心話：「要知自己擁有好多，唔可以成日埋怨，要識得知恩、感恩同報恩，力量就會出嚟，就會遇到貴人有啟示，度過難關。」今年10月係陳美齡抗癌十周年，07年9月某一晚佢喺日本屋企梳化睇電視，發覺右胸有啲痕，摸時覺得有一小粒硬物，佢同老公金子力商量，盡快安排睇婦科做檢查，醫生證實陳美齡患上乳腺癌第一期，結果10月1號就安排入院做咗3小時手術，發現癌細胞冇擴散去淋巴，胸部可以保留，手術好成功。陳美齡由病發到康復，心情好忐忑，回想走過死門關：「我當時諗，細仔（協平）仲讀小學，得11歲，我真係唔可以死。好彩係第一期，唔係當日覺得個胸有少少痕，我會唔知，萬一遲咗，一、兩年會變大，一倍一倍變大。我算係執番呢條命，呢十年我係賺到。」
「呢十年，我好注重細仔，唔係睇化，我病好同天主講，我想要多五年，睇住細仔初中畢業，初中佢都10幾歲，就算冇咗媽媽，佢都可以自立，唔想佢咁細個就冇咗媽媽。五年過去，我又想同天主講數話想睇個孫個樣，咁咪又可以長啲囉，點知唸經時，我講唔出口，o依家已再多五年好感恩。」
結果陳美齡禱告中，佢講咗呢個訴求：「我話任你啦，你覺得我有用咪保住我條命，因為囝囝都讀高中，每日都係恩賜，每日都係賺番嚟，好似生日，好滿足，唔知仲有幾多年，只要有一年就做報恩嘅事。協平o依家20歲，天主畀我恩賜唔可以再問，再開口就以為我好貪心，五年前已經冇要求，我希望佢有指示畀我。」三個囝囝和平、昇平同協平都長大成人，自由時間多咗嘅陳美齡已開始籌備佢第90本書作，佢目標係出100本書。
(蘋果日報)
恭喜晒！官恩娜宣佈懷有第二胎，預產期係出年1月！
官恩娜2015年嫁咗畀混血醫生Juan-Domingo Maurellet後，兩個月就造人成功，前年仲喺香港剖腹誕下6.7磅兒子BéBé G！
呢日佢喺FACEBOOK上載一條短片，見到Ella同囝囝喺沙灘玩沙，囝囝四圍跑非常活潑，之後又同老公拖住囝囝漫步沙灘，仲係沙灘上畫出「Baby #2 Due jan 2018」宣佈自己有喜！
Ella唱片公司發言人接受傳媒訪問時，承認Ella已經有咗：「知佢有咗四個月，佗得好辛苦同日日嘔，不過依家穩定咗，未知仔女！」有報道指，本身打算復出嘅佢，亦都因為咁暫停錄音。
（sina)
早前，李國麟一張與15歲囡囡李沅薐(Cherie)嘅親嘴合照，惹來網上一陣小風波。
有網民認為呢啲係父愛，只要子女唔介意，幾多歲都可以錫；亦有網民以道德標準來批判呢件事，但係實情旁人又怎可單憑雙眼去衡量呢種愛呢！
62歲嘅李國麟早前就接受周刊專訪，重提與囡囡親嘴一事，他依然有自己一套嘅睇法同做法。老年得女嘅李國麟，當然錫到個女燶，佢話好多人都話佢將個女寵壞，個女想要乜就買乜。
李國麟就舉咗一個例子，佢話買咗部新電話俾Cherie，三日就唔見咗，老婆就話不如只買一部長者電話俾阿女就算，但係李國麟就靜靜雞咁帶Cherie去買過部新款電話。
李國麟話，記憶中，爸爸當年都係咁好寵阿妹，李爸爸教落，生仔要嚴，因為將來要孭起頭家；生女就要寵，因為唔知佢將來嫁得好唔好，touch wood 將來嫁得唔好，都有父愛同快樂嘅童年彌補番數吖！
至於上次咀嘴被網民批判一事，李國麟坦言，一直以來佢都唔理會網上嘅討論。佢覺得可能係啲人思想保守或者有啲唔愉快嘅經歷影響，先會戴有色眼鏡嚟睇呢件事。佢話當時同阿女慶祝，有好多朋友在場，唔通搞亂倫會咁公開咩？
李國麟咁惜囡囡，原來佢都對阿女做咗一件事感到好後悔，就係買咗部電話俾阿女。
佢話依家電話佔咗阿女95％時間，Cherie同手機人機合一。李國麟好欷歔咁話，以前阿女當自己係偶像，依家偶像變閒角，佢話真係唔敢想像之後阿女拍拖佢會點，但係肯定嘅係佢一定會呷醋，感覺儼如失戀。
Cherie有向李國麟透露，有人曾向她表白，幸好阿女拒絕咗，但呢位老竇都好爆炸，竟然問阿女拒愛嘅理由係咪佢同性戀，Cherie即回佢一句：你黐線㗎！
李國麟話，覺得阿女遲早都會進入成人世界，佢更形容阿女呢隻紙鳶就快斷，所以佢更珍惜依家同囡囡相處嘅時間。
(蘋果日報)
