洪天明老婆周家蔚（Janet）平時除了要打理美容生意又要照顧兩個寶貝仔，所以唔使開工的洪天明當然要幫輕吓老婆啦！
呢日天明就化身湊仔公，同老婆帶埋兩個兒子洪大仁（TJ）和洪竟琋（JT）到將軍澳行街家庭樂。
一家四口於該處商場內的食肆醫肚後步出，見兩兄弟都好活潑冇時停。
期間天明於商場櫃台蓋泊車飛時，細仔JT不時手指指兼大叫媽咪抱，於是Janet一手抱起細仔扮「空中飛人」。 
另一隻手就做出超人手勢，與哥哥齊齊扮超人。
有工作在身的Janet交低兩兒子給老公後先行搭港鐵離開。
紮紮跳的大仔TJ突然興奮到周圍走，還跑到好遠，天明要大聲嗌TJ返回身邊，又急步跑上前捉實手仔，幾經辛苦才帶着兩個仔仔齊齊返屋企！
(on.cc 東網)
台灣型男彭于晏前幾日嚟咗香港出席《悟空傳》首映。
估唔到一個轉身，佢已經同屋企人飛咗去英國旅行。
彭于晏仲用埋電話拍晒片同大家喺IG全程直擊，好似帶住大家去旅行一樣，唔少粉絲都話佢細心又貼心呀！
呢日彭于晏就同屋企人去咗劍橋市，除咗搭火車之外，彭于晏踏單車咁暢遊一番。
邊拍片邊踏單車，仲要擺出個煞食陽光笑容，真係令唔少女粉絲睇到嘩嘩聲！
去得劍橋市，又點可以唔去劍橋大學呢？彭于晏就同屋企人四圍行，除咗留個言表明到此一遊外，連彭媽媽都入埋鏡，彭媽媽仲表情十足地賣萌，似乎玩得開心。
之後佢哋仲泛舟湖上，真係好寫意呀！ 
54歲的「大美人」關之琳（之之）早前以高達4,200萬港元，接拍內地真人騷《我們來了》第二季。近日，她接受內地媒體訪問，表示曾經看過林青霞和趙雅芝演出的第一季節目，是觸動她來參加節目的原因之一。關之琳又說在節目內會盡量做自己，但會比較禮讓其他人，但之後睇番，就覺得當時自己應該主動一點。
關之琳訪問時指自己其實不會做戲，都是逼出來的，她稱自己性格怕醜，又喜歡讓人，不應該做娛樂圈，因為這行應該野心大一點，主動一點，而自己就剛好相反，所以應該做其他行業。被問到會否復出拍戲時，關之琳表示機會應該是零，因為她覺得女演員到了一定的年紀，就要停了。對於獎項，關之琳覺得可遇不可求，每個演員都希望攞到獎，但好可惜自己拍的電影都是商業片。她又講到自己從影期間，沒有遇到一個自己喜歡的角色，好想試一下做壞人，但礙於外表的限制，多數都是做一些好人角色。
經歷過兩段婚姻的關之琳又感嘆地表示，自己身為一個女人，有好多遺憾，失去了好多。原因是一出來就拍戲，沒有嘗試做其他行業。做生意都是剛剛才開始，還想學畫畫，她覺得只要肯學，甚麼時候都可以。即使愛情，只要放開，就可以找到心愛的人。她指自己選擇了不生BB，不算是遺憾，她覺得世界太多污染、很複雜，自己一個人都幾好。
(on.cc東網)
日本女團SPEED成員上原多香子的丈夫TENN於2014年9月自殺身亡後。
新一期日本雜誌爆料，指TENN的胞弟公開兄長的遺書，內容涉及多香子背夫偷食，搭上有婦之夫、日劇《花樣男子》的中日混血男星阿部力。
有多香子與阿部力咀嘴的照片做證，指多香子不忠才是導致TENN上吊自殺的真正原因。
至於阿部力方面，他於2009年與內地女星史可結婚，2014年7月阿部力與多香子合演舞台劇，到各地巡迴演出期間發生婚外情。
不過TENN自殺後，阿部力感到好震驚，此事對他很大衝擊，他的朋友透露，阿部力自此除了演戲之外，很少看到他的笑容。
阿部力與妻子其實已於2012年
分居，內地更傳兩人已離婚，前妻亦已返回內地，之後再沒有聯絡，而她所屬的經理人公司亦以藝人的私事為由不作回應。
阿部力於4日前已停止更新Instagram，不過仍有大批網民留言狂插阿部力。
(on.cc 東網)
經典愛情電影《鐵達尼號》男、女主角里安納度狄卡比奧（Leonardo DiCaprio）同琦溫絲莉（Kate Winslet），傳出由銀幕情侶變真情侶，有雜誌驚爆兩人拍拖，仲影到佢哋一齊喺法國游水度假，消息震驚全球！
美國雜誌《Star》話有消息人士指，里安納度當年已經對琦溫絲莉一見鍾情，一路都覺得對方係世界上最靚嘅女人，即使身邊伴侶經常換，依然覺得「肥溫」先係「對的人」，只有同佢之間先可以好好咁溝通！
再者，琦溫斯莉同老公Ned Rocknroll近日傳出婚姻有問題，而里安納度咁岩今年又回復單身，就係咁，就傳出兩人擦出愛火！
不過呢單嘢傳出無耐，美國闢謠網站《Gossip Cop》就引述佢兩位身邊好友話，佢哋仲係好朋友，仲轉述里安納度回應，話男主角同佢哋講，報道所有嘢都係假！
（Sina)
藝人湯怡同歌手洪卓立拍拖原來唔經唔覺已經十年啦，近年有唔少人都好想睇到佢哋快啲結婚，雖然未聽到佢哋有婚訊，不過唔少人都讚佢哋夠甜蜜！
適逢今年係佢哋拍拖十周年，呢個咁重要嘅日子，當然要好好咁慶祝一吓！慶祝又點可以少咗送禮物呢個環節呢？湯怡決定自己做手作仔，整一對情侶公仔出嚟，仲要好有心機咁喺個公仔整個「1」同埋「O」字！
湯怡仲喺鏡頭面前教大家點織呢隻公仔出嚟，見佢兩三吓手勢就搞掂，真係快、靚、正！
原來織呢對公仔湯怡都唔係第一次，其實佢喺九年幾前已經整過，仲喺佢哋拍拖一周年開始，每年拍拖周年都會織一對公仔送畀洪卓立，仲晒冷畀大家睇吓呢個「洪氏家族」！
之不過佢哋拍拖成十年，唔係應該有十對公仔先啱㗎咩？但數嚟數去都唔夠數，湯怡解釋：「係啦，係冇5、6、7、8、9嘅，點解呢？人開始懶啦，冇計啦！」雖然miss咗幾年，不過有年湯怡就用織冷衫嘅方式，織咗個巨大情侶公仔出嚟，真係閃盲網友嘅眼晴！唔少網友都話湯怡又識煮飯，依家連公仔都識整，呢個老婆真係娶得過，仲係咁留言叫洪卓立畀心機，快啲娶湯怡啦，仲封佢做最佳女朋友添！
網民有話兒：
KXXXes傑XX：超級sweet
P Sxxx：如果選最佳女朋友，湯怡係第2，冇人咁（敢）認第1
x搞董x：好羨慕你哋咁恩愛，祝你地（哋）長長久久❤
S Kxxny：唔like唔得，心機作，祝永遠幸福
月x：幾時結婚啊
(on.cc東網)
陸永太太帶人有三急嘅大女Hannah，喺商場傷殘人士洗手間加育嬰室解決，惹嚟一位女士嘅微言。
陸太仲要即時道歉，呢件事就引嚟好多網民戥陸太同囡囡唔抵。
陸永接受訪問時，話太太道歉係正確做法。
「件事就係咁，嗰位街坊覺得唔好，出聲話吓佢哋（太太同囡囡），我太太就道歉話唔好意思，我覺得咁做係啱嘅，始終殘廁係有殘廁人士嘅需要，講到育嬰板，咁梗係嬰兒用，我個女唔係嬰兒吖嘛，我老婆知唔啱，但小朋友太急，對唔住。」
陸永仲話人哋體諒只係人情。
「如果環顧四周冇人，小朋友好急咪衝入去囉，如果出嚟見到有人話：『我等你好耐喎。』咁始終唔係傷殘人士，都係有錯。」
「佢（太太）道歉係處理得好好，畀小朋友知唔可以喺街爭執，小朋友基本上唔知咩事，亦唔可以畀佢覺得我做錯咩呀？或者媽咪做錯咩？我哋都係一貫作風，總之令人不便就會道歉。」
陸永又不認為對方麻煩。
(on.cc 東網 )
楊千嬅同老公丁子高結婚以來一直恩愛，大時大節都會為對方準備驚喜。
今年5月嘅時候，佢哋仲慶祝拍拖10周年，真係甜到漏！
日前，就喺佢哋結婚8周年喇！
千嬅就上載兩公婆慶祝合照。見到千嬅小鳥伊人咁挨住丁生，仲嘴仔嘟嘟，少女味十足，千嬅仲引用佢首名曲《飛女正傳》嘅歌詞留言。
「Our 8th世界將我包圍 誓死都一齊 壯觀得有如 懸崖的婚禮⋯⋯❤《飛女正傳》」
連張繼聰都忍唔住留言嗌「Congratulations」，曬死人啦丁生丁太！
(on.cc 東網)
昨日36歲生日嘅韓劇《五個孩子》女星蘇有珍，2013年跟名廚白鍾元結婚，二人育有一仔一女。今日蘇有珍再傳來好消息，宣佈目前陀第三胎。
昨早蘇有珍於Instagram公開家人為佢慶祝36歲生日嘅照片，留言：「感謝大家嘅祝福，希望大家都能度過幸福嘅一日。
我都會跟丈夫、可愛嘅子女，仲有肚裡嘅孩子一齊度過愉快嘅一日。」宣佈陀第三胎嘅消息。據相關人士透露，蘇有珍目前已懷孕12周，預產期為明年2月。
（蘋果日報 / 東方日報）
林盛斌（Bob）工作一個接一個，吸金力非同小可，最近更被發現買了新車。
「係嘅，的確係買咗架新車。（車價250萬？）其實我已經揀架低調啲嘅車，估唔到都畀大家發現，其實呢個車廠品牌出品嘅車，係我由細到大嘅Dream car！」
「我一出嚟做嘢就儲錢，儲到近排差唔多，加上車行通知我，我就買嚟當獎勵自己一路以來努力工作囉！」
講到他即將第四度做爹哋。
「老婆預產期係月尾，我都盡量調配工作，希望陪佢入產房迎接小生命。」
「之前有關佢有妊娠糖尿嘅報道出咗，好多朋友都好關心，其實佢過往大肚都有過呢個情況，但佢依家情況已經穩定咗，多謝大家關心！」
(on.cc 東網)
