55歲的天王劉德華今年初因在泰國拍攝廣告不慎墜馬受傷而要停工休養！不過劉天王的康復進度理想，今日華仔「驚喜現身」，與梁朝偉和劉嘉玲一起拍片力撐劉偉強導演的新片《建軍大業》！片中，見華仔並沒有如之前報導所指的暴瘦，聲音亦沒有沙啞，而且樣子精神，狀態大勇不需使拐仗幫助，令大家都即時放心不少！
而早前華仔亦有在自己的官網更新近況，分享復工為新片《俠盜聯盟》配音的照片！相信華仔可以達成早前表示明年會舉行個唱的承諾！
（原文：SINA）
【分居係因為有第三者？】溫碧霞再度開腔
51歲嘅「海潮」溫碧霞上周突爆同結婚十七年嘅何祖光分居後，之後佢啱啱有工作要外出，當時佢喺機場都好大方咁停下來接受傳媒訪問，見佢臉容憔悴，講到分居，佢當時咁話：「17年嘅感情，唔係話分開就可以分開…」，今日有周刊就話佢哋分居嘅原因除咗係工作上有分歧外，仲話兩度影到何祖光，趁溫碧霞返大陸工作時，約會一名貌似前港姐冠軍郭藹明嘅中女。
溫碧霞婚後依然活躍於娛樂圈，近年就轉戰大陸，見佢不時會返大陸工作，上周突然爆出佢同老公分居，好多人都感到愕然，事後溫碧霞就離港工作，當時佢回應分居時，話17年感情唔係話分就分，咁問佢係咪會俾機會老公時，佢就話：「我諗…我諗…發生咗呢件事後，我發覺係最緊要係大家開心囉。開心真係最緊要㗎！我希望我哋兩個都要開心，我亦都希望我哋最緊要係大家都要珍惜對方囉！」
今日有周刊指，溫碧霞同老公分居嘅主要原因，係何祖光不滿溫碧霞經常返大陸工作，而女方就唔肯為家庭而放棄事業，咁分歧就越來越大，關係就越來越僵啦！周刊報道入面，仲話曾經影過何祖光，兩次相約一名貌似郭藹明嘅中女出街，話佢哋行街、食飯，按腳，非常疏肝咁話。而周刊亦有就事件問番溫碧霞，報道就話溫碧霞依然好維護老公，話佢都認識嗰位中女，仲話呢啲係好正常嘅社交，完全唔介意喎！
(蘋果日報)
【經常都便秘﹗】專家：排宿便「靠呢招」
便秘好幾天，肚子大到不行？甚至被人誤以為懷孕？一直沒上廁所，宿便囤積、肚子當然會變大，根據國外網站《Baby Bod》，美國紐約物理治療師Marianne Ryan指出，想解決便秘問題，除了求助藥物外，建議可透過小腹按摩法，來幫助排便。
該如何按摩才對？Marianne Ryan表示，先喝杯溫開水，雙手塗乳液，以肚臍為中心點，將2、3根手指放在腹部右下方，適度施力於同一個點上，順時針旋轉10秒，再往右上、肚臍上方、左上、左下順時畫圓按壓，做完一遍後，再重複動作1分鐘，按摩3到4次即可，切記別太大力，以免造成腸胃不適。
除了按摩外，平常建議多吃高纖維蔬果，多喝水、走路，並養成運動習慣，小腹才能維持平坦。此外，上廁所時別一直玩手機或看報紙，容易對腸胃帶來不良影響，建議別在廁所待太久，以不超過5至10分鐘較妥當。
(ETtoday)
【睡眠窒息症】專家倡以家居診斷方式檢測
阻塞性睡眠窒息症是常見的睡眠呼吸疾病，患者的上呼吸道肌肉會放鬆，令呼吸道收窄，造成鼻鼾聲，甚至窒息。
一般的診斷方式主要依靠患者入院進行睡眠檢測，但由於現時公立醫院的輪候時間過長，有醫生轉為提供家用檢查儀器，讓患者能在家中自行檢測。中大醫學院為睡眠窒息症的診治模式進行比較，發現家居式及傳統住院式，診斷準確度及治療成效均相若。
內科及藥物治療學系系主任許樹昌表示，家居式可大幅縮短輪候時間，首次接受診症至接受治療的時間，由原來的三百日縮短至一百五十五日。他又表示，使用家居診斷模式的患者，長遠可改善日間嗜睡的情況、生活質素及認知能力，節省醫療成本近一萬四千元。醫學院建議，本港增加採用家居檢測方式，及早為病人診治。
（原文：881903）
【入無線29年】綠葉王首度與汪明荃拍劇
加入TVB29年，汪明荃（阿姐）和馬海倫雖然是同事亦相識多年，不過原來兩人從來未合作過拍劇。
阿姐今晚在微博上載多張相片，原來她和張繼聰﹑馬海倫﹑李佳芯﹑龔嘉欣等，拍攝無綫新劇《誇世代》，阿姐今次以客串形式參演，她表示高興和他們合作，亦謝謝監製陳維冠邀請，阿姐透露下星期還有一天外景拍攝，阿姐在微博還說：「馬海倫說她在TVB廿九年，今天是第一次與我合作。」
（原文：明報）
【唔止煮餸叻】方太教女仲叻：一就一，二就二，唔會長氣
方太方任利莎教煮餸，一早就已經係媽媽們心目中嘅良師益友。至於方太嘅媽媽，都係位好有個性嘅女士，結婚前開出條件，話明婚後要讀書，結果成功考到上海助產士資格。不過方母喺任利莎8歲嘅時候離世，終年33歲。
任利莎繼承到母親性格，對兩子三女有一套教育方針，佢曾喺專訪中講過：「我會說出我的意見，也不反對你有自己意見。只要你能承擔後果，便去做。」方太自言，一就一，二就二，唔會長氣。5位子女唔係所有人都留喺香港，方太亦講經過通電話保持聯絡，維繫感情。
方太大女方珍妮曾經係麗的電視藝人，參演過《風塵淚》等劇集演出，但珍妮入行，原來唔關方太事，而係行街中途被被施南生發掘，當時方太拒絕讓女兒入行，直至珍妣同佢講：「為甚麼你要將我的命，弄得跟你一樣呢？」方太先俾珍妮加入麗的。不過珍妮入行幾年後，好快就辭職，到北京做生意，之後仲識咗法國大使老公。
至於二女方安妮，做過27年警察，曾任機動部隊指揮官，帶領前綫工作，因為打擊賣淫活動，有綽號叫「殺雞女督察」，安妮喺14年轉任地產代理監管局執行總監。
孻女方寶妮早年接受專訪時就話，同媽咪有最多時間相處，仲唔介意自嘲裙腳。寶妮仲話，初戀男友曾叫佢一齊到美國生活，但因為唔捨得媽咪，所以選擇留低。
(蘋果日報)
【消委會】發現食油樣本中41款含有塑化劑
消委會測試60款市面較常見的食油樣本，發現41款含有塑化劑。
當中五款更高於本港行動水平和歐盟遷移限量的標準，並有兩款檢出殘留溶劑哥羅芳 ；42款檢出污染物氯丙二醇及有四十六款檢出基因致癌物環氧丙醇。
消委會期望政府能夠早日立法，制訂食油安全標準，加強食油安全，並敦促業界積極檢視原材料及生產程序，盡量避免食油中含具風險的污染物。
（原文：881903）
【混血、高大、靚仔】方太大讚方生好靚仔﹗
方太（任利莎）爸爸係民國時候嘅高官，三妻四妾喺當時係好普通嘅事，於45年任爸爸帶住其中一位太太及幾名仔女嚟到香港，之後到方太嚟到，一家幾口當時住喺北角一幢唐樓。因為方太媽咪早逝，同有媽咪嘅兄弟姊妹相處得唔快樂，佢形容當時係每日喺屋企都喊，方太話：「嗰時爸爸開咗間餐廳同辦館，因為我冇媽媽，得我睇舖。咁唔通你唔睇呀？以前收舖收12點，喺咁嘅情形之下，你喺屋企唔開心，喺學校讀書讀唔到，o依家啲女仔叻，識出走，嗰時我哋唔敢，驚餓死同失禮自己，所以結婚係唯一嘅出路，我20歲就結婚。」
方太同先生嘅邂逅都幾似電影情節，話說每日以淚洗面嘅方太，令佢暫時釋懷嘅係每星期嘅「紅荳冰時間」，佢話：「我同先生拍拖好浪漫，喺彌敦道屋企舖頭附近有間店，我去食3毫子紅荳冰，係我最開心嘅時間。」方太話當時好興jukebox（點唱機），入一毫子就可以點歌聽，不過當時方太只係夠錢飲冰，佢笑笑口話：「你食3毫子冰，咪坐喺度聽人哋點啲歌囉。嗰時喺屋企好苦悶，我唔可以同爸爸講同同父異母兄弟姊妹相處唔嚟，喺冰室就遇到我先生，佢成日都喺度，佢好靚仔，有少少混血，乾淨企理，我自細就鍾意靚仔。」
方太先後講咗老公4次好靚仔之後，佢跟住話：「佢知道我鍾意聽咩歌，跟住佢就點，你會知道佢係特登點畀你聽。見得多咪打招呼，講真少女時代好寂寞、好唔開心，有歌聽吓覺得好享受。」被方太形容好靚仔嘅方生，人稱方達，是直譯佢嘅英文姓氏Fonda，身高5呎10吋嘅佢絕對係高大靚仔，又喺英國軍部工作，職位係後備後軍上尉。到咗聖誕節方生終於出手，約方太去街，方太話：「佢帶咗我去姐夫屋企食飯，姐夫係英國人嚟香港做幫辦。冇耐佢就同我講你嫁畀我啦，嗰時大家都係20歲左右，相識頭尾一年多啲，以前我哋拍拖，睇戲都唔拖手，所以覺得你哋o依家好奇怪。」
嗰時方太諗呢個係離開屋企唯一辦法，同老竇講結婚時，嚇到佢窒咗。最後反對唔成之下，方太兩公婆都係開個茶會當擺酒，喺當時嚟講都幾前衛。不過呢段婚姻只係維持咗33年，最後都係離婚收場，方太話當一個人越行越遠，而另一個仍然表現不太成熟時，分岐就出現。
其實方太結咗婚之後，為咗生計，有一段時間去北角都城戲院做劃票員，仲引嚟過狂蜂浪蝶。當時有一位有錢嘅英印混血兒日日嚟睇戲，一定坐樓上超特等，仲成日借機搭訕，又買埋陳皮梅畀方太，有一日佢邀請方太返屋企食飯：「都唔知點解自己會去，佢食完飯同我講話好鍾意我，如果你做我女朋友我會畀間屋你住，點樣、點樣。我覺得呢個人不懷好意，之後就請經理調咗自己去另一個部門。」
其實除咗呢位英印過客，方太仲有一位曾任職航空公司嘅知己、伴侶，可惜對方已經喺多年前離世，方太帶點唏噓話：「同呢位知己相識咗33年，認識嗰陣都係大家唔快樂嘅時候，到後來大家一齊生活咗17年，大家都有大家嘅故事，關係可以講係好知己朋友，可以講係一個伴侶。」
(蘋果日報)
【糖尿病瘦60磅】近照瘦咗幾個碼
曾經喺周星馳主演電影《九品芝麻官》飾演尚書大人嘅資深配音員盧雄，近年因為糖尿病而減少幕前及配音工作，現年70歲嘅盧雄，近日接受港台節目《守下留情》主持劉偉恒同梁禮勤專訪，大談昔日配音軼事。節目官網更上載咗一張盧雄近照，見佢比往時足足瘦咗一個碼，但精神尚算不俗。
有周刊噚日打電話俾盧雄，佢表示呢次電台訪問係好早之前嘅錄音，問佢可有冇瘦咗50、60磅？盧雄說：「有呀。」佢承認受糖尿病困擾，由於身體狀況欠佳，暫時不便再接受訪問。
在《守下留情》訪問中，講到配音配得最多藝人，盧雄話：「配得最多係成奎安（大儍）。」之後盧雄重即刻扮大儍把惡聲話：「乜嘢事。」講到配音工作，盧雄話：「我哋嗰陣配音，係唔俾人知我哋配佢㗎，要做到我配曹查理，我就用呢把聲，成奎安我就用呢個聲，何家駒就用呢個聲。」盧雄之後又即時再扮大儍、曹查理把聲，講到扮何家駒，盧雄話：「佢把聲冇乜特別，但對方啲戲帶住我咁去。通常佢好多戲係三級片。」
盧雄成日為電影配音，但原來佢已經30年冇入戲院睇戲，因為睇得太多，而自己配音嘅戲，因為配音時已睇晒，所以唔會再睇，佢話：「我又拍戲又配音，已經完全冇代入感。你話點樣驚嘅戲，有鬼出現，呢度後面成班人吖嘛，啲鬼出現我都知係特技啦，差唔多點樣做我都知啦，咁我睇嚟做乜啫？完全冇代入感。o依家啲劇集我久唔久就會睇嘅。」
主持又問佢會唔會聽得唔舒服，盧雄話：「肯定係，所以點解導致我唔多睇呢，就係有呢個問題，除咗佢哋唔對嘴，佢哋啲語氣係唔得，唔係我自己認叻，我哋嗰輩要求高，你睇番啲港產片，真係好似嗰個人講嘢。我哋嗰陣第一要求自己要好，競爭好緊，你一定要比啲功夫比領班、導演睇，人哋咪會多用你囉，我就要自己upgrade自己啦，自己點樣練、點樣配得好啲，曹查理我直頭要講到好似曹查理講咁。」
(蘋果日報)
【好閃呀】許冠文一見老婆即笑笑口
現年74歲嘅影壇「冷面笑匠」許冠文，同老婆鄭潔英結婚45年，平時出街秤不離鉈，十分恩愛，堪稱圈中嘅模範夫妻。
日前(上月23日)下晝約4點半，許冠文竟然單拖現身銅鑼灣，身邊唔見老婆。見佢喺白沙道幾乎逐間逐間，由零食舖、到藥房再到護膚品店，許冠文都企正喺門口駐足唔郁，一時擔天望地、一時又擰轉身向番出馬路，之後佢再行去一間賣天然食品同日用品嘅店舖，望幾望就行入去，喺舖頭氹氹轉，試勻搽椰子油同唔同種類嘅cream喺手背。
再行多一轉，望望手錶，本身一直維持慢動作嘅許冠文，個樣突然好似甦醒咗咁，急急腳行返去對面馬路。等咗一陣，就見到許太施施然喺商場行出嚟，而許冠文亦好自然咁，貼實老婆一齊行。之後兩公婆就再喺附近鞋店睇鞋，老婆試鞋嗰陣，許冠文就識做企喺門口等，不過許太喺鞋店就未見斬獲。
二人等七人車司機期間，許冠文就耷低頭同老婆傾偈，間中仲「手口並用」七情上面，老婆就一味點頭回應，相比起喺條街個發呆樣，許冠文對住老婆明顯生猛晒。70歲嘅夫妻，其實恩愛起上嚟，都可以好閃！
(蘋果日報)