【祝福城城一索得女﹖】熊黛林：多一個唔多，少一個唔少

2017-09-29

Lynn稱：「我不嬲都係咁嘅，我都唔止一個ex，個個都係咁，一視同仁。。。

_____________

城城郭富城一索得女，前日佢出席活動，好開心咁咬住眼鏡框同大家介紹佢呢位小公主，又話好感謝太太Moka咁辛苦，仲自爆有份剪臍帶添！佢又自爆，唔使開工嗰陣，佢就一定返屋企湊女。而且，一眾好友都輪住恭喜佢初為人父。

而熊黛林（Lynn）昨日就去到中環文華酒店出席珠寶展，傳媒自然追問佢：城城生女做爸爸，問Lynn可會祝福佢？Lynn答：「你哋（指傳媒）祝福佢就夠啦！多一個唔多，少一個唔少。」

傳媒再問：「BB似城城喎（城城自己講0架），咁你會唔會覺得好靚女？你會唔會想睇下？」Lynn就答：「我冇乜想唔想睇，我唔好奇。自己嘅嘢咁多，仲理人哋嘅嘢咩？」

咁係咪即係，以後有關城城嘅嘢，你都唔會理？Lynn話：「理我老公嘅嘢啦，第二啲人嘅嘢我冇興趣。」咁你老公咪好冧？「等佢冧下啦。」咁呢啲係咪你老公意思？Lynn稱：「我不嬲都係咁嘅，我都唔止一個ex，個個都係咁，一視同仁，唔係對人。」

言下之意是否同每個ex都做唔到朋友？Lynn稱：「冇，完全係冇聯絡，所有都係咁。」係咪因為分手唔開心？「我個人性格就係咁。」再問Lynn係咪可以做到好絕？佢話：「係呀，睇唔出呢？」言下之意係咪想俾安全感老公？Lynn答：「係啦，費事啦。」

(蘋果日報)

【要結婚啦？】突然PO戴戒指相：終於找到讓我幸福的人

2017-09-29

麥貝夷日前認戀樂隊KillerSoap低音結他手陳樂恒，噚晚佢喺社交網放閃，貼出拖手相，男友嘅中指戴咗隻戒指，唔通咁快就宣佈訂婚！？

麥貝夷留言：「我終於找到讓我幸福的人啦！這位陳先生除了非常懂得疼愛我之外，還耐心的鼓勵我進步和成長，也教會了我愛是互相包容和體諒。每段關係都有不協調的時候，但我相信相愛就是在爭吵中仍然選擇擁抱對方。」

《蘋果》今日致電問恒仔係咪求婚成功？身在大陸嘅佢話：「未敢求住呀，邊敢求呀，可能人哋唔嫁畀我呢！因為成日都唔喺香港，去咗大陸做嘢，所以送隻hand made嘅純銀戒指，大家戴住可以掛住對方，見到戒指就諗起啫，如果要求婚，我梗係當住所有觀眾面前，喺live演出求啦，可以令到fans一齊見證呢件事嘛！」

(蘋果日報)

【佗B八個幾月】胡杏兒驚青問醫生：係咪有問題？

2017-09-29

「個樣變咗、鼻都大埋」嘅胡杏兒，懷胎八個多月，下月底生得，日前更公佈BB性別——一索得男，仲有傳佢想40歲之前生夠三個，今年37歲嘅杏兒，要爭取時間造人！

近月胡杏兒依然陀住巨肚開工，一時飛澳洲拍旅遊節目，一時為自家婚紗品牌搞騷，頻撲到老公都在ig投訴。客家新抱多飲湯水少吃補品，有過增肥做「肥田」再極速減磅嘅經驗，杏兒話：「有毅力一定可以生完修身，呢樣我唔擔心，BB而家成日踢我，直情好似在入面打筋斗咁！」

胡杏兒與老公李乘德（Philip）結婚兩年，今年年頭成功造人，現時陀B八個多月的她，重了20幾磅。之前對腹中嬰兒性別保密，但被老公無意間踢爆陀了男嬰，臨盆在即，杏兒亦開始心情緊張：「要開始準備，都開始有啲驚，因為我想順產，啲人話順產復原得快啲，但我未試過，一生人都未經歷過個種痛，唔知自己捱唔捱到，因為朋友都話會痛到發癲、痛到會暈，所以都有啲驚。」

講到BB，每日都有新鮮事，杏兒又開心又亂擔心，「有時個肚會摸到一舊嘢，唔知手定腳，爸爸有時會摸下佢。BB成日郁，係咁踢我，直情好似在入面打筋斗咁，係郁到我要問醫生：『佢郁得咁緊要，係咪有問題？』，醫生先話BB郁得多係好事。」

老公Philip係客家沙頭角禾坑村原居民、三代單傳，難免有後繼香燈壓力，胡杏兒成功陀仔，將來囝囝更有丁權，而奶奶及李家長輩都由外地返港照顧她。其實客家新抱，有甚麼禁忌？「冇喎，我奶奶整好多嘢俾我食，煲好多湯，但唔係好補嗰種，佢開始整薑醋。」她希望至少生兩個，三個亦唔拘，「一個好悶，我希望唔係好痛，唔好有陰影，如果冇嚇親，會生三個。」

陀B過程，杏兒謂倒是不辛苦：「好多人都話我個鼻大咗，個樣有啲唔同咗。其實頭三四個月係最辛苦，我喺無錫拍緊劇，成日發冷，成日想嘔，冇乜胃口；到四五個月就穩定咗，想食吓嘢，嗰段時間係最舒服。到咗依家，去到第三個階段，又開始辛苦，因為BB重，我就瞓得唔係好好，同埋唔會暴飲暴食，唔想俾佢太大隻，因為生出黎好難生。」

產婦最怕肥人不肥胎，她就不擔心自己產後修身，「只要付出努力，肯去做運動，就一定得，呢樣嘢係毅力，我都試過增肥、減肥拍劇。」孕婦情緒波動大，杏兒多謝老公體諒及開解，「老公有留意我情緒，我都發覺有時會突然好down，佢都有提醒我，叫我：『喂，你唔好諗埋一邊，自己走咗入個窿喎！』」至於影好激嗰啲大肚寫真，杏兒就話唔會喇。

(蘋果日報)

【今年37歲】傳容祖兒為媽咪提早出嫁劉浩龍…

2017-09-28

劉浩龍喺2012年6月承認同容祖兒（Joey）拍拖，外界唔睇好呢段戀情，連楊受成都鬧爆劉浩龍過早張揚戀事，行為鹵莽兼笨拙，言語間又懷疑有人此舉暗藏機心，點知Joey同劉浩龍感情穩定，拍拖5年，更多次傳出好事近，不過Joey均否認，指目前以事業為重，早前開出38歲嫁人嘅「期票」，後嚟改口風，謂40歲左右會結婚，Joey今年37歲，即係工作多3年先。

不過今日有周刊指，一向孝順嘅Joey，知媽咪想自己40歲前結婚，打算今年年尾就結婚，等媽咪見證佢幸福時刻，圓媽咪心願，據知容母三年前患肺癌第三期，Joey情願推咗逾千萬酬勞嘅job，花費逾百萬，由美國請專家幫媽咪去醫，上年容母癌病復發，Joey就陪媽咪吃素祈福。

周刊報道又指Joey今年同媽咪再睇醫生，6月又租淺水灣曼克頓大廈暫住，原來舊居松柏新村要裝修。不過容母最大心願係睇住囡囡出嫁，未知係唔係呢個原因，先忽然傳出Joey嘅婚訊呢!?不過之前Joey上大陸節目《金星秀》講過容母總係唔滿意自己嘅另一半，成日覺得自己囡囡可以揀個更好，之但係相處過後，覺得劉浩龍都唔錯，近年主動搬去松柏新村附近，方便照顧容母，漸漸fans同容母都接受咗劉浩龍。

跟住，有周刊致電劉浩龍求證係咪年尾結婚？佢連聲否認：「唔係呀！唔係呀！」祖兒經理人霍汶希同樣回覆：「沒有這件事！」

(蘋果日報)

【Jasper前一晚入院】病住出鏡仲仆親

2017-09-28

如果你有睇頭兩集嘅《爸爸去哪兒5》，見到小春到寶貝仔Jasper嘅互動，又或者再推前啲，有睇第二季吳鎮宇同囝囝Feynman嘅相處，你係咪都有同感，港版爸爸相對大陸版爸爸，會比較嚴厲同欠缺耐性。

上兩集，小春為咗着襪着褲鎖碎事，發晒脾氣，到之後Jasper唔小心用槌仔揼到佢，兩眼冒火嘅小春，直頭嚇到Jasper騰騰震。結果，小春就俾唔少網民話唔識教仔。

今日節目播出第三集，一班爸爸同小朋友由頭兩集嘅漁村，轉咗去山區老鎮，但節目一開始，鏡頭就只影住其他包括吳尊嘅四個家庭，一直唔見小春同Jasper。原來Jasper出發前一晚，病倒入咗醫院留醫，要延遲出發。到節目播出超過一半，先見到佢兩父子姍姍來遲。

鏡頭前，Jasper望落仲有少少病病哋，但經過之前全天候同老竇相處，嚟到第三集，兩父子互動明顯親密多咗，而小春亦冇之前咁惡。不過脾氣同性格，好難話一朝一夕就改到，結果去到節目尾聲時，小春差啲又發作。事緣Jasper同其他小朋友追逐時，唔小心仆倒，背脊撞瘀咗嘅佢，一臉痛楚，其他爸爸即扶起佢，問佢有冇事，不過身後嘅小春就有啲嬲豬話：「I told you…」第二句語氣先變番溫柔話：「 I told you, everthing slowly！」