於腹中孕育小生命的感覺，從來都是女士們獨享的甜蜜負擔，寶寶每下心跳、每下胎動，都是懷孕媽媽專屬的體會。

42歲的鄺文珣，今年4月宣佈懷上小公主，加上9歲大仔家澄同7歲細仔家泊，幾乎可以說是大肚專家了，小公主Chesney終於在9月25日出世，鄺文珣回覆時稱：「早咗出世，個個都好開心，尤其醫生拎佢出嚟，我哋聽到佢喊聲，好感動，完全控制唔到自己眼淚，先生都好感動，佢都喊，哥哥都期待見妹妹，最初見到有彈開，妹妹太細粒，後來佢哋都好幫手照顧妹妹。」

於Chesney出世前，鄺文珣接受周刊專訪，她坦言從前是緊張大師，現時已輕鬆不少，唯一讓鄺文珣不能放鬆的是教育一環：「養好容易，教先係重點。」

鄺文珣與應德榮走出婚姻低谷，Chesney到來，對鄺文珣來說又驚又喜：「做媽媽真係好多嘢兼顧，以前好想快啲卸貨，今次想佢大隻啲先，人哋話第三胎會早啲出嚟，所以我成日同佢傾偈，叫佢住耐啲。」

孕婦心情總是忽晴忽雨，鄺文珣卻總是笑意盈盈，她笑謂要擁有快樂孕期，必先擁抱問題：「其實係要自己諗得正面啲，放輕鬆心情去面對就得。早排我都好辛苦，會有啲擔心，不過要接納呢啲情況，同老公分享下，擁抱嗰啲問題，甚至可以喊出嚟，喊完就冇事。」

坊間笑稱「第一胎跟書養，第二胎跟豬養」，問她這次是否再次「跟豬養」？鄺文珣說：「係喎，其實我乜都未買，連走佬袋都未執。第一個嗰陣好緊張，連飲奶都緊張，60ml就60ml，真係多一滴都唔敢，仲要mark低晒啲大便、小便，o依家我咩都冇搞，放鬆心情，我會著重點教育佢多啲。」

肥B不肥媽，鄺文珣陀B期間手腳依然纖瘦，是孕媽媽夢寐以求的身型，談到她的飲食安排？鄺文珣說：「早排瘦得好犀利，o依家飽滿啲、精神啲。我自己就會食多種維他命，因為最容易吸收，多咗又會排番出嚟，其他就雞湯、肉汁、蛋、鮑魚都會長胎，仲有澱粉質好呀，澱粉質可以肥B唔肥媽。」至於日常生活，她會減少走路、不拿重物：「好彩有兩個仔，佢哋會幫手。雖然湊住兩個仔會辛苦啲，但係我會訓練佢哋做家務。我叫工人姐姐唔好幫佢哋做晒所有嘢，摺衫、執玩具要佢哋自己做番。」

提到初生嬰兒的教育？她指坊間有很多不同的說法，但只有作為媽媽的才最清楚子女個性和習慣：「好似人哋話0至1歲要抱定唔抱咁，我覺得唔係出面點講你就要做，要用自己嘅方法。初為人母，真係好容易俾人影響，聽得多會質疑自己，但其實最緊要係培養小朋友嘅價值觀同埋同家庭嘅關係。千祈唔好人學你又要學，唔好驚佢會輸，應該教佢好好照顧自己，教佢生存嘅意義，唔使迫佢行邊條路，只要佢對自己有信心、識得負責任，條路就唔會行錯。」

(蘋果日報)