TVB劇集《不懂撒嬌的女人》，搵到林文龍、宣萱回巢，收視同觀眾反應都似乎唔錯。不過，呢日有報道指，播完《不懂撒嬌的女人》後，大台決定抽起由黃智雯、袁偉豪、陳智燊及黃淑儀主演嘅《三個女人一個「因」》，改播2007年製作，由蘇玉華、田蕊妮、唐寧、胡定欣、陳錦鴻、黃智賢及胡諾言等主演嘅《蘭花劫》！
自從TVB開始咗一個星期嘅黃金時段都播劇之後，播劇速度快咗，而製作亦似乎跟唔上，所以先播倉底貨。呢套《蘭花劫》其實一早已經喺收費台重播咗N次，TVB回應傳媒查詢時話：「該劇於2007年製作，同年透過TVBI發行至海外市場播映，乃無綫劇集片庫中的滄海遺珠！」
至於劇情方面，就講到講蘇玉華演嘅炎沛湖，因謀殺養母而入獄，後來重遇失散多年嘅大家姐「江麗雅」田蕊妮，以及細妹唐寧「蘇菲」，三人重拾姊妹情。
不過，蘇玉華為咗唔想坐監，就收賣醫生，話畀田蕊妮知佢身患「絕症」，令田蕊妮甘願代蘇玉華頂罪，但後來獄醫講俾田蕊妮知，佢根本冇病，一切都係蘇玉華預先安排，最後呢三姊妹就互報恩仇！
田蕊妮接受訪問時話，呢套係佢過檔無綫嘅第一套劇：「當年拍嚟賣埠，估唔到依家喺翡翠台播出，好驚喜！」而離巢4年嘅陳錦鴻亦話，已經收到大台通知，問佢可唔可以幫手做宣傳：「最驚嚇係我哋個樣同十年前一樣冇變，只係唐寧變咗做媽咪，我都做咗人阿爸，哈哈！」
（SINA）
