張智霖（Chilam）與老婆袁詠儀（靚靚）出席盆菜晚宴。
靚靚表示兒子張慕童（魔童）在忙於滑板事業故未有一同到場。她認為應該告發唔做足安全措施的人：「唔明白點解冇戴安全設備嘅人可以入場，嗰兩父子大家都知係邊個啦！」
問到該家長有否道歉，從旁的Chilam一直點頭沒有出聲，靚靚續說：「個家長話冇人戴㗎！政府應該立例喺公眾設施唔做足安全措施唔畀入。」
問到囝囝魔童有冇約法三章幾時先玩得，靚靚就話：「佢有應承我做完功課先玩，但依家好醒目，做得叻會搵我，做得唔理想就會搵爹哋。」
問Chilam是否甚麼都應承，他笑言自己是Sugar Daddy。靚靚立即詐型地說：「我都唔明點解阿仔打畀你，你咩都話好，佢就話媽咪成日話唔好，仲成日同老竇講I Miss You So Much。」
問Chilam會點補償，他說：「又補？我做錯咩，有得食有得住已經好好。（怕唔怕寵壞仔仔？）我錫得嚟都好有分寸。」
靚靚反駁他說：「你唔戴安全措施仲話有分寸？離晒譜，跌親條腰骨你就後悔一世。」
（on.cc 東網）
官恩娜（Ella ）囝囝Garbriel喺10月4日過咗兩歲生日，而Ella懷第二胎已有6個月，雖然已經有第一胎嘅經驗，但係Ella 原來有樣嘢做得唔合格，仲為呢樣嘢喊過幾次添！
Ella 今日喺IG話，原來自問對老公同個仔照顧得好好，但係曾經做過地獄廚神嘅佢，點都做唔到一份營養晚餐咁話，真係陰公豬。
Ella 係咁講：「我做左（咗）人老婆同呀媽都有一段時間，自問對老公同個仔照顧都算無微不至！但係有一樣嘢我無論幾努力，都好似永遠做唔好…就是為家人準備一頓豐富好味營養好嘅晚餐…我為呢（件）事都喊過幾次…大住個肚去參加家庭傭工烹飪都係想煮餐好嘅俾老公仔同個仔食！但係我就係冇辦法搞得掂！不過終於搵我嘅救星。」
原來Ella為咗學好廚藝，參加咗家庭傭工烹飪班但都係搞唔掂，而佢提到嘅救星，竟然係一個網購現成食品嘅網頁，咁咪即係叫外賣？
(蘋果日報)
當胡杏兒貼呢張相出嚟嘅時候，其實心裡面係諗住網民／fans俾咩回應呢？
先睇睇張圖…坐緊月嘅新手媽媽胡杏兒，前日貼圖話好懷念陀B嗰段母子血脈相連嘅美好日子。
昨晚佢又貼圖，係一張大頭相，相中杏兒笑得好甜，化咗淡妝，寫道：「Hubby sent me this old photo and said I have 少女feel. Can I still be a 少女 after being a mother？」
網民紛紛留言話：
在老公心裡永遠是少女
Of course！
Of course you can
How old r you? 17? Lol
You sure still a 少女！
mother feel with 少女 heart
Pretty morher
BIG Yes !
大家都好愛杏兒！講到少女feel，其實以下呢啲，係杏兒初入行嘅珍貴圖片，真係好green好可愛，唔知杏兒自己記唔記得？
(蘋果日報)
麥雅緻（Angie）早前就為老公張頴康誕下細仔「小花生」。
囡囡張雅喬「小豆」都升呢做家姐，真係夠晒幸福！
「小花生」話咁快就已經出咗世5日，而且仲返咗屋企添！
Angie今日就喺社交網站上載咗一張「小花生」瞓緊覺嘅相。
「Yeah … Day 5 , I’m going home ! U guys are the best ! @cheungwinghong」
相中可見「小花生」瞓得相當冧，而且五官亦好精緻！唔少網民都話「小花生」同家姐「小豆」好似樣，亦有人大讚「小花生」好可愛，仲話佢大個一定好靚仔添！
(on.cc 東網)
藝人黃心美自2015年與台灣老公Thomas離婚，回復單身後一直寄情工作，直至今年6月與陳安立（Brian）被拍得孖住放狗而傳撻着，但兩人齊齊開腔否認，緋聞疑幻似真。
最近到冰島旅行嘅心美，昨日突然喺社交網上載一張與男士拖手照，疑似宣布有新戀情，雖然唔知心美身旁嘅男士係邊個，但見佢哋咁親暱，心美仲以兩個心心圖案去留言，似乎有好消息喎！
唔少網民都戥心美高興，紛紛留言祝賀佢有新戀情，仲叫對方要好好照顧心美。
另外，亦有網民問心美身旁嘅男士係咪緋聞男友Brian，但翻查Brian嘅社交平台，尋日佢先上載打籃球照，背景似乎身在香港，冇理由今日就喺冰島，除非…除非佢瞬間飛去地球另一邊，又或者擺舊相啦！
(on.cc東網)
被形容為《萬千星輝頒獎典禮》前哨戰的《星和無綫電視大獎2017》，今晚在新加坡舉行。
獲TVB力捧上位的「女神」李佳芯撼贏胡定欣、田蕊妮及宣萱一眾當家花旦，憑劇集《踩過界》的角色「Never」榮登視后寶座，獲頒「我最愛TVB女主角獎」，而「我最愛TVB男主角」則由同劇的王浩信奪得，《踩過界》一劇成大贏家。
同時，張振朗就憑《踩過界》贏得「我最愛TVB男配角獎」。張振朗頒獎時在台上爆喊表示自己每日都用盡心機去想如何演好角色，還問台下觀眾為何聽到他這樣說都不會笑呢? 台下立即給予掌聲支持。
（明報）
食物環境衞生署食物安全中心公布，一個「雅培心美力較大嬰兒配方奶粉2」樣本的煙酸含量與其營養標籤上的標示值不符，中心呼籲業界立即停止出售有關批次的產品。
中心發言人指，中心透過恒常的食物監察計劃，從銅鑼灣謝斐道萬寧Plus抽取上述奶粉樣本進行檢測。化學分析結果顯示，樣本的煙酸含量為每100克含1.3毫克，與其營養標籤上的標示值每100克含3.8毫克不符。發言人續指，已知會有關商戶上述違規事項，有關商戶已按中心指令將受影響批次的產品停售及下架。中心正追查有關產品的分銷情況。
涉事產品資料如下：
產品名稱：雅培心美力較大嬰兒配方奶粉2
原產地：愛爾蘭
製造商：Abbott Ireland
入口商：美國雅培製藥有限公司
淨重：每罐400克
此日期前最佳：2018年3月11日
(on.cc東網)
趙哲妤(Uny)產後收身快，火速復出幕前賺奶錢，不過佢有時間必會親自湊女，日前就佢帶住外傭湊約十個月嘅囡囡「小魚」到灣仔返playgroup，當日3時多，Uny抱住「小魚」放學，肥嘟嘟嘅囡囡已20磅重，真係抱到手痠，但Uny為親近囡囡，絕不假手外傭姐姐。
Uny抱住「小魚」行街濕平，原來重點係去撲奶粉，佢哋行咗幾間藥房都冇，結果入咗屈臣氏，除咗買到嬰兒用濕紙巾同尿片，佢仲撲到兩罐奶粉，Uny即發揮佢天生購物狂本色，掃齊嬰兒用品即閃。
Uny全程抱實囡囡，又會逗佢玩，一時又反轉抱，又錫啖囡囡，「小魚」好奇周圍望，係咁笑，「小魚」係個開心BB，Uny同外傭姐姐買齊嘢，一行三人就向灣仔方向攞車返歸，Uny細心先讓外傭坐後座，遞上囡囡坐定，佢才閂車門，走返去做柴可夫。
特首林鄭月娥日前喺施政報告提出檢討「限奶令」，Uny日前幾經辛苦先為囡囡撲到奶粉，所以佢話希望唔好取消「限奶令」，Uny日前接受電話訪問：「點解要取消？囡囡每兩周飲一罐奶粉，我次次有貨都要買定幾罐，因為佢唔可以轉其他牌子，佢會敏感，希望即使取消『限奶令』，情況唔好差過o依家就好。大陸啲媽咪嚟香港買水貨都係因為佢哋啲奶粉食完個頭會變大，畢竟奶粉係BB主要食糧，都體諒大陸媽咪擔心，希望奶粉供應商可以生產多啲，大陸用家嚟買幾罐自用係冇問題，但唔好掃貨，留番畀真正用家，佢哋掃晒成間藥房存貨，真係好誇張。」
Uny話之前囡囡「小魚」淨係飲奶粉，佢會成箱咁買定，不過囡囡o依家大咗，中午會食粥仔，所以佢o依家每次買定兩、三罐備用就夠。有女萬事足嘅Uny話：「我乜嘢都諗咗囡囡先，即使我再拍唔拍拖都唔重要，排包尾。湊女係辛苦，但亦好開心，我希望政府可以提供多啲資源援助，養育小孩子頭三年係辛苦，我寧願搵少啲，夠食夠用都要親自帶大囡囡，陪佢長大，即使入不敷支，我都要畀最好個女。」
(蘋果日報)
陳冠希（Edison）榮升爸爸之後，每次與寶貝女兒Alaia合照，他一定慈父上身，不再是娛樂圈的壞孩子。
近日秦舒培為時裝品牌行騷。
Edison亦有帶Alaia去捧場。
兩父女在台下欣賞秦舒培表演。
表演後更一家三口合照，畫面非常溫馨！
(明報即時娛樂)
喺法國影壇地位一向好崇高嘅王家衛，佢曾經攞過康城最佳導演獎、法國政府頒授榮譽軍團騎士級勳章、司令勳章，喺今年6月，有法國金球獎之稱嘅第9屆里昂盧米埃爾電影節(Lumière Film Festival)官網宣佈，將會向王家衛頒發有終身成就獎之稱嘅盧米埃爾大獎（Prix Lumières），作為對佢喺創作同藝術風格嘅肯定。
喺當地時間10月20日，王家衛同太太Esther齊齊出席頒獎禮，好友杜可風亦現身支持，今次大會邀請咗著名女星依莎貝拉雅珍妮（Isabelle Adjani）做頒獎嘉賓。
王家衛感謝盧米埃爾兄弟，令佢哋有機會成就自己心中嘅光影夢想，除咗感謝fans同所有合作過嘅人外，王家衛仲話要特別感謝太太同兒子，甚至仲同太太一齊上台，分享呢份喜悅：「為咗唔打擾我，佢好少去片場，希望俾更多嘅空間，等我可以專注地去做我嘅工作。」
王家衛仲話：「喺電影裡面，我創造嘅極具魅力嘅女性角色，每一個有佢嘅影子，因為呢個原因，所以喺我哋自己出品嘅電影裡面，佢嘅名字總係會第一個出現喺屏幕上嘅原因。」跟住王家衛話將呢個獎獻給佢嘅繆斯女神！
喺頒奬禮之後，仲舉咗《墮落天使》特別放映會，全新4K修復嘅《花樣年華》，仲會喺22嘅閉幕典禮成為閉幕影片，有唔少網友留言向王家衛的祝賀，又話好期待全新修復版嘅《花樣年華》。
(蘋果日報)
