森美今日就分別喺IG同FB PO咗張相，問大家睇呢對Vans究竟見到係咩色，有啲人話睇到灰底綠邊，但另一啲人就話睇到粉紅底白邊。
「呢對鞋咩色?問吓人啦! 灰底綠邊? 定係 粉紅底白邊? 我睇到粉紅底白邊 (photo from Nicole Coulthard) 有感而發 同一張圖片 可以 睇到 唔同顏色 同一個世界其實真係可以容許大家有唔同意見 大家放鬆啲!」
有網民表示首先見到係灰底綠邊，但第二次睇就變咗係粉底白邊；另有網民就反而掉轉，先係睇到粉底白邊，轉個頭睇又變番灰底綠邊。
仲有網民話近睇同遠睇顏色會唔同。。。
你哋又睇到咩色呢？
妮歌接受訪問時表示佢朋友幾星期前買咗呢對粉白色Vans，仲影低咗Send畀佢媽媽睇，點知媽媽竟然話「藍色好襯你」，令友人感到驚訝：「媽，這是粉紅色」，但後來佢承認照片中運動鞋離奇地呈現灰藍色，與真實不符。
(Instagram / HK01)
吳佩慈同富商紀曉波拍拖兼生咗三個仔女，早前開完39歲生日派對，收咗一隻由未來奶奶崔麗杰送嘅10.4卡、DIF嘅Bvlgari鑽石戒指，鑽石值港幣2500萬元，卡數係吳佩慈生日日期，可想而知吳佩慈早已融入紀家，之前都收過百萬卡地亞美洲豹腕錶、同市價4億港元嘅豪宅，就知男友紀曉波同未來奶奶都好錫佢。
吳佩慈今日又再喺Ig貼出同朋友嘅合照，相中見佢身穿紅色露肩連身裙，相當貴氣，佢留言：「謝謝朋友們給我的生日驚喜派對，很感動，愛你們。」未知係唔係已為三B之母，親情、愛情、友情都好豐收，佢就感觸咁打hashtag「活到39歲有這麼多愛超值」、「有愛最重要」、「今年生日過了太多次很感謝」。睇番啲合照，似乎朋友又再為佢開多一個生P，席上有張新悅、楊恭如及好姊妹白歆惠等，個生日P以粉紅、白色為主，吳佩慈更戴上后冠，尤如女王。
(蘋果日報)
現年55歲，龍虎武師出身，86年讀完無綫藝員進修班畢業後，一直做到今時今日，先後拍過100套劇集。。。
無綫劇集造就咗唔少經典螢幕情侶，好似《殭》嘅鄭嘉穎同陳凱琳，仲有《師奶Madam》嘅蕭正楠同黃翠如等等，呢兩Pair仲戲假情真，由螢幕情侶變成真情侶添！估唔到有人可以揮低呢兩Pair成為網民至愛嘅螢幕情侶，仲要係男男組合！佢哋就係《愛‧回家》嘅KC（歐瑞偉飾演）同Terry（李偉健飾演），皆因佢哋火花十足，企埋一齊發放唔少笑彈，網民睇見佢哋咁合拍都忍唔住嗌「在一起」！
新一輯《愛．回家之開心速遞》亦有呢對男男組合嘅演出，繼早前佢哋大玩重口味，上演爆笑SM場面，最近再有突破演出，滿足一班劇迷嘅心。尋晚播出嘅《愛》，劇情講到KC要壓抑自己對另一半嘅慾望，搵埋Terry陪佢做運動發洩精力，點知KC運動過量而暈倒，醒番嘅時候仲認錯Terry做姚瑩瑩，主動獻上肉嘴錫錫。
兩人頭貼頭、嘴對嘴錫咗兩秒，隨即Terry推開兼摑醒KC，仲大鬧對方奪去佢嘅初吻。雖則深情錫錫一幕只有短短兩秒，但足以叫網民們回味！唔少網民睇到歷史性一幕都表現興奮，皆因晚晚最期待嘅畫面終於出現，留言指錫錫畫面相當有愛，但亦有人頂唔順，覺得太重口味而Say No。無論如何，兩位演員都好專業，決心為藝術而豁出去！
(東方日報)
食環署食物安全中心恒常化驗沙律菜的微生物樣本，在101個沙律菜樣本中，有1個被驗出含有李斯特菌，含菌量為每克2400個菌落形成單位，較標準超出23倍。
抽驗的包括有沙律、水耕沙律和魚菜共生沙律菜樣本，它們都不夾雜非植物類配料，例如魚肉、雞肉，大部分是非預先包裝，當中沙律樣本佔多數，有89個。食安中心化驗了樣本中的O157型大腸桿菌、沙門氏菌及李斯特菌含量，發現有1個沙律樣本李斯特菌含量超標，中心已知會該食肆停售該食物。
食環署食物安全中心署理首席醫生(風險評估及傳達)周楚耀估計，有機會是生產過程中或儲存期間處理不當。中心研究主任方朗茵指，進食含李斯特菌的沙律，主要令孕婦或幼童受影響，例如進食後孕婦會流產，建議市民自行配製沙律可減少處理過程受污染，製成後亦應盡快食用。
(on.cc東網)
王祖藍近年專注於內地發展，除咗密密做綜藝節目賺人仔外，仲同邵氏合作，大搞經理人公司「手工藝」，一簽就簽咗20個藝人，包括徐子珊、鄧萃雯、黎瑞恩等！
不過最近就有報道指，唔少藝人開始有離心，好似有傳祖藍同徐子珊簽約時，承諾會開戲畀佢，點知電影開唔成，子珊扭計放大假一個月；而鄧萃雯亦都想拍番廣東話劇本嘅電視劇，唔想接太多綜藝節目，最終選擇同王祖藍「和平分手」！
其實祖藍接受訪問時亦預計過，陸陸續續會有藝人離場。最新就有傳，黎瑞恩因為祖藍兌現唔到出碟同開演唱會嘅承諾，都決定「止蝕離場」，離開「手工藝」；另外，祖藍舅父、副總裁冼偉智，亦傳出同祖藍意見分歧，已經遞信劈炮！
年初先加盟嘅張彥博，於將軍澳出席活動時坦言自己唔清楚事件：「做好自己本分唔會諗咁多，我同無綫都仲有約。」
（SINA）
藝人劉愷威同老婆楊冪結婚3年幾不時傳出婚變消息，不過佢哋就用行動粉碎傳聞！
今日係劉愷威42歲生日，楊冪就踏正凌晨零時喺微博發文：「糯米爸爸，生日快樂！」而冧爆嘅劉愷威喺3分鐘後睇到微博，轉發貼文同用三個心心留言！
而重要嘅係呢次係楊冪連續5年踏正凌時同老公講生日快樂，不過今年唔同嘅係，冇咗句「剩下話悄悄說」噃！
網民都大讚好Sweet，祝佢哋永遠幸福呀！楊冪咁甜蜜嘅舉動，更成為微博熱搜榜第一位，認真誇張！
(on.cc東網)
陳小春近排同囝囝Jasper參加大陸真人騷《爸爸去哪兒5》，火爆鬧仔惹網友熱烈討論，加上喺網劇《反黑》擔正，小春呢期人氣都幾高企。
而小春同老婆應采兒嘅新聞都被翻炒，睇翻前年應采兒上大陸電視節目《超級訪問星星的故事》，應采兒就自爆最初認識陳小春就覺得佢好小器，而且第一眼見到佢就已經唔鍾意佢，完全唔係自己杯茶喎。
應采兒喺節目度話：「我看到他（小春）真人之後就不喜歡他，我們以前同公司，一看到他真人……」應采兒做咗個伸脷同作嘔表情，然後繼續講：「對他沒有感覺，很怪！」加上佢聽聞小春份人好小器：「那時候他出了名是孤寒，很小器，聽說他從來不請別人吃飯，然後不請工作人員喝東西。」然後再一次伸脷同作嘔。
不過小春後來開始追應采兒，性格竟然突變，應采兒至對佢改觀，覺得小春其實好大方。不過主持人問到佢覺得小春浪唔浪漫，應采兒就好肯定咁答：「他不浪漫！他想要給我任何浪漫都會被我破掉。」跟住開始講故事。
個故事發生喺佢同小春結婚大約1年之後，即係11年，亦即係陳小春同黎明拍電影《鴻門宴》嗰陣，當時有傳攝製隊被困山區冇晒消息，應采兒好擔心老公安危，佢咁講：「我的心撲通撲通地跳，然後我找不到他，微博也找不到，電話也找不到，然我就發微博了。」
但係依然冇消息，應采兒愈嚟愈心急：「那個時候就沒有辦法，只能找黎明的前妻（當時黎明老婆係樂基兒），我給她發訊息我老公在不在？」樂基兒就話黎明已經返咗屋企，原來小春亦一早離開咗劇組，唔出聲係想畀個驚喜應采兒喎，咁大整蠱呀！但係應采兒得到嘅唔係驚喜，而係懷疑老公出軌，應采兒話：「中間我很生氣，第一個反應就是他去了那裡？他去哪裡鬼混了？」至於小春返到屋企有冇被老婆鬧就冇講喇！但係應采兒就叫老公唔好再俾驚喜佢，而且仲要喺手機set埋定位以防佢再失蹤，係咪攞嚟衰呢？
(蘋果日報)
孕媽媽在懷孕期間，是最靚的。
楊洛婷(Rabee’a)婚後，積極造人4年，終於得償得願，本來係緊張大師Rabee’a，在懷孕期間，放慢腳步，放輕心情，臉上經常掛住開心嘅笑容，所以囡囡Tanya Faith Wong都係一個甜睡寶寶。Rabee’a喺產前接受專訪話：
「今次呢個懷孕期間去咗3次旅行，第一次係不知情之下加拿大過新年，之後發現原來有咗，第二個旅行，6月個時同Tim去左baby moon，陽光與海灘影咗啲大肚相，啱啱我都返咗加拿大去探Daddy，其實都好開心，唔係淨係坐喺度等生，成個過程好開心，我希望BB都吸收到呢啲正能量，遲啲大個都會鍾意周圍走，同埋佢都好好動，咁啱我細佬個老婆都有咗，我哋屋企係雙喜臨門o架，我父母好開心，同一時間做爺爺嫲嫲公公婆婆。我弟婦11月生，時間差唔多，佢個肚冇我咁大，BB都冇我咁多郁動，我自己覺得佢有我同Tim啲genies，我哋都鐘意玩，好鍾意跳舞、唱歌仔，都似我哋嘅。」
十月懷胎嘅過程入面，Rabee’a成日笑，充滿正能量，佢話：「好開心呀，因為好彩我老公咁錫我，佢每晚都盡量同BB傾計、唱歌仔，雖然佢好忙，但佢都會抽時間陪我哋，一有時間就去買嘢，最好笑係咩？呢樣嘢要分享，未知仔定女嗰陣，佢話仔又點女又點？都係着黑色衫o架啦！知道咗係女之後，佢話o依家好多女仔衫都黑色好型o架！不過啱啱去咗澳洲，o依家係冬天，我話不如你去買定啲冬天衫，遲啲去加拿大有冬天衫著，佢返到嚟香港買啲衫全部係粉紅色，仲要係粉紅色毛毛，口水肩仲寫住『I love daddy』，我望住佢問唔係仔女都係着黑色嘅咩。我覺得佢已經係好冧，好開心生女，我成日話幾時作返首歌，我心諗，我結婚個陣都等左8年幾，佢先作一首歌比我，可能個女10歲先有歌聽，哈哈！」
緊張大師Rabee’a，係懷孕初期已經去睇定啲幼稚園展搵資料，咁佢對囡囡又有咩期望呢？佢話：「其實我就希望佢係開心，快樂成長，健康係好緊要，懷孕期間每個月都要照聲波，之前醫生都話，BB個頭比較細，我已經好驚，到第2次去驗又冇事，又大返，BB嘅生長你係估唔到，有時聽到會好擔心，有啲朋友同你講BB個頭有個窿生唔埋個心又好細，聽到呢啲嘢你會好擔心，所以我希望生個女想似我啦，大個又做香港小姐，o依家就會覺得健康，佢想做乜，作為父母會support。」
(蘋果日報)
姚子羚同黎諾懿今日喺西環屈地街電車廠出席宣傳活動，近日姚子羚成功做業主，以逾930萬元購入日出康城晉海三房戶，2019年收樓，目前要努力搵錢供樓。置業係咪準備結婚？姚子羚話：「邊有女仔買樓自己結婚㗎，暫時未有呢個打算，出年工作已經安排好，12月會開劇，實在冇時間諗。」之前豹嫂胡蓓蔚同胡杏兒都爆胡說八道會將有喜事，姚子羚話：「唔係我，你哋可以向其他人問下，睇下胡定欣有冇艷遇。」
胡定欣早前喺網上同陳山聰以老公老婆相稱，惹起網民評論，胡定欣喺網上反擊鬧爆，姚子羚話：「唔係鬧，係表達諗法，可能啲言論過咗定欣底線，其實我哋圈子大家太好朋友，有互相暱稱，可能啲稱呼令大家有誤解。」
杏兒預產期在即，姚子羚話：「對上一次見面係六個女仔一齊影相，我哋都好期待，但係影相當日就叫BB要生性，唔好作動，唔係就要大家一齊去醫院，希望快啲可以見到BB，聽聞已經改咗名，你哋可以問下杏兒。」
黎諾懿嘅BB小春雞已經半歲，佢話太太隆重其事，每月都同BB慶祝生日，現時BB成長好快，黎諾懿話：「我好驚佢第日叫我uncle，因為同時間開幾套劇，返到屋企我抱住BB，太太叫我畀番佢，我都唔製，驚BB唔認得我，不過BB都畀足面我，試過喺街撞見記者都冇喊。」係咪考慮追多個女？黎諾懿話：「我之前好大聲話豬年想追多個 ，但因為雞仔身體弱啲，試過感冒、尿道炎，原來小朋友病精神付出好大，好似返咗10日通宵，暫時唔諗住，但係老婆仍然好憧憬追女，如果唔係就話再生，我覺得再追好攰會變陳豪，希望一仔一女啦。」
(蘋果日報)
一日已有100萬次搜尋。。。
46歲嘅古天樂同31歲嘅台灣女藝員郭采潔，今日無啦啦上咗微博嘅搜尋榜，仲以100萬次搜尋高踞榜首，咩事呢？有指事源係今朝有人發微博，以問句型式話：「古天樂和郭采潔在一起了？」就係一句說話，引爆咗好多人嘅好奇心，盲搜古郭戀。
古天樂喺14年同郭采潔合作過一套電影《巴黎假期》，有咀戲有婚紗相，之後兩人四圍飛宣傳，係幾親密嘅。不過上年古仔去台灣時曾經被問番起呢段「戀情」，古仔輕輕咁答「感情的事我從來不談」落閘。至於郭采潔經理人就回應話：「對於網路不實消息，均不予回應，請大家別太費心。」
(蘋果日報)
