鄭希怡(Yumiko)最近同兩歲半囡囡梁浸浸(梁子柔)一齊參加大陸真人騷《不可思議的媽媽》。頭兩集面對扭計狂喊嘅梁浸浸，Yumiko幾度崩潰，更被指疑似爆粗。
喺啱啱播出嘅一集，母女關係繼續繃緊，情況冇改善之餘，Yumiko再度全面崩潰失控爆喊兼發囡囡脾氣。事緣梁浸浸喺食飯期間大喊，Yumiko用盡方法o氹佢都不得要領，最後Yumiko抱番囡囡入房，但梁浸浸繼續喊唔停，Yumiko終於忍唔住發脾氣向阿女大聲講5次Stop：「你再哭啊，我不理你」。
不過，當工作人員走過去o氹梁浸浸時，梁浸浸竟然止哭大笑，看在眼裏嘅Yumiko，自責唔識做媽媽，又喊住話：「我連工作人員都不如。」
有網民睇完呢三集《不》，唔少人都留言叫Yumiko唔好氣餒，不過亦有網民指估計喺屋企湊小朋友責任，主力係喺外傭姐姐身上。雖然備受非議，不過Yumiko今日就喺微博質疑劇組話：「我用各種方法哄了孩子好久好久…怎麼節目都在播我崩潰的片段…」Yumiko又預言會喺嚟緊幾集，自己會絕地反彈，越做越好咁話。
(蘋果日報)
大台之前播嘅電視劇《超時空男臣》，令今年29歲、喺劇中飾演小太監嘅何廣沛彈起，有傳佢仲同劇中飾演二小姐嘅朱晨麗日對夜對，戲假情真。
有傳何廣沛為咗唔想影響上位機會，將近一年嘅戀情密冚。對於戀情，二人之前都死口唔認。
兩個月前，何廣沛生日，大男方一歲嘅朱晨麗，忽然貼咗張扮咀何廣沛嘅相，留言話：「生日快樂大個仔啦，生生性性吖！」事後有人問佢哋係咪拍拖，男方話自己一直專注事業，冇時間拍拖，女方就話只係劇照嚟，仲講笑話如果傳緋聞，即係代表二人演出成功。
何廣沛生日嗰陣，《超》劇仲係播緊，就算雙方有互動，都仲講得通。不過《超》劇早早播完大結局，二人就被影到再單獨約會撐枱腳，仲互餵蛋糕同檸茶，令戀情更加可信。
二人坐得好埋好埋，何廣沛仲不時托住個頭凝望女方。
事後，傳媒問到朱晨麗有冇同何廣沛約食飯，最初得到嘅回覆係：「日日拍劇好忙，冇時間約人食嘢！」對於佢哋兩個撐枱腳，佢就話：「大家係好朋友，難得嗰日唔使開工，咪約吓食飯見面。」問到有冇機會發展，佢就話：「將來嘅嘢都冇人知，順其自然喇！」
（Apple Daily）
每年港姐競選，都總有無窮話題提供俾廣大市民，今屆尤甚，無論Do姐嘅決定性兩票，抑掝冠軍雷莊𠒇，究竟係咪符合港姐選美嘅標準美？與智慧並重，都成為熱騰騰話題。
無論你同意與否，今屆后冠已經套咗入雷莊𠒇頭上。新人登場，舊人漸被人遺忘，尤其本身唔活躍喺熒幕上嘅，就更加恍如失蹤人口。01人港姐亞軍鍾沛枝(冠軍係楊思琦)，當選入行後，令人深刻印象嘅電視作品唔算多，相反，當佢離開電視圈後，因為做咗國泰地勤嘅關係，反而引嚟報館報仔隊嘅注意，亦因此令其曝光率不跌反升。
「其實當時確實係要過一個好大嘅心理關口，以前做藝員，有人幫你打點服侍，就算出活動，都係尊貴嘅嘉賓，但突然之間，要轉去serve番人，嗰時每隔一陣，就會見到有記者匿喺柱後偷影我，都明白嘅，雖然我做藝員嗰陣，唔算高調，但突然佢哋覺得係個talking point喎，覺得我好坎坷，得7,000蚊底薪，不過其實當時我唔止呢個人工，因為我好勤力OT，仲有員工福利嘅。」
遇見記者未算難堪，但若然遇到係其他藝人，又會唔會覺得尷尬呢？「少少都會有嘅，嗰時同自己講，港姐對自己嚟講，已經係一個history，既然選擇咗就俾心機去做，唔好再諗返轉頭啦。」喺航空公司做地勤近4年嘅生涯，鍾沛枝又係另一番體會，最終選擇離開機場。
「同我同期入職嘅新人，都已經升晒上去，我選擇繼續做番地勤嘅位，事實公司想升我職好幾次，不過我真係唔想，因為去到supervisor嘅位，就即係有一定責任，亦要面對客人，試過有好幾次，遇着啲有性格嘅客人，會有啲特別要求，雖然我EQ唔低，但有時遇到啲突發情況，例如隻機起唔到飛，要面對一啲比較焦急嘅客人，你要變得好有耐性同佢哋解釋，但有時都會覺得唔開心，始終都係想開開心心打工，本身又鍾意扮靚，所以7年前，就決定轉行做美容。」
家中有成千上萬枝唇膏嘅鍾沛枝，現時喺一間美容中心擔任員工形象指導顧問。對於扮靚心得，佢就話：「由細到大我都好鍾意食啲老土嘢，例如桂圓、紅棗，老火湯更係唔少得，反而女仔鍾意嘅甜品，自己好少掂，凍飲更加可免則免，又唔會出夜街，我覺得單靠化妝品，就算你買再貴嘅，但你本身皮膚差嘅，都冇用。」
(蘋果日報)
陳啟泰宣傳ViuTV節目《有病有真相》，分享自己十多年的保健心得。
「我2002年開始失眠，因為食咗保健食品七日，就失眠咗15年，所以話有啲嘢身體唔係咁吸收，又好似我一直以為自己熱底，係咁飲涼茶，結果仲怕凍過啲女仔，係近兩年開始食多啲溫性食物，失眠改善番八成。呢個節目我會同大家分享一啲呢十幾年學到嘅嘢，有啲健康小Tips，中西醫資訊都會講。」
問有否興趣主持新遊戲節目，他表示尚要多作了解，但近年的確少了一些大型送錢遊戲節目，再搞是好事。
講到近況，陳啟泰表示最近多拍攝網劇，最想演壞人、黑幫。
「我入行就30年，七成時間做主持，對未試過嘅角色都有憧憬，想演多啲壞人，有啲老正角色我都推咗，依家鬚都白，接工作一係好玩一係好多錢。」
問到TVB有冇搵佢，陳啟泰表示：「2001年有，但當時啱啱簽咗亞視，到近兩年好多亞視人入TVB，其實TVB都有搵我，但我太耐冇簽長約，部頭形式就可以傾。」
(on.cc 東網)
現年41歲的「四洲太子女」戴凱欣（Kennis）與34歲的上海金融才俊樊林爽昨日拉埋天窗，兩人於上海的半島酒店舉行婚宴。
新娘子以一襲白色的低胸婚紗配珍珠頸鏈上陣，高貴大方，而新郎亦化身白馬王子，以全白禮服示人。出席婚宴的賓客包括楊千嬅與丈夫丁子高、方中信與太太莫可欣、宣萱、鮑起靜、任葆琳等，並由范振鋒擔任大會司儀，場面熱鬧。現場布置以紫色為主，配合鮮花及羽毛作裝飾，氣氛浪漫。
Kennis與樊林爽雖然年紀相差7年，且長期分隔異地，一個在港，一個在滬，但拍拖2年多以來一直表現恩愛，無礙戀情開花結果。由於男方的家人是上海人，故順理成章地在上海舉行婚宴。
在婚宴中段，一對新人換裝上台致辭，新郎穿上紫色西裝，而Kennis則以身穿閃片裙，兩人又即場跳舞晒舞技，而方中信亦應邀上台。
另外，有份出席喜宴的琦琦亦在社交網站上載照片，相中她跟汪詩詩及汪圓圓合照，並寫道﹕「美麗的新婚派對」
(on.cc東網)
藝人胡定欣多年來默默耕耘，由當初嘅小妹妹變配角，再成為今日嘅視后，一手一腳靠自己努力成就今天的我，成績有目共睹，不過人愈紅受到嘅批評就可能愈多！
佢今日凌晨就喺Instagram發長文宣洩，坦言自己係公眾人物做每件事都會受到公開評論，不過真係要「每一件事」都要被評論？佢話：「怎樣看得透徹…理解…接受…包容，總會有底線！」又覺得冇人100%清楚佢份人，點解要嘥時間去作不必要嘅公開評論，而評論係帶傷害性：「不斷傷害人，你們生活愉快嗎？」
最後佢話：「我真想講呢個世界真係真係真係好大…望遠啲呀！……真的支持我，支持我的工作，祝我生活愉快，足夠！」唔少網民都留言力撐佢，叫佢加油：「你已經好好，你唔需要為任何人改變，做自己做開心，加油！」
長文如下：
「我喜歡去旅行，放眼看世界，因為地球真係有好多好靚好值得我地（哋）欣賞的地方。 每次當我旅行見到外面的天空好大，可以望到好遠的時候，就會自然感覺呢個世界真係好大，人類真係好渺小，自己仲渺小，所以我只要好好活在當下，開開心心，努力工作，做好自己，做自己想做的事。無關痛癢的事就由他去。
有些事情沒有說明，唔代表真係無（冇）感受。當然明白身為公眾人物，做每件事都會受到公開評論，我亦控制唔到評論。但係真的要『徹底地』『每一件事』嗎？
怎樣看得透徹…理解…接受…包容，總會有底線！
我相信無（冇）任何人會100%清楚我自己，因為連我都唔完全清楚自己。試問一個無（冇）接觸過你，又無（冇）同你生活過，又咩都唔知的人，何必要浪費咁多時間去評論同自己無關痛癢而單方面自己一廂情願認為係咁既（嘅）事，去作不必要的公開評論，而評論係帶傷害性。不斷傷害人，你們生活愉快嗎？
我表達能力好差。但我真想講呢個世界真係真係真係好大…望遠d（啲）呀！處理好自己的事，過好自己生活，已經好足夠！
真的！真的支持我，支持我的工作，祝我生活愉快，足夠！！～
感謝！❤️」
剛出道10年的韓國女團少女時代（少時）於8月推出十周年專輯，活動結束後有傳各成員正與SM事務所傾續約。
當中Tiffany更出國留學，令人擔心少女時代即將解散。
而今晚韓國傳出少女時代8名成員中Tiffany、秀英及徐賢將不會與SM事務所續約，Tiffany想到美國留學，而秀英及徐賢日後計劃集中演員活動。
其餘的Yoon A、泰妍、Yuri、孝淵及Sunny則會與SM事務所續約。
據悉少女時代並未計劃解散，而SM事務所承認有成員不續約，指她們並非想解散，但有成員離開公司，活動會有困難，會慎重考慮她們日後的活動。
(on.cc 東網)
藝人姜皓文（黑仔）的太太殷寧接受新城電台訪問，分享與老公18年婚姻的相處之道以及老公瘦身三十多磅的經過。殷寧大讚老公有恆心，當時一個月已減去廿多磅。問到飲食方面是否由她安排？殷寧稱：「要分開煮畀佢，我點跟佢齋食白烚雞肉？」
講到黑仔成功變型佬，殷寧笑言：「冇諗過我係嫁咗個靚仔老公，因為當年喺亞視識佢，第一眼覺得佢係黑媽媽咁。」問到可擔心老公會惹來「飛來蜢」？殷寧則表示：「飛來蜢都唔會因為係靚仔，好多嘢都係睇人嘅。所以我身為姜氏美人，都要不斷增值自己，女人應該要自強不息，唔可以乜都唔識，要出嚟見多啲人，今年就係我哋結婚18周年，咁多年嚟我哋嘅相處模式都不斷修改，尤其係佢轉變得好大，比以前更緊張我，最緊要懂得互相包容同學習。」
(蘋果日報)
藝人陳敏之首次帶住囝囝雷子樂出席公開活動，僅9個月大的子樂相當精靈，面對在場閃光燈狂閃也不驚慌，只是合照時不肯望鏡頭，已有一女的王浩信與陳自瑤見狀，即走上前引他注意力望向鏡頭。
事後敏之接受訪問時，笑指囝囝雖然僅得9個月大，但身高卻如兩歲小朋友般，認為全因遺傳她與丈夫的高挑身形。
談到她可一手抱起子樂，敏之謂：「係呀，好弗，湊佢時可以單手抱，交叉手咁抱都得，有嘢做令我瘦得快。（囝囝有酬勞？）有，連埋我嗰份都放晒落佢教育基金。」更指今次囝囝處男下海，身為母親的她緊張非常，與母親齊齊搜羅靚仔服飾給囝囝。
談到囝囝表現淡定，敏之謂：「佢連百日宴都冇喊過，性格上係斯文BB，屬於觀察同思考型，遺傳咗老公嘅淡定。（畀個仔拍廣告？）唔阻到佢就ok，唔想佢成日出去做嘢，讀書最緊要，拍劇就唔好，都唔想佢做呢行，廣告ok，當係做個紀念，等佢大個可以睇番，搵到嘅錢會放入教育基金同做善事，等佢細細個就知做善事嘅重要性，大啲會帶佢去做義工，等佢知道呢樣嘢緊要過搵錢。（生多個陪個仔？）有機會都會，等個仔有個伴。」
(on.cc東網)
