山頂纜車服務今起暫停五天

2017-06-05

山頂纜車公司表示，由於需要進行定期維修保養及更換索纜工程，纜車服務由今日起暫停五日，但實際所需日數要視乎天氣而定。纜車公司指，工程是為了確保纜車系統的安全及維持服務的可靠性，呼籲乘客選擇其他交通工具前往山頂，期間巴士及小巴會加強服務。

(SINA)

【張文慈、陳啟泰做婚禮MC】袁文傑儲定首期

2017-05-31

藝人袁文傑拖實女友Jackeline到尖沙咀出席電影活動，講到二人把握時間拍拖過節，袁文傑笑笑口咁話：「其實我今日糉都未食，今早都忙做訪問，要多謝大家咁錫我。依家都好多工作進行當中，同港男丁子朗以及阿辰（林韋辰）拍《玩轉香港日與夜》，係大家離開亞視後第一次合作。」

女友勁支持

問Jackeline男友忙工作有否冷落她？她冧笑搖搖頭表示不會，仲好支持男友的工作。問是否努力儲錢結婚？袁文傑笑說：「仲未有落實嘅部署。（定儲首期先？）都儲下先，同女友都低調嘅，但張文慈同陳啟泰都聯絡我話記得早啲講佢哋知，話要到時婚禮做MC，寫定稿畀我睇！」

講波被讚中肯

講到袁文傑早前客串講波，獲不少球迷讚中肯，佢笑笑話：「多謝大家欣賞，我都係講吓感想。（做埋評述員？）唔會，只係當同球迷一齊睇波，場波本身都話題性，自己都係有少少研究，都係做吓嘉賓啦。」

(東方日報)

【張衛健版就見得多】「大潑猴」林峯孫悟空造型曝光

2017-05-30

張衛健版嘅孫悟空大家就見得多。

不過今次呢個孫悟空就唔係張衛健啦！係林峯！

自從冇做大台後，林峯幾乎長駐大陸拍劇。向來有「Chok峯」之稱嘅佢，入行以嚟一直keep住靚仔形象，不過早排佢就試過剃光頭拍大陸劇《獨步天下》。

接住落嚟，林峯又接咗另一套大陸劇《大潑猴》做孫悟空。

今日佢個孫悟空造型正式曝光。而單單呢套孫悟空猴毛戲服，就重達10幾磅，工作人員每次化呢個特技化妝，都要需時長達4個鐘先完成。

加上正值夏天，日日片場都高達30幾度高溫，林峯都咪話唔辛苦。

就連呢日嚟探班嘅小fans，都話唔認得自己個偶像。

(蘋果日報)

【無聲引退之後音訊全無】猝逝9年才驚爆死訊

2017-05-30

今日出版的日本雜誌《週刊女性》及富士電視台一個節目報道，90年代初日本人氣偶像川越美和，原來已於9年前即2008年4月在寓所身亡，死時年僅35歲。報道指川越美和於2007年引退後，便失去音訊，她死前生活更是十分潦倒淒涼。

川越美和於1988年憑處女單曲《Looking at You》出道，1989年憑第4張單曲《正在看夢境》奪得《第31屆日本唱片大賞》新人獎，隨即人氣急升大受歡迎，劇集、電影、廣告邀約如雪片飛來，可惜事業一直走下坡，2007年主演最後作品真人版電影《鬼太郎》扮演井上真央的母親一角，但中途已辭演，之後便退出演藝界。

引退後於2007年，川越轉行在地產公司任打電話Call客的營業員，公司安排她在墨田區的宿舍居住，同時飼養兩隻老虎狗。最初川越表現不錯，還經常買名牌，但其後她遇人不淑，有藝能界人士找她擔任擔保人，她答應後才知受騙，結果孭得一身錢債，搞到自己破產陷入財困。

半年後她辭職搬離宿舍，但因愛犬將宿舍的牆和床爪花，被索償80萬日圓，導致她雪上加霜。其後她搬到品川居住，飽受經濟壓力之苦，加上患病要支付醫藥費，令她極度窮困。2008年4月，不得不搬到大田區的木屋居住。不過，一星期後，業主未能與川越美和聯絡，於是報警求助，警方入屋發現川越美和陳屍在家中，估計已死去數天，死因是心臟衰竭。

她的生前同期出道的好友43歲女星中江有里接受訪問時表示，川越離開藝能界後，一直失去聯絡，她得知好友晚境淒涼，感到十分心酸及自責未能幫助好友。

(on.cc東網)

【已經入紙註冊】姊弟戀終於修成正果！

2017-05-30

「四洲太子女」戴凱欣（Kennis）與上海金融才俊樊林爽拍拖兩年幾。

Kennis透露男友已向她求婚，但二人遲遲未落實婚期。

上星期四25號，40歲的Kennis與34歲樊林爽正式入紙登記註冊，二人礙結婚通告書曝光，三個月內將正式結婚。

女方雖然比男方大六年，而男友亦曾離過婚，但都無礙二人相愛。

Kennis與男友雖然相隔兩地，一個在香港一個在上海，但感情並沒有因距離而生疏，反而愈見恩愛。

二人不時做「空人飛人」爭取見面機會，又常糖黐豆出席活動，3月時Kennis自爆男友已向她求婚，但未定結婚好日子，亦不想舉行盛大婚禮，應該會旅行結婚。

據知，由於男家是上海人，婚禮會在當地舉行，但會否在香港補擺酒，則未落實。

(on.cc 東網)

【43歲高齡做媽媽】潘芳芳坦然講第三者

2017-05-29

當年潘芳芳以43歲高齡做媽媽，為老公陳冠豪生下獨子陳健御（Question），雖然囝囝已經11歲，但潘芳芳拒絕做怪獸家長，操兒子學游水、音樂、書法、畫畫，小小年紀嘅Question去年獲校內傑出演員獎，青出於藍。

潘芳芳接受訪問，對於當年做高齡產婦，會唔會擔心同囝囝有代溝？佢坦白話：「我43歲生囝囝，覺得年紀唔緊要，最緊要點同佢相處，唯一年紀大咗，精力體力上要兼顧工作，做媽咪始終要分時間畀小朋友，尤其最初幾年要陪多啲，到佢成長溝通冇咁大隔膜，青少年或多或少有反叛，如果關係好，大家容易溝通。」

問到囝囝讀書辛唔辛苦？潘芳芳話：「好彩，佢讀港大同學會，學校畀好多自主，佢自己會處理功課，考試會承擔溫書，佢又冇壓力，我問使唔使陪佢溫？佢話唔使，平時喺學校都識，唔使特別溫。」問到囝囝成績係咪好好？佢話：「英文科比較成績好，學校有戲劇班，佢攞過傑出演員獎，仲有服務獎、學業進步獎。」囝囝係咪遺傳咗佢嘅演藝細胞？潘芳芳話：「我唔知道，可能咁啱角色發揮好，成日同佢強調戲劇係team work。」

潘芳芳話囝囝嘅其他科目就努力當中，又唔會好差：「我嘅立場佢識就得，因為考試好難講。」唔會做怪獸家長？佢坦言：「我唔想佢覺得考試讀書大壓力辛苦，家長迫唔到咁多，佢都有補吓數學，主要因我同老公計數好差，好驚害死佢，其他學游水、音樂、書法、畫畫，都係佢興趣。」

談到夫妻相處之道，佢話：「可能大家結婚時都成熟，又都喺呢個圈子，知道對方工作時間各樣要求，我哋共識咗family life喺呢個階段好重要。咁多年我同先生感情都OK，最緊要溝通，我哋過咗拗撬年紀，去到40幾歲喺埋一齊，方向都好近。」記者笑言最緊要冇第三者，潘芳芳笑笑話：「呢樣好難包，講雙方關係點維繫，有時我都信第三者嘅出現，可能夫妻關係潛藏問題，我哋又冇呢啲事，我哋成日對住，冇第三者埋到身，唔准埋嚟，第三者咪係我個仔囉，哈哈！」點解當年唔追多個？佢話：「呢個上天安排，我40幾歲生佢，都係冇預期，大家都知，年紀大咗懷孕機會低啲，有時唔係你想就有，有一個小朋友已經好滿足開心。」

(蘋果日報)

【黎國柱x江新月】林保怡陳慧珊「防腐情侶檔」西貢放閃

2017-05-28

無綫《妙手仁心》系列於深夜正重播到第3輯。急症室醫生黎國柱（林保怡飾演）與大律師江新月（陳慧珊）的戀情，已經劃上句號，令不少劇迷心酸，以為他們會有美好結局。林保怡這隻「無腳雀仔」，第3輯故事中繼續與其他女性，發生沒有結果的戀情。

林保怡與陳慧珊19年前的合作，當年曾是大家認定的熒幕情侶，兩人更於《鑑證實錄》系列中再做情侶，友情可謂深厚。{advhere} 林保怡日前曬出二人合照留言：「今天的驚喜是，天氣十分好，美麗的星期六在西貢碼頭。哈哈哈Be Happy」

原來，林保怡正為旅遊衛視拍攝旅行節目《悠游（yoyo)星攻略》，節目組於是設計1場10年一遇的重逢。

陳慧珊躲在上菜卡通人物身後，給林保怡送上神秘驚喜。

當刻林保怡望見陳慧珊足足呆了5秒，相當搞笑。

(明報即時娛樂)

【墜馬4個月首現身】劉德華忍脊椎腰傷別陳佩華

2017-05-27

劉德華因墜馬意外休養近4個月，26日在妻子朱麗倩陪同下現身九龍城教會，出席資深電影監製陳佩華（佩華姐）的告別式。他因墜馬導致腰脊受傷、盆骨撕裂，出院返家後從坐輪椅到拄拐杖，透過照片向全球粉絲報平安，這次首度公開現身，並和葉德嫻坐在一起，共同送恩人最後一程。

據報導，劉德華和朱麗倩接近晚間7:00搭成白色7人座休旅車抵達，並且一直待到告別式結束。現場有大批媒體守候，他和妻子都戴著口罩，門一開就立刻上車，動作迅速且沒有使用拐杖，可見傷勢順利康復中。

陳佩華於4月28日因淋巴癌病逝，享年68歲。她生前擔任多部電影監製，包括《桃姐》、《A計畫》、《殭屍先生》、《東邪西毒》、《重慶森林》、《拆彈專家》等電影。她和劉德華、葉德嫻共同合作的電影《桃姐》，征戰中外影展勇奪威尼斯影后，同時在金馬獎、香港電影金像獎也橫掃多項大獎，離世消息令天王悲痛說：「她把我如親人般疼愛，彼此合作多年丶彼此照顧，她的離去心實在不捨，但願一路走好、永遠把佩華姐放在心裡。」