黎姿一向有情有義，對圈中朋友好，又愛錫家人，尤其胞弟黎嬰，2007年黎嬰發生車禍，昏迷3個月，家姐黎姿對弟弟不離不棄。
黎姿選擇息影從商，接手打理弟弟嘅醫學美容生意，又月花10萬，安排弟弟去復康院，其後接咗弟弟返屋企，又將屋企裝修成好似復康院嘅腦神經室，又搵物理治療師上門，弟弟出入要看護同外傭睇住。
今日有周刊指，黎姿早前買咗一個位於中半山騰皇居、價值4千幾萬嘅過千呎單位，俾細佬同父母住，等大家住埋同一個屋苑，方便見面，又搵人喺屋整咗個護理室，有齊所有儀器，而且胞弟黎嬰更傳來好消息，現時已康復近七成。報道又指黎嬰目前仍然要每日做4、5個鐘嘅物理治療同職業治療，又要接受言語治療，日常由兩位外傭照顧飲食，三個專業看護每日工作8個鐘，廿四小時輪更協助。
日前周刊影到黎嬰去咗會展嘅動漫節，對一個舞蹈學校攤位幾有興趣，停低睇咗一陣影片，黎嬰讀書時已經鍾意跳舞、又愛演話劇；近日被影到睇水墨畫展，中途黎媽撞到朋友，黎嬰都有笑晒傾幾句，只係進食同手腳郁動仍然需要人照顧。至於黎姿平時除咗照顧家人同三個愛女之外，上月底就親自去咗法國，視察法國護膚品廠，又四處行吓了解當地文化，做職業女性要兼顧家庭同事業，絕對唔容易。
（蘋果日報）
娛樂圈喜事一接一浪，早年同女友拉埋天窗嘅藝人陳國峰（Penny），早幾個月就喺社交網站上載咗一張相並宣布準備榮升人父！相中嘅Penny就拎住咗一張超聲波相，雖然張相就喺Penny嘅身後影埋去，不過隱約都見到Penny嘴角向上揚，睇嚟榮升父親嘅Penny都好期待BB嘅來臨！佢仲留言話：「陳家有喜，希望BB健健康康，平平安安。托賴，我終於做爸爸喇，我會更加比（畀）心機搵奶粉錢 #我係陳國峰」一班網友都恭喜佢終於成為爸爸，仲叫佢畀心機搵多啲奶粉錢添！
名模歐陽妙芝興趣多多，又學琴又參演舞台劇，最近她獲周大福後人周樹堂邀請，夥拍化妝師好友Gary設計沉香首飾。早前妙芝以一身型格造型擔任首飾模特兒拍硬照，看來清減不少，她自爆帶病開工：「其實我啱啱出院，影嗰日仲係有啲攰兼暈暈哋，因為患咗甲亢（甲狀腺功能亢進），新陳代謝速度太快，突然間瘦咗十磅，搞到又暈又嘔，醫生建議入院檢查安全啲。」
