孫敬安同盧敏兒今日喺紅磡舉行結婚20周年派對，出席嘉賓有陳錦鴻、羅蘭、胡楓、陳嘉桓、阮兆祥、鄧兆尊、李龍基、丁羽、漢洋、譚嘉荃等等，今日宴會大約60幾圍、花費7位數字。其中謝賢專誠嚟送玫瑰花畀盧敏兒，送完就閃人，不過佢都有停低接受訪問，講到佢特登嚟送花，佢笑住話：「梗係啦，幾廿年都未離婚，唔好講喇，唔好講喇，你哋講o架咋！」
孫敬安盧敏兒恩愛現身，合照嘅時候，孫敬安仲輕吻太太面頰，對於黎明今日喺一份報章上，買咗一個頭版廣告祝賀佢哋結婚20周年，孫敬安話：「梗係感動啦，我噚晚收到佢嘅電話，已經知道喇，真係想喊，突然間做啲咁嘅嘢。」盧敏兒就指：「其實佢已經眼紅紅，好想喊好感動，不過我哋真係好多謝Leon（黎明），都希望佢事事順利，佢哋嘅情誼仲耐過我，唔可以用三言兩語講到，一切在心中。」
問到孫敬安送咩禮物畀太太﹖佢話：「我送咗我個人畀太太。」盧敏兒表示老公送咗今晚呢個派對畀佢：「去年我身體唔太好，之後走去驗身，最初以為自己生乳癌，老公知道好擔心，攬住我喊，後來經兩位專家幫我抽組織化驗，話8、9成都係冇事，所以一直到o依家，老公知道又攬住我喊，當時就知道老公真係好錫我，佢全程都喺我身邊，令我好感動。」
佢哋透露許冠文、陳玉蓮、杜琪峯平時好少出席呢類活動，其中最難得係老友曾志偉：「佢話呢個派對，一定要mark日子，因為仲緊要過特首請食飯，所以志偉贊助咗全場嘅紅酒，大約120枝。」盧敏兒感性咁話：「記得最初結婚嘅時候，我講過我一定愛老公多於老公愛我，但係20年後，我覺得老公愛我多於我愛老公，我有時都比較任性，但佢就樣樣遷就我，我對佢冇要求，亦冇要佢改變任何嘢，但係老公自己都改變咗好多，總之永遠都係老公最好。」
藝人朱潔儀都有到埸：「好開心今晚嚟賀佢哋兩個結婚20周年，因為盧敏儀係我中學時代嘅師姐，佢成績好，英文出眾，今晚嚟賀佢哋！（你哋兩個都係當年嘅校花？）我可能算係比較活躍啲，有玩運動，係籃球隊成員，盧敏儀嗰陣時已經做電視節目，喺學校好多人都知道盧敏儀係邊個！」朱潔儀又透露工作計劃，她說：「我呢排忙緊搞畫展，同埋嚟緊會為奇妙電視做節目。」
(蘋果日報 / 東方日報)
