【賴弘國攬實】阿嬌笑笑口現身

37歲鍾欣潼(阿嬌)正式註冊結婚了!今日阿嬌跟台灣「醫界王陽明」賴弘國在尖沙嘴舉行註冊儀式,只邀請30多位至親好友見證,下午2時40分,阿嬌嘅座駕返抵西環寓所,約10分鐘後,阿嬌嘅座駕再度駛離寓所,出發到筲箕灣,原來是調虎離山引開傳媒。

由於一對新人欲低調進行,故在餐廳包場舉行註冊儀式,地點位於尖沙嘴海旁,可以盡覽270度維港靚景,一對新人可以望着海景作出山盟海誓,浪漫滿瀉。而餐廳的露天位置有5排座椅,以白色簡約佈置,有幾個花球點綴,賓客可望着海旁景色;今日天氣風和日麗,而露台外有草地,但因為海旁邊有小樹,故就算註冊儀式舉行時有船隻駛近,船上嘅人都未能分享阿嬌嘅喜悅一刻,私隱度極高。

約下午2時許已有傳媒聚集餐廳外,現場保安嚴密,有餐廳職員在扶手電梯位把守,而商場亦安排三、四個保安協助。在下午近3時,英皇工作人員抵餐廳,約3點半,開設婚嫁公司的梁靖琪(Toby)抵會場,未知她是否阿嬌婚禮的統籌人。

下午約4時10分,一對新人抵會場,新郎着白裇衫襯深色西褲,阿嬌着黑色上衫、灰色外套、白色鞋,當兩人在停車場由扶手電梯行落嚟時,老公好細心為阿嬌撥頭髮,仲攬住阿嬌條腰,讓傳媒拍攝老婆最靚一面。

記者叫佢哋停低影相,阿嬌笑笑口急急腳,邊行邊講:「我要趕住去換衫。」

冇停步即入會場。

英皇CCO霍汶希(Mani)拿着一袋禮物到場,記者問Mani送甚麼?佢表示:「我買咗幾隻豬啦,由古生古太開始,即係基仔結婚開始,都係一揪揪豬囉。」

記者笑指阿嬌講過唔要豬,Mani笑笑話:「我唔理啦,佢阿媽話最緊要好運。」問到註冊程序?Mani表示:「我真係唔知,主要都係簽紙啫,同埋今次阿嬌想低調原因,因為佢想正式擺酒先同大家分享喜悅,阿嬌唔想煩到人哋,唔好意思,我都同佢講呢個世界好難保密,因為始終有咁多人知道,所以呢幾日我都好辛苦,個個朋友問我,又唔可以答,好尷尬。」

問到今日有乜人嚟賀阿嬌?Mani話都係一班姐妹,問到佢嫁女心情點?Mani笑答:「唔係嫁女,係嫁妹。我覺得好開心,雖然好破費,英皇啲金豬畀我掃晒。」希望下隻金豬送畀蔡卓妍(阿Sa)?Mani話:「我買畀周勵淇先,希望下一隻金豬係紅姐(惠英紅)同阿Sa。」問到估一陣係咪好感動?Mani坦言:「有,我帶咗一包紙巾嚟。」

而阿嬌到埗前,老闆楊受成及好友關智斌到場,有不少人圍觀睇熱鬧。

今年5月,阿嬌和賴弘國在洛杉磯舉行婚禮,「龍虎豹」好姊妹容祖兒同蔡卓妍、鄭希怡(Yumiko)、霍汶希(Mani)、賭王千金何超蓮陪嫁,阿嬌在婚禮上感動落淚,跟老公甜蜜錫錫,幸福滿瀉。

(綜合報道/Apple daily)