藝人郭晉安、馬國明、李佳芯、唐詩詠、何廣沛同黃嘉樂等，夜晚現身電視城，出席劇集《白色強人》祝捷晚宴，場面好熱鬧！
該劇大結局7天跨平台總收視有成32.1點，吸引超過2,100,000觀眾收看，成績甚佳！郭晉安受訪就話希望收視愈多愈好，問到會否開續集，佢回應：「希望嘅，梗係原本班底啦，最好1年內，過兩、三年嘅話就拖得太耐，觀眾會淡忘。其實監製剪完片，都已經講要開續集。（你有檔期？）唔知㗎，不過要集齊咁多演員都幾難，大家都好忙。」
如果《白色強人》開續集嘅話，相信唔少觀眾都十分期待。
早前郭晉安同11歲嘅囝囝去咗歐遊，佢坦言想囝囝認識唔同種族嘅生活，仲話估唔到佢幾捱得，有時落咗火車要推個篋行15分鐘，兩仔爺已經唸定遲啲挑戰去凍啲嘅地方。問到太太有無擔心，佢話：「日日報平安，最難忘係喺意大利拿玻里見到好多難民，旁人提醒我哋連手錶都唔好帶，最好連袋都唔孭，免得被搶，不過我哋唔係留得耐，全程都OK嘅。」
（on.cc / TVB）
