藝人田蕊妮為9月20日喺旺角麥花臣場館舉行的《Kristal Tin New Start Live Concert》開記者會，因阿田喜歡影相，記者會現場如同一個迷你相展咁。司儀宣布阿田嘅預訂門票已爆滿，阿田講笑話：「唔通預訂門票得3張飛？」她坦言開個唱好緊張，因為觀眾係真金白銀買飛，正構思俾咩觀眾睇。
今次演唱會唱歌之餘亦有加入Talk Show元素，阿田坦言會有難度， 要喺創作上取得平衡，Talk Show會從佢自身出發，分享一下經歷同大家不知嘅趣事，從中帶出演唱會主題「New Start」，觀眾睇完騷可以笑着迎接新一日，仲話希望將自己最真實嘅一面俾大家睇到。
阿田話應該唔會加場，坦言希望有生之年可以喺紅館開騷：「要集氣先得， 或者喺紅館門口busking，都叫喺紅館開騷呀，咁紅館係每位歌手嘅終極目標，雖然我係歌手出身，但入行26年都未達到。」粉絲們要加把勁集氣完阿田心願呀！
至於嘉賓方面，她透露吳業坤走不甩，又笑言佢嘅六嚿腹肌已六神合體。除了吳業坤之外，阿田透露爸爸都係嘉賓之一，還爆爸爸好緊張，不停忙於唱K練歌：「爸爸係我唱歌啟蒙老師，所以今次開騷我第一個就諗到佢。」被問到可會邀請曾做佢MV男主角嘅古天樂做嘉賓？阿田話佢都想，但要睇古天樂得唔得閒。
（on.cc / Instagram）
