於今年5月宣佈懷第二胎，近日原來靜靜開刀順利誕下7磅兒子，生第二胎的Zoey直言生產過程順利：「有過一次經驗，所以比較淡定，我不停叫自己勇敢啲，生嘅過程都唔算辛苦。」
她續說：「老公有陪我入產房同剪臍帶，最搞笑係BB一出世就請我『飲茶』，醫生抱BB畀我睇嘅時候，BB竟然疴咗篤尿落我個頭度，好搞笑！成個手術室嘅人都忍唔住大笑。（BB似你定老公多啲？）好多朋友都話今次BB似我多啲。」
大家認爲細仔似爸爸還是媽媽呢？
媽媽表示BB尚未改名，會交由師傅負責，講到對BB的期望，她說：「都係希望佢平安健康、肥肥白白咁長大。」
藝人岑潔儀（Zoey）又指會餵哺母乳。
已找來專業人士幫忙催乳：「依家每兩個鐘餵一次，有催乳師教我點餵，點樣唔會咬損乳頭，所以暫時都好順利。」
一家四口好幸福！恭喜恭喜~
（ig / 綜合報道）
藝人張衞健、洪永城、曹永廉、蔡思貝和楊秀惠等現身電視城，為即將推出的劇集《大帥哥》宣傳。無綫兩大高層樂易玲和曾勵珍現身撐場外，有關方面更請來樂隊及軍車接載張衞健出場，期間又舞獅點睛，足證他的地位。
張衞健於台上感性表示：「由開機嗰日開始，我已經唔捨得，因為唔知幾時再用廣東話拍劇，有可能係明年，亦有可能never again！」他接受訪問時說：「頭先我真係眼濕濕，因為真係唔知幾時再拍。有其他唔係娛樂圈嘅工作等我做，包括慈善及教會嘅事。」
對於今次返港拍劇，他形容為「還畀觀眾」：「當年我拍完《西遊記》就走咗去，好似不辭而別咁，所以好想再拍番一套劇畀大家。（對收視有信心？）冇理講呢啲，因為拍嘅目的唔係為呢樣。（唔再拍好可惜。）我話1年1部嘅話，大家都唔珍惜啦，少食多滋味，等同如果我拍得多，自己都唔珍惜表演機會啦。」
(on.cc)
咩叫好朋友呢？唔一定要日日見嘅，有心比較重要。
好似聽日36歲生日嘅蔡卓妍（Sa）咁，雖然要忙於為《神探大戰》開工，但係獲得一班好朋友，包括容祖兒、關智斌（Kenny）、張致恒（Steven）同鄭希怡（Yumiko）到片場探班，仲帶埋蛋糕去為壽星女預祝，係咪又warm又窩心先？
阿Sa今日喺Instagram度貼相，簡簡單單一句「太好喇你哋！！多謝」嚟表達謝意，至於喺Yumiko嘅IG度，就向阿Sa送上祝福話：「生日快樂，最正嘅SA！」
其實祖兒等人已經係連續第二日去探阿Sa班，佢哋前日探第一次次，噚日佢哋貼相上IG時，仲玩今期流行嘅「汪阿tag」！
難得開工時間都可以見到一班老友，仲要前日見完，噚日又見，仲有咁多人送吻賀壽，難怪阿Sa咁開心！
不過吹蠟燭許願時發生一段小插曲，祖兒一時情急下，搶先吹熄蠟燭，搞到主角阿Sa擔心自己的願望會否成真，Steven搞笑指如果阿Sa要幾百萬， 可以問祖兒攞，祖兒隨即豪氣答應「冇問題」。問到阿Sa有咩生日願望？佢話：「健健康康、開開心心、食得瞓得玩得，已經好足夠！」
至於祖兒今日另外再貼相，係佢去探Yumiko囡囡梁浸浸時嘅合照，見到已經3歲嘅梁浸浸坐定定玩氣球，合照時都好乖好淡定，不過祖兒就留言話：「一眨眼，她要變成少女了，多眨一下，她就談會戀愛，還會嫌我幼稚（其實已經嫌棄中），時間這東西……」
(Apple daily)
26歲大台《3日2夜》歐陽巧瑩（Tammy）明日升呢做人妻，跟30歲「木偶哥」林師傑有情人終成眷屬，晚上在尖沙嘴某酒店筵開30多圍囍宴。兩人既甜蜜又鬼馬嘅婚紗相曝光，Tammy換咗幾套靚靚婚紗，不但盡顯完美body，仲好似八爪魚咁夾實未來老公影相，煙韌爆燈。
婚禮前夕，準人妻Tammy接受傳媒訪問，踢爆木偶哥今早8點先返到屋企，冧爆表示：「佢作咗首歌畀我，噚日排band（bigday live band）排到今朝先返屋企，心痛！」問到情歌叫乜名？Tammy話：「我乜都唔知㗎，保持神秘感。心情未得閒緊張住，不過係有少少興奮，因為籌備咗咁耐，終於到聽日了！」
睇番兩人嘅婚紗相，Tammy甜絲絲話：「最難忘嘅係睇相嗰下，見到佢個樣好開心，佢仲download咗落嚟做wallpaper，覺得佢好迷戀我，我好高興，哈哈！」
明日做老襯嘅木偶哥為咗向老婆表愛意，寫咗《美麗的你》同《So in Love》兩首歌在婚禮上告白，木偶哥接受傳媒訪問表示：「一直都想寫歌畀TamTam，3年前已經寫咗《So》，為婚禮再寫《美》送畀佢，音樂對我哋好重要，佢鍾意我嘅其中一個原因，係睇到我keep住對音樂團火，《美》係講我哋嘅故事，自己中文唔係十分叻，點知真係迫到去8、9月，因為搞結婚我哋經歷多咗，自己用15分鐘寫好呢首歌，我仲搵咗譚俊彥喺婚禮上彈solo，希望自己可以唱得好好畀TamTam聽。」
(Apple daily)
胡說八道會開心事輪住嚟！
早前係杏兒生日，一班好姊妹為佢開生日P！
前晚賀黃智雯拎視后。今次就到姚子羚～
姚子羚今日（11月21日）38歲正日生日，胡說八道會好姊妹胡定欣、胡蓓蔚、黃智雯、李施嬅及胡杏兒昨晚為她慶生，又送花又送吻，令壽星女大為開心。
李施嬅在社交網分享這晚開心時刻，並留言：「祝10分勁嘅姚子羚生日快樂。呢位美女同我嘅口味同喜愛嘅東西（除咗男人）都好相似，所以一齊經歷很多。希望你要乜有乜，開心健康，真命天子快啲出現啦（喂，真命天子，睇到呢段message快啲報到啦！）love you babe @elaine_yiu @myoliemyolie @nwuuu @paisleyhu @wong_manman #happybirthday #胡說八道會」
(明報)
黎諾懿與李潔瑩(Nicole)於2014年拉埋天窗，一直都非常恩愛～而仔仔「小春雞」（黎峰睿）於上年四月出世。愛情家庭得意，不過事業之前一直未見起色，入行16年歷盡艱辛，直至近年先真正「入屋」，多咗唔少女性粉絲。
過去一年更加係大豐收，成為廣告客戶界寵兒嘅佢，廣告拍完一個又一個，作為大台親生仔，對公司算係有交待。
黎諾懿雖然啱啱喺大台台慶，失意新加坡同馬來西亞兩地視帝獎項，但大台又點會令呢位親生仔唔開心呢？所以嚟緊一年，大台決定同黎諾懿有錢齊齊搵，安排佢暫時跳出戲劇組，主力拍攝最搵錢嘅飲食同旅遊節目，已經出咗宣傳片嘅《暖男廚房》就係第一波喇！
黎諾懿今日凌晨亦繼續做暖男，喺IG上載入廚炒蟹「餵」妻嘅短片，仲留言話：「做完台慶有咩做？當然係煮老婆最鍾意嘅新加坡胡椒炒蟹啦！」到今日就化身暖爸，陪囝囝小春雞返學校玩。
問黎諾懿是否將會調去綜藝組拍節目？佢接受傳媒訪問就話：「唔係調走，但暫時唔會拍劇住，過埋農曆年會去幾個國家拍飲食節目。」至於會否帶埋老婆出埠，繼續造人大計？黎諾懿就講笑話要視乎到時是否已經造人成功，如果老婆大肚就唔會同行。哦……唔通……
(綜合報道/Apple daily)
2014年港姐季軍何艷娟在大台做開宮女等閒角，事業就沒甚曙光，但專心同大她40歲的澳博營運總裁吳志誠拍拖，今年7月她被揭入紙註冊結婚，早前二人已正式註冊，富貴爺孫戀修成正果，正式成為吳太，過其億萬闊太生活。
何豔娟做了吳太，Ig都不時放不少她富貴生活片後，好似連日嚟就貼了不少在法國著名酒區布根地(Bourgogne)品酒的相片，她原來去了當地參加酒農盛宴(La Paulee)活動。
一身珠光寶氣、周身名牌打扮的何豔娟更拎住一支Armand Rousseau Chambertin 1979出品靚酒，留言大講酒經，大讚支酒有層次，之後又去酒莊參觀，出席赤名油酒拍賣會。
其實，何豔娟老公吳志誠出名對紅酒有研究，幾年前更買下當地酒莊，估計此行何豔娟陪他巡視業務居多。
升哂呢！
不過何豔娟即使做了富太都依然未有放棄大台拍劇工作。
她在出發之前還要開08返大台拍劇，還留言一點都不覺得辛苦，名副其實賺錢買花戴過日辰。
(Apple daily)
因為一個Tag而成為IG紅人嘅汪明荃（汪阿姐），引領全城熱玩「汪阿Tag」，喺相片上用手寫人名當tag，大家跟還跟，但知唔知點解阿姐當初要咁tag人先？
鄭裕玲（嘟嘟）就喺節目爆料，原來係因為汪阿姐開咗IG之後，唔少人都叫佢合照後hashtag番佢哋，但阿姐就話：「唔係想領導潮流，成日畀人叫hashtag，我都唔知咩叫hashtag！」
而阿姐本身就有個「明荃之友」網站，公務繁忙嘅佢不時出席政商界活動，會同唔少名人合照，所以佢一向都會咁樣落名畀「明荃之友」搞手認人上載照片！
嘟嘟仲話阿姐親力親為「Tag」人，當日夜收工，阿姐就話返屋企搞，點知搞到凌晨點幾2點！
正所謂「活到老學到老」，阿姐依家玩IG玩到出神入化，仲識得tag「我就是ig紅人」，緊貼潮流不特止，識玩一定係做Leader！
(on.cc)
「民間視帝」馬國明喺台慶又陪跑，不過佢今日有「喜訊」宣布噃！
話說佢上個月尾開咗微博終於可以同網友互動，不過一直未有「紅V」（個人認證），睇落木獨嘅佢發揮馬國明式幽默自製紅V，仲每張相都畫一個上去，連圖像都有！
幾經辛苦，佢今日興奮留言：「終於有微博認証（證）喇……感覺就像有出生証（證）明1樣……謝謝……yeah……✌✌✌」仲附上一張裸照贈興，而張相佢仲搞笑用個自製紅V遮住「小明」，不過係童年照啫！
其實馬國明真係好風趣，啱啱開微博時，好多網民「嫌棄」佢唔識玩，叫佢快啲申請認證！
之後佢就上載舉V自拍照，留言：「V認証（證）來了……yeah」點知大家不懂佢嘅幽默話佢蠢，誤會佢都係唔知咩叫「認證」，搞到佢再上載張手遮眼嘅自拍相表示「冇眼睇……」！
今次終於「得償所願」，就嚟比視帝仲難攞，網民都戥佢好開心，不過就要求佢以後每張相都要Keep住加紅V，有人仲話呢期社交網最紅就係馬國明同汪明荃嘅「汪阿tag」喇！
(on.cc)
佢話：「知道有咁高難度動作日日都湊仔女當練舉重，有玩健身。」家燕姐話：「你放心，我都減緊肥，減咗六、七磅，到時應該會再瘦幾磅，一共十磅。」佢再重複：「動作大只可以一日做一次，頭先係為大家破例，依家揸咪都手震。」家燕姐聽到後輩咁講，反安撫話：「其實我幾重，辛苦佢，好多人都想抱我㗎，小田都想，但係一齊就會跌落地，因為佢唔夠高。」
薛家燕噚晚喺北角為入行60週年演唱會綵排，邀請咗謝天華做表演嘉賓，兩人演出一首《再共舞》，謝天華由跳唱組合出身，但噚晚跳到氣來氣喘。首先兩人面貼面，然後載歌載舞，到最尾一個pose謝天華要抱起家燕姐，見佢谷到面都紅晒頂硬上，後來家燕姐話：「攞佢命。」謝天華話：「現場未必會做呢一part。」
傳媒要求佢抱多次家燕姐，天華就話：「一日只可以做一次，24小時後啦。」幾經大家同家燕姐要求下，天華最終叫咗四位壯男喺側邊睇實再抱起家燕姐。
家燕姐話第一日綵排有舞王拍住，謝天華話：「收到家燕姐電話好開心，但壓力就開始嚟，同咁有份量前輩合作。」家燕姐即刻話：「你講重量呀？」謝天華鍾意舞台表演，視今次為大挑戰，家燕姐話：「天華要求好高，搵佢表演要開會、傾點出場、唱歌、啲衫各樣。」謝天華話家燕姐入行60週年，一定要有驚喜畀大家，喺台上如果興起可能會更甚。
家燕姐話：「我哋呢一part件衫好少布，話布料貴要慳啲，好性感。」謝天華笑指：「家燕姐60週年事業喎，梗係要畀觀眾睇下你幾有事業心啦，好多人恨睇㗎。」家燕姐謙虛叫唔好笑我啦。 舞步方面謝天華堅持唔跳十字步，仲話：「家燕姐呢方面係宇宙最強，冇理由我同佢跳。」
謝天華抱咗家燕姐兩次搞到好辛苦，佢話：「知道有咁高難度動作日日都湊仔女當練舉重，有玩健身。」家燕姐話：「你放心，我都減緊肥，減咗六、七磅，到時應該會再瘦幾磅，一共十磅。」謝天華重複：「動作大只可以一日做一次，頭先係為大家破例，依家揸咪都手震。」家燕姐聽到後輩咁講，反安撫話：「其實我幾重，辛苦佢，好多人都想抱我㗎，小田都想，但係一齊就會跌落地，因為佢唔夠高。」謝天華呼籲佢哋係危險動作，大家切勿模仿。
(Apple daily)
