藝人吳綺莉女兒卓林女友Andi早前透過社交網，發文聲稱被自己母親虐待，又指對方虐畜。
今日Andi再度更新社交網，她晒出一張文字截圖，圖中文字寫上：「wish the world had as big of a heart as my fiancee does（希望全世界都有寛大的胸懷，就好像我未婚妻一樣）」似乎係講緊卓林。
唔少網民都對「fiancee」呢個字眼好好奇，紛紛問佢同卓林係咪訂咗婚？
(on.cc東網)
【要揀溫和唔刺激嘅】坐月更加要注重清潔！
坊間常有人說，坐月期間容易受風，應待十二朝（產後十二天）過後才可洗頭，以免有受風的機會。在古代，由於洗澡洗頭等較為麻煩，且當時的婦女頭髮較長，故洗澡及洗頭的確較易感染風邪，因此古代醫家習慣囑咐產婦要待十二朝過後，暗紅及淡紅色惡露基本已清除時才好洗澡洗頭。
然而，現今要洗澡洗頭已不是一件難事（洗澡時可使用暖氣及使用吹風機吹乾頭髮）。事實上，保持個人衛生十分重要，產後不斷排出的惡露也容易成為細菌的溫床，造成產褥感染。而且新生兒抵抗力低，稍一不慎便容易生病。故基本的清潔是必須的，尤其是母乳餵哺的婦女更需注意。
坐月期間也可以使用薑水抹身，因生薑有袪風散寒的作用，而薑皮的藥性會偏向進入人體的肌表，故可適量使用。市面上亦有以天然老薑製作而成的沐浴露，潔淨成分溫和不刺激，方便又有效清潔肌膚髒汙。
(按圖了解更多)【傳出離婚消息後】陳自瑤首PO相
藝人王浩信同太太陳自瑤（Yoyo）近日被東網率先踢爆婚變消息，仲有指二人已分居一段日子，引起大家嘅關注！不過二人都冇回應事件，尋日浩信就喺社交網上載做gym片，似乎就做運動發洩。
今日Yoyo更新社交網，上載同鮮花合照，好開心咁話：「Hi,Good morning everyone !Have a nice weekend!（各位早晨！祝大家有個愉快周末！）」見到Yoyo展露笑容，似乎未受婚變消息影響，好多網民都留言話無論結果點都好都會支持佢！
(on.cc東網)
【講到當年拍《驚變》】溫碧霞覺得自己好傻：其實我個人本身好⋯
《溫碧霞海潮演唱會》將於今月19日在麥花臣球場舉行，演唱會回顧Irene嘅演藝事業，除咗「海潮」look可以26年永恒不變，96年Irene拍三級片《驚變》嘅露兩點演出，同樣令觀眾至今難忘。
聽到《驚變》，Irene即話：「嘩！呢部戲……呢部戲好經典呀，點講呢？其實我個人本身好開放，唔係保守女仔，由細到大睇開外國片，好多model…我覺得人嘅身體只係一部份，我見好多model，或者外國啲artists，佢哋拍戲都好open，但拍出嚟好靚好有美感，當時我覺得……第一，我想突破自己，第二，我覺得為藝術而犧牲好似好型咁喎，當時細個係咁諗。冇後悔拍呢部戲，始終係一個人生經歷。我依然好鍾意呢部戲，只不過有冇需要去做呢件事。依家望番轉頭，覺得當時都好傻女嘅……哈哈，覺得自己好傻，咩為藝術而犧牲，好傻女，但都係一個人生經歷。」
至於今次演唱會嘅造型會唔會好性感？Irene就話：「造型方面，會係番一啲…屬於『海潮』嘅感覺……」即係…「即係好多海嘅感覺，好多花嘅感覺。跌膊都會有嘅，一向我嘅作風啦。會有驚喜，但點都會有番海潮嘅感覺。」問到老公何祖光是否批准台上性感？Irene笑說：「佢一直覺得我性感，可能佢已經睇慣咗。」老公是否包咗很多張飛支持？她說：「有呀，好似100張，佢一聽到我開騷，請好多朋友去睇，我覺得佢都好興奮好開心，好支持我嘅工作。」
(蘋果日報)
【轉行做燈飾超低調】靠呢樣打動太太：佢話一紮係生日，一紮係求婚
年年都求婚，仲好搞笑咁次次都揀女方生日嗰日：「佢第一次送咗兩紮花，問佢點解有兩紮，佢話一紮係生日，一紮係求婚，我當然冇睬佢。」
48歲嘅蔡濟文，同黃翊失聯廿年，大前晚成班同期歌手，包括鄭敬基、杜德智同前女友李樂詩、何婉盈、胡渭康、黎明詩、唐韋琪、江希文、韋綺姍、蔡興麟、文佩玲、洪楗華、莫鎮賢、劉彩玉等等等等，去咗黃寶欣位於九龍城嘅港嘢茶檔「大團聚」。
廿年人事幾番新，早於千禧年之前已由歌手／演員退下火線、轉戰商場打理家族燈飾生意嘅蔡濟文，真係絕少絕少曝光。就算之前黃寶欣開新店，傳媒想邀請其現身撐好友，蔡濟文都婉言拒絕。2014年鄭敬基個唱，請來鄭伊健任壓軸嘉賓，當時力邀蔡濟文上台一齊唱《Home Alone》，但最後蔡濟文因私事缺席，有點遺憾。
咁呢近廿年，蔡濟文發生過咩事呢？其實佢太太——前無綫藝人陳珮珊2006年曾接受《蘋果》專訪，當年係兩人結婚四周年，而蔡濟文亦已接手屋企嘅燈飾生意，仲長時間喺上海。陳珮珊由兩人點解拍拖講起。Raymond（蔡濟文）88年參加亞視嘅《未來偶像爭霸戰》進身娛樂圈，後來成為歌手出專輯，當時佢要拍MV，第一時間就諗起陳珮珊。
「十幾年前，公司安排我同Raymond拍劇試鏡，對佢冇咩印象，但原來佢已經靜雞雞睇上我。後來佢乘機向導演推薦我做佢MV女主角，拍完之後，保母就走，剩佢送我返屋企，佢仲送咗佢隻CD俾我，之後佢一直有聯絡我。」但原來，陳珮珊當時，係有男朋友。「所以我拒絕咗佢，但Raymond一直冇放棄，我媽咪對佢印象都好好，後來我同當時嘅男朋友分手，之後先同佢一齊。」
98年，蔡濟文到上海，打理家族燈飾生意，當時陳珮珊好唔想，但又唔可以阻止，而且最初都唔係太信任——但蔡濟文好識得處理，當時佢同陳珮珊都未結婚，但就同人講已婚，謝絕艷福。當時兩人就係靠書信維繫感情。陳珮珊憶述：「雖然佢每次只會畫兩個公仔寫幾隻字，但對我嚟講，一個人在外地，收到來信感覺很warm。」
蔡濟文年年都向陳珮珊求婚，仲好搞笑咁次次都揀女方生日嗰日：「佢第一次送咗兩紮花，問佢點解有兩紮，佢話一紮係生日，一紮係求婚，我當然冇睬佢。」陳珮珊來自大家庭，有五兄弟姐妹，所以婚後未幾已計劃生仔：「我陀大仔Jason之前（兩人育有兩子），已經懷疑自己有咗，但用驗孕紙又驗唔出。記得嗰次我上貨車點完貨，仲好瀟灑咁跳落嚟，事後先至知驚。後來的起心肝去驗，果然有咗。嗰陣老公一有時間就陪我去公園、郊外散步。所有孕婦嘅症狀我都冇，唯一係唔可以食隔夜餸，一食就嘔。」蔡濟文原來真係好Sweet好貼心0架！
(蘋果日報)
【聽日結婚但⋯】原來仲有請陳展鵬：好多嘢未安排好
連日嚟為婚禮嘅事做準備，日前仲約埋未婚夫同一班姊妺團見面，準新郎直言任玩唔嬲！今日準人妻繼續出動，喺朝早11點左右，去咗尖沙嘴1881嘅婚紗店last fitting，心情勁靚嘅佢仲著咗兩套禮服俾大家影相。
31歲落選港姐李美慧將於聽日，即係3號下嫁已故富豪曾紀華二房長子、56歲富商曾文豪，升呢做幸福人妻，佢哋會喺淺水灣酒店舉行婚禮，之後再去法國開派對，女方仲係雙喜臨門，真係恭喜晒！
連日嚟李美慧婚禮嘅事做準備，日前仲約埋未婚夫同一班姊妺團見面，曾文豪直言任玩唔嬲！今日準人妻李美慧繼續出動，喺朝早11點左右，去咗尖沙嘴1881嘅婚紗店last fitting，心情勁靚嘅李美慧，仲著咗兩套禮服俾大家影相。
見到佢嘅身型仲好纖瘦，孕味暫時都唔係好濃，佢哋手上都唔見戴住任何戒指，只係戴手鈪。講到o依家嘅心情，佢話：「其實都幾繁複，因為請咗好多藝員同事，好似煒哥同展鵬，但係佢哋有啲要開工，所以好多嘢都未安排好。」
工作方面，佢就話：「o依家拍緊《鐵探》，預計會拍到8月，之後停工等生仔，生完先再做嘢，不過o依家有啲工作已經經傾緊！」至於害喜情況，佢就話：「都幾好，冇乜點嘔，所以導演會盡量拍咗我啲戲份！」
(蘋果日報)
【男方曾同孫慧雪等傳緋聞】陳庭欣大方直認⋯
入行多年的陳庭欣與香港先生翟威廉的緋聞最惹人談論，緋聞傳足五年，但兩人一直死口不認拍拖，其後陳庭欣被爆戀上有米律師唐偉倫，曾經默認與唐偉倫拍拖，不過這段情已經成為過去式。。。
港姐出身的無綫小花陳庭欣又有新仔登場，新歡更是有過億身家的美容零售商老闆楊振源（Benny），入行多年的陳庭欣與香港先生翟威廉的緋聞最惹人談論，緋聞傳足五年，但兩人一直死口不認拍拖，其後陳庭欣被爆戀上有米律師唐偉倫，多次被目睹出雙入對，對感情事堅持低調的陳庭欣，曾經默認與唐偉倫拍拖，不過這段情已經成為過去式，分手後陳庭欣火速達着新歡。
楊振源（左一）係美容零售商老闆。
Benny雖然是圈外人，不過曾經先後與圈中不少女星傳出緋聞，包括已為人母的孫慧雪、曾被指是周永恒趙頌茹婚姻「小三」的𡃁模劉依靜。有傳陳庭欣跟Benny兩年前在一個晚宴上認識，不過當時陳庭欣心有所屬，直到最近兩人被爆秘密拍拖，陳庭欣也大方直認雙方正處於了解階段。
(on.cc東網)
【預告會做媽媽！】原來出道前做過黎明演唱會伴舞
事前就透過大會講明唔准問有關私人生活及黎明等問題，但最終當記者提問時，佢都有大方回答，至於有冇探好友黎明個BB時，即興奮大笑，直認。。。
韓國神劇《太陽的後裔》女星宋慧喬去年10月結婚，噚日自婚後首度襲港，今日下午先到中環出席品牌店鋪嘅開幕儀式，晚上再出席品牌派對活動。
喬妹喺現場接受傳媒訪問，不過事前就透過大會講明唔准問有關私人生活及黎明等問題，但最終當記者提問時，喬妹都有大方回答，講到自己好鍾意來香港，喺香港有好多朋友，但今次行程冇乜時間，希望見到幾個朋友。至於有冇探好友黎明個BB時，喬妹即興奮大笑，直認有睇新聞，亦都恭喜佢，但今次時間就未必可以見到。
宋慧喬其實與黎明是多年的好友，兩人的關系一直很好，令大家震驚的是，宋慧喬在出道之前還做過黎明演唱會的伴舞，兩人可以說是有著十幾年的友誼了。
對於自己有冇生B計劃時，喬妹話有計劃，但未知幾時，直認仲會有呢一日，預告會做媽媽。喬妹話知道唔少粉絲等緊自己新作，佢亦有睇緊劇本，當中包括電影同劇集。對於有傳佢會同朴寶劍拍新劇《男朋友》，喬妹話未決定，仍然考慮中。問到享唔享受現在生活時，喬妹話現在好多時間去旅行、睇戲同埋見朋友，似乎相當滿足。
(蘋果日報/騰訊)
【囡囡靠自己唔補習】徐濠縈﹕讀書低分都冇所謂
徐濠縈、雷莊𠒇(Juliette)、貝安琪、許懷欣和太太等噚晚在中環置地出席一間概念店開幕活動，阿徐一身潮服現身。
阿徐女兒康堤即將考試，現時閉關讀書，考完試兩母女就可以御准去玩玩放鬆心情，考試期間係父親節，老公陳奕迅亦可能唔喺香港，暫未知點慶祝，阿徐話：「每年阿女都會畫心意咭，我哋開心接收放喺廳，好似個畫展咁。」阿徐現時已經好少陪女兒溫習，因為學習程度好深，女兒只有靠自己，亦冇補習，十分自律。阿徐話：「唔係叻，係唔使我擔心。」
女兒現正讀中二，中三後才揀科，阿徐持開放態度：「唔會逼佢讀書，好似佢唔鍾意中史，唔會逼佢一定要有好成績，低分都冇所謂。我覺得阿女鍾意音樂，音樂有好多種，唔一定要同爸爸一樣做流行歌手，向其他發展都可以，我哋會引導佢做自己鍾意做嘅事，唔會有壓力。」
(蘋果日報)
【連Facebook都認錯咗】吳若希撞樣呢位前港姐
「有人試過爭我錢不過還畀吳若希，有時我自己都認錯，幾時可以同吳若希演孖女或失散多年嘅姊妹。」
正所謂人有相似，就算出名有靚樣嘅星明藝人都冇例外，時不時都會有撞樣嘅情況出現！
前港姐陳庭欣在網上轉載咗一張朋友給她的截圖，朋友向她表示透過Facebook自動認人系統，原想tag歌手吳若希時，電腦嘅自動系統竟然將吳若希tag咗做陳庭欣。
陳庭欣得知後在網上發文表示：「電腦都總有出錯嘅時候，我不是吳若希，吳若希不是我，自動辦認臉孔功能失敗，電腦都認錯唔怪得好多人都認錯，有人試過爭我錢不過還畀吳若希，有時我自己都認錯，幾時可以同吳若希演孖女或失散多年嘅姊妹。」
而吳若希亦有留意呢個post，仲有留言「hahahahahahahaha」。陳庭欣仲講笑同吳若希講「 我下次幫你頂上呀。」
(on.cc東網)