以往都係與圈外人拍拖，去年底結束兩年戀情，最近被指低調換畫，雖未有親口回應緋聞，但佢就以行動來承認蜜運，十指緊扣公開戀情真係好Sweet呀！
曾演《哈利波特》（Harry Potter）系列嘅英國女星「妙麗」愛瑪屈臣（Emma Watson），最近與美劇《歡樂合唱團》（Glee）男星Chord Overstreet出雙入對，繼日前被發現一同離開奧斯卡賽後慶功派對，日前又被拍得甜蜜約會，二人在燈光幽暗餐廳內談心，戴帽嘅愛瑪屈臣輕輕托腮，更甜笑望住男友，甜蜜關係盡在不言中。
現年27歲嘅愛瑪屈臣以往都係與圈外人拍拖，去年底佢同美國科技企業家William Knight結束兩年戀情，最近被指低調換畫。說時遲那時快，愛瑪屈臣雖未有親口回應緋聞，但佢就以行動來承認蜜運，更與Chord Overstreet十指緊扣咁手拖手公開戀情。
(蘋果日報)
韓劇《奇皇后》嘅43歲男星朱鎮模，前年被爆因拍攝大陸劇《親愛的，對不起》而撻着33歲大陸女星張儷，不過戀情爆出時朱鎮模就唔認戀情，直到有傳媒公開二人去日本札幌旅行時嘅照片，朱鎮模喺有圖有真相下才終於認拍拖，並指會好好保護女友。
不過兩人拍拖近兩年，敵唔過分隔兩地之苦，分手收場。今日張儷就透過工作室發聲明，宣佈已經同朱鎮模分手，聲明指：「因工作聚少離多，決定回到朋友關係，和平分手。」
又指感恩彼此有過美好嘅回憶，同時希望外界尊重二人嘅選擇，繼續支持佢哋嘅作品，並給予佢哋私人空間。又一對中韓戀斬纜，令唔少粉絲大感惋惜，今年1月韓國男星宋承憲同大陸女星劉亦菲分手收場，估唔到朱鎮模同張儷亦都敵唔過聚少離多而分手。
(蘋果日報)
為了讓孩子「贏在起跑線」，好多準媽媽都會食用針對孕婦及胎兒營養所需的保健食品。但孕婦的需求與一般人不同，部份孕婦特別需要的維他命及礦物質，如過量攝取會令補身不成，反會影響胎兒發育及孕婦健康，更有機會引致畸胎及增加嬰兒罹患自閉症。
世界綠色組織今(11日)公布「孕婦保健食品正面清單」，令各位準媽媽可以有多一份參考嘅資料！記得除了參考正面清單，亦應先向醫生諮詢意見。
世界綠色組織於今年年初抽取市面上17款孕婦保健產品作3種測試，包括生物測試、化學測試及成分篩查，發現所有樣本全部通過測試，符合高安全標準的產品清單，全部被納入「正面清單」。
孕婦持續補充所需營養雖然有益，但一旦攝取過量便會造成問題：如攝取過量維他命嚴重者甚至會影響胎兒發育遲緩，胎兒出生後亦較易對花生及黃豆等食物出現過敏；攝取過少及過量葉酸或會增加嬰兒患自閉症風險；攝取過量礦物質或會導致胎兒畸形甚至流產或早產。所以補之前應留意產品各項成分濃度及向醫生諮詢意見。
婦產專科陳少慧醫生表示：「孕婦的需求與一般人不同，即使平日服用的保健食品，亦未必適合於懷孕期內服用。加上上述營養大都可以從日常飲食中攝取，如牛奶便含有豐富的維他命A、D、葉酸和鈣，碘和鐵則可透過進食海帶與雞蛋等補充，所以如同時進食保健食品，便容易造成攝取過量，加上各人體質有異，建議大家於選購時，宜先向醫生或專業人士查詢。」
即睇正面清單：
另外，市面部份含魚油及由魚油提煉DHA的保健食品引致過度捕魚問題，影響海洋生態環境，而部分深海魚或受重金屬污染，如水銀等，故此世界綠色組織行政總裁余遠騁博士建議可以藻油代替魚油，兩者營養價值相約，對環境及自己的健康也有好處，又提醒孕婦避免進食過期保健食品。
(世界綠色組織)
佘詩曼拍住黃子華合作嘅賀歲片《棟篤特工》大收旺場，早前衝破四千萬票房。子華喺多次訪問中都大讚呢位合作多年嘅拍檔keep得好，佩服阿佘每次拍完通宵戲，第二朝早上見面，個個想殺人咁嘅樣，唯獨阿佘皮膚依然白裏透紅，仲可以笑面迎人。
噚日阿佘就開facebook live分享美顏心得，雖然佢只係薄施脂粉，但唔少網民不停留言讚佢靚女。心情大靚嘅阿佘話：「女人要愛錫自己，尤其係大家工作咁忙，一定要好好注意身體，要keep到好精神，我每朝早上都會空肚飲滴雞精，暖笠笠又可以補身，加一個紫薯夠高纖維，健康得嚟又有營養，可能因為咁，唔化妝面色都紅卜卜，好氣色應該由內調理，先可以靚到出嚟。」
此外，阿佘透露過年時玩得好攰，現在已回復工作情緒。
(蘋果日報)
歌手鄭希怡（Yumiko）囡囡梁子柔（梁浸浸）向來以可愛萌樣，取得一眾網民歡心，每次一出post都必定成功吸like！最近Yumiko同好姊妹黃依汶兩家人一齊飛去日本旅行滑雪，連日來見Yumiko邊玩邊上載旅行靚相同網民分享。
梁浸浸向來非常活潑，未夠三歲已經學識踩單車，上個夏天仲學識游水，運動細胞相當之強，而梁浸浸今次第一次滑雪，當然唔會難到佢啦！
短片中見到梁浸浸全身着晒滑雪裝備，仲戴咗御用魔鬼頭盔，唔需要滑雪杖都平衡到、滑到，仲興奮對住鏡頭揮手，非常之犀利！
唔少網民大讚梁浸浸好叻女，梁浸浸又成功呃唔少like喇！
(on.cc東網)
問：
醫生您好，我想問一下，高血脂的病人是不是不能吃動物內臟？
西奈山醫院以色列醫療中心腫瘤科主治醫生蔣威廉：
對，高血脂病人不要吃動物內臟，因爲內臟所含脂肪比較高。另外，高膽固醇、痛風病人也儘量不要吃動物內臟。
亞洲人吃內臟的比較多，西方人很少吃內臟，所以國外談內臟的問題很少，但中國人要小心。許多內臟都含有毒素，比如肝、腸。另外，內臟不煮熟可能會有寄生蟲，比如在火鍋裡涮腰子，煮不熟可能會有蟲，一定要注意。但對於貧血的人來說，內臟含鐵質是很高的。
所以能否吃內臟，第一要看身體的情況，不是每個人都合適吃；第二一定要煮熟再吃。
(大紀元)
型男余文樂（樂仔）與皮帶大王千金王棠云（Sarah）結婚後一直愛得甜蜜，雖然屢傳「樂嫂」有喜，不過佢哋都未有承認。
但係早前Sarah剪咗短髮，仲不時甫啲同小朋友玩嘅相，令人覺得佢似乎係為迎接BB而做好準備喎。
早前Sarah破例晒出一張全身相，睇落好似肚凸凸，今日樂仔又喺社交網上載咗一張Sarah食嘢食得好開心嘅相，原來佢帶咗Sarah去食日式料理。
相裏面見到有好精緻嘅壽司，咁多正嘢，難怪Sarah笑得咁開心，不過網民都留言叫Sarah唔好食咁多生冷嘢、要小心呀，大家仲搞笑地話樂仔係晒妻狂魔，佢哋兩個認真Sweet到爆！
(on.cc東網)
伍詠薇（伍姑娘）老公練海棠喺年幾前被指背住老婆偷食，但伍姑娘選擇相信老公，令事件亦告一段落，兩公婆雨過天晴。今年係伍姑娘同練海棠踏入結婚19周年，伍姑娘早排去東京為奇妙電視主持《四小時生活圈》，電視台就花咗3個月時間籌備，送咗份超級驚喜俾伍姑娘嚟賀佢結婚19周年。
原來奇妙今次搵咗日本人氣快閃團隊Emotion Rise合作，呢個團隊經常幫人搞驚喜生日或者求婚派對，佢哋嘅YouTube片周不時都會網上流傳，而今次係佢哋第一次同電視台合作。
奇妙同Emotion Rise又請到日本歌手渡梓喺驚喜派對到唱live，Emotion Rise經常用渡梓首名曲《Wedding Day》嚟做主題曲同背景歌曲，但搵原唱者唱live都係第一次。話說練海棠一早同伍姑娘講咗飛去日本探班，電視台就靜靜雞叫佢提早一日到，然後話同伍姑娘喺一間餐廳做情深訪問。
Emotion Rise照慣例假扮侍應或者食客，當伍姑娘準備拍攝時，突然熄燈同音樂響起，所有成員就出嚟跳舞，令伍姑娘好興奮。最驚喜之處，係練海棠突然攞住束花出嚟，又攞結他自彈自唱咗首《The Wonder of You》，伍姑娘感動到喊，又尖叫話：「乜你識唱歌彈結他㗎咩？」
呢次係練海棠第一次自彈自唱俾伍姑娘聽，佢話首歌寓意伍姑娘對佢嚟講係一個好神奇嘅老婆，感激老婆10幾年嚟對自己支持同包容。伍姑娘亦對老公話：「我係一匹野馬，我冇試過同一個異性可以維繫到一段關係咁耐，所以你真係收服到一匹野馬。」
《蘋果》今日打番俾伍姑娘，佢話奇妙團隊喺今次咁緊密行程都搞咗呢個驚喜派對俾佢，令佢好感動：「我喊係因為團隊俾咗個surprise我，連我助手都唔知，我好耐都未試過喊得咁淒涼，嗰種係開心喜悅嚟。」伍姑娘話Emotion Rise通常係結婚求婚先見到佢哋表演，喺網上見到佢哋驚喜表演時覺得好正，估唔到自己都有份：「我以為真係有人求婚，點知原來為咗我做呢件事，跟住我老公仲高潮走出嚟，白馬王子咁唱歌，我都未見過，呢個媾女高手，我對咗佢19幾年都未見過佢孭住結他唱歌，好多謝電視台團隊，所以我喊到豬頭咁。所以啲嘢never too late，永遠唔會覺得啲嘢太遲，原來呢個係遲來的春天，好開心。」
伍姑娘話最搞笑係佢哋個女導遊同日本人介紹伍姑娘係香港藝人時，竟然話伍姑娘等同日本嘅藤原紀香級數，伍姑娘笑話：「我話吓？嗰個cup數？我冇佢咁大喎！」
(蘋果日報)
//一人有一個夢想 兩人熱愛漸迷惘 三人有三種愛 找各自理想//
呢幾句，有聲嘅。
黎瑞恩呢首《一人有一個夢想》好多人都識唱，但為咗家庭，佢選擇退出退出娛樂圈，轉行做保險。幾年前離婚之報，小恩子復出繼續唱歌，今日佢喺商台接受《1圈圈 星光背後》訪問，講到感情問題，仲無意間承認咗，曾經同阮兆祥拍過拖。小恩子直認當年公開拍拖係禁忌嚟，佢話：「以前嗰個年代，真係最好唔好拍拖，邊有o依家咁自由。經理人公司會覺得『如果你拍拖，就會令到少男們幻想冇晒，因為佢哋鍾意你就會將你當情人咁看待』，所以最好拍拖唔好公開，唔好俾人影到。」
至當年同阮兆祥傳緋聞，係咪就係俾公司棒打鴛鴦？小恩子唔覺意承認拍過拖，而分手原因係……因了解而分開：「其實冇咩特別，大家當時都係少男少女，或者係因了解而分開。」小恩子直認當年為咗拍拖放棄唱歌：「喺力圖時期只係出一張碟，其實係因為我真係拍拖。因為我好喜歡拍拖，事業對於我嚟講唔係太重要。」
佢話男朋友要求唔好再做藝人，小恩子就答應，連經理人恭喜佢，答應唔使佢唱歌，小恩子話：「覺得好開心，可以拍拖喇。但唔可以每日都只係拍拖，要搵工作，有個朋友向我sell保險，但唔知點解由sell保險變成做保險。」愛情至上，可惜小恩子喺14年宣布離婚，佢坦言曾經怨恨前夫，但經過劉小慧同李國祥等好朋友開解後，已經放低怨恨，仲已經同前夫做番朋友，佢話：「我哋嘅關係係無辦法分離，始終有咗小朋友。但我會經常覺得，始終呢個人我曾經深愛過。」
(蘋果日報)
藝人賴慰玲去年底榮升人母，為老公梁子峰誕下寶貝仔Marat，唔經唔覺Marat就快100日大喇，當然要開派對慶祝吓！身為媽咪嘅賴慰玲事前做足準備，一早整定囝囝嘅百日蛋糕送驚喜，仲喺社交網分享整蛋糕過程。
見賴慰玲畫好設計圖，開始落手落腳整蛋糕，好姊妹兼囝囝契媽陳嘉寶同陳凱琳齊齊幫手，最後成功整咗一個立體公仔蛋糕，上面仲有代表100日以及囝囝Marat個名嘅字樣。相信Marat收到咁靚嘅蛋糕，就算冇得食都好開心！賴慰玲亦留言表示：「My son is ready for his 100th day party！（囝囝已經準備好佢嘅100日派對！）」
開完派對後，賴慰玲其中一個好姊妹就喺社交網上載派對上嘅靚相，相中除咗有Marat BB同媽咪嘅愛心蛋糕影合照之外，仲有各位來賓嘅大合照，該好姊妹仲留言：「個個都一雙一對…」
咦咦咦！相中除咗有陳嘉寶與老公之外，仲罕有見到陳凱琳與男友鄭嘉穎到賀啵！唔少網友都嗌夠晒驚喜，仲話嘉穎影合照時好自然咁攬住陳凱琳，好Sweet呀！
(on.cc東網)
