江湖傳聞，當年攞完影后寸到飛起嘅袁詠儀（靚靚），連環得罪影壇大哥成龍同周星馳，95年同成龍合作拍《霹靂火》，傳成龍打電話叫靚靚補錄兩句對白，但打極靚靚都唔接電話。94年同星爺合作拍《國產凌凌漆》，有傳靚靚大言不慚話同星爺風格唔同，最好以後唔好再合作！日前靚靚接受《蘋果》「閃耀人生女人心」連載專訪，親口否認有得罪星爺：「我邊有咁薑呀，我傻啫，我未咁蠢㗎下話！」
性格率直嘅靚靚好易得罪人，仲要係畀人話得罪兩位影壇巨星，呢個傳聞傳足20幾年，依家靚靚親口解疑團，先講得罪星爺呢單，靚靚呼冤：「你問我，我就真係唔係好記得有冇得罪佢，我邊有咁夠薑呀！我傻啫，我未咁蠢㗎下話，我要澄清我係傻啫，唔係蠢！我一定唔會對有經驗嘅人講啲咁嘅說話，我自己係一個新人。」
咁嗰時同星爺合作，係覺得風格唔同呢？靚靚話：「我直頭…啲人成日講…我完全…冇發生過呢樣嘢，我反而覺得係合作得幾開心喎！」有乜開心呢？靚靚爆料：「佢哋話星爺未試過萬歲嘅，但佢就試過我提出有個美術指導生日，我話：『喂！星爺萬歲啦！』佢真係現兜兜攞咗$2,000出嚟萬歲喎，咁如果大家合作得唔愉快，根本就唔會有呢啲事，有一個美指打扮似男仔，我哋仲一齊將佢變番女仔，即係喺戲外面咁樣玩，應該唔會係不和啩，所以啲人成日話你同星爺點，我真係諗極都諗唔明，究竟係啲乜嘢不和！」
不過，事實真係之後兩人冇再合作，靚靚解釋：「我有聽過呢樣嘢，因為我嗰時要去拍《金枝2》，所以就冇咗一個機會啦，當然我亦都唔會去find out係咪咁樣。」
講完星爺講成龍，去年曾志偉約張智霖同大哥飯局，靚靚知道後主動問志偉，自己可唔可出席，結果斷交22年嘅靚靚同成龍，一見泯恩仇！靚靚坦言：「前排我會去問大哥，我係咪得罪咗佢呢？係因為我都唔知呀，我知我就唔會得罪人啦，我根本就係唔知，所以我先至好想去問大哥，因為啲人同我講過大哥成日話：『提起呢個人（靚靚）佢都嬲啊！』咁我喺另一個角度去睇，我覺得我都40啦，咁我諗大哥都唔細啦，我哋已經叫做行咗人生嘅一啲路，我唔想大哥到咗某個年紀，提起一個人嘅時候仲會嬲，即係喺佛學嗰度睇呢，千祈唔好對人起怨恨心，我唔想佢係咁，我想佢身體健康快快樂樂，如果嗰個人令到你咁嬲，點解你唔去令佢釋懷呢，所以我嗰日特登跑落去，就係問大哥呢樣嘢。」
咁依家有冇人令靚靚有怨恨心？佢坦言：「咁梗係有啦，但我選擇唔會憎一個人，我反而漠視佢，我覺得我仲快樂。我對朋友係100%付出，我唔係要你100%對我，但唔好出賣我，打個譬如就係，如果你嚟同我講佢嘅壞話，我唔理真好假好，我只有兩個反應，我一係就唔出聲，一係就同你撐到底，我係唔會同你一齊去講佢嘅壞話，我個人係咁㗎，如果俾我知道，我嗰個所謂朋友聽到一啲我嘅嘢，佢唔理係真定係假，佢唔去保護我，呢個人冇㗎啦，唔會喺我朋友list度。」
靚靚覺得身為朋友，應該好了解佢嘅人格：「但冇去幫我，仲去踩多一腳，我覺得仲慘過佢呃我錢。」靚靚話曾被兩三個朋友出賣，問到係咪已經冇朋友做？靚靚表示：「因為我老公曾經同我講過，多一個朋友好過多一個小人係你身邊，所以我依家會係…我會假囉對佢，唔好再俾佢插多刀囉。」
(蘋果日報)
