62歲嘅陳美齡熱愛進修，佢相信學無止境，早年曾喺史丹福大學完成教育學博士嘅佢，近年埋首寫作有關教育作品，佢教子有方，三名囝囝金子和平、金子昇平同細仔金子協平喺媽咪悉心栽培下，佢哋都先後考入史丹福大學，仲學有所成，所以陳美齡係好多家長嘅學習榜樣。
陳美齡近年用文字分享教育心得，佢最近孖即將做「老襯」嘅長子金子和平母子檔推出新作《為了孩子的未來 家長不要做的35件事》，內容分享家長唔可以做嘅事，除咗有陳美齡溫馨提示，仲有「用家」囝囝和平回應，母子首次用文字互動。
到底陳美齡嘅教細路心得實戰掂唔掂，佢日前喺灣仔接受《蘋果》專訪，佢面對一位讀K2、4歲小男生Ethan互動，互出IQ題考對方，陳美齡非常有耐性同小朋友溝通，佢哋仲一齊玩摺紙。經過測試，陳美齡唔單止教小朋友有妙法，佢哋仲玩到唔捨得走，所以相信大兒子和平婚後生B，將孫仔或孫女交托畀呢位靚嫲嫲湊都好放心。
陳美齡於新作中講到家長唔可以做有35件事，但如精挑三件最重要事項，佢就話：「首先家長一定唔可以比較，每個細蚊仔都係生命，唔需要同人比較，父母要接受自己細蚊仔。其次，做咗爸爸媽媽，一定要將細蚊仔排第一，唔好話成日事業為重，父母要改變生活思維。第三切記唔可以用暴力，包括說話暴力，咁教法對細蚊仔有害。」
陳美齡講番呢次同長子和平合力出書，當中有乜嘢趣事，佢話：「我先寫自己部份，跟住交畀囝囝睇完，由佢再寫出『用家』感想，初時我有啲保留，因為好似寫review咁，即係好似啲網上用家評價，如果方法上，佢覺得唔好咁點算，但出嚟我睇番囝囝回應，我有啲感動同驚喜，我當年真係為咗佢好咁教佢，原來另有啟發。」
去年陳美齡被指係教育局長熱門人選，結果當然係冇出任，特首林鄭月娥委任咗楊潤雄出任教育局局長，副局長係蔡若蓮，對於兩位司長上任後評價，陳美齡話：「睇唔到有乜嘢轉變同改革，可能計劃中。」陳美齡覺得畢竟就任時間仲短，仲有改進空間。
(蘋果日報)
