37歲嘅台灣女星安以軒今年3月喺微博宣佈同百億身家嘅CEO陳榮煉結婚，之後6月先後喺夏威夷、台北舉行婚禮，婚後一直過住幸福嘅生活！
不過今日台灣傳媒報道，陳榮煉喺未認識安以軒之前，曾經有過一段婚姻兼且仲有一個8歲大嘅囡囡，雖然最後分開，不過陳榮煉對前妻同囡囡仍然照顧有加，除咗每個月友支付近10萬元港幣（約39萬元台幣）生活費之外，亦好積極參與女兒學校嘅活動。
報道仲話向來愛情至上嘅安以軒，亦好接納呢件事，成日鼓勵老公多啲陪伴女兒，甚至佢本身都同小朋友相處得好好，當正係自己親生女咁看待！其後安以軒透過經理人回應呢件事，佢話：「某周刊報導有誤，陳先生沒有過婚姻紀錄，和我是第一次結婚，每個人在感情上或多或少都有一段過往，我們夫妻向來坦誠以對。現在，我很幸福、快樂，以後也不會再回應相關問題，謝謝大家關心。」
(蘋果日報)
坐擁逾340億元身家嘅富豪筍盤李澤楷，自6年前同梁洛施分手後，新任「楷女郎」已變成2015年港姐季軍郭嘉文，而梁洛施亦被爆有新戀情。之前傳過梁洛施每年帶三個囝囝返嚟俾爺爺李嘉誠見，為咗保持良好關係，梁洛施就算有新歡，佢選擇保持低調。
今日有周刊上月底影到梁洛施同一個年約40歲嘅四眼男行圓方睇戲，梁洛施同四眼男未散場，已拖手離場，行去一間餐廳，揀個暗角位坐，二人互相對望，情到濃時，四眼男把玩梁洛施手仔，全程咀足梁洛施隻手三十幾次，梁洛施冇抗拒，仲展露甜笑，二人一杯嘢兩份飲，梁洛施走嗰陣，即戴上口罩，四眼男就肉緊隔罩啜嘴，真係好黐纏。
據報道指梁洛施出外見四眼男前都係夜晚時間，安頓好三個囝囝先出去，仲有兩個保鑣陪同，坐的士出入，今次李澤楷都知梁洛施返咗嚟香港，梁洛施同李澤楷都有聯絡，不時講吓三個囝囝嘅生活近況，梁洛施同三個囝囝現時都係長居加拿大，不過報道聲稱爺爺李嘉誠想接三個孫返嚟香港住，安排佢哋入弘立書院，當中以8歲孫仔李長治最得爺爺歡心。未知呢個安排係唔係因之前有傳李嘉誠計劃明年90歲生日前退休，等可以多啲時間見啲孫呢!?
(蘋果日報)
胡杏兒日前38歲生日，一班「胡說八道」會好友為佢慶祝生日，但未見老公李乘德影蹤。
李乘德終於喺社交網上載同太太慶生照片嘞，相中見到胡杏兒手執鮮花，緊緊依偎住老公，台上面仲有四大個生日蛋糕同一大束鮮花，但兒子Brendan則未有出鏡。
李乘德仲留言祝老婆大人生日快樂，以英文留言表示「開心、健康，繼續做自己。很開心Brendan和我們一起慶祝這個日子。」
胡杏兒仲留言讚老公喺世界上最好嘅老公。胡杏兒亦有喺自己社交網上載同一張相，仲搞笑咁話：「多謝大家的蛋糕，仔仔可能會問媽媽啲奶點解咁甜嘅？」
(on.cc 東網)
歌手楊千嬅演出完音樂會接受訪問，問到為何不叫仔仔Torres上台頂替小朋友角色？千嬅透露Torres發燒：「尋日接佢放學，摸佢個頭發燒，所以佢今日冇返學，不過原本都唔係佢做。」提到小演員叫她滾下台，千嬅說：「其實佢係要讀我首歌嘅歌詞『請你滾，滾出去！』。」提到荷蘭女歌迷母親寫的信，哭崩的千嬅承認很激動，她說：「事前唔知有呢封信。（回信？） 會錄啲片畀佢睇，因為佢做完開腦手術對影像會好啲。（催淚？）直情癲咗同呆咗，每個人都有自己嘅故事，係一種緣份。」
對於音樂會尾段不停喊，千嬅坦言已忍住，她說：「好感慨同感人，每首歌都有廿幾年，老過屋企啲陳皮。」由於李克勤表示有意送仔仔入軍校學獨立，千嬅說：「每個父母教導都唔一樣，唔去評論，我好放手畀個仔，好多時佢係要自己做，從小圈子慢慢練習先，先要識解決問題。」
(東方日報)
張繼聰（阿聰）最近一家四口出外旅遊。
估唔到佢哋去旅遊都不忘做GYM，為咗要保持完美嘅身材，認真勤力呀！
呢日阿聰就喺社交網同網友分享一張佢同太太謝安琪喺GYM room嘅相，唔少網民都大讚謝安琪清減不少。
難怪阿聰亦都留言表示：「去旅行，最緊要有GYM Room，唔係點擺Pose？係咪先？ Btw，成日比人話肥咗，我表示唔解釋。」
另外一張相，仲見到阿聰晒出兩位小朋友嘅相，阿聰仲抱住囡囡在懷中，場面溫馨！
（on.cc 東網）
迪麗熱巴自加盟楊冪工作室後星途一片光明，參演內地劇《三生三世十里桃花》及綜藝節目《奔跑吧兄弟》令其人氣急升。
最近還與成龍合作英皇電影《解憂雜貨店》，劇集方面則有與舊拍檔張彬彬合作《秦時麗人明月心》。
不過近日張彬彬現身內地綜藝節目時，卻踢爆熱巴體重上升。
他謂:「記得之前跟她拍戲，可以很輕鬆把她抱起，但是《跑男》回來後，熱巴體重明顯飆升，抱上幾秒已經令我很吃力，實在抱不動，後來導演就叫替身上，所以大家看到的那段戲就是熱巴替身來的。」
（on.cc 東網）
影帝梁家輝早前與太太及一對孖女Chloe及Nikkie到馬爾代夫享受陽光與海灘，孖女在社交網上載泳衣照晒噴血身材，獲大批網友讚索。日前大孖Chloe打扮密實，與女友人及B女現身中環商場。見她對名店全無興趣，只顧與B女玩樂，十分有愛。
嘟嘴索吻
及後她們一行幾人到超級市場掃貨，Chloe化身保母，全程抱實B女不放手，更母愛氾濫不停逗BB玩樂，期間她向B女嘟嘴索吻，怎料B女突然伸出小手扯Chloe頭髮，她未有發嬲，反而捉實B女手仔錫錫及扮咬B女手仔來阻止。掃完貨後，Chloe將B女交回給女友人，見她依依不捨望實B女，然後齊齊搭𨋢離開。
(東方日報)
歌手楊千嬅於會展舉行音樂會，吸引父母、弟弟、老公丁子高、歌手林欣彤、Yanny@Super Girls、Jessica@Super Girls、蘇麗珊及填詞人林夕捧場，請來王菀之、吳業坤、陳柏宇、鄧小巧、On仔@C AllStar及顏卓靈等人做嘉賓。
音樂會以音樂劇形式演繹，On仔與顏卓靈飾演一對拍拖到拉埋天窗的情侶。後來，台上出現一名抱住公仔的小男孩，千嬅先拖住對方再坐低唱歌給他聽，但小朋友全程表現得悶悶不樂，當對方落台前，千嬅問小朋友：「你係咪有句嘢同我講？」搞笑的小朋友大叫說：「請你滾落去。」惹來全場大笑，連千嬅都忍不住笑。
到音樂會尾聲，工作人員遞上一封信，千嬅一邊讀一邊淚流滿面，信中內容是千嬅的一位荷蘭女歌迷GiGi母親寫的，GiGi母親透露愛女早年做了開腦手術，最後手術失敗昏迷，一個月前GiGi終於甦醒，之後要重新學寫字、講嘢，GiGi第一筆便寫出「楊千嬅」3字，此時，千嬅已哭崩，不能說下去，要深呼吸後才說：「點解綵排時唔畀我睇？祝你早日康復，GiGi。」千嬅最後以《楊千嬅》結束音樂會。
(東方日報)
藝人王浩信到尖東出席聖誕亮燈活動，他以一身厚衣到場，他受訪時解釋謂：「啱啱喺英國拍《兄弟》外景返嚟幾日，返到嚟冇停過繼續開工，所以都有少少感冒。（太太陳自瑤又係唔舒服，因而缺席今日台慶綵排？）佢冇喎，頭先我哋仲一齊做運動。係咪溝通上有問題？如果通知咗佢會到㗎。（驚唔驚再被傳，係想避開本來都有份綵排蔡思貝？）唔關事嘅。」
請假去女兒入學試
王浩信又指將陪同女兒出席第3輪入學試：「我暫時請咗1日假。我哋報咗十幾間學校，而呢間心儀嘅學校就入去到第3輪面試嘞，我為囡囡感到驕傲，不過依家啲學校要求家長寫文去闡述自己對小朋友及學校嘅寄望。自中學後我都未寫過文章，好彩平時睇開劇本，有得學吓文法去表達自己意思。」
聖誕要開工
至於今年聖誕，王浩信相信要在工作中度過：「希望平安夜前後有少少時間可以陪吓屋企人啦。（最難忘嘅聖誕係點？）因為以前囡囡仲細，所以冇乜難忘嘢，但希望嚟緊可以為佢製造更多嘅回憶啦。之前帶佢上船玩，佢好開心，嚟緊相信有多啲機會嘅。」
(東方日報)
郭富城主演嘅電影《破‧局》今晚喺圓方舉行好友場，主角城城當然有現身，佢老婆方媛（Moka）喺老公做訪問期間，靜悄悄同媽媽前後腳入場，不過佢嘅芳蹤逃唔過記者法眼，行蹤曝光後，Moka都有應記者要求停低影相。
城城早排一索得女Chant，咁佢個舊愛熊黛林（Lynn）啱啱宣佈有喜，問城城知唔知？佢話：「如果大家有追蹤我嘅近況，都知道我忙緊拍戲，而我冇乜留意同關注娛樂新聞，對於我嚟講，我哋做娛樂圈呢一行，對於有圈內朋友有好消息，我哋都會祝福。」
好喇，唔講舊愛，咁講新戲啦，城城話多謝導演連奕琦同王千源，因為今次同一啲英國攝影師合作，自己都大開眼界，喺片中要演倒霉警察，係一個黑色幽默嘅故事，有別於自己以往演出嘅角色。近況呢，城城就忙緊拍由翁子江執導嘅電影《全球通緝令》，就同梁朝偉合作，城城話：「第一次同偉仔合作，好欣賞對方，自己去到唔同影展，人哋問我想同邊個合作，我都會話想同發哥同偉仔合作，咁發哥就合作過，今次就到偉仔。」
城城又話：「對手對自己嚟講都有唔同嘅挑戰，偉仔係自己好欣賞嘅演員，又好有魅力，亦都俾到好多衝擊自己，偉仔係一個好開心好認真嘅演員，大家私底下都有傾偈，似啲做運動嘅嘢，大家以為偉仔平時係一個好沉默嘅人，但其實佢都好鍾意傾大家有共同話題嘅嘢。」
(蘋果日報)
