藝人黃心美自2015年與台灣老公Thomas離婚，回復單身後一直寄情工作，直至今年6月與陳安立（Brian）被拍得孖住放狗而傳撻着，但兩人齊齊開腔否認，緋聞疑幻似真。
最近到冰島旅行嘅心美，昨日突然喺社交網上載一張與男士拖手照，疑似宣布有新戀情，雖然唔知心美身旁嘅男士係邊個，但見佢哋咁親暱，心美仲以兩個心心圖案去留言，似乎有好消息喎！
唔少網民都戥心美高興，紛紛留言祝賀佢有新戀情，仲叫對方要好好照顧心美。
另外，亦有網民問心美身旁嘅男士係咪緋聞男友Brian，但翻查Brian嘅社交平台，尋日佢先上載打籃球照，背景似乎身在香港，冇理由今日就喺冰島，除非…除非佢瞬間飛去地球另一邊，又或者擺舊相啦！
(on.cc東網)
被形容為《萬千星輝頒獎典禮》前哨戰的《星和無綫電視大獎2017》，今晚在新加坡舉行。
獲TVB力捧上位的「女神」李佳芯撼贏胡定欣、田蕊妮及宣萱一眾當家花旦，憑劇集《踩過界》的角色「Never」榮登視后寶座，獲頒「我最愛TVB女主角獎」，而「我最愛TVB男主角」則由同劇的王浩信奪得，《踩過界》一劇成大贏家。
同時，張振朗就憑《踩過界》贏得「我最愛TVB男配角獎」。張振朗頒獎時在台上爆喊表示自己每日都用盡心機去想如何演好角色，還問台下觀眾為何聽到他這樣說都不會笑呢? 台下立即給予掌聲支持。
（明報）
食物環境衞生署食物安全中心公布，一個「雅培心美力較大嬰兒配方奶粉2」樣本的煙酸含量與其營養標籤上的標示值不符，中心呼籲業界立即停止出售有關批次的產品。
中心發言人指，中心透過恒常的食物監察計劃，從銅鑼灣謝斐道萬寧Plus抽取上述奶粉樣本進行檢測。化學分析結果顯示，樣本的煙酸含量為每100克含1.3毫克，與其營養標籤上的標示值每100克含3.8毫克不符。發言人續指，已知會有關商戶上述違規事項，有關商戶已按中心指令將受影響批次的產品停售及下架。中心正追查有關產品的分銷情況。
涉事產品資料如下：
產品名稱：雅培心美力較大嬰兒配方奶粉2
原產地：愛爾蘭
製造商：Abbott Ireland
入口商：美國雅培製藥有限公司
淨重：每罐400克
此日期前最佳：2018年3月11日
(on.cc東網)
趙哲妤(Uny)產後收身快，火速復出幕前賺奶錢，不過佢有時間必會親自湊女，日前就佢帶住外傭湊約十個月嘅囡囡「小魚」到灣仔返playgroup，當日3時多，Uny抱住「小魚」放學，肥嘟嘟嘅囡囡已20磅重，真係抱到手痠，但Uny為親近囡囡，絕不假手外傭姐姐。
Uny抱住「小魚」行街濕平，原來重點係去撲奶粉，佢哋行咗幾間藥房都冇，結果入咗屈臣氏，除咗買到嬰兒用濕紙巾同尿片，佢仲撲到兩罐奶粉，Uny即發揮佢天生購物狂本色，掃齊嬰兒用品即閃。
Uny全程抱實囡囡，又會逗佢玩，一時又反轉抱，又錫啖囡囡，「小魚」好奇周圍望，係咁笑，「小魚」係個開心BB，Uny同外傭姐姐買齊嘢，一行三人就向灣仔方向攞車返歸，Uny細心先讓外傭坐後座，遞上囡囡坐定，佢才閂車門，走返去做柴可夫。
特首林鄭月娥日前喺施政報告提出檢討「限奶令」，Uny日前幾經辛苦先為囡囡撲到奶粉，所以佢話希望唔好取消「限奶令」，Uny日前接受電話訪問：「點解要取消？囡囡每兩周飲一罐奶粉，我次次有貨都要買定幾罐，因為佢唔可以轉其他牌子，佢會敏感，希望即使取消『限奶令』，情況唔好差過o依家就好。大陸啲媽咪嚟香港買水貨都係因為佢哋啲奶粉食完個頭會變大，畢竟奶粉係BB主要食糧，都體諒大陸媽咪擔心，希望奶粉供應商可以生產多啲，大陸用家嚟買幾罐自用係冇問題，但唔好掃貨，留番畀真正用家，佢哋掃晒成間藥房存貨，真係好誇張。」
Uny話之前囡囡「小魚」淨係飲奶粉，佢會成箱咁買定，不過囡囡o依家大咗，中午會食粥仔，所以佢o依家每次買定兩、三罐備用就夠。有女萬事足嘅Uny話：「我乜嘢都諗咗囡囡先，即使我再拍唔拍拖都唔重要，排包尾。湊女係辛苦，但亦好開心，我希望政府可以提供多啲資源援助，養育小孩子頭三年係辛苦，我寧願搵少啲，夠食夠用都要親自帶大囡囡，陪佢長大，即使入不敷支，我都要畀最好個女。」
(蘋果日報)
陳冠希（Edison）榮升爸爸之後，每次與寶貝女兒Alaia合照，他一定慈父上身，不再是娛樂圈的壞孩子。
近日秦舒培為時裝品牌行騷。
Edison亦有帶Alaia去捧場。
兩父女在台下欣賞秦舒培表演。
表演後更一家三口合照，畫面非常溫馨！
(明報即時娛樂)
喺法國影壇地位一向好崇高嘅王家衛，佢曾經攞過康城最佳導演獎、法國政府頒授榮譽軍團騎士級勳章、司令勳章，喺今年6月，有法國金球獎之稱嘅第9屆里昂盧米埃爾電影節(Lumière Film Festival)官網宣佈，將會向王家衛頒發有終身成就獎之稱嘅盧米埃爾大獎（Prix Lumières），作為對佢喺創作同藝術風格嘅肯定。
喺當地時間10月20日，王家衛同太太Esther齊齊出席頒獎禮，好友杜可風亦現身支持，今次大會邀請咗著名女星依莎貝拉雅珍妮（Isabelle Adjani）做頒獎嘉賓。
王家衛感謝盧米埃爾兄弟，令佢哋有機會成就自己心中嘅光影夢想，除咗感謝fans同所有合作過嘅人外，王家衛仲話要特別感謝太太同兒子，甚至仲同太太一齊上台，分享呢份喜悅：「為咗唔打擾我，佢好少去片場，希望俾更多嘅空間，等我可以專注地去做我嘅工作。」
王家衛仲話：「喺電影裡面，我創造嘅極具魅力嘅女性角色，每一個有佢嘅影子，因為呢個原因，所以喺我哋自己出品嘅電影裡面，佢嘅名字總係會第一個出現喺屏幕上嘅原因。」跟住王家衛話將呢個獎獻給佢嘅繆斯女神！
喺頒奬禮之後，仲舉咗《墮落天使》特別放映會，全新4K修復嘅《花樣年華》，仲會喺22嘅閉幕典禮成為閉幕影片，有唔少網友留言向王家衛的祝賀，又話好期待全新修復版嘅《花樣年華》。
(蘋果日報)
周杰倫老婆昆凌雖然已經生咗兩個，其實可以疊埋心水做幸福少奶奶湊吓細路，不過佢依然熱愛工作，仲喺荷里活大展拳腳。
除咗同國際男星Orlando Bloom合作，仲有機會伙拍動作巨星Dwayne Johnson拍戲，認真犀利！
而呢日Dwayne Johnson就喺Instagram上載咗張劇照，相中嘅佢被一個人揸槍指住，而「呢一個人」完全睇唔到樣，只係露得個「二八分面」。
不過心水清嘅周董，一睇就知係老婆嚟，於是佢喺Instagram上載咗張Cap圖，中英夾雜留言：「What can i say 只能說 你拿🔫的背影不錯 @hannah_quinlivan（昆凌）but can u tell @therock（狄維莊遜）以後拍照可不可以等你轉身再拍」
網民都紛紛留言嗌「好閃」、「炫妻狂魔」，又讚佢舉動好可愛！
(on.cc 東網)
鍾嘉欣自從去年8月誕下囡囡Kelly後，就以家庭為重，專心湊女。
雖然婚後喺加拿大居住嘅嘉欣暫時就未再有拍劇，不過佢都會間中回港出席活動，等一班粉絲唔使咁記掛住佢。
向來都好鍾意同網友分享生活點滴嘅嘉欣，就喺社交網發文表示近日就有傳聞指佢會退出幕前，不過佢澄清都係不實嘅傳聞。
嘉欣BB並以英文留言表示，雖然有傳聞指佢會退出幕前，不過這並唔係事實，佢從來冇諗過呢個問題，因為佢仍然好熱愛我嘅工作，只不過佢現在會將家庭放喺首位先。
嘉欣仲話佢嘅屋企人係非常支持佢嘅工作，亦指對佢嚟講退休絕對唔係佢嘅目標，而係最緊要開心同幸福！
聽到嘉欣咁講，相信一班粉絲都可以放心晒喇！
(on.cc 東網)
安志杰（Andy）同名模Jessica C.（JC）日前於夏威夷舉行婚禮。
佢嘅好兄弟伍允龍仲特登飛到夏威夷，同台灣歌手吳建豪擔任兄弟團！
雖然佢就話冇流下男兒淚，但望住「老死」娶老婆做老襯，仲生埋BB成家立室，都咪話唔感動呀！
當日有上台講祝福詞嘅佢就喺微博晒出多張婚禮花絮照。
見佢好細心幫Andy整理衣領又同對方握手，真係一切盡在不言中！
伍允龍：「A big big congratulations to my brother Andy and his lovely bride Jessica on their beautiful wedding celebration! love you guys! 恭喜曬恭喜曬！愛你們！」
網民除咗祝福一對新人，仲忍唔住向佢催婚，叫佢：「你也得抓緊了！」唔知幾時到伍允龍呢？
(on.cc 東網)
陳美齡日前接受電台訪問，講到她之前拍攝ViuTV節目《熟女在野》。
她謂：「帶我去睇香港文化，我去咗荔枝窩客家村，教我煮飯同認識佢哋歷史，我都喺嗰到瞓咗一晚，雖然冇冷氣，但有蚊帳，同埋有3個年輕俊男同我一齊體驗，可以聽吓年青人嘅心事同睇法。」
而講到她成立有益圖書俱樂部，她表示：「閱讀對成長好重要，從小開始訓練，由0至18歲，我哋喺每一歲都會向家長推薦5本有益嘅中英圖書，等父母唔使再考慮要畀小朋友睇咩書。」
她亦謂小時候很喜歡睇書，會到圖書館借書或到報紙檔租書，覺得睇書可以訓練小朋友的想像力。
她亦推介《The Giving Tree》一書給小朋友睇，不同年齡睇都會有不同體會。
（on.cc 東網）
