衛蘭（Janice）將於明年1月12及13日第四次假紅館舉行演唱會。
Janice暫時未定會否邀妹妹衛詩擔任演唱會嘉賓，不過舞台的設計圖已定，布景全部是出自Janice之前的畫作再伸展出來，好有童話感覺。
Janice多年來被取笑身形「肥過部電單車」，為以最Fit狀態示人，連月來積極收身、練氣。
早前更被拍得在超市齋食生果。
據知，Janice為減磅寧願長時間捱餓減食，可是未見成效，而其營養師指Janice的減肥方法全錯，皆因脂肪會因長期肚餓而作出調節，身體反而更容易吸收食物營養而令脂肪增加。
營養師提議她每日要食三餐且要飽肚。
Janice得知毋須捱餓很開心，但亦不敢太放肆，奉行少食多餐，每日以三文魚、蔬果及澱粉質為主。
(on.cc 東網)
陳奕迅（Eason）為咗宣傳新碟，今日起一連兩晚喺旺角麥花臣體育館開騷谷新歌。喺唱完幾首新碟作品後又唱咗《超人的主題曲》及《喜歡一個人》等幾首廣東歌，全場氣氛熱烈。
Eason心情都靚豬，聲線狀態又好，佢喺唱完一輪廣東歌後話：「原本唔想講咁多，但唱唱吓又想講，今日揀啲歌都係好少唱，我隨時都可以唱首《K歌之王》，或者唔好咁舊，隨時唱《無條件》都得，係隨時都得。」
但好快Eason就話今日唔可以隨心所欲咁唱：「話晒都係大碟宣傳，難得唱晒全隻碟嘅歌，怕冇機會。」然後，Eason要tag自己跟住唱嗰首歌，佢撰擇咗一個看似冇特別，但識嘅就發現好冧豬嘅tag法：「以下呢首歌都係好好嘅，就似我太太咁，《人生馬拉松》。」嘩！唔知台下嘅徐濠縈有冇被冧暈呢？
Eason唱多兩首歌後，就問現場觀眾：「細場係咪聽得楚啲，係咪正先？你哋都知㗎啦，年紀大咗越來越多嘢講，都係唱多啲歌，唔好做咁多訪問好啲，一陣又被人話。（台下觀眾問邊個…）大把人，唔講得笑冇幽默感，識笑嘅唔會留comment，稍為有涵養嘅都係笑完就算，費事寫嘢。」
(蘋果日報)
劉明軒上月16日剛40歲生日，不時都在喺網上update近況嘅佢，日前仲去咗灣仔利東街喺巨型月亮裝置自拍，不過今日佢忽然喺facebook貼咗幾張相，包括一張瞓喺醫院病床嘅素顏照，仲留言表示切除咗子宮肌瘤：「切除了十數個像太陽行星般的fibroids(子宮肌瘤)，雖然是微創，但頭兩天的痛楚比想像中大，比想像中更不適，護士們都告訴我，這其實是大手術呢！What an experience!!!感謝醫生及護士們的悉心照料，其實當醫生護士很偉大！現在總算一切平安。」
有周刊聯絡劉明軒，佢以訊息回覆：「多謝關心，早幾日入院做咗個微創手術，割除啲纖維瘤，因為最大嗰個都有大約9cm，所以都要做手術。現在正在休息及康復當中。」劉明軒曾於12年閃嫁王傲山，可惜婚姻維持1年便告終，今年6月被傳媒影到同57歲人夫、無綫非執董盧永仁多次短聚，其後盧永仁在facebook貼文，指二人只是生意夥伴，但未有解釋車廂親蜜原因。
(蘋果日報)
娛樂圈有唔少人都被指「撞樣」，首先有陳法拉前夫兼「Neway大少」薛世恒同袁偉豪。
薛世恒更表示過：「試過畀Ben嘅朋友或合作夥伴認錯。」仲有小朋友認錯佢係袁偉豪，話要同佢影相。
另外，蔡思貝更一直被同達哥撞樣。
其實娛樂圈仲有一對好似樣嘅「兄弟」，就係王浩信同楊明。
日前，王浩信出席無綫新劇《兄弟》拜神儀式。訪問時，王浩信表示劇集講述他與楊明、伍允龍的兄弟情，更笑指入行初期不少人覺得他與楊明撞樣。
「依家睇Playback都覺得係兄弟，個樣都接近八成。（你似佢定佢似你？）互相都似，唔知係咪失散兄弟？佢大我少少，但佢個樣細我少少。（你Keep得唔好？）冇辦法啦，多嘢拍係殘啲！」
王浩信經常同女拍檔傳緋聞，而今次就與文青女神江嘉敏多對手戲，問會否擔心跟對方傳緋聞：「唔怕，大家都係想做好個戲，希望各位高抬貴手。」又大讚對方喊功了得，有一場戲勁喊三個鐘，驚為天人。
提到他與眾女角零親密場面，問老婆陳自瑤會否因此而非常放心，他謂：「佢每次都好放心，係唔知點解會有古怪報道，所以冇咩特別避忌，做演員都係做好作品為大前題。」
(on.cc 東網)
下個月就33歲嘅周柏豪，喺舊年11月唔聲唔聲同拍拖超過10年嘅女友Stephanie秘密喺布吉結婚，做咗人夫嘅周柏豪，婚後依然低調，柏豪曾經話過：「我一直想好好保護我的家人，不被我的世界而影響，對，她是周太，是最好的，我會繼續好好的保護她。」
喺今年5月，周柏豪接受周刊專訪曾經講過，未有為計劃為呢個二人團隊增添成員，佢話呢個時間同屋企人有共識，想放多啲時間工作，為自己打好一個好啲嘅基礎，雖然未有特別計劃，但係佢哋都好鍾意小朋友。
之不過有啲嘢如果係命中注定，點走都走唔甩，日前有《蘋果》讀者張小姐，佢透過《蘋果》嘅「爆相爆片」捕獲人夫周柏豪同埋老婆Stephanie，仲有一班同事喺觀塘嘅麗東酒店食lunch，本來兩公婆食lunch真係冇乜出奇，但係讀者話見到周太肚凸凸疑似有喜，胃口仲好好咁話。讀者張小姐話：「嗰日大約下晝2點半左右見到佢哋，食到差不多4點先埋單走人，我見佢太太一邊食嘢，一邊同柏豪傾偈，反而柏豪就冇乜食嘢，多數係聽老婆講嘢。可能因為嗰陣係lunch時間，所以有啲避忌，走嗰陣都係前後腳咁傾計，唔算好親密。」佢仲話：「雖然嗰日周太著住件鬆身恤衫，但係起身嗰陣見到佢肚凸凸，睇落最少有咗4、5個月。」
對於老婆被指疑似大肚，柏豪接受周刊電話訪問否認做老竇：「唔係喇，可能佢着啲衫大大件件，o依家潮流係興所有嘢都大件嘛。」問到老婆係咪幸福肥？佢笑晒：「幸福就梗啦，但肥咗就唔係好覺，所以冇咁嘅事，多謝大家關心。」有冇計劃幾時造人？柏豪表示：「做好自己嘢再諗，呢啲真係要睇緣份。」柏豪坦言自己冇乜時間喺香港，每個月都要返大陸做一至兩場巡唱，o依家又拍緊電視劇《再創世紀》：「真係想爭取多啲時間做好工作先，令到日後所有條件、環境都更加紥實先進行呢樣嘢。」係咪要儲吓粉奶錢先？佢話：「係喇！奶粉錢又儲，乜嘢都要儲，唔心急生BB，反而心急追《使徒行者2》，哈哈！」
(蘋果日報)
曾經喺神劇《天與地》飾演「少年版陳豪」嘅楊潮凱，喺13年同拍拖11年嘅初戀女友結婚，32歲楊潮凱今年喺事業上露出曙光，除咗拍電影之外，佢仲喺網劇擔正做男主角，不過點都唔夠呢件事咁高興！
楊潮凱今日喺ig宣佈太太有咗bb，佢貼咗張超聲波嘅相片兼留言話：「各位親愛的朋友們，今天我有一個開心的消息宣佈 — 「我做爸爸喇！」感謝太太，往後的日子我地有排學喇！我會好好照顧你同BB。感謝神！賜予我們多一位家庭成員，同時亦要多謝大家的祝福。#我要努力賺錢喇!」唔少圈中好友包括張曦雯同陳國峰都有留言恭喜！
(蘋果日報)
即將榮升爸爸的藝人李雨陽今於微博貼了一張抱着大肚太太鄭嘉詠的溫馨照片。
兩人一起望住太太隆起的腹部，期盼Baby出世，非常Sweet！
原來李雨陽為了紀錄太太懷孕的美好時光，特別請來中學同學幫手拍照，這輯「一家三口」的生活照充滿愛。
「第一胎嘛，亦可能係唯一一胎，所以想留個紀念畀寶寶，同埋我太太怕生完減唔番，希望都有個證明，原來佢曾經瘦過。」
太太現懷孕逾七個月，已知是兒子。
產期愈來愈近，李雨陽笑言：「依家心情只係諗住母子平安，寶寶健康，同努力搵奶粉錢，除此之外，真係冇其他，信念未試過咁集中呢！」
(on.cc 東網)
英國皇室前御用廚師麥格雷迪（Darren McGrady），最近向一本雜誌大爆包括英女王伊利沙伯二世在內的皇室成員，私底下的用餐習慣及喜好；曾在1982到1993年服務皇室的他更指，當皇室成員在蘇格蘭的巴爾莫勒爾堡度假時，會比在白金漢宮時更見休閒和自在，不過許多規定仍需要遵守。
1.王太后愛遲到
因為每次晚餐時，王太后都是最後一個才到，因此工作人員皆會騙她說晚餐時間是8時15分，即比正式用餐時間8時半說早了15分鐘。
2.吃飯也要盛裝
吃晚餐時，皇室成員都要穿上正式禮服，桌子上甚至會放滿高級瓷器。用餐結束後，也會有風笛手在桌邊演奏。
3.菲臘親王討厭有機食物
麥格雷迪說，有次菲臘親王問起一個禮籃裝的是什麼，當他知道是王儲查理斯所帶來的有機食物時，隨即表現出嗤之以鼻的神態。
4.女王不抗拒塑膠盒
縱然英女王常以高級器皿用餐，但麥格雷迪就曾目睹她用塑膠保鮮盒吃水果的一面，十分「貼地」。
5.威廉和哈利小時也愛開心樂園餐
麥格雷迪憶述有一次，戴妃跟他說：「不用做午餐了，我會帶兩位孩子外出，我們會去麥當勞。」麥格雷迪說兩位小王子看來很喜歡開心樂園餐的玩具；他們也很喜吃薄餅、薯皮等美式食物。
(東方日報)
英國劍橋公爵夫人凱特上月宣布陀第3胎後，一直未有公開露面。她日前與丈夫威廉王子及哈利王子，主持在白金漢宮舉行的世界心理健康日的活動。只見凱瑟琳穿上粉藍色喱士裙，腹部微隆，精神尚算不俗。據悉，她仍出現妊娠劇吐症狀，但已逐步好轉。
凱瑟琳當日會見處理心理健康的員工及慈善組織等代表，期間笑容滿臉。有嘉賓大讚懷孕的凱瑟琳是鬥士，感謝她現身活動。凱瑟琳對上一次公開露面已是8月30日，有6周未有履行皇室職務，貪靚的她今次露面仍舊穿上高跟鞋。有傳媒推測，她穿上粉藍色裙子，或意味她腹中是名男嬰。
(東方日報)
內地一名小學女教師近日在網上分享其班級學生在十一長假的作文功課，題為《我的XX》。貼文所見，大多數學生寫的都是《我的媽媽》，但內容卻千奇百趣，甚至大爆媽媽的秘密，包括「媽媽的雙眼皮是去店裏做的」，令人忍俊不禁。
部分學生「一如所料」地都是借作文來頌讚媽媽的偉大，「她每天在忙忙碌碌中度過，可她從來沒有怨言。」。亦有人趁機抱怨媽媽，「每次都為了買衣服而晚接我，做甚麼事情全部就是買衣服排第一。」
更爆笑的是，有些學生竟在作文中大爆媽媽秘密，「「她的肚子像個小皮球，爸爸給媽媽起了一個可愛的外號『小肥豬』」、「不管是早上還是晚上，媽媽都會花一個小時來弄自己的臉。」、「媽媽的雙眼皮是去店裏做的」。
貼文引起網民熱議，有網民笑言「真是養了群好孩子，老娘的秘密全國人民都知道了。」、「被寶寶賣得一乾二淨」、「這孩子看的太透徹了，每句話都在揭媽媽短。」
(東方日報)
