去年Lynn接受人工受孕，上月剖腹誕下5磅重孖女，護妻備至的郭可頌安排星級婦產科醫生接生，豪花20萬住院費！雖然家中有陪月及母親幫手照顧孖女，但Lynn事事親力親為，繼日前上載一張腳腫照後，最近雙手又因湊孖女用錯力，患上「媽媽手」。

昨午3時半，未坐完月的Lynn在母親陪同下步出北角半山寓所，見她由頭包到落腳，戴齊帽和頸巾在街上截的士。剛生完不久的Lynn穿貼身牛仔褲，手腳依然纖幼，體形與未生時分別不大，但見她雙手戴有黑色護腕，連截的士都要就住力，其後與母親搭車前往灣仔。

落車後，兩母女步往該處一幢診所林立的商廈，手腕受傷的Lynn似乎痛到連硬幣都拿不穩，跌了幾個散銀落地，她彎身拾回後就搭𨋢上樓求診。

逗留1小時多後，睇完醫生的Lynn雙手紮住厚厚的白色繃帶落樓，期間停步打電話，相信是致電老公等接送。

未幾，郭可頌即駕着白色房車抵達，Lynn亦識做地不用老公落車，雖然手腕有傷，但仍不忘為母親開車門。記者上前問她是否不習慣抱B，身為新手媽媽的她坦言：「係呀！」再問雙手可有大礙？她揈一揈手說：「媽媽手！」想到可能有一段時間不能抱孖女，她即扁晒嘴，幸而有體貼的老公呵番，火速載她回家休息，照顧周到。

(on.cc)

童星出身的黃美棋小時候已經拍過不少無綫劇集，演出經驗可謂相當豐富，包括現時深夜播出的《刑事偵緝檔案II》。佢仲喺社交網站PO咗同「救命恩人」嘅合照，話同佢都算有緣分，但美棋未有解釋點解會與他重遇，話要留待下回分解。。。

在《刑》劇中飾演「棠棠」的美棋於社交網站上載與「張Sir」陶大宇的合照，留言話：「當棠棠再遇張Sir？不過同大宇哥都算有緣分…佢仲救過『棠棠』一命㗎！」

但美棋未有解釋點解會與「救命恩人」重遇，話要留待下回分解。

(on.cc東網)

鍾欣潼（阿嬌）今日喺金鐘為英國品牌BORA AKSU活動擔任嘉賓，大會為阿嬌送上兩幅肖像。

提到佢本月25日將到美國舉行婚前派對，問佢籌備成點？阿嬌誤會記者問佢婚禮搞成點，即強調唔係結婚：「我個人去參與就得，唔使搞咁多嘢。其實我都唔知叫咩派對，總之係朋友聚會。」咁派對上會唔會有狂野男舞蹈員表演先？阿嬌自嘲會怕醜：「我唔係玩得好癲，我玩唔起，想像唔到個畫面，有朋友提議過，不過我覺得好尷尬，我未見過世面。」

阿嬌仲透露28號係未婚夫賴弘國生日，所以未婚夫都會同行慶祝，又笑指會安排火辣女舞蹈員作賀禮：「我唔會送自己囉，我幫佢call定dancer，一定要靚，一定要好身材。」如果到時辣妹埋未婚夫身呢？阿嬌話：「我接受唔到。」雖然阿嬌講笑唔會送生日禮物畀未婚夫，不過佢自爆未婚夫喜歡十多年嘅舊款金手錶：「係全新，但係舊款，不過我覺得唔抵，等我諗下先啦。」至於婚紗揀左未？佢就話自己唔心急：「去美國會影（婚紗相），不過未揀裙。各式各樣都試下啦，借架啫。」

（apple daily）

一直愛得甜蜜，交往兩年四個月之後，在今年三月中兩人突然宣佈分手，令一班粉絲錯愕之餘，都替雙方感到非常可惜。根據媒體報導，指兩人因彼此工作壓力而逐漸走向分手，不過兩人依然是好友關係，會繼續互相支持。

Gigi Hadid 在社交網的分手聲明

Zayn Malik 在社交網的分手聲明

日前，有媒體影到Gigi和Zayn漫步紐約街頭，Zayn以全新造型現身，剃了光頭的他在頭上紋身，個性十足；Gigi則以一件深色西裝外套襯牛仔褲簡單出行。

兩人看上去心情不錯，一路有說有笑，Gigi不時手挽Zayn，真的是甜到漏呀！相中見到Zayn將Gigi「逼」到墻面，低聲細語，而Gigi就低頭甜笑，兩人還當街親吻，簡直羨煞旁人。期間Gigi和Zayn見到路邊的物價可歸的老人時，還給予錢和類似購物卡的卡片，認真是人靚心善，非常有愛心。

兩人見到街邊的露宿者便獻上自己的一份愛心(IG圖片)

Gigi Hadid 與 Zayn Malik

（綜合報導 / hk01）

無綫「視后」唐詩詠在太古城出席工銀亞洲推出的全新「ICBC | LINE FRIENDS 信用卡 」宣傳活動，今日度過37歲生日的她表示生日最開心就是出席活動工作，而今晚會與家人食飯慶祝。問到可有男士約會？詩詠笑說：「冇，有啲識咗好耐嘅朋友。（生日願望搵個男友？）唔會許呢啲願望，我知道佢喺好遠慢慢行緊過嚟，最緊要啱timing，等佢慢慢行過嚟啦。」

認為閃婚冇問題

詩詠直言不介意拍拖一年，甚至數月就閃婚，認為這年代閃婚沒有太大問題。講到37歲的詩詠與四字頭愈來愈近，可會考慮雪藏卵子留待日後生BB？她笑說：「可以詳細了解吓，近幾年身邊朋友都有講，當係送畀自己嘅禮物。」

洪永城冇送祝福

詩詠最近再與前男友洪永城傳復合，問對方可有約她慶祝生日？詩詠表示：「冇呀，同黃翠如成班就約緊，佢應該喺個group裏面嘅，我唔知呀。（短訊祝賀？）都冇喎，你哋幫我鬧佢啦，哈哈。」

Timing好重要

詩詠對於另一舊愛崔建邦再有新歡表示戥對方開心，希望他能與女方成家立室。問到可希望組織家庭？詩詠說：「願望都想有個family，每個女仔都希望有另一半。（想有小朋友？）我冇所謂，兩個人都可以，有人喺身邊陪住就得。（心急？）唔會，年齡係數字，我哋做呢行遲結婚唔係大問題，要搵到個好啱timing先。」

(on.cc東網)